《绿色短评》

 | | | 转寄

郭台铭hām眠teh讲gōng话！

作者 李南衡, ChoânTâijī/全台字 by Chng Hūiphêng 2023.07.30




Choânbîn Tâioânjī pán/全民台湾字版简称ChoânTâiJī

《 Le̍ksek toánphêng》 Lí Lâmhêng

　　　　　　　　Koeh Tâibêng hāmbîn teh kóng gōng ōe!

　　 Chhitgoe̍h cha̍pchhit, Hônghái chi̍pthoân chhòngpānjîn Koeh Tâibêng tâu su Bíkok 《Hôasēngtùn Iûpò 》 chíchhut, Tâioân kah Tiongkok chi kan, kòekhì tī "it tiong kok piáu " ê "kiújī kiōngsek" chihā, chinchē nî lâi tùi kok niáhe̍k gītê chìnhêng liáu ū sênghāu ê hia̍psiong, mā ta̍tsêng liáu ētàng ūnchok ê kauliû, tānsī tī 2016 nî Chhòa Engbûn tòngsoán chóngthóng liáuāu, Tiongkok í Chhòa Engbûn kīchoa̍t chiapsiū Pakkiaⁿ kā Tâioân khòaⁿ choh Tiongkok chi̍tpō͘hūn ê káisek choh líiû, chiongchí nn̄g hōaⁿ tùiōe, kàu taⁿ iáu bōe hôeho̍k. Koeh Tâibêng chíchhut, sūsi̍t siōng, hō͘ chipchèng ê Bînchìntóng khòaⁿ choh gántiong teng, the̍h tiāu chiah ē hoaⁿhí ê "kiújī kiōngsek", tī kòekhì 30 nî lāi íkeng chhiokchìn liáu nn̄g hōaⁿ chi kan kui pah bān piàn ê hō͘ hóng, tōa kuibô͘ tâuchu kah siang hiòng bō͘e̍k, kengchè chengtióng, múi lépài kúi pah panchhù ê ti̍thâng hângpan, hō͘ kíntiuⁿ kio̍ksè oānhô lo̍h・lâi, siūⁿ beh hòngkhì "it tiong kok pió" khengkè lâi kah Tiongkok tâmphòaⁿ, kiatkó kantaⁿ ē kakiông chiàncheng uihia̍p, hō͘ Tâioân tī kokchè siōng chìn chi̍tpō͘ hông ko͘li̍p, súnhāi Tâioân ê kengchè, inūi chiàncheng gûihiám kā tâuchu chiá hehkiaⁿ cháukhì, hō͘ choân sèkài lóng jīnûi Tâioân chin bô anchoân. Koeh Tâibêng piáusī, i tn̂gkî chútiuⁿ sûisî hôeho̍k Tâioân kah Tiongkok chi kan ê ti̍tchiap nn̄g hōaⁿ tâmphòaⁿ, che sī oânkái kíntiuⁿ kio̍ksè, ûihō͘ Tâioân bînchú, chūiû kah hoattī ê ûṳt tô͘kèng, chinchiàⁿ iúhāu ê tâmphòaⁿ, bô engkai hō͘ soánkí kah koânle̍k līek phòhoāi, chhì tô͘ beh līiōng BíTiong tùikhòng lâi tittio̍h hóchhù, choa̍ttùi sī sǹg bē ha̍p, koh khah bô khólêng chhútāi chinchiàⁿ iúhāu ê tâmphòaⁿ, tio̍h hiānsi̍t bīntùi énghióng Tâioân bīlâi siōngkài tōa ê insò͘ "Tiongkok", liânsòa tùiōe kah hia̍psiong. Koeh Tâibêng jīnûi, tī chit khoán ê khengkè ēbīn, Tâioân ū kàugia̍h ê khongkan chhionghun póhō͘ i ê bînchú, chūiû kah sengoa̍h hongsek, siōng tiōngiàu・ê sī, ánne ētàng chhōe tio̍h chi̍t tiâu ē kā sianghong ùi choa̍tpiah piⁿ giú tńglâi ê tōlō͘.

