《绿色短评》 |
 |
 |
|
 转寄 |
中国上gâu骗kah假！
作者 李南衡, ChoânTâijī/全台字 by Chng Hūi-phêng 2023.08.27
Choânbîn Tâioânjī pán/全民台湾字版简称ChoânTâiJī
《 Le̍ksek toánphêng 》 Lí Lâmhêng
Tiongkok siōng gâu phiàn kah ké!
Phiàn kah ké sī Tiongkok ê nn̄g tōa phiat pō͘. Ē kìtit 1981 nî Tiongkok jînkháu ta̍tkàu 10 ek, chiàm sèkài jînkháu 22%, bô jōa kú Tiongkok tio̍h liûthoân chi̍tê 顺口溜,"十亿人口九亿骗", lí siūⁿ kóng iáu ū chi̍t siâⁿ láusi̍t lâng? chhò・liáu! inūi āu pòaⁿkù sī "还有一亿在训练." Téngsi phiàn ēsi, ēsi phiàn téngsi, chènghú phiàn jînbîn, jînbîn phiàn chènghú, jînbîn hō͘siong phiàn. Ēng siáⁿ phiàn? kóng ké chō ké lâi phiàn tùihong.
Siongsìn chin chē lâng lóng bat thiaⁿkòe chitê Tiongkok chō ké ê kò͘sū, chi̍tê lôngpeh・á khì bé chi̍t tōa pau chiéngchí, sinkhó͘ kúiá kang lo̍hkhì chèng koh ak chúi, kúi cha̍p kang āu hoatchhut chi̍t tōa phiàn ê cha̍pchháu, inūi i bé ê chéngchí sī ké・ê. Lôngpeh・á sêng siongsim, siūⁿ beh chūsat tio̍h khì bé lôngio̍h lâi lim, kiatkó bô sí, inūi lôngio̍h sī ké・ê. Ūitio̍h lôngpeh・á bô sí, khioh tio̍h miā, chhù・ni̍h ê lâng khì bé chiú lâi khèngchiok, kiatkó choânke tiòngto̍k sí・khì, inūi chiú sī ké・ê.
Chō ké pēng m̄ sī kanta Tiongkok ū niāniā, choân sèkài sìkè lóng ū lâng teh chō ké. Tānsī bô chi̍tê kokka chhinchhiūⁿ Tiongkok chō ké chō kah chiahni̍h chiâuûn chiahni̍h thiatté. Kéhòe biánkóng, bûnpêng mā ké. Nāsī liân chènghú hoatpò͘ ê sò͘kù mā sī ké・ê tio̍h ē hông kiaⁿ! Tiongkok chènghú kongpò͘ kiⁿî la̍kgoe̍h hūn siâⁿtìn 16 chì 24 hòe sitgia̍p lu̍t 21.3% sī le̍ksú siōng kài koân・ê. Tānsī Tiongkok
Pehgoe̍hchhe, sèkài Tiânkéng Chónghōe kongpò͘ chòe sin sèkài pâi miâ, khiok bô khòaⁿtio̍h Tiongkok nn̄gūi gōapiáu chapo͘thé ê lú soánchhiú Liāu Bēngseh kah Tông Chanhoan, mā hō͘ nn̄g lâng sèngpia̍t gî hûn chài tō͘ ínkhí thólūn. Liāu Bēngseh sī nn̄gpah kongchhioh kah sìpah kongchhioh kochhiú, Tông Chanhoan choan kong sìpah kongchhioh, nn̄g lâng kòekhì inūi bênghián ê āmkúnchu siuⁿkòe tōalia̍p téng lâmsèng ê gōa hêng, hông chitgî sī "châpo͘ sin". Sèkài Tiânkèng Chónghōe ū tī la̍kgoe̍h iaukiû Tiongkok Tiânkèng Hia̍phōe, tùi kok séngtūi ê lú soánchhiú chìnhêng "血睾酮" kiámchhek, ittàn chhiau pio tio̍h kìm sài. Só͘í chit nn̄g lâng hông tûmiâ khólêng kah chitê kuitēng iúkoan. Liân sèngpia̍t mā beh phiàn, khóliân!
Tiongkok tī in koklāi ánchóaⁿ phiàn ánchóaⁿ ké, sī in tau ê tāichì. Pàithok mài phiàn mài ké kàu Tâioân lâi! 2021 nî gō͘goe̍h, lán Tâioân tng bôêng phahpiàⁿ hôngtī Búhàn hìiām, tio̍h ū lâng ké choh .《 Chūiû Sîpò 》ê miâ khui siat Twitter siàuhō͘, sànpò͘ iâugiân kóng"Tāipak Sinpak chi̍t bió piànchoh kúiá siâⁿ, náchhiūⁿ sī Bānhôa tōaliōng hìiām ûithé chi̍ptiong hûnsio." Hêngsūkio̍k ū kàiji̍p chengpān, sī tùihōaⁿ bāngkun só͘ chò ê ké sinbûn.
