《绿色短评》

 | | | 转寄

一位日本人按怎看咱四位可能ê总统参选人？

作者 李南衡, ChoânTâijī/全台字 by Chng Hūi-phêng 2023.09.03

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　 Lí Lâmhêng

　 Chi̍t ūi Ji̍tpún lâng ánchóaⁿ khòaⁿ lán sì ūi khólêng ê chóngthóng chhamsoánjîn?

Pehgoe̍h cha̍pchhit, Ji̍tpún 《 Sánkeng sinbûnsiā》Tāipak chikio̍ktiúⁿ Yaita Akio（矢板明夫）tī i ê bīnchheh téngbīn kóng, tiongtàu tī《Hôasī》"Saⁿkok iángī" ê ti̍tpò chiatbo̍k tiong, túhó kóng kàu kúiūi khólêng ê chóngthóng chhamsoánjîn. Hō͘ góa siūⁿtio̍h ēng búkiap siósoat tiong ê búlîm jînsū lâi chò pílū. I chin khehkhì kóng, m̄chai kóng liáu ū tùitâng ah bô? khòaⁿkòe i bīnchheh ê lâng, lóng oló kah ē takchi̍h.

Yaita chikio̍ktiúⁿ tī bīnchheh téngbīn kóng, chòekīn ê 2024 chóngthóng tōasoán bîntiāu, Lōa Chhengtek kèsio̍k póchhî niásian ê tēūi. Koa Bûntia̍t ū siókhóa lo̍h, Hâu Iúgî ū hôe seng, Koeh Tâibêng kèsio̍k teh sńg i ê bôngbông būbū chiànlio̍k. Tùi chit kúiūi i ū chò chi̍tê pílū, i kóng Lōa Chhengtek náchhiūⁿ sī miâ mn̂g tōa phài ê tēchú. Bôlūn sī lāila̍t, kiàmhoat, khinkang, àmkhì, ta̍k hāng lóng tī chúichún ísiōng. Suijiân i m̄ sī choa̍ttùi ê kochhiú, tānsī khí kha tāng chhiú mā lóng ū chiàu pō͘ lâi, chin chió hoānchhò. Jîchhiáⁿ chòekīn itti̍t kianchhî khûn o̍h khó͘ liān, búkong tī i chin chāi ê kichhó͘ téngbīn ū teh thêseng.

Iā bô cho͘chit iā bô chîⁿ ê Koa Bûntia̍t, náchhiūⁿ sī chi̍tê kangô͘ gē lâng （ lán Tâioân lâng kóng・ê phah kûnthâu bē koio̍h ）. Yaita chikio̍ktiúⁿ piáusī Koa Bûntia̍t tiāⁿtiāⁿ kā búsu̍t, cha̍pki, mô͘su̍t kap kap chòhóe, chìnhêng piáuián. Khòaⁿ・khílâi chhiaiāⁿ chhùbī, só͘í tiāⁿtiāⁿ ē ín khip chin chē lâng ûi lâi khòaⁿ, tānsī " lāila̍t pêⁿpêⁿ, chin chē chiausò͘ kanta hó khòaⁿthâu niāniā bô siáⁿmi̍h lō͘ēng." Kah lâng kòe chiau, siatsú chêng kúi chiau nā bô hoattō͘ kā tùihong háⁿ tò, tio̍h ū khólêng tiantò hō͘ tùihong apchè tiâu.

Yaita chikio̍ktiúⁿ kóng, tittio̍h Tiongkok Kokbîntóng thêmiâ ê Hâu Iúgî, náchhiūⁿ sī tī bó͘chióng iniân khiáuha̍p ēbīn tittio̍h páchiok lāila̍t ê hui búlîm jînsū. Khósioh oânchoân bē hiáu chiausò͘, kakī koh bē hiáu khòngchè lāila̍t. Sinthé lāi ê kúi kó͘ lāila̍t kengsiông hō͘siong phah lâi phah khì, kā i kakī chhiong kah o͘ thiⁿ àm tē. Chòekīn ū chhiàⁿ chi̍t ūi sèⁿ Kim ê kàuliān, kà i chi̍t kóa siōng kipún ê thò͘la̍p ho͘khip ê honghoat, náchhiūⁿ chiāmchiām antēng・lo̍hlâi, tānsī ētàng chiūⁿtiûⁿ ah bē iûgoân chin pháiⁿ kóng.

