《绿色短评》

 | | | 转寄

中国国民党gōng话讲bē soah！

作者 李南衡, ChoânTâijī/全台字 by Chng Hūiphêng 2023.07.23



Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　 Lí Lâmhêng

　　　 Tiongkok Kokbîntóng gōng ōe kóng bē soah!

Tiongkok Kokbîntóng chóngthóng chhamsoánjîn Hâu Iúgî chòekīn ê bîntiāu bô khísek, chhitgoe̍h chhepeh, khiok thoânchhut Tiongkok Kokbîntóng ànsǹg Koeh Tâibêng chi loān káugoe̍h tiong ē soah, kàusî Koeh Tâibêng nā kui tūi, Hâu Iúgî ê bîntiāu tio̍h ē tòtńglâi kàu tējī, tio̍h ē khaisí kah Koa Bûntiat tâm ha̍pchok, chìnhêng hui Le̍k tōa chéngha̍p, jîchhiáⁿ bô pâithek "Hāu Koa phòe". Tiongkok Kokbîntóng kochàn ùithâu kàubóe ê thāitō͘, tio̍h sī beh ài Bînchiòngtóng chóngthóng chhamsoánjîn Koa Bûntiat "bô tiâukiāⁿ tâuhâng", Tiongkok Kokbîntóng bôkhólêng chiapsiū "Koa Hâu phòe".

Chhitgoe̍h chhepeh ēpo͘, Koa Bûntiat chhutse̍k iliâu sengki sángia̍p kìⁿbīnhōe koh ū hoatpiáu iánkáng. Kìchiá kā Koa Bûntiat kóng, Tiongkok Kokbîntóng kóng beh ài I "bô tiâukiāⁿ tâuhâng". Koa Bûntiat thiaⁿ・chi̍tē soah gāng・khì, ba̍kchiu tián tōatōa lúi tò mn̄g kóng,"bô tiâukiāⁿ tâuhâng?" náchhiūⁿ siongtong tio̍hkiaⁿ. Kìchiá mn̄g kóng, lí káⁿ ē tâuhâng? Koa Bûntiat soah haha tōachhiò kóng,"Ná ē ánne mn̄g? ・・ kuikhì ・・mài kóng chhiò." chiah ko͘h chhiòchhiòá kóng, ē hoat line taphok kìchiá.

Mài kóng Koa Bûntiat púnlâng thiaⁿtio̍h "bô tiâukiāⁿ tâuhâng" ē gāng・khì, lán bô sū lâng thiaⁿtio̍h mā kámkak thiⁿ o͘ chi̍t pêng. Lán seng lâi liáukái siáⁿmi̍h kiò choh "bô tiâukiāⁿ tâuhâng". Siochiàn sianghong, chiànsu ê hit pêng ūitio̍h hibāng kiatsok chiàncheng, ē thêchhut "bô tiâukiāⁿ tâuhâng", ínchún chiàn iâⁿ hit pêng sûi chāi ánchóaⁿ chhúlí, beh chian beh chú beh ánchóaⁿ koánlí khòngchè inê chèngtī kah siāhōe, lóng bô ìkiàn. Tānsī, nāsī khah iâⁿ hit pêng iaukiû tùihong "bô tiâukiāⁿ tâuhâng", ū khólêng ē ínkhí khah su hit pêng bē sóng kah hoânló, tìsú chiàncheng bô hoattō͘ kín kiatsok, tiantò kā chiàncheng thoa tn̂g.

　　 Nā chiàu chhitgoe̍h chhechhit《Hōelâu sinbûn bāng 》kongpò͘ siōng sin 7 goe̍hhūn chóngthóng tōasoán bîntiāu, tiâucha kiatkó hiánsī, ha̍ppèng chhīlāi tiānōe kah chhiúkiá ê tōaiūⁿpún tiāuchhâ tiong, Bînchiòngtóng Koa Bûntiat chichhî tō͘ í 30.8% tit tēit miâ, siókhóa niáseng chichhî tō͘ 29.3% ê Bînchìntóng Lōa Chhengtek, sianghong chhekū 1.5%, Tiongkok Kokbîntóng Hâu Iúgî phoa̍h phòa nn̄g siâⁿ, chichhî tō͘ kanta 18.5% siōngbóeá miâ.

