《绿色短评》

 | | | 转寄

「在野大联盟」、「执政大联盟」是啥物碗糕？

作者 李南衡, ChoânTâijī/全台字 by Chng Hūiphêng 2023.08.06




Choânbîn Tâioânjī pán/全民台湾字版简称ChoânTâiJī

《 le̍ksek toánphêng》　　 Lí Lâmhêng

　　　　"Chāṳá tōa liânbêng","Chipchèng tōa liânbêng" sī siáⁿmi̍h óaⁿko ?

Chhitgoe̍h jīsaⁿ, Tiongkok Kokbîntóng choânkok tāipiáu tāihōe, tóngchúse̍k Chu Li̍plûn soanpò͘, chit piàn chóngthóng tōa soán Tiongkok Kokbîntóng beh thoânkiat só͘ū hui Le̍k ê pêngiú kiōng cho͘ "tōa tôngbêng","Chāṳá tōa liânbêng", bīlâi Tiongkok Kokbîntóng koh tò tńglâi chipchèng liáuāu, koh beh kah ta̍kê kiōngtông kiànli̍p chi̍tê hôpêng, antēng, kongpêⁿ, chènggī ê "chipchèng tōa liânbêng", kiōngtông kā Tâioân péng・ kòelâi, hō͘ Tâioân koh khah hó.

Chhitgoe̍h jīgō͘, Tiongkok Kokbîntóng chóngthóng chhamsoánjîn Hāu Iúgî kēngsoán pānkongsek chiphêngtiúⁿ金溥聪siū hóngbūn ê sî kóng, oânchoân m̄ chaiiáⁿ siáⁿmi̍h sī "chipchèng tōa liânbêng", i kóng, i kah Hāu Iúgî lóng m̄ chai chit hāng tāichì, i mā tùi Chu chúse̍k hutjiânkan tàn chhut chit ê sin miâsû kámkak kîkoài. Hit ēpo͘ Tiongkok Kokbîntóng hoatgiânjîn Iûⁿ Tìû to̍h hôeèng kóng, Chu Li̍plûn chúse̍k tī choântāihōe thêkhí "chipchèng tōa liânbêng" ê kài liām, tio̍hsī beh thoânkiat só͘ū hoān Nâ, hui Le̍k, chāṳá ê le̍kliōng, iā tio̍hsī kiatha̍p só͘ū líliām kāngkhoán ê le̍kliōng, oânsêng hō͘ Bînchìntóng lo̍htâi, chèngtóng lûnthè ê bo̍kphiau.

Tiongkok Kokbîntóng hoatgiânjîn ánne káisoeh, m̄chai thâunáu itliû ê 金小刀 thiaⁿ ū ah bô? chhiūⁿ goán chit chióng phó͘thong lâng si̍tchāi sī thiaⁿ bô. Tàuté sī tōa soán chêng beh "chāṳá tōa liânbêng"? ah sī tōasoán liáu chiah beh "chipchèng tōa liânbêng" leh? nāsī tōasoán chêng beh "chāṳá tōa liânbêng", tàuté beh ánchóaⁿ liân ánchóaⁿ bêng? káⁿ ū kah Bînchiòngtóng chúse̍k Koa Bûntiat kóng chi̍tsiaⁿ? bô. Chu Li̍plûn chúse̍k kóng Koa Bûntiat chúse̍k chin bôêng. Bo̍kchêng Koa Bûntiat ê bîntiāu sī iâⁿ kòe Tiongkok Kokbîntóng ê Hāu Iúgî, ná ēsái bô kah lâng kóng ・chi̍tsiaⁿ to̍h beh kah lâng "chāṳá tōa liânbêng"? Nâ iâⁿ phó͘soán jînsū ū thánpe̍k kóng, hiān kaitōaⁿ soán chêng ha̍pchok khongkan bô tōa, kantaⁿ ū khólêng chhuthiān tī soán āu ê Li̍phoatīⁿ. Ánne "chāṳá tōa liânbêng" sī siáⁿmi̍h óaⁿko ?

　　 Bo̍kchêng chāṳá sèle̍k tējī tōa ê Bînchiòngtóng chúse̍k Koa Bûntiat jīnûi, hiānchāi kokhōe 3 tóng lóng bô kòe pòaⁿ ê kilu̍t chiâⁿ koân, i iûgoân kámkak, kèta̍t, chèngchhek, líliām saⁿ hāng lóng ē ha̍h chiah ū pānhoat ha̍pchok.

