《绿色短评》

 | | | 转寄

Phô͘中国ê kha-chhng爱phô͘ tio̍h位！

作者 李南衡, ChoânTâijī/全台字 by Chng Hūiphêng 2023.07.16



Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　　　　　　　　Phô͘ Tiongkok ê khachhng ài phô͘ tio̍h ūi!

La̍kgoe̍h jīsaⁿ, Tiongkok Kokbîntóng chóngthóng chhamsoánjîn Hâu Iúgî khì Thôhn̂g chhamhiuⁿ, kóngtio̍h nn̄g hōaⁿ gītê ê sî piáusī i ē kèsio̍k ló͘le̍k, hō͘ nn̄g hōaⁿ chi kan ētàng chhinchhiūⁿ chi̍t ke lâng, hôhâi úntēng, bi̍tchhiat ê tùiōe kah kaulâu. Ēpo͘ mûithé mn̄g khí i nn̄g hōaⁿ lūnsu̍t "两岸一家人", kah Bînchiòngtóng chóngthóng chhamsoánjîn Koa Bûntiat ê "两岸一家亲" ū siáⁿ bô kâng? Hâu Iúgî ti̍tchiap phoe kóng, Koa Bûntiat ê nn̄g hōaⁿ chèngchhek piànlâi piànkhì, kóng ê ōe tiantian tótó. Chhò・liáu! Koa Bûntiat ùithâu kàubóe tio̍h sī chi̍t kù ōe "两岸一家亲".

Thiaⁿ Hâu Iúgî ánne kóng, lán tio̍h chaiiáⁿ i ēng chit kù ōe beh phô͘ Tiongkok ê khachhng, chha Koa Bûntiat chi̍tbān peh chhianlí! ū sinbûn mûithé kóng,"两岸一家亲" m̄ sī Koa Bûntiat thâu chi̍tê kóng・ê. Tongjiân! nāsī Koa Bûntiat thâu chi̍tê kóng "两岸一家亲", kah Hâu Iúgî kóng"两岸一家人" kāngkhoán, ná chhiūⁿ pàng phùi chi̍tsiaⁿ, bô lâng ē chhap i. Tiōngiàu・ê sī "两岸一家亲" siáⁿ lâng seng kóng・ê? 习近平.

　　 Lán chaiiáⁿ, 2013 nî cha̍pgoe̍h chhela̍k, Tiongkok kokka chúse̍k习近平 tī Ìnnî Bâlîtó chhamka Athài kengchè ha̍pchok hōegī (APEC) tē 21 kài hōegī, koh hōekiàn Siau Bāntiâng ê sî, tēit piàn chèngsek thêchhut "两岸一家亲"ê kónghoat. 习近平 kóng,"nn̄g hōaⁿ sianghong engkai kianchhî kiâⁿ nn̄g hōaⁿ koanhē hôpêng hoattián ê chèngkhak tōlō͘, soantō “两岸一家亲” ê líliām, kakiông kauliû ha̍pchok, kiōngtông chhiokchìn Tionghôa Bîncho̍k úitāi ho̍kheng. "2014 nî jīgoe̍h cha̍ppeh, 习近平 tī Pakkiaⁿ hōekiàn Tiongkok Kokbîntóng êngū chúse̍k Liân Chiàn ê sî, hoatpiáu liáu "kiōng îⁿ Tionghôa Bîncho̍k úitāi ho̍kheng ê Tiongkok bāng" ê tiōngiàu kóngōe, 习近平 kiôngtiāu,"hibāng nn̄g hōaⁿ sianghong péngchhî “两岸一家亲” ê líliām, sūnsè jîūi, chêsim hia̍ple̍k, chhuitōng nn̄g hōaⁿ koanhē hôpêng hoattián chhútit koh khah hó ê sêngkó, chōhok nn̄g hōaⁿ bînchiòng, kiōng îⁿ Tionghôa Bîncho̍k úitāi ho̍kheng ê Tiongkok bāng."che sī 习近平 tī sin hêngsè hē bīntùi nn̄g hōaⁿ koanhē hoattián só͘ choh ê tiōngiàu koh choânbīn ê lūnsu̍t.

Kiⁿî chiaⁿgoe̍h chhejī, Tiongkok kokka chúsek 习近平 hoatpiáu 2023 siⁿî tùi Tâioân hōsû, kah kūnî goântàn kiôngtiāu ê "itkoklióngchè" bô kâng, kiⁿî kantaⁿ thêkhí" 海峡两岸一家亲". Suijiân náchhiūⁿ ū khah hôoān, tānsī Τiongkiōng kunki kunkàm chiàusiông lâi "chhin", lâi jiáuloān Tâioân. Lán ùi chittiám mā ētàng khòaⁿchhut 习近平 púnlâng kah Tiongkok chènghú, jōanī khòaⁿtiōng chit kù "两岸一家亲"!

