《绿色短评》

 | | | 转寄

郭台铭真正犹未转大人！

作者 李南衡, ChoânTâijī/全台字 by Chng Hūi-phêng 2023.09.10


Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　　 Koeh Tâibêng chinchiàⁿ iáubōe tńg tōalâng!

Pehgoe̍h jīpeh, Hônghái chi̍pthoân chhòngpānjîn Koeh Tâibêng soanpò͘ beh tâuji̍p 2024 chóngthóng tōasoán, jîchhiáⁿ chèngsek thiánkhui liânsú, i kiôngtiāu kóng, i ê chhamsoán sī ūitio̍h chhioksêng chāṳá tīniâⁿ ê chéngha̍p,"chāṳá nā bô chéngha̍p, hō͘ Lōa Chhengtek siuⁿkòe hóchia̍h khùn". Koeh Tâibêng mā kóng tōasiaⁿ ōe, i beh hō͘ Tâioân tī 20 nî lāi chhiauoa̍t Sinkapho, chiâⁿchoh Achiu jînkun GDP siōngkoân・ê" Achiu tēit hógia̍h".

　　 Koeh Tâibêng soanpò͘ beh chhamsoán chóngthóng, bô lâng kámkak ìgōa. Hō͘ lâng kámkak ìgōa・ê sī, Koeh Tâibêng sī ánchóaⁿ kàu taⁿ iáu bōe tńg tōalâng? lán ná ē ánni kóng.

　　 Pehgoe̍h jīsaⁿ, Hônghái chi̍pthoân chhòngpānjîn Koeh Tâibêng chhutse̍k " chúliû bînì tōa liânbêng" Κimmn̂g tiûⁿ, tìsû ê sî soanpò͘, i beh tâuji̍p 2,000 bān bíkim sêngli̍p "Κimmn̂g hôpêng chhiònggī kikimhōe", chhuitōng chhòngsiat "nn̄g hōaⁿ hôpêng hia̍psiong pānkongsek", í bînkan li̍ptiûⁿ chhuitōng nn̄g hōaⁿ í hôpêng ūi bo̍ktek ê hōetâm, íki̍p bô͘hóng bīlâi chhuitōng nn̄g hōaⁿ hôpêng hia̍psiong.

Tùi chittiám, ū tóngchèng jînsū piáusī, Koeh Tâibêng ūkàu thianchin, kah Tiongkok Kiōngsántóng tâm hôpêng hia̍psiong, kanta ē í pikio̍k siu tiûⁿ. Lán lóng chaiiáⁿ,"thianchin" ê ìsù sī kóng chi̍tê lâng kòsèng sûnchin chūjiân, bô higûi, ásī kóng chi̍tê lâng thâunáu kántan, khah chē sī kóng sèhàn gíná, kóng Koeh Tâibêng káná gíná.

1951 nî gō͘goe̍h jīsaⁿ, Tiongkok kiôngpek Sechōng tī Pakkiaⁿ chhiamtēng 《 Tiongiong jînbîn chènghú kah Sechōng tēhng chènghú koanû hôpêng káihòng Sechōng pānhoat ê hia̍pgī 》（ kánchheng 《 cha̍pchhit tiâu hia̍pgī 》）, póchèng Sechōng la̍kcha̍p nî bē piàn. Tānsī ōaⁿ・lâi ・ê khiok sī Tiongkok tī 1959, 1989, 2008 saⁿ piàn hoehchhiⁿ tìnap Sechōng, kîtiong 1989 hit piàn sī iû tongsî tamjīm Τiongkiōng Sechōng tóngúi sukì ê chêng Tiongkok kokka chúse̍k Ô͘ Gímtô hālēng tìnap ê. Chhiamtēng hôpêng hia̍pgī hit tongsî Koeh Tâibêng chiah tútú chhutsì chhit kò gōa goe̍h, tōahàn liáuāu koh bô àitha̍k le̍ksú, chin ū khólêng m̄chai chit tōaⁿ le̍ksú, m̄chai iáⁿ Tiongkok Kiōngsántóng ê ōe bē sìn tit.

