《绿色短评》

 | | | 转寄

Siáng ài去中国ah！？

作者 李南衡, ChoânTâijī/全台字 by Chng Hūiphêng 2023.08.20




Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　　　　　　　　　　Siáng ài khì Tiongkok ah!?

　　 Pehgoe̍h chhechhit, Bíkok《华尔街ji̍tpò 》choantê pòtō kóng, gōakok lâng bēgiàn lâi ah, sī Tiongkok kengchè hoattiánsiōng sin ê thiauchiàn. Pòtō kóng, e̍kchêng kái hong jîchhiáⁿ koh tiôngsin khaihòng piankéng pòaⁿ nî liáuāu, khì Tiongkok ê kokchè lúkheh chin chió.《华尔街ji̍t pò》jīnûi, che sī Tiongkok kah sehong kokka lú kiâⁿ lú hn̄g ê chi̍tê hiānsiōng, khólêng ē tī chi̍ttōaⁿ chin tn̂g ê sîkan chōsêng hūbīn ê énghióng. Tī Pakkiaⁿ, Siōnghái téng tōa to͘chhī bô khòaⁿtio̍h gōakok lúkheh ê lângiáⁿ te̍kpia̍t bênghián, ùi choân kok hoānûi lâi khòaⁿ, kiⁿî tēit kùi lúhêngsiā ji̍pkéng lúiû chiapthāi jînchhù kanta ū 5 bān 2,000 lâng, 2019 nî tēit kùi ji̍pkéng lúiû chiapthāi ū 370 bān jînchhù. 张家界kokka konghn̂g kiⁿî kàu 5 goe̍h tiongsûn, háigōa iûkheh jînsò͘ kanta 2 bān 5,600 lâng, 2019 nî chêng 5 kògoe̍h ê háigōa iûkheh jînsò͘ sī 50 bān lâng. Kah éngnî kāngkhoán, kîtiong ū chiongkīn chi̍tpòaⁿ ê iûkheh sī ùi Tâioân, Hiangkáng kah Òmn̂g lâi・ê, m̄ sī úi Bíkok ah sī Auchiu kokka lâi・ê.

Gōakok iûkheh siámkhui Tiongkok ê chi̍tê tiōngiàu goânin, sī Tiongkok kah sehong ê koanhē kèsio̍k okhòa, che mā hō͘ in siūⁿ beh khì Tiongkok lúhêng ē koh khah kínsīn. Bíkok chènghú 6 goe̍hhūn ū hoatpò͘ chi̍t hūn lúhêng kéngsī, kéngkò Bíkok lâng nā beh khì Tiongkok lúhêng tio̍h tiôngsin khólū, líiû sī Bíkok chènghú só͘ kóng ê Tiongkok "sûiì chiphoat", paukoat chhutkéng kìmlēng kah bô chèngtong khuliû ê khólêngsèng. Bíkok chi̍t ūi sionggia̍p kò͘būn kóng, siatsú sī góa goânpún só͘ se̍ksāi ê Tiongkok, góa ē koh khì! tānsī chitmá, Tiongkok ná chhiūⁿ chinchiàⁿ kā kakī pānián choh chi̍tê huisiông hoán sehong, te̍kpia̍t sī hoán Bíkok ê kokka. Che hō͘ góa chin putan."

Tiongkok chènghú phianphian tī kiⁿî chhitgoe̍h chheit hoat pò͘ "Tiongkok hoán kantia̍phoat", ná chhiūⁿ tng nî gûgōng ê Tiongkok Kokbîntóng chènghú só͘ kóng ê "匪谍就在你身边", kā só͘ū ê lâng lóng chúnchoh kantia̍p, paukoat gōakok koankongkheh, oa̍h beh hông kiaⁿ sí! Tiongkok ná kantia̍p chi̍tê tōa niáuchhítngá, gōakok iûkheh nā hoān tio̍h "Tiongkok hoán kantia̍phoat", ētàng ji̍pkhì, bētàng chhutlâi.. lí sûipiān lo̍kim lio̍kiáⁿ hipsiōng, lí sûipiān ōe tētô͘, lí kah Tiongkok lâng tâmlūn Hiangkáng Tâioân Sinkiang Se chōng, sī siáⁿmi̍h khìtô͘? Tâioân lâng koh khah tio̍h siósim, lí tī Tâioân bat tī bānglō͘ téngbīn bôkoán sī bīnchheh ahsī Twitter phoephêng kòe Tiongkok ah bô? nā ū, Tiongkok tio̍h ē kā lí chún choh " kantia̍p" pān! Tiongkok chènghú ho͘io̍k choânbîn kiōngtông kaji̍p hoán kan hông tia̍p ê tàucheng, khì Tiongkok ê lâng chèngtī honghiám tōatōa seng koân.