　　 Tiongkok Kokbîntóng chúse̍k Chu Li̍plûn "tōa liânbêng"ê siūⁿhoat sī ùi tóūi lâi ê?

　　 La̍kgoe̍h cha̍pgō͘, Tiongkok Kokbîntóng Tâipak chhī gīoân, chit piàn Tāiankhu li̍púi chhamsoánjîn Lô Tìkiông piáusī,I beh tiûpī cho͘chit "chèngtóng lûnthè tōa liânbêng", tùikhòng Le̍k iâⁿ ké bînchú tōa liânbêng, jîchhiáⁿ jīnûi chāṳátóng tio̍h chhiú khan chhiú ha̍pchok, siáⁿ lâng choh chóngthóng sī chhùiàu būntê; i mā kiôngtiāu, i bô kóng bô chichhî Tiongkok Kokbîntóng chóngthóng chhamsoánjîn Hāu Iúgî, siōng tiōngiàu・ê bo̍kphiau sī chèngtóng lûnthè. Nā chiàu Lô Tìkiông ê kónghoat, soán chêng nā itti̍t îchhî hiānchhúsî ê bîntiāu piáuhiān, kàusî tongjiân tio̍h ē khì Hāu Iúgî pó Koa Bûntiat. Bo̍kkoài ínkhí Nâ iâⁿ lāipō͘ pō͘hūn jînsū kā i tèng kah chhàuthâu. Tējī kang, Lô Tìkiông tī bīnchheh téngbīn hoatchhut tōkhiam sengbêng, goânpún ītēng ê kìchiáhōe mā chhúsiau.

　　 Tiongkok Kokbîntóng chúse̍k Chu Li̍plûn kóng beh thoânkiat só͘ū hui Le̍k ê pêngiú kiōng cho͘ "chāṳá tōa liânbêng","chipchèng tōa liânbêng". Che tàuté sī siáⁿmi̍h óaⁿ ko? Mài kóng 金小刀 m̄chai siáⁿ ìsù, lán itpoaⁿ lâng khòaⁿ m̄bat. Lán si̍tchāi chin hoâigî, Chu Li̍plûn chúse̍k káⁿ chaiiáⁿ i kakī teh kóng siáⁿ? (230728)


Chù, 金溥聪 金小刀 chhiáⁿ liām Hôagí


Pe̍h-ōe-jī-pán/白话字版


《 le̍k-sek toán-phêng》　　 Lí Lâm-hêng

　　　　"Chāi-iá tōa liân-bêng","Chip-chèng tōa liân-bêng" sī siáⁿ-mi̍h óaⁿ-ko ?

Chhit-goe̍h jī-saⁿ, Tiong-kok Kok-bîn-tóng choân-kok tāi-piáu tāi-hōe, tóng-chú-se̍k Chu Li̍p-lûn soan-pò͘, chit piàn chóng-thóng tōa soán Tiong-kok Kok-bîn-tóng beh thoân-kiat só͘-ū hui Le̍k ê pêng-iú kiōng cho͘ "tōa tông-bêng","Chāi-iá tōa liân-bêng", bī-lâi Tiong-kok Kok-bîn-tóng koh tò tńg-lâi chip-chèng liáu-āu, koh beh kah ta̍k-ê kiōng-tông kiàn-li̍p chi̍t-ê hô-pêng, an-tēng, kong-pêⁿ, chèng-gī ê "chip-chèng tōa liân-bêng", kiōng-tông kā Tâi-oân péng-・ kòe-lâi, hō͘ Tâi-oân koh khah hó.