　　 Lán kóng chi̍ttōaⁿ Koeh Tâibêng tōahàn liáuāu ē hiáu khòaⁿ pòchóa khòaⁿ tiānsī hitchūn ê tāichì, i engkai chiok chhengchhó. 1984 nî cha̍pjīgoe̍h cha̍pkáu, iû Tiongkok Kokbūīⁿ chónglí Tiō Chíiông kah Engkok siúsiòng 玛格丽特・柴契尔 chokûi nn̄g kok chènghú siúléng tī Pakkiaⁿ chhiamtēng 《 TiongEng liânha̍p sengbêng 》, lia̍tchhut 1997 nî chhitgoe̍h chheit Hiangkáng kuihêng Tiongkok liáuāu, Tionghôa Jînbîn Kiōnghôkok tùi Hiangkáng ê kipún hongchim, tī "itkoklióngchè" ê goânchek hē, Tionghôa Jînbîn Kiōnghôkok chènghú ē khakpó i siāhōe chúgī chètō͘ bē tī Hiangkáng te̍kpia̍t hêngchèngkhu si̍thêng, Hiangkáng púnsin ê chupún chúgī chètō͘ kah sengoa̍h hongsek îchhî "gō͘cha̍p nî putpiàn", póchiòng jînsin, giânlūn, chhutpán, chi̍phōe, kiatsiā, líhêng, chhiansóa, thongsìn, pākang, soánte̍k chitgia̍p kah ha̍ksu̍t giánkiù íki̍p chongkàu sìngióng téng kok hāng khoânlī kah chūiû. Chhiáⁿ Koeh Tâibêng kóng liôngsim ōe, 1997 nî chhitgoe̍h chheit kàu taⁿ jīla̍k nî, Hiangkáng ū piàn bô? Tiongkok Kiōngsántóng káⁿ ū chiàu ho͘ chiàu kiâⁿ?

　　 Lán kóng nn̄g tōaⁿ le̍ksú, tio̍h sī beh thêchhéⁿ Koeh Tâibêng tángsūtiúⁿ, Tiongkok Kiōngsántóng ê ōe bē sìn tit. Hibāng Koeh tángsūtiúⁿ chá chi̍t ji̍t chhengchhéⁿ・khílâi, mài koh thianchin. Chinchiàⁿ ētàng tńg tōalâng. 　(230901)

Chù, 玛格丽特・柴契尔　　 chhiáⁿ liām Hôagí



Pe̍h-ōe-jī-pán/白话字版


《 Le̍k-sek toán-phêng 》　　 Lí Lâm-hêng

　　 Koeh Tâi-bêng chin-chiàⁿ iáu-bōe tńg tōa-lâng!

Peh-goe̍h jī-peh, Hông-hái chi̍p-thoân chhòng-pān-jîn Koeh Tâi-bêng soan-pò͘ beh tâu-ji̍p 2024 chóng-thóng tōa-soán, jî-chhiáⁿ chèng-sek thián-khui liân-sú, i kiông-tiāu kóng, i ê chham-soán sī ūi-tio̍h chhiok-sêng chāi-iá tīn-iâⁿ ê chéng-ha̍p,"chāi-iá nā bô chéng-ha̍p, hō͘ Lōa Chheng-tek siuⁿ-kòe hó-chia̍h khùn". Koeh Tâi-bêng mā kóng tōa-siaⁿ ōe, i beh hō͘ Tâi-oân tī 20 nî lāi chhiau-oa̍t Sin-ka-pho, chiâⁿ-choh A-chiu jîn-kun GDP siōng-koân-・ê" A-chiu tē-it hó-gia̍h".

　　 Koeh Tâi-bêng soan-pò͘ beh chham-soán chóng-thóng, bô lâng kám-kak ì-gōa. Hō͘ lâng kám-kak ì-gōa-・ê sī, Koeh Tâi-bêng sī án-chóaⁿ kàu taⁿ iáu bōe tńg tōa-lâng? lán ná ē án-ni kóng.