　　 Kòekhì 30 nî, nn̄g hōaⁿ koanhē náchhiūⁿ ū khah oânhô, tānsī m̄thang bē kìtit, kúi cha̍p nî lâi Tiongkok itchài kiôngtiāu, ē chīn siōngtōa ê ló͘le̍k chhōekiû hôpêng thóngit ê chiânkéng, tānsī choa̍ttùi bô iôngjím jīmhô hunlia̍t kokka ê Tâito̍k kiâⁿchò, choa̍ttùi bô chiapsiū tī kokchè siōng bú "nn̄gê Tiongkok" ahsī "it Tiong it Tâi". Tiongkok kataⁿ ū "it Tiong"."It Tiong kokpiáu ê kiújī kiōngsek", Tiongkok chū lâi m̄bat chiapsiū kòe, Bînchìntóng mā m̄bat chiapsiū kòe, hiānchāi kah chionglâi, mā bô hithō siáⁿmi̍h "it Tiong kok piáu ê kiújī kiōngsek". 2022 nî cha̍pgoe̍h cha̍pla̍k, Tiongkiōng chóngsukì 习近平 tī Jīcha̍ptōa khuibō͘sek hoatpiáu chèngtī pòkò ê sî piáusī, káikoat Tâioân būntê sī Tiongkok lâng kakī ê tāichì, tio̍h iû Tiongkok lâng lâi koattēng. Tiongkiōng kianchhî í siōng tōa sêngì, chīn siōng tōa ló͘le̍k chengchhú hôpêng thóngit ê chiânkéng, tānsī choa̍ttùi put sênglo̍k hòngkhì súiōng búle̍k. I kiôngtiāu,"chó͘ kok oânchoân thóngit ittēng beh si̍thiān, mā ittēng ē si̍thiān!" 习近平 ê tìlông ha̍kchiá Tēⁿ Éngnî kóng,"M̄ sī Tâioân beh thóngit ahsī m̄ ê būntê, si̍tchèsiōng sī siáⁿmi̍h sîchūn thóngit, ēng toh chi̍t chióng hongsek thóngit ê būntê."

　　Koeh Tâibêng kakī kóng 4 tang chêng thè tóng sī "nîkhin khùi sēng, chi̍tsî chhiongtōng", khòaⁿ i chòekīn ê tâusu lāṳông, kah nîkhin khùi sēng bô koanhē, náchhiūⁿ sī chi̍tê lâng hāmbîn teh kóng gōng ōe. 　　(230721)

Chù, 习近平chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng》 Lí Lâm-hêng

　　　　　　　　Koeh Tâi-bêng hām-bîn teh kóng gōng ōe!