Chhit-goe̍h jī-gō͘, Tiong-kok Kok-bîn-tóng chóng-thóng chham-soán-jîn Hāu Iú-gî kēng-soán pān-kong-sek chip-hêng-tiúⁿ金溥聪siū hóng-būn ê sî kóng, oân-choân m̄ chai-iáⁿ siáⁿ-mi̍h sī "chip-chèng tōa liân-bêng", i kóng, i kah Hāu Iú-gî lóng m̄ chai chit hāng tāi-chì, i mā tùi Chu chú-se̍k hut-jiân-kan tàn chhut chit ê sin miâ-sû kám-kak kî-koài. Hit ē-po͘ Tiong-kok Kok-bîn-tóng hoat-giân-jîn Iûⁿ Tì-û to̍h hôe-èng kóng, Chu Li̍p-lûn chú-se̍k tī choân-tāi-hōe thê-khí "chip-chèng tōa liân-bêng" ê kài- liām, tio̍h-sī beh thoân-kiat só͘-ū hoān Nâ, hui Le̍k, chāi-iá ê le̍k-liōng, iā tio̍h-sī kiat-ha̍p só͘-ū lí-liām kāng-khoán ê le̍k-liōng, oân-sêng hō͘ Bîn-chìn-tóng lo̍h-tâi, chèng-tóng lûn-thè ê bo̍k-phiau.

Tiong-kok Kok-bîn-tóng hoat-giân-jîn án-ne kái-soeh, m̄-chai thâu-náu it-liû ê 金小刀 thiaⁿ ū ah bô? chhiūⁿ goán chit chióng phó͘-thong lâng si̍t-chāi sī thiaⁿ bô. Tàu-té sī tōa soán chêng beh "chāi-iá tōa liân-bêng"? ah sī tōa-soán liáu chiah beh "chip-chèng tōa liân-bêng" leh? nā-sī tōa-soán chêng beh "chāi-iá tōa liân-bêng", tàu-té beh án-chóaⁿ liân án-chóaⁿ bêng? káⁿ ū kah Bîn-chiòng-tóng chú-se̍k Koa Bûn-tiat kóng chi̍t-siaⁿ? bô. Chu Li̍p-lûn chú-se̍k kóng Koa Bûn-tiat chú-se̍k chin bô-êng. Bo̍k-chêng Koa Bûn-tiat ê bîn-tiāu sī iâⁿ kòe Tiong-kok Kok-bîn-tóng ê Hāu Iú-gî, ná ē-sái bô kah lâng kóng -・chi̍t-siaⁿ to̍h beh kah lâng "chāi-iá tōa liân-bêng"? Nâ iâⁿ phó͘-soán jîn-sū ū thán-pe̍k kóng, hiān kai-tōaⁿ soán chêng ha̍p-chok khong-kan bô tōa, kan-taⁿ ū khó-lêng chhut-hiān tī soán āu ê Li̍p-hoat-īⁿ. Án-ne "chāi-iá tōa liân-bêng" sī siáⁿ-mi̍h óaⁿ-ko ?

　　 Bo̍k-chêng chāi-iá sè-le̍k tē-jī tōa ê Bîn-chiòng-tóng chú-se̍k Koa Bûn-tiat jīn-ûi, hiān-chāi kok-hōe 3 tóng lóng bô kòe pòaⁿ ê ki-lu̍t chiâⁿ koân, i iû-goân kám-kak, kè-ta̍t, chèng-chhek, lí-liām saⁿ hāng lóng ē ha̍h chiah ū pān-hoat ha̍p-chok.

　　 Tiong-kok Kok-bîn-tóng chú-se̍k Chu Li̍p-lûn "tōa liân-bêng"ê siūⁿ-hoat sī ùi tó-ūi lâi ê?

　　 La̍k-goe̍h cha̍p-gō͘, Tiong-kok Kok-bîn-tóng Tâi-pak chhī- gī-oân, chit piàn Tāi-an-khu li̍p-úi chham-soán-jîn Lô Tì-kiông piáu-sī,I beh tiû-pī cho͘-chit "chèng-tóng lûn-thè tōa liân-bêng", tùi-khòng Le̍k iâⁿ ké bîn-chú tōa liân-bêng, jî-chhiáⁿ jīn-ûi chāi-iá-tóng tio̍h chhiú khan chhiú ha̍p-chok, siáⁿ lâng choh chóng-thóng sī chhù-iàu būn-tê; i mā kiông-tiāu, i bô kóng bô chi-chhî Tiong-kok Kok-bîn-tóng chóng-thóng chham-soán-jîn Hāu Iú-gî, siōng tiōng-iàu-・ê bo̍k-phiau sī chèng-tóng lûn-thè. Nā chiàu Lô Tì-kiông ê kóng-hoat, soán chêng nā it-ti̍t î-chhî hiān-chhú-sî ê bîn-tiāu piáu-hiān, kàu-sî tong-jiân tio̍h ē khì Hāu Iú-gî pó Koa Bûn-tiat. Bo̍k-koài ín-khí Nâ iâⁿ lāi-pō͘ pō͘-hūn jîn-sū kā i tèng kah chhàu-thâu. Tē-jī kang, Lô Tì-kiông tī bīn-chheh téng-bīn hoat-chhut tō-khiam seng-bêng, goân-pún ī-tēng ê kì-chiá-hōe mā chhú-siau.