Yaita chikio̍ktiúⁿ kóng, Koeh Tâibêng náchhiūⁿ sī chi̍t ūi thoânsoat tiong ê búlîm kochhiú, itti̍t tī tiûⁿ gōa koankhòaⁿ. Chi̍t ki chhùi ti̍tti̍t kóng siūⁿ beh ji̍ptiûⁿ, tānsī tio̍h sī itti̍t bô beh hiòngchêng ta̍h chhut chi̍t pō͘. Chin chē lâng kóng i līhāi, tānsī mā ū lâng kóng i kîsi̍t sī chi̍t kûn bô kàu sí. Tàuté si̍t la̍t ánchóaⁿ, ta̍kê lóng iáu m̄chai.

Yaita chikio̍ktiúⁿ kóng, siatsú in saⁿê liânchhiú・khílâi, kiámchhái ū khólêng phah iâⁿ. Tānsī in saⁿê lâng hō͘siong bô sìnjīm, chitmá khòaⁿ・khílâi saⁿê lâng liânchhiú ê khólêngsèng bô siáⁿ tōa.

　　 Suijiân Yaita chikio̍ktiúⁿ só͘ chò ê pílū chiâⁿ si̍tchāi, tānsī i mā kiaⁿ ū lâng khòaⁿliáu bô hoaⁿhí, só͘í i tī bûnchiuⁿ siōng āubīn te̍kpia̍t sengbêng, ísiōng ê pílū, sûnjiân sī hó sńg・ê, oânchoân bô okì. Hibāng hō͘ ta̍kê khòaⁿliáu chhiò・ chi̍tē.

Khah chhùbī・ê sī, Tiongkok Kokbîntóng chúse̍k Chu Li̍plûn kóng, m̄chai iáⁿ Yaita Akio teh kóng siáⁿmi̍h. Lán tī chia kā Yaita chikio̍ktiúⁿ kóng ê ōe ēng Tâioân ōe liām・chhutlâi, m̄chai Chu chúse̍k thiaⁿ ū ah bô? (230825)


Pe̍h-ōe-jī-pán/白话字版



《 Le̍k-sek toán-phêng 》　 Lí Lâm-hêng

　 Chi̍t ūi Ji̍t-pún lâng án-chóaⁿ khòaⁿ lán sì ūi khó-lêng ê chóng-thóng chham-soán-jîn?

Peh-goe̍h cha̍p-chhit, Ji̍t-pún 《 Sán-keng sin-bûn-siā》Tāi-pak chi-kio̍k-tiúⁿ Ya-ita Aki-o（矢板明夫）tī i ê bīn-chheh téng-bīn kóng, tiong-tàu tī《Hôa-sī》"Saⁿ-kok ián-gī" ê ti̍t-pò chiat-bo̍k tiong, tú-hó kóng kàu kúi-ūi khó-lêng ê chóng-thóng chham-soán-jîn. Hō͘ góa siūⁿ-tio̍h ēng bú-kiap sió-soat tiong ê bú-lîm jîn-sū lâi chò pí-lū. I chin kheh-khì kóng, m̄-chai kóng liáu ū tùi-tâng ah bô? khòaⁿ-kòe i bīn-chheh ê lâng, lóng o-ló kah ē tak-chi̍h.

Ya-ita chi-kio̍k-tiúⁿ tī bīn-chheh téng-bīn kóng, chòe-kīn ê 2024 chóng-thóng tōa-soán bîn-tiāu, Lōa Chheng-tek kè-sio̍k pó-chhî niá-sian ê tē-ūi. Koa Bûn-tia̍t ū sió-khóa lo̍h, Hâu Iú-gî ū hôe seng, Koeh Tâi-bêng kè-sio̍k teh sńg i ê bông-bông bū-bū chiàn-lio̍k. Tùi chit kúi-ūi i ū chò chi̍t-ê pí-lū, i kóng Lōa Chheng-tek ná-chhiūⁿ sī miâ mn̂g tōa phài ê tē-chú. Bô-lūn sī lāi-la̍t, kiàm-hoat, khin-kang, àm-khì, ta̍k hāng lóng tī chúi-chún í-siōng. Sui-jiân i m̄ sī choa̍t-tùi ê ko-chhiú, tān-sī khí kha tāng chhiú mā lóng ū chiàu pō͘ lâi, chin chió hoān-chhò. Jî-chhiáⁿ chòe-kīn it-ti̍t kian-chhî khûn o̍h khó͘ liān, bú-kong tī i chin chāi ê ki-chhó͘ téng-bīn ū teh thê-seng.