　　 Chhit-goe̍h cha̍p-chhit, Hông-hái chi̍p-thoân chhòng-pān-jîn Koeh Tâi-bêng tâu su Bí-kok 《Hôa-sēng-tùn Iû-pò 》 chí-chhut, Tâi-oân kah Tiong-kok chi kan, kòe-khì tī "it tiong kok piáu " ê "kiú-jī kiōng-sek" chi-hā, chin-chē nî lâi tùi kok niá-he̍k gī-tê chìn-hêng liáu ū sêng-hāu ê hia̍p-siong, mā ta̍t-sêng liáu ē-tàng ūn-chok ê kau-liû, tān-sī tī 2016 nî Chhòa Eng-bûn tòng-soán chóng-thóng liáu-āu, Tiong-kok í Chhòa Eng-bûn kī-choa̍t chiap-siū Pak-kiaⁿ kā Tâi-oân khòaⁿ choh Tiong-kok chi̍t-pō͘-hūn ê kái-sek choh lí-iû, chiong-chí nn̄g hōaⁿ tùi-ōe, kàu taⁿ iáu bōe hôe-ho̍k. Koeh Tâi-bêng chí-chhut, sū-si̍t siōng, hō͘ chip-chèng ê Bîn-chìn-tóng khòaⁿ choh gán-tiong teng, the̍h tiāu chiah ē hoaⁿ-hí ê "kiú-jī kiōng-sek", tī kòe-khì 30 nî lāi í-keng chhiok-chìn liáu nn̄g hōaⁿ chi kan kui pah bān piàn ê hō͘ -hóng, tōa kui-bô͘ tâu-chu kah siang hiòng bō͘-e̍k, keng-chè cheng-tióng, múi lé-pài kúi pah pan-chhù ê ti̍t-hâng hâng-pan, hō͘ kín-tiuⁿ kio̍k-sè oān-hô lo̍h-・lâi, siūⁿ beh hòng-khì "it tiong kok pió" kheng-kè lâi kah Tiong-kok tâm-phòaⁿ, kiat-kó kan-taⁿ ē ka-kiông chiàn-cheng ui-hia̍p, hō͘ Tâi-oân tī kok-chè siōng chìn chi̍t-pō͘ hông ko͘-li̍p, sún-hāi Tâi-oân ê keng-chè, in-ūi chiàn-cheng gûi-hiám kā tâu-chu chiá heh-kiaⁿ cháu-khì, hō͘ choân sè-kài lóng jīn-ûi Tâi-oân chin bô an-choân. Koeh Tâi-bêng piáu-sī, i tn̂g-kî chú-tiuⁿ sûi-sî hôe-ho̍k Tâi-oân kah Tiong-kok chi kan ê ti̍t-chiap nn̄g hōaⁿ tâm-phòaⁿ, che sī oân-kái kín-tiuⁿ kio̍k-sè, ûi-hō͘ Tâi-oân bîn-chú, chū-iû kah hoat-tī ê ûi-it tô͘-kèng, chin-chiàⁿ iú-hāu ê tâm-phòaⁿ, bô eng-kai hō͘ soán-kí kah koân-le̍k lī-ek phò-hoāi, chhì tô͘ beh lī-iōng Bí-Tiong tùi-khòng lâi tit-tio̍h hó-chhù, choa̍t-tùi sī sǹg bē ha̍p, koh khah bô khó-lêng chhú-tāi chin-chiàⁿ iú-hāu ê tâm-phòaⁿ, tio̍h hiān-si̍t bīn-tùi éng-hióng Tâi-oân bī-lâi siōng-kài tōa ê in-sò͘ "Tiong-kok", liân-sòa tùi-ōe kah hia̍p-siong. Koeh Tâi-bêng jīn-ûi, tī chit khoán ê kheng-kè ē-bīn, Tâi-oân ū kàu-gia̍h ê khong-kan chhiong-hun pó-hō͘ i ê bîn-chú, chū-iû kah seng-oa̍h hong-sek, siōng tiōng-iàu-・ê sī, án-ne ē-tàng chhōe tio̍h chi̍t tiâu ē kā siang-hong ùi choa̍t-piah piⁿ giú tńg-lâi ê tō-lō͘.

　　 Kòe-khì 30 nî, nn̄g hōaⁿ koan-hē ná-chhiūⁿ ū khah oân-hô, tān-sī m̄-thang bē kì-tit, kúi cha̍p nî lâi Tiong-kok it-chài kiông-tiāu, ē chīn siōng-tōa ê ló͘-le̍k chhōe-kiû hô-pêng thóng-it ê chiân-kéng, tān-sī choa̍t-tùi bô iông-jím jīm-hô hun-lia̍t kok-ka ê Tâi-to̍k kiâⁿ-chò, choa̍t-tùi bô chiap-siū tī kok-chè siōng bú "nn̄g-ê Tiong-kok" ah-sī "it Tiong it Tâi". Tiong-kok ka-taⁿ ū "it Tiong"."It Tiong kok-piáu ê kiú-jī kiōng-sek", Tiong-kok chū lâi m̄-bat chiap-siū kòe, Bîn-chìn-tóng mā m̄-bat chiap-siū kòe, hiān-chāi kah chiong-lâi, mā bô hit-hō siáⁿ-mi̍h "it Tiong kok piáu ê kiú-jī kiōng-sek". 2022 nî cha̍p-goe̍h cha̍p-la̍k, Tiong-kiōng chóng-su-kì 习近平 tī Jī-cha̍p-tōa khui-bō͘-sek hoat-piáu chèng-tī pò-kò ê sî piáu-sī, kái-koat Tâi-oân būn-tê sī Tiong-kok lâng ka-kī ê tāi-chì, tio̍h iû Tiong-kok lâng lâi koat-tēng. Tiong-kiōng kian-chhî í siōng tōa sêng-ì, chīn siōng tōa ló͘-le̍k cheng-chhú hô-pêng thóng-it ê chiân-kéng, tān-sī choa̍t-tùi put sêng-lo̍k hòng-khì sú-iōng bú-le̍k. I kiông-tiāu,"chó͘ kok oân-choân thóng-it it-tēng beh si̍t-hiān, mā it-tēng ē si̍t-hiān!" 习近平 ê tì-lông ha̍k-chiá Tēⁿ Éng-nî kóng,"M̄ sī Tâi-oân beh thóng-it ah-sī m̄ ê būn-tê, si̍t-chè-siōng sī siáⁿ-mi̍h sî-chūn thóng-it, ēng toh chi̍t chióng hong-sek thóng-it ê būn-tê."