Hônghái chi̍pthoân chhòngpānjîn Koeh Tâibêng chêng chi̍tchām thoânchhut kóng, iúì "Pēngkò͘ " Bînchiòngtóng. Chhitgoe̍h chhecha̍p Bînchiòngtóng chúse̍k, chóngthóng chhamsoánjîn Koa Bûntiat chèngsi̍t, koh kóng Koeh Tâibêng chòekīn iáu ū phah tiānōe hō͘ i, tānsī i chi̍tē khòaⁿ sī Koeh Tâibêng, i tio̍hkiaⁿ kah m̄ káⁿ chiap tiānōe. Ùi chittiám lán chaiiáⁿ, Koeh Tâibêng siūⁿ beh kah Koa Bûntiat ha̍pchok, m̄ sī kiò Koa Bûntiat "bô tiâukiāⁿ tâuhâng", sī chháichhú " Pēngkò͘ " Bînchiòngtóng ê hongsek, ìsù sī kóng Koa Bûntiat ētàng the̍h tio̍h chi̍t tōa pé kho͘ kho͘. Koeh Tâibêng sǹg sī ū sêngì.

　　 Chiàu Tiongkok Kokbîntóng kakī sóng ê sǹgpôaⁿ ánne phah, kàu bo̍kchêng ûichí chiànkó tēit miâ ê Koa Bûntiat, tio̍h hiòng chiànkó tēsaⁿ miâ ê Hâu Iúgî "bô tiâukiāⁿ tâuhâng". Tiongkok Kokbîntóng gōngōe kóng bē soah!

　　Khah kîkoài・ê sī, hoānnā tú tio̍h bô boánì ê tāichì, á・sī thiaⁿtio̍h bô ha̍hì ê ōe tio̍h ē sûisî thiàu khílâi mē lâng ê Koa Bûntiat, chit piàn Tiongkok Kokbîntóng kā i ánne sé bīn, kiò I "bô tiâukiāⁿ tâuhâng", Koa Bûntiat kèngjiân tiām chiⁿchiⁿ. Chit tiám ū siókhóa kîkoài. 　(230714)


Pe̍h-ōe-jī-pán/白话字版


《 Le̍k-sek toán-phêng 》　 Lí Lâm-hêng

　　　 Tiong-kok Kok-bîn-tóng gōng ōe kóng bē soah!

Tiong-kok Kok-bîn-tóng chóng-thóng chham-soán-jîn Hâu Iú-gî chòe-kīn ê bîn-tiāu bô khí-sek, chhit-goe̍h chhe-peh, khiok thoân-chhut Tiong-kok Kok-bîn-tóng àn-sǹg Koeh Tâi-bêng chi loān káu-goe̍h tiong ē soah, kàu-sî Koeh Tâi-bêng nā kui tūi, Hâu Iú-gî ê bîn-tiāu tio̍h ē tò-tńg-lâi kàu tē-jī, tio̍h ē khai-sí kah Koa Bûn-tiat tâm ha̍p-chok, chìn-hêng hui Le̍k tōa chéng-ha̍p, jî-chhiáⁿ bô pâi-thek "Hāu Koa phòe". Tiong-kok Kok-bîn-tóng ko-chàn ùi-thâu kàu-bóe ê thāi-tō͘, tio̍h sī beh ài Bîn-chiòng-tóng chóng-thóng chham-soán-jîn Koa Bûn-tiat "bô tiâu-kiāⁿ tâu-hâng", Tiong-kok Kok-bîn-tóng bô-khó-lêng chiap-siū "Koa Hâu phòe".

Chhit-goe̍h chhe-peh ē-po͘, Koa Bûn-tiat chhut-se̍k i-liâu seng-ki sán-gia̍p kìⁿ-bīn-hōe koh ū hoat-piáu ián-káng. Kì-chiá kā Koa Bûn-tiat kóng, Tiong-kok Kok-bîn-tóng kóng beh ài I "bô tiâu-kiāⁿ tâu-hâng". Koa Bûn-tiat thiaⁿ-・chi̍t-ē soah gāng-・khì, ba̍k-chiu tián tōa-tōa lúi tò mn̄g kóng,"bô tiâu-kiāⁿ tâu-hâng?" ná-chhiūⁿ siong-tong tio̍h-kiaⁿ. Kì-chiá mn̄g kóng, lí káⁿ ē tâu-hâng? Koa Bûn-tiat soah ha-ha tōa-chhiò kóng,"Ná ē án-ne mn̄g? ・・ kui-khì ・・mài kóng chhiò." chiah ko͘h chhiò-chhiò-á kóng, ē hoat line tap-hok kì-chiá.