　　 Peh-goe̍h jī-saⁿ, Hông-hái chi̍p-thoân chhòng-pān-jîn Koeh Tâi-bêng chhut-se̍k " chú-liû bîn-ì tōa liân-bêng" Κim-mn̂g tiûⁿ, tì-sû ê sî soan-pò͘, i beh tâu-ji̍p 2,000 bān bí-kim sêng-li̍p "Κim-mn̂g hô-pêng chhiòng-gī ki-kim-hōe", chhui-tōng chhòng-siat "nn̄g hōaⁿ hô-pêng hia̍p-siong pān-kong-sek", í bîn-kan li̍p-tiûⁿ chhui-tōng nn̄g hōaⁿ í hô-pêng ūi bo̍k-tek ê hōe-tâm, í-ki̍p bô͘-hóng bī-lâi chhui-tōng nn̄g hōaⁿ hô-pêng hia̍p-siong.

Tùi chit-tiám, ū tóng-chèng jîn-sū piáu-sī, Koeh Tâi-bêng ū-kàu thian-chin, kah Tiong-kok Kiōng-sán-tóng tâm hô-pêng hia̍p-siong, kan-ta ē í pi-kio̍k siu tiûⁿ. Lán lóng chai-iáⁿ,"thian-chin" ê ì-sù sī kóng chi̍t-ê lâng kò-sèng sûn-chin chū-jiân, bô hi-gûi, á-sī kóng chi̍t-ê lâng thâu-náu kán-tan, khah chē sī kóng sè-hàn gín-á, kóng Koeh Tâi-bêng ká-ná gín-á.

1951 nî gō͘-goe̍h jī-saⁿ, Tiong-kok kiông-pek Se-chōng tī Pak-kiaⁿ chhiam-tēng 《 Tiong-iong jîn-bîn chèng-hú kah Se-chōng tē-hng chèng-hú koan-û hô-pêng kái-hòng Se-chōng pān-hoat ê hia̍p-gī 》（ kán-chheng 《 cha̍p-chhit tiâu hia̍p-gī 》）, pó-chèng Se-chōng la̍k-cha̍p nî bē piàn. Tān-sī ōaⁿ-・lâi -・ê khiok sī Tiong-kok tī 1959, 1989, 2008 saⁿ piàn hoeh-chhiⁿ tìn-ap Se-chōng, kî-tiong 1989 hit piàn sī iû tong-sî tam-jīm Τiong-kiōng Se-chōng tóng-úi su-kì ê chêng Tiong-kok kok-ka chú-se̍k Ô͘ Gím-tô hā-lēng tìn-ap ê. Chhiam-tēng hô-pêng hia̍p-gī hit tong-sî Koeh Tâi-bêng chiah tú-tú chhut-sì chhit kò gōa goe̍h, tōa-hàn liáu-āu koh bô ài-tha̍k le̍k-sú, chin ū khó-lêng m̄-chai chit tōaⁿ le̍k-sú, m̄-chai iáⁿ Tiong-kok Kiōng-sán-tóng ê ōe bē sìn tit.

　　 Lán kóng chi̍t-tōaⁿ Koeh Tâi-bêng tōa-hàn liáu-āu ē hiáu khòaⁿ pò-chóa khòaⁿ tiān-sī hit-chūn ê tāi-chì, i eng-kai chiok chheng-chhó. 1984 nî cha̍p-jī-goe̍h cha̍p-káu, iû Tiong-kok Kok-bū-īⁿ chóng-lí Tiō Chí-iông kah Eng-kok siú-siòng 玛格丽特・柴契尔 chok-ûi nn̄g kok chèng-hú siú-léng tī Pak-kiaⁿ chhiam-tēng 《 Tiong-Eng liân-ha̍p seng-bêng 》, lia̍t-chhut 1997 nî chhit-goe̍h chhe-it Hiang-káng kui-hêng Tiong-kok liáu-āu, Tiong-hôa Jîn-bîn Kiōng-hô-kok tùi Hiang-káng ê ki-pún hong-chim, tī "it-kok-lióng-chè" ê goân-chek hē, Tiong-hôa Jîn-bîn Kiōng-hô-kok chèng-hú ē khak-pó i siā-hōe chú-gī chè-tō͘ bē tī Hiang-káng te̍k-pia̍t hêng-chèng-khu si̍t-hêng, Hiang-káng pún-sin ê chu-pún chú-gī chè-tō͘ kah seng-oa̍h hong-sek î-chhî "gō͘-cha̍p nî put-piàn", pó-chiòng jîn-sin, giân-lūn, chhut-pán, chi̍p-hōe, kiat-siā, lí-hêng, chhian-sóa, thong-sìn, pā-kang, soán-te̍k chit-gia̍p kah ha̍k-su̍t gián-kiù í-ki̍p chong-kàu sìn-gióng téng kok hāng khoân-lī kah chū-iû. Chhiáⁿ Koeh Tâi-bêng kóng liông-sim ōe, 1997 nî chhit-goe̍h chhe-it kàu taⁿ jī-la̍k nî, Hiang-káng ū piàn bô? Tiong-kok Kiōng-sán-tóng káⁿ ū chiàu ho͘ chiàu kiâⁿ?