　　Koeh Tâi-bêng ka-kī kóng 4 tang chêng thè tóng sī "nî-khin khùi sēng, chi̍t-sî chhiong-tōng", khòaⁿ i chòe-kīn ê tâu-su lāi-iông, kah nî-khin khùi sēng bô koan-hē, ná-chhiūⁿ sī chi̍t-ê lâng hām-bîn teh kóng gōng ōe. 　　(230721)

Chù, 习近平chhiáⁿ liām Hôa-gí



　　七月十七，鸿海集团创办人郭台铭投书美国《华盛顿邮报》指出，台湾kah中国之间，过去tī「一中各表」ê「九二共识」之下，真chē年来对各领域议题进行了有成效ê协商，mā达成了ē-tàng运作ê交流，但是tī 2016年蔡英文当选总统了后，中国以蔡英文拒绝接受北京kā台湾看作中国一部分ê解释作理由，终止两岸对话，到taⁿ犹未恢复。郭台铭指出，事实上，hō͘执政ê民进党看作眼中钉，the̍h掉chiahē欢喜ê「九二共识」，tī过去30年内已经促进了两岸之间归百万遍ê互访、大规模投资kah双向贸易、经济增长、每礼拜几百班次ê直航航班， hō͘紧张局势缓和落来，想beh放弃「一中各表」框架来kah中国谈判，结果kan-taⁿē加强战争威胁，hō͘台湾tī国际上进一步hông孤立，损害台湾ê经济，因为战争危险kā投资者heh惊走去，hō͘全世界lóng认为台湾真无安全。郭台铭表示，伊长期主张随时恢复台湾kah中国之间ê直接两岸谈判，che是缓解紧张局势、维护台湾民主、自由kah法治ê唯一途径，真正有效ê谈判，无应该hō͘选举kah权力利益破坏，试图beh利用美中对抗来得tio̍h好处，绝对是算bē合，koh khah无可能取代真正有效ê谈判，tio̍h现实面对影响台湾未来上kài大ê因素「中国」，持续对话kah协商。郭台铭认为，tī chit款ê框架下面，台湾有够额ê空间充分保护伊ê民主、自由kah生活方式，上重要ê是，án-neē-tàng chhōe tio̍h一条ēkā双方ùi绝壁边giú转来ê道路。

　　过去30年，两岸关系ná像有khah缓和，但是m̄-thang bē记得，几十年来中国一再强调，ē尽尚大ê努力寻求和平统一ê前景，但是绝对不容忍任何分裂国家ê台独行径，绝对无接受tī国际上舞「两个中国」ah是「一中一台」。中国ka-taⁿ有「一中」。「一中各表ê九二共识」，中国自来m̄-bat接受过，民进党mā m̄-bat接受过，现在kah将来，mā无hit号啥物「一中各表ê九二共识」。2022年十月十六，中共总书记习近平tī二十大开幕式发表政治报告ê时表示，解决台湾问题是中国人家己ê代志，tio̍h由中国人来决定。中共坚持以尚大诚意、尽尚大努力争取和平统一ê前景，但是绝对不承诺放弃使用武力。伊强调，「祖国完全统一一定beh实现，mā一定ē实现！」习近平ê智囊学者郑永年讲，「M̄是台湾beh统一ah是m̄ê问题，实际上是啥物时阵统一，用toh一种方式统一ê问题。」

　　郭台铭家己讲4冬前退党是「年轻气盛、一时冲动」，看伊最近ê投书内容，kah年轻气盛无关系，ná像是一个人hām眠teh讲gōng话。　　(230721)

注：习近平　　请念华语