Mài kóng Koa Bûn-tiat pún-lâng thiaⁿ-tio̍h "bô tiâu-kiāⁿ tâu-hâng" ē gāng-・khì, lán bô sū lâng thiaⁿ-tio̍h mā kám-kak thiⁿ o͘ chi̍t pêng. Lán seng lâi liáu-kái siáⁿ-mi̍h kiò choh "bô tiâu-kiāⁿ tâu-hâng". Sio-chiàn siang-hong, chiàn-su ê hit pêng ūi-tio̍h hi-bāng kiat-sok chiàn-cheng, ē thê-chhut "bô tiâu-kiāⁿ tâu-hâng", ín-chún chiàn iâⁿ hit pêng sûi chāi án-chóaⁿ chhú-lí, beh chian beh chú beh án-chóaⁿ koán-lí khòng-chè in-ê chèng-tī kah siā-hōe, lóng bô ì-kiàn. Tān-sī, nā-sī khah iâⁿ hit pêng iau-kiû tùi-hong "bô tiâu-kiāⁿ tâu-hâng", ū khó-lêng ē ín-khí khah su hit pêng bē sóng kah hoân-ló, tì-sú chiàn-cheng bô hoat-tō͘ kín kiat-sok, tian-tò kā chiàn-cheng thoa tn̂g.

　　 Nā chiàu chhit-goe̍h chhe-chhit《Hōe-lâu sin-bûn bāng 》kong-pò͘ siōng sin 7 goe̍h-hūn chóng-thóng tōa-soán bîn-tiāu, tiâu-cha kiat-kó hián-sī, ha̍p-pèng chhī-lāi tiān-ōe kah chhiú-ki-á ê tōa-iūⁿ-pún tiāu-chhâ tiong, Bîn-chiòng-tóng Koa Bûn-tiat chi-chhî tō͘ í 30.8% tit tē-it miâ, sió-khóa niá-seng chi-chhî tō͘ 29.3% ê Bîn-chìn-tóng Lōa Chheng-tek, siang-hong chhe-kū 1.5%, Tiong-kok Kok-bîn-tóng Hâu Iú-gî phoa̍h phòa nn̄g siâⁿ, chi-chhî tō͘ kan-ta 18.5% siōng-bóe-á miâ.

Hông-hái chi̍p-thoân chhòng-pān-jîn Koeh Tâi-bêng chêng chi̍t-chām thoân-chhut kóng, iú-ì "Pēng-kò͘ " Bîn-chiòng-tóng. Chhit-goe̍h chhe-cha̍p Bîn-chiòng-tóng chú-se̍k, chóng-thóng chham-soán-jîn Koa Bûn-tiat chèng-si̍t, koh kóng Koeh Tâi-bêng chòe-kīn iáu ū phah tiān-ōe hō͘ i, tān-sī i chi̍t-ē khòaⁿ sī Koeh Tâi-bêng, i tio̍h-kiaⁿ kah m̄ káⁿ chiap tiān-ōe. Ùi chit-tiám lán chai-iáⁿ, Koeh Tâi-bêng siūⁿ beh kah Koa Bûn-tiat ha̍p-chok, m̄ sī kiò Koa Bûn-tiat "bô tiâu-kiāⁿ tâu-hâng", sī chhái-chhú " Pēng-kò͘ " Bîn-chiòng-tóng ê hong-sek, ì-sù sī kóng Koa Bûn-tiat ē-tàng the̍h tio̍h chi̍t tōa pé kho͘ -kho͘. Koeh Tâi-bêng sǹg sī ū sêng-ì.