Mênî chiaⁿgoe̍h cha̍psaⁿ, Tâioân beh soán chóngthóng hù chóngthóng kah li̍phoat úigoân, Tiongkok kakī ê jînbîn bô ài chiàukò͘ hō͘ hó, khiok chiâⁿ ū khólêng ē ēng phiàn kah ké ê siausit lâi jiáuloān Tâioân, lán bēsái bô chùì. (230818)
Chù, 顺口溜 十亿人口九亿骗 还有一亿在训练 血睾酮 chhiáⁿ liām Hôagí
Pe̍h-ōe-jī-pán/白话字版
《 Le̍k-sek toán-phêng 》 Lí Lâm-hêng
Tiong-kok siōng gâu phiàn kah ké!
Phiàn kah ké sī Tiong-kok ê nn̄g tōa phiat pō͘. Ē kì-tit 1981 nî Tiong-kok jîn-kháu ta̍t-kàu 10 ek, chiàm sè-kài jîn-kháu 22%, bô jōa kú Tiong-kok tio̍h liû-thoân chi̍t-ê 顺口溜,"十亿人口九亿骗", lí siūⁿ kóng iáu ū chi̍t siâⁿ láu-si̍t lâng? chhò-・liáu! in-ūi āu pòaⁿ-kù sī "还有一亿在训练." Téng-si phiàn ē-si, ē-si phiàn téng-si, chèng-hú phiàn jîn-bîn, jîn-bîn phiàn chèng-hú, jîn-bîn hō͘-siong phiàn. Ēng siáⁿ phiàn? kóng ké chō ké lâi phiàn tùi-hong.
Siong-sìn chin chē lâng lóng bat thiaⁿ-kòe chit-ê Tiong-kok chō ké ê kò͘-sū, chi̍t-ê lông-peh-・á khì bé chi̍t tōa pau chiéng-chí, sin-khó͘ kúi--á kang lo̍h-khì chèng koh ak chúi, kúi cha̍p kang āu hoat-chhut chi̍t tōa phiàn ê cha̍p-chháu, in-ūi i bé ê chéng-chí sī ké-・ê. Lông-peh-・á sêng siong-sim, siūⁿ beh chū-sat tio̍h khì bé lông-io̍h lâi lim, kiat-kó bô sí, in-ūi lông-io̍h sī ké-・ê. Ūi-tio̍h lông-peh-・á bô sí, khioh tio̍h miā, chhù-・ni̍h ê lâng khì bé chiú lâi khèng-chiok, kiat-kó choân-ke tiòng-to̍k sí-・khì, in-ūi chiú sī ké-・ê.
Chō ké pēng m̄ sī kan-ta Tiong-kok ū niā-niā, choân sè-kài sì-kè lóng ū lâng teh chō ké. Tān-sī bô chi̍t-ê kok-ka chhin-chhiūⁿ Tiong-kok chō ké chō kah chiah-ni̍h chiâu-ûn chiah-ni̍h thiat-té. Ké-hòe bián-kóng, bûn-pêng mā ké. Nā-sī liân chèng-hú hoat-pò͘ ê sò͘-kù mā sī ké-・ê tio̍h ē hông kiaⁿ! Tiong-kok chèng-hú kong-pò͘ kin-nî la̍k-goe̍h hūn siâⁿ-tìn 16 chì 24 hòe sit-gia̍p lu̍t 21.3% sī le̍k-sú siōng kài koân-・ê. Tān-sī Tiong-kok
Peh-goe̍h-chhe, sè-kài Tiân-kéng Chóng-hōe kong-pò͘ chòe sin sè-kài pâi miâ, khiok bô khòaⁿ-tio̍h Tiong-kok nn̄g-ūi gōa-piáu cha-po͘-thé ê lú soán-chhiú Liāu Bēng-seh kah Tông Chan-hoan, mā hō͘ nn̄g lâng sèng-pia̍t gî hûn chài tō͘ ín-khí thó-lūn. Liāu Bēng-seh sī nn̄g-pah kong-chhioh kah sì-pah kong-chhioh ko-chhiú, Tông Chan-hoan choan kong sì-pah kong-chhioh, nn̄g lâng kòe-khì in-ūi bêng-hián ê ām-kún-chu siuⁿ-kòe tōa-lia̍p téng lâm-sèng ê gōa hêng, hông chit-gî sī "châ-po͘ sin". Sè-kài Tiân-kèng Chóng-hōe ū tī la̍k-goe̍h iau-kiû Tiong-kok Tiân-kèng Hia̍p-hōe, tùi kok séng-tūi ê lú soán-chhiú chìn-hêng "血睾酮" kiám-chhek, it-tàn chhiau pio tio̍h kìm sài. Só͘-í chit nn̄g lâng hông tû-miâ khó-lêng kah chit-ê kui-tēng iú-koan. Liân sèng-pia̍t mā beh phiàn, khó-liân!