Gōakok lâng bô ài khì Tiongkok lúiû mā énghióng tio̍h gōasiong tâuchu. 2022 nî tēit kùi sī bíkim 1,000 ek, 2023 nî tēit kùi gōakok tùi Tiongkok ti̍tchiap tâuchu lo̍h kàu chhun bíkim 200 ek. Tiongkok piáubīn siōng hoangêng gōakok khìgia̍p khì Tiongkok tâuchu, tānsī Tiongkok chènghú tiāⁿtiāⁿ àmtiong í pàihóng tiâucha téng chhiútōaⁿ, tùi tī Tiongkok ê gōakok khìgia̍p si ap. Chin chē ê Bísiong Ji̍tsiong ê oânkang siūtio̍h kanjiáu sīmchì khuliû, ū gōakok oânkang sin chhéng beh tńgkhì kò͘hiong, mā siūtio̍h pahpoaⁿ thiaulân. Íkeng ū chi̍t tōatui gōakok khìgia̍p thiatlī Tiongkok, bo̍kchêng iáu ū 27% tâuchu chiá khólū beh cháulī Tiongkok, gōachu thiatchhut liōng ū Sintâipè 970 ek chóiū.

Kóngtio̍h Tiongkok, kúi mā kiaⁿ. Siáng ài khì Tiongkok ah? 　　　　(230811)


Chù, 华尔街 　张家界 "匪谍就在你身边" chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》　　 Lí Lâm-hêng

　　　　　　　　　　Siáng ài khì Tiong-kok ah!?

　　 Peh-goe̍h chhe-chhit, Bí-kok《华尔街ji̍t-pò 》choan-tê pò-tō kóng, gōa-kok lâng bē-giàn lâi ah, sī Tiong-kok keng-chè hoat-tián-siōng sin ê thiau-chiàn. Pò-tō kóng, e̍k-chêng kái hong jî-chhiáⁿ koh tiông-sin khai-hòng pian-kéng pòaⁿ nî liáu-āu, khì Tiong-kok ê kok-chè lú-kheh chin chió.《华尔街ji̍t- pò》jīn-ûi, che sī Tiong-kok kah se-hong kok-ka lú kiâⁿ lú hn̄g ê chi̍t-ê hiān-siōng, khó-lêng ē tī chi̍t-tōaⁿ chin tn̂g ê sî-kan chō-sêng hū-bīn ê éng-hióng. Tī Pak-kiaⁿ, Siōng-hái téng tōa to͘-chhī bô khòaⁿ-tio̍h gōa-kok lú-kheh ê lâng-iáⁿ te̍k-pia̍t bêng-hián, ùi choân kok hoān-ûi lâi khòaⁿ, kin-nî tē-it kùi lú-hêng-siā ji̍p-kéng lú-iû chiap-thāi jîn-chhù kan-ta ū 5 bān 2,000 lâng, 2019 nî tē-it kùi ji̍p-kéng lú-iû chiap-thāi ū 370 bān jîn-chhù. 张家界 kok-ka kong-hn̂g kin-nî kàu 5 goe̍h tiong-sûn, hái-gōa iû-kheh jîn-sò͘ kan-ta 2 bān 5,600 lâng, 2019 nî chêng 5 kò-goe̍h ê hái-gōa iû-kheh jîn-sò͘ sī 50 bān lâng. Kah éng-nî kāng-khoán, kî-tiong ū chiong-kīn chi̍t-pòaⁿ ê iû-kheh sī ùi Tâi-oân, Hiang-káng kah Ò-mn̂g lâi-・ê, m̄ sī úi Bí-kok ah sī Au-chiu kok-ka lâi-・ê.