　　 Lán kóng nn̄g tōaⁿ le̍k-sú, tio̍h sī beh thê-chhéⁿ Koeh Tâi-bêng táng-sū-tiúⁿ, Tiong-kok Kiōng-sán-tóng ê ōe bē sìn tit. Hi-bāng Koeh táng-sū-tiúⁿ chá chi̍t ji̍t chheng-chhéⁿ-・khí-lâi, mài koh thian-chin. Chin-chiàⁿ ē-tàng tńg tōa-lâng. 　(230901)

Chù, 玛格丽特・柴契尔　　 chhiáⁿ liām Hôa-gí




八月二八，鸿海集团创办人郭台铭宣布beh投入2024总统大选，而且正式展开连署，伊强调讲，伊ê参选是为tio̍h促成在野阵营ê整合，「在野若无整合，hō͘赖清德siuⁿ过好食困」。郭台铭mā讲大声话，伊beh hō͘台湾tī 20年内超越新加坡，成作亚洲人均GDP上koânê「亚洲第一好额」。

　　郭台铭宣布beh参选总统，无人感觉意外。Hō͘人感觉意外ê是：郭台铭是按怎到taⁿ犹未转大人？咱náē án-ni讲。

　　八月二三，鸿海集团创办人郭台铭出席「主流民意大联盟」金门场，致词ê时宣布，伊beh投入2,000万美金成立「金门和平倡议基金会」，推动创设「两岸和平协商办公室」，以民间立场推动两岸以和平为目的ê会谈，以及模仿未来推动两岸和平协商。

对chit点，有党政人士表示，郭台铭有够天真，kah中国共产党谈和平协商，kan-taē以悲剧收场。咱lóng知影，「天真」ê意思是讲一个人个性纯真自然、无虚伪，抑是讲一个人头脑简单，khahchē是讲细汉gín-á，讲郭台铭ká-nágín-á。

1951年五月二三，中国强迫西藏tī北京签订《中央人民政府kah西藏地方政府关于和平解放西藏办法ê协议》（简称《十七条协议》），保证西藏六十年bē变。但是换来ê却是中国tī 1959、1989、2008三遍血腥镇压西藏，其中1989 hit遍是是由当时担任中共西藏党委书记ê前中国国家主席胡锦涛下令镇压ê。签订和平协议hit当时郭台铭才tú-tú出世七个外月，大汉了后koh无爱读历史，真有可能m̄知chit段历史，m̄知影中国共产党ê话bē信得。

　　咱讲一段郭台铭大汉了后ē晓看报纸看电视hit阵ê代志，伊应该足清楚。1984年十二月十九，由中国国务院总理赵紫阳kah英国首相玛格丽特・柴契尔作为两国政府首脑tī北京签订《中英联合声明》，列出1997年七月初一香港归还中国了后，中华人民共和国对香港ê基本方针，tī「一国两制」ê原则下，中华人民共和国政府ē确保伊社会主义制度bētī香港特别行政区实行，香港本身ê资本主义制度kah生活方式维持「五十年不变」，保障人身、言论、出版、集会、结社、旅行、迁徙、通信、罢工、选择职业kah学术研究以及宗教信仰等各项权利kah自由。请郭台铭讲良心话，1997年七月初一到taⁿ二六年，香港有变无？中国共产党敢有照呼照行？

　　咱讲两段历史，tio̍h是beh提醒郭台铭董事长，中国共产党ê话bē信得。希望郭董事长早一日清醒起来，mài koh天真。真正ē-tàng转大人。　(230901)

注：玛格丽特・柴契尔　　请念华语