　　 Chiàu Tiong-kok Kok-bîn-tóng ka-kī sóng ê sǹg-pôaⁿ án-ne phah, kàu bo̍k-chêng ûi-chí chiàn-kó tē-it miâ ê Koa Bûn-tiat, tio̍h hiòng chiàn-kó tē-saⁿ miâ ê Hâu Iú-gî "bô tiâu-kiāⁿ tâu-hâng". Tiong-kok Kok-bîn-tóng gōng-ōe kóng bē soah!

　　Khah kî-koài-・ê sī, hoān-nā tú tio̍h bô boán-ì ê tāi-chì, á-・sī thiaⁿ-tio̍h bô ha̍h-ì ê ōe tio̍h ē sûi-sî thiàu khí-lâi mē lâng ê Koa Bûn-tiat, chit piàn Tiong-kok Kok-bîn-tóng kā i án-ne sé bīn, kiò I "bô tiâu-kiāⁿ tâu-hâng", Koa Bûn-tiat kèng-jiân tiām chiⁿ-chiⁿ. Chit tiám ū sió-khóa kî-koài. 　(230714)




中国国民党总统参选人侯友宜最近ê民调无起色，七月初八，却传出中国国民党预计郭台铭之乱九月中ēsoah，到时郭台铭若归队，侯友宜ê民调tio̍hē回转来到第二，tio̍hē开始kah柯文哲谈合作，进行非绿大整合，而且无排斥「侯柯配」。中国国民党高层ùi头到尾ê态度，tio̍h是beh爱民众党总统参选人柯文哲「无条件投降」，中国国民党无可能接受「柯侯配」。

七月初八下晡，柯文哲出席医疗生技产业见面会koh有发表演讲。记者kā柯文哲讲，中国国民党讲beh爱伊「无条件投降」。柯文哲听一下soah gāng去，目睭展大大蕊倒问讲：「无条件投降？」ná-chhiūⁿ相当tio̍h惊。记者问讲：你敢ē投降？柯文哲soah哈哈大笑讲：「Ná ē án-ne问？・・归气・・mài讲笑。」才ko͘h笑笑á讲，ē发line答覆记者。

Mài讲柯文哲本人听tio̍h「无条件投降」ē gāng去，咱无事人听tio̍h mā感觉天乌一旁。咱先来了解啥物叫作「无条件投降」。相战双方，战输ê hit pêng为tio̍h希望结朿战争，ē提出「无条件投降」，允准战嬴hit pêng随在按怎处理，beh煎beh煮beh按怎管理控制in-ê政治kah社会，lóng无意见。但是，若是khah嬴hit pêng要求对方「无条件投降」，有可能ē引起khah输hit旁bē爽kah烦恼，致使战争无法度紧结束，颠倒kā战争拖长。

　　若照七月初七《汇流新闻网》公布上新7月份总统大选民调，调查结果显示，合并市内电话kah手机á ê大样本调查中，民众党柯文哲支持度以30.8%得第一名，小可领先支持度29.3% ê民进党赖清德，双方差距1.5%，中国国民党侯友宜phoa̍h破两成，支持度kan-ta18.5%上尾á名。

鸿海集团创办人郭台铭前一站传出讲，有意「并购」民众党。七月初十民众党主席、总统参选人柯文哲证实，koh讲郭台铭最近犹有拍打电话hō͘伊，但是伊一下看是郭台铭，伊tio̍h惊kah m̄敢接电话。Ùi chit点咱知影，郭台铭想beh kah柯文哲合作，m̄是叫柯文哲「无条件投降」，是采取「并购」民众党ê方式，意思是讲柯文哲ē-tàng the̍h tio̍h一大把箍箍。郭台铭算是有诚意。

　　照中国国民党家己爽ê算盘án-ne拍，到目前为止战果第一名ê柯文哲，tio̍h向战果第三名ê侯友宜「无条件投降」。中国国民党gōng话讲bēsoah！

　　Khah奇怪-・ê是，凡若抵tio̍h无满意ê代志，抑是听tio̍h无合意ê话tio̍hē随时跳起来骂人ê柯文哲，chit遍中国国民党kā伊án-ne洗面、叫伊「无条件投降」，柯文哲竟然恬chiⁿ-chiⁿ。Chit点有小khóa奇怪。　(230714)