Tiong-kok tī in kok-lāi án-chóaⁿ phiàn án-chóaⁿ ké, sī in tau ê tāi-chì. Pài-thok mài phiàn mài ké kàu Tâi-oân lâi! 2021 nî gō͘-goe̍h, lán Tâi-oân tng bô-êng phah-piàⁿ hông-tī Bú-hàn hì-iām, tio̍h ū lâng ké choh .《 Chū-iû Sî-pò 》ê miâ khui siat Twitter siàu-hō͘, sàn-pò͘ iâu-giân kóng"Tāi-pak Sin-pak chi̍t bió piàn-choh kúi-á siâⁿ, ná-chhiūⁿ sī Bān-hôa tōa-liōng hì-iām ûi-thé chi̍p-tiong hûn-sio." Hêng-sū-kio̍k ū kài-ji̍p cheng-pān, sī tùi-hōaⁿ bāng-kun só͘ chò ê ké sin-bûn.
Mê-nî chiaⁿ-goe̍h cha̍p-saⁿ, Tâi-oân beh soán chóng-thóng hù chóng-thóng kah li̍p-hoat úi-goân, Tiong-kok ka-kī ê jîn-bîn bô ài chiàu-kò͘ hō͘ hó, khiok chiâⁿ ū khó-lêng ē ēng phiàn kah ké ê siau-sit lâi jiáu-loān Tâi-oân, lán bē-sái bô chù-ì. (230818)
Chù, 顺口溜 十亿人口九亿骗 还有一亿在训练 血睾酮 chhiáⁿ liām Hôa-gí
骗kah假是中国ê两大phiat步。Ē记得1981年中国人口达到10亿，占世界人口22%，无jōa久中国tio̍h流传一个顺口溜：「十亿人口九亿骗」，你想讲iáu有一成老实人？错了！因为后半句是「还有一亿在训练。」顶司骗下司，下司骗顶司，政府骗人民，人民骗政府，人民互相骗。用啥骗？讲假造假来骗对方。
相信真chē人lóng bat听过chit-ê中国造假ê故事：一个农伯á去买一大包种子，辛苦几á工落去种koh沃水，几十工后发出一大片ê杂草，因为伊买ê种子是假ê。农伯á诚伤心，想beh自杀tio̍h去买农药来lim，结果无死，因为农药是假ê。为tio̍h农伯á无死、拾（khioh）tio̍h命，厝里ê人去买酒来庆祝，结果全家中毒死去，因为酒是假ê。
造假并m̄是kan-ta中国有niā-niā，全世界四界lóng有人teh造假。但是无一个国家亲像中国造假造kah chiah-ni̍h齐匀（chiâu-ûn）chiah-ni̍h彻底。假货免讲，文凭mā假。若是连政府发布ê数据mā是假ê tio̍hēhông惊！中国政府公布今年六月份城镇16至24岁失业率21.3%是历史上kài koân-・ê。但是中国《财新网》引述北京大学副教授张丹丹研究指出，若将大约1,600万名倒平平、kah食父母m̄做工课ê青年lóng看作失业，中国今年三月份青年实际失业率有46.5%。八月十五，中国国家统计局tī记者会宣布，ùi今年八月起无beh koh发布青年失业ê数据。继续公布ē真pháiⁿ看。Mài公布总是比公布假ê数据有khah好，但是án-nemā koh骗人讲是为tio̍h调查统计工作ê「健全优化」。Che tio̍h是中国。
八月初，世界田径总会公布最新世界排名，却无看tio̍h中国两位外表查埔体ê女选手廖孟雪kah童曾欢，mā hō͘两人性别疑云再度引起讨论。廖孟雪是二百公尺kah四百公尺高手、童曾欢专攻四百公尺，两人过去因为明显ê颔颈珠siuⁿ过大粒等男性ê外型，hông质疑是「查埔身」。世界田径总会有tī六月要求中国田径协会，对各省队ê女选手进行「血睾酮」检测，一旦超标tio̍h禁赛。所以chit两人hông除名可能kah chit-ê规定有关。连性别mā beh骗，可怜！
中国tī in国内án怎骗án怎假，是in兜ê代志。拜托mài骗mài假到台湾来！2021年五月，咱台湾tng无闲拍拼防治武汉肺炎，tio̍h有人假作《自由时报》ê名开设Twitter帐户，散布谣言讲「台北新北一秒变作鬼á城，ná像是万华大量肺炎遗体集中焚烧。」刑事局有介入侦办，是对岸网军所做ê假新闻。
明年正月十三，台湾beh选总统副总统kah立法委员，中国家己ê人民无ài照顾hō͘好，却chiâⁿ有可能ē用骗kah假ê消息来扰乱台湾，咱bē-sái无注意。 (230818)
注：顺口溜 十亿人口九亿骗 还有一亿在训练 血睾酮 请念华语
- 《绿色短评》文章索引 | RSS | 寄给朋友
- « 上一篇 | 下一篇 »