Gōa-kok iû-kheh siám-khui Tiong-kok ê chi̍t-ê tiōng-iàu goân-in, sī Tiong-kok kah se-hong ê koan-hē kè-sio̍k ok-hòa, che mā hō͘ in siūⁿ beh khì Tiong-kok lú-hêng ē koh khah kín-sīn. Bí-kok chèng-hú 6 goe̍h-hūn ū hoat-pò͘ chi̍t hūn lú-hêng kéng-sī, kéng-kò Bí-kok lâng nā beh khì Tiong-kok lú-hêng tio̍h tiông-sin khó-lū, lí-iû sī Bí-kok chèng-hú só͘ kóng ê Tiong-kok "sûi-ì chip-hoat", pau-koat chhut-kéng kìm-lēng kah bô chèng-tong khu-liû ê khó-lêng-sèng. Bí-kok chi̍t ūi siong-gia̍p kò͘-būn kóng, siat-sú sī góa goân-pún só͘ se̍k-sāi ê Tiong-kok, góa ē koh khì! tān-sī chit-má, Tiong-kok ná chhiūⁿ chin-chiàⁿ kā ka-kī pān-ián choh chi̍t-ê hui-siông hoán se-hong, te̍k-pia̍t sī hoán Bí-kok ê kok-ka. Che hō͘ góa chin put-an."

Tiong-kok chèng-hú phian-phian tī kin-nî chhit-goe̍h chhe-it hoat pò͘ "Tiong-kok hoán kan-tia̍p-hoat", ná chhiūⁿ tng nî gû-gōng ê Tiong-kok Kok-bîn-tóng chèng-hú só͘ kóng ê "匪谍就在你身边", kā só͘-ū ê lâng lóng chún-choh kan-tia̍p, pau-koat gōa-kok koan-kong-kheh, oa̍h beh hông kiaⁿ sí! Tiong-kok ná kan-tia̍p chi̍t-ê tōa niáu-chhí-tng-á, gōa-kok iû-kheh nā hoān tio̍h "Tiong-kok hoán kan-tia̍p-hoat", ē-tàng ji̍p-khì, bē-tàng chhut-lâi.. lí sûi-piān lo̍k-im lio̍k-iáⁿ hip-siōng, lí sûi-piān ōe tē-tô͘, lí kah Tiong-kok lâng tâm-lūn Hiang-káng Tâi-oân Sin-kiang Se- chōng, sī siáⁿ-mi̍h khì-tô͘? Tâi-oân lâng koh khah tio̍h sió-sim, lí tī Tâi-oân bat tī bāng-lō͘ téng-bīn bô-koán sī bīn-chheh ah-sī Twitter phoe-phêng kòe Tiong-kok ah bô? nā ū, Tiong-kok tio̍h ē kā lí chún choh " kan-tia̍p" pān! Tiong-kok chèng-hú ho͘-io̍k choân-bîn kiōng-tông ka-ji̍p hoán kan hông tia̍p ê tàu-cheng, khì Tiong-kok ê lâng chèng-tī hong-hiám tōa-tōa seng koân.

Gōa-kok lâng bô ài khì Tiong-kok lú-iû mā éng-hióng tio̍h gōa-siong tâu-chu. 2022 nî tē-it kùi sī bí-kim 1,000 ek, 2023 nî tē-it kùi gōa-kok tùi Tiong-kok ti̍t-chiap tâu-chu lo̍h kàu chhun bí-kim 200 ek. Tiong-kok piáu-bīn siōng hoan-gêng gōa-kok khì-gia̍p khì Tiong-kok tâu-chu, tān-sī Tiong-kok chèng-hú tiāⁿ-tiāⁿ àm-tiong í pài-hóng tiâu-cha téng chhiú-tōaⁿ, tùi tī Tiong-kok ê gōa-kok khì-gia̍p si ap. Chin chē ê Bí-siong Ji̍t-siong ê oân-kang siū-tio̍h kan-jiáu sīm-chì khu-liû, ū gōa-kok oân-kang sin- chhéng beh tńg-khì kò͘-hiong, mā siū-tio̍h pah-poaⁿ thiau-lân. Í-keng ū chi̍t tōa-tui gōa-kok khì-gia̍p thiat-lī Tiong-kok, bo̍k-chêng iáu ū 27% tâu-chu chiá khó-lū beh cháu-lī Tiong-kok, gōa-chu thiat-chhut liōng ū Sin-tâi-pè 970 ek chó-iū.