Iā bô cho͘-chit iā bô chîⁿ ê Koa Bûn-tia̍t, ná-chhiūⁿ sī chi̍t-ê kang-ô͘ gē lâng （ lán Tâi-oân lâng kóng-・ê phah kûn-thâu bē ko-io̍h ）. Ya-ita chi-kio̍k-tiúⁿ piáu-sī Koa Bûn-tia̍t tiāⁿ-tiāⁿ kā bú-su̍t, cha̍p-ki, mô͘-su̍t kap- kap chò-hóe, chìn-hêng piáu-ián. Khòaⁿ-・khí-lâi chhia-iāⁿ chhù-bī, só͘-í tiāⁿ-tiāⁿ ē ín khip chin chē lâng ûi lâi khòaⁿ, tān-sī " lāi-la̍t pêⁿ-pêⁿ, chin chē chiau-sò͘ kan-ta hó khòaⁿ-thâu niā-niā bô siáⁿ-mi̍h lō͘-ēng." Kah lâng kòe chiau, siat-sú chêng kúi chiau nā bô hoat-tō͘ kā tùi-hong háⁿ tò, tio̍h ū khó-lêng tian-tò hō͘ tùi-hong ap-chè tiâu.

Ya-ita chi-kio̍k-tiúⁿ kóng, tit-tio̍h Tiong-kok Kok-bîn-tóng thê-miâ ê Hâu Iú-gî, ná-chhiūⁿ sī tī bó͘-chióng in-iân khiáu-ha̍p ē-bīn tit-tio̍h pá-chiok lāi-la̍t ê hui bú-lîm jîn-sū. Khó-sioh oân-choân bē hiáu chiau-sò͘, ka-kī koh bē hiáu khòng-chè lāi-la̍t. Sin-thé lāi ê kúi kó͘ lāi-la̍t keng-siông hō͘-siong phah lâi phah khì, kā i ka-kī chhiong kah o͘ thiⁿ àm tē. Chòe-kīn ū chhiàⁿ chi̍t ūi sèⁿ Kim ê kàu-liān, kà i chi̍t kóa siōng ki-pún ê thò͘-la̍p ho͘-khip ê hong-hoat, ná-chhiūⁿ chiām-chiām an-tēng-・lo̍h-lâi, tān-sī ē-tàng chiūⁿ-tiûⁿ ah bē iû-goân chin pháiⁿ kóng.

Ya-ita chi-kio̍k-tiúⁿ kóng, Koeh Tâi-bêng ná-chhiūⁿ sī chi̍t ūi thoân-soat tiong ê bú-lîm ko-chhiú, it-ti̍t tī tiûⁿ gōa koan-khòaⁿ. Chi̍t ki chhùi ti̍t-ti̍t kóng siūⁿ beh ji̍p-tiûⁿ, tān-sī tio̍h sī it-ti̍t bô beh hiòng-chêng ta̍h chhut chi̍t pō͘. Chin chē lâng kóng i lī-hāi, tān-sī mā ū lâng kóng i kî-si̍t sī chi̍t kûn bô kàu sí. Tàu-té si̍t la̍t án-chóaⁿ, ta̍k-ê lóng iáu m̄-chai.

Ya-ita chi-kio̍k-tiúⁿ kóng, siat-sú in saⁿ-ê liân-chhiú-・khí-lâi, kiám-chhái ū khó-lêng phah iâⁿ. Tān-sī in saⁿ-ê lâng hō͘-siong bô sìn-jīm, chit-má khòaⁿ-・khí-lâi saⁿ-ê lâng liân-chhiú ê khó-lêng-sèng bô siáⁿ tōa.