　　 Tiong-kok Kok-bîn-tóng chú-se̍k Chu Li̍p-lûn kóng beh thoân-kiat só͘-ū hui Le̍k ê pêng-iú kiōng cho͘ "chāi-iá tōa liân-bêng","chip-chèng tōa liân-bêng". Che tàu-té sī siáⁿ-mi̍h óaⁿ ko? Mài kóng 金小刀 m̄-chai siáⁿ ì-sù, lán it-poaⁿ lâng khòaⁿ m̄-bat. Lán si̍t-chāi chin hoâi-gî, Chu Li̍p-lûn chú-se̍k káⁿ chai-iáⁿ i ka-kī teh kóng siáⁿ? (230728)


Chù, 金溥聪 金小刀 chhiáⁿ liām Hôa-gí




七月二三，中国国民党全国代表大会，党主席朱立伦宣布，chit遍总统大选中国国民党beh团结所有非绿ê朋友共组「大同盟」、「在野大联盟」，未来中国国民党koh倒转来执政了后，koh beh kahta̍k个共同建立一个和平、安定、公平、正义ê「执政大联盟」，共同kā台湾péng-・过来，hō͘台湾koh khah好。

七月二五，中国国民党总统参选人侯友宜竞选办公室执行长金溥聪受访问ê时讲，完全m̄知影啥物是「执政大联盟」，伊讲，伊kah侯友宜lóng m̄知chit项代志，伊mā对朱主席忽然间tàn出chit个新名词感觉奇怪。Hit下晡中国国民党发言人杨智伃（û）to̍h回应讲，朱立伦主席tī全代会提起「执政大联盟」ê概念，tio̍h是beh团结所有泛蓝、非绿、在野ê力量，也tio̍h是结合所有理念仝款ê力量，完成hō͘民进党落台、政党轮替ê目标。

中国国民党发言人án-ne解说，m̄知头脑一流ê金小刀听有ah无？像阮chit种普通人实在是听无。到底是大选前beh「在野大联盟」？ah是大选了chiahbeh「执政大联盟」leh？若是大选前beh「在野大联盟」，到底beh án-chóaⁿ联án-chóaⁿ盟？敢有kah民众党主席柯文哲讲一声？无。朱立伦主席讲柯文哲主席真无闲。目前柯文哲ê民调是嬴过中国国民党ê侯有宜，náē-sái无kah人讲一声to̍h beh kah人「在野大联盟」？蓝营辅选人士有坦白讲，现阶段选前合作空间无大，kan-taⁿ有可能出现tī选后ê立法院。Án-ne「在野大联盟」是啥物碗糕？

　　目前在野势力第二大ê民众党主席柯文哲认为，现在国会3党lóng无过半ê机率chiâⁿ koân，伊犹原感觉，价值、政策、理念三项lóngēha̍hchiah有办法合作。

　　中国国民党主席朱立伦「大联盟」ê想法是ùi tó位来ê？

　　六月十五，中国国民党台北市议员、chit遍大安区立委参选人罗智强表示， 伊beh筹备组织「政党轮替大联盟」，对抗绿营假民主大联盟，而且认为在野党tio̍h手牵手合作，啥人作总统是次要问题；伊mā强调，伊无讲无支持中国国民党总统参选人侯友宜，上重要ê目标是政党轮替。若照罗智强ê讲法，选前若一直维持现此时ê民调表现，到时当然tio̍hē弃侯友宜保柯文哲。莫怪引起蓝营内部部分人士kā伊钉kah臭头。第二工，罗智强tī面册顶面发出道歉声明，原本预定ê记者会mā取消。

　　中国国民党主席朱立伦讲beh团结所有非绿ê朋友共组「在野大联盟」、「执政大联盟」。Che到底是啥物碗糕？Mài讲金小刀m̄知啥意思，咱一般人看m̄-bat。咱实在真怀疑，朱立伦主席敢知影伊家己teh讲啥？ (230728)


注：金溥聪 金小刀　　请念华语