Kóng-tio̍h Tiong-kok, kúi mā kiaⁿ. Siáng ài khì Tiong-kok ah? 　　　　(230811)


Chù, 华尔街 　张家界 "匪谍就在你身边" chhiáⁿ liām Hôa-gí



　　八月初七，美国《华尔街日报》专题报导讲：外国人bē-giàn来ah，是中国经济发展上新ê挑战。报导讲，疫情解封而且koh重新开放边境半年了后，去中国ê国际旅客真少。《华尔街日报》认为，che是中国kah西方国家lú行lú远ê一个现象，可能ē tī一段真长ê时间造成负面ê影响。tī北京、上海等大都市无看tio̍h外国旅客ê人影特别明显，ùi全国范围来看，今年第一季旅行社入境旅游接待人次kan-ta有5万2,000人，2019年第一季入境旅游接待有370万人次。张家界国家公园今年到5月中旬，海外游客人数kan-ta 2万5,600人，2019年前5个月ê海外游客人数是50万人。Kah往（éng）年仝款，其中有将近一半ê游客是ùi台湾、香港kah澳门来ê，m̄是úi美国ah是欧洲国家来ê。

外国游客闪开中国ê一个重要原因，是中国kah西方ê关系继续恶化，che mā hō͘ in想beh去中国旅行ēkoh khah谨慎。美国政府6月份有发布一份旅行警示，警告美国人若beh去中国旅行tio̍h重新考虑，理由是美国政府所讲ê中国「随意执法」，包括出境禁令kah无正当拘留ê可能性。美国一位商业顾问讲，设使是我原本所熟sāiê中国，我ēkoh去！但是chit-má，中国ná像真正kā家己扮演作一个非常反西方、特别是反美国ê国家。Che hō͘我真不安。」

中国政府偏偏tī今年七月初一发布「中国反间谍法」，那像当年愚戆ê中国国民党政府所讲ê「匪谍就在你身边」，kā所有ê人lóng准作间谍，包括外国观光客，活beh hông惊死！中国ná像一个大「老鼠tng-á」（niáu-chhí-tng-á），外国游客若犯tio̍h「中国反间谍法」，ē-tàng入去、bē-tàng出来.。你随便录音录影hip相、你随便画地图、你kah中国人谈论香港台湾新疆西藏，是啥物企图？台湾人koh khah tio̍h小心，你tī台湾bat tī网路顶面无管是面册ah是Twitter批评过中国ah无？若有，中国tio̍hē kā你准作「间谍」办！ 中国政府呼吁全民共同加入反间防谍ê斗争，去中国ê人政治风险大大升koân。

外国人无ài去中国旅游mā影响tio̍h外商投资。2022年第一季是美金1,000亿，2023年第一季外国对中国直接投资落到chhun美金200亿。中国表面上欢迎外国企业去中国投资，但是中国政府tiāⁿ-tiāⁿ暗中以拜访调查等手段，对tī中国ê外国企业施压。真chē个美商日商ê员工受tio̍h干扰甚至拘留，有外国员工申请beh转去故乡，mā受tio̍h百般刁难。已经有一大堆外国企业撤离中国，目前犹有27%投资者考虑beh走离中国，外资撤出量有新台币970亿左右。

讲tio̍h中国，鬼mā惊。Siáng ài去中国ah？　　　　(230811)


注：华尔街　张家界 「匪谍就在你身边」 请念华语