　　 Sui-jiân Ya-ita chi-kio̍k-tiúⁿ só͘ chò ê pí-lū chiâⁿ si̍t-chāi, tān-sī i mā kiaⁿ ū lâng khòaⁿ-liáu bô hoaⁿ-hí, só͘-í i tī bûn-chiuⁿ siōng āu-bīn te̍k-pia̍t seng-bêng, í-siōng ê pí-lū, sûn-jiân sī hó sńg-・ê, oân-choân bô ok-ì. Hi-bāng hō͘ ta̍k-ê khòaⁿ-liáu chhiò-・ chi̍t-ē.

Khah chhù-bī-・ê sī, Tiong-kok Kok-bîn-tóng chú-se̍k Chu Li̍p-lûn kóng, m̄-chai iáⁿ Ya-ita Aki-o teh kóng siáⁿ-mi̍h. Lán tī chia kā Ya-ita chi-kio̍k-tiúⁿ kóng ê ōe ēng Tâi-oân ōe liām-・chhut-lâi, m̄-chai Chu chú-se̍k thiaⁿ ū ah bô? (230825)



八月十七，日本《产经新闻社》台北支局长Ya-ita Aki-o（矢板明夫）tī伊ê面册顶面讲：中昼tī《华视》「三国演议」ê直播节目中，tú好讲到几位可能ê总统参选人。Hō͘我想tio̍h用武侠小说中ê武林人士来做比喻。伊真客气讲，m̄知讲了有对同ah无？看过伊面册ê人，lóng o-ló kahē触舌（tak-chi̍h）。

Ya-ita支局长tī面册顶面讲，最近ê 2024总统大选民调，赖清德继续保持领先ê地位。柯文哲有小khóa落、侯友宜有回升，郭台铭继续teh玩（sńg）伊ê蒙蒙雾雾战略。对chit几位伊有做一个比喻，伊讲赖清德ná像是名门大派ê弟子。无论是内力、剑法、轻功、暗器，ta̍k项lóngtī水准以上。虽然伊m̄是绝对ê高手，但是起脚动手mālóng有照步来，真少犯错。而且最近一直坚持勤学苦练、武功tī伊真在ê基础顶面有teh提升。

也无组织也无钱ê柯文哲，ná像是一个江湖艺人（咱台湾人讲ê拍拳头卖膏药）。Ya-ita支局长表示柯文哲tiāⁿ-tiāⁿ kā武术、杂技、魔术kap- kap做伙，进行表演。看起来奢iāⁿ趣味，所以定定ē引吸真chē人围来看，但是「内力平平，真chē招数kan-ta好看头niā-niā无啥物路用。」Kah人过招，设使前几招若无法度kā对方háⁿ倒，tio̍h有可能顚倒hō͘对方压制tiâu。

Ya-ita支局长讲，得tio̍h中国国民党提名ê侯友宜，ná像是tī某种因缘巧合下面得tio̍h饱足内力ê非武林人士。可惜完全bē晓招数，家己koh bē晓控制内力。身体内ê几股内力经常互相拍来拍去、kā伊家己冲kah乌天暗地。最近有chhiàⁿ一位姓金ê教练，教伊一寡上基本ê吐纳呼吸ê方法，ná像渐渐安定落来，但是ē-tàng上场ah bē犹原真pháiⁿ讲。

Ya-ita支局长讲，郭台铭ná像是一位传说中ê武林高手，一直tī埸外观看。一枝嘴直直讲想beh入场，但是tio̍h是一直无beh向前踏出一步。真chē人讲伊厉害，但是mā有人讲伊其实是一拳无够死。到底实力按怎，ta̍k个lóng犹m̄知。

Ya-ita支局长讲，设使in三个联手起来，检彩有可能拍嬴。但是in三个人互相无信任，chit-má看起来三个人联手ê可能性无啥大。

　　虽然Ya-ita支局长所做ê比喻诚实在，但是伊mā惊有人看了无欢喜，所以伊tī文章上后面特别声明：以上ê比喻，纯然是好sńg-・ê，完全无恶意。希望hō͘ta̍k个看了笑一下。

Khah趣味ê是，中国国民党主席朱立伦讲，m̄知影Ya-ita Aki-o teh讲啥物。咱tīchia kā Ya-ita支局长讲ê话用台湾话念出来，m̄知朱主席听有ah无？ (230825)