Tùi Tiongkok kio̍ksè "hóphīⁿsai" ê Koa Bûntiat chiok bô kántan, 2014 nî cha̍pitgoe̍h jīkáu tòngsoán Tâipakchhītiúⁿ, hoantńgnî (2015) pehgoe̍h cha̍pchhit khì Siōnghái chhamka "siang siâⁿ lūn tôaⁿ", tī hia thâuchi̍t piàn kóngchhut "两岸一家亲". I náchhiūⁿ cháchá tio̍h phīⁿ chhut 习近平 ū chi̍t kang ē choh hôngtè, Koa Bûntiat kín tī Siōnghái soantho̍k "sèngchí". Tī Koa Bûntiat soantho̍k "sèngchí" chìnchêng, i tongjiân mā chaiiáⁿ lán Hoatbūpō͘ Tiâuchakiok chiamtùi "两岸一家亲" ū choh kòe thóngchiàn tiâucha pòkò. Koa Bûntiat ê tiōngtiám sī tī Tâioân itti̍t soantho̍k 习近平 ê sèngchí "两岸一家亲", só͘í chiah ē tit Tiongkok sioh, chiahni̍h tit Tiongkok sioh ê chèngkheh tī Tâioân chhōe bô tējīê, bo̍kkoài Tiongkok hit hongbīn itti̍t beh ài Koa Bûntiat soán chóngthóng.

Ánne lán tio̍h chai, phô͘ Tiongkok ê khachhng ài phô͘ tio̍h ūi! (230707)

Chù, 两岸一家人　两岸一家亲　习近平　海峡两岸一家亲 chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》　　 Lí Lâm-hêng

　　　　　　　　Phô͘ Tiong-kok ê kha-chhng ài phô͘ tio̍h ūi!

La̍k-goe̍h jī-saⁿ, Tiong-kok Kok-bîn-tóng chóng-thóng chham-soán-jîn Hâu Iú-gî khì Thô-hn̂g chham-hiuⁿ, kóng-tio̍h nn̄g hōaⁿ gī-tê ê sî piáu-sī i ē kè-sio̍k ló͘-le̍k, hō͘ nn̄g hōaⁿ chi kan ē-tàng chhin-chhiūⁿ chi̍t ke lâng, hô-hâi ún-tēng, bi̍t-chhiat ê tùi-ōe kah kau-lâu. Ē-po͘ mûi-thé mn̄g khí i nn̄g hōaⁿ lūn-su̍t "两岸一家人", kah Bîn-chiòng-tóng chóng-thóng chham-soán-jîn Koa Bûn-tiat ê "两岸一家亲" ū siáⁿ bô kâng? Hâu Iú-gî ti̍t-chiap phoe kóng, Koa Bûn-tiat ê nn̄g hōaⁿ chèng-chhek piàn-lâi piàn-khì, kóng ê ōe tian-tian tó-tó. Chhò-・liáu! Koa Bûn-tiat ùi-thâu kàu-bóe tio̍h sī chi̍t kù ōe "两岸一家亲".

Thiaⁿ Hâu Iú-gî án-ne kóng, lán tio̍h chai-iáⁿ i ēng chit kù ōe beh phô͘ Tiong-kok ê kha-chhng, chha Koa Bûn-tiat chi̍t-bān peh chhian-lí! ū sin-bûn mûi-thé kóng,"两岸一家亲" m̄ sī Koa Bûn-tiat thâu chi̍t-ê kóng-・ê. Tong-jiân! nā-sī Koa Bûn-tiat thâu chi̍t-ê kóng "两岸一家亲", kah Hâu Iú-gî kóng"两岸一家人" kāng-khoán, ná chhiūⁿ pàng phùi chi̍t-siaⁿ, bô lâng ē chhap i. Tiōng-iàu-・ê sī "两岸一家亲" siáⁿ lâng seng kóng-・ê? 习近平.

　　 Lán chai-iáⁿ, 2013 nî cha̍p-goe̍h chhe-la̍k, Tiong-kok kok-ka chú-se̍k习近平 tī Ìn-nî Bâ-lî-tó chham-ka A-thài keng-chè ha̍p-chok hōe-gī (APEC) tē 21 kài hōe-gī, koh hōe-kiàn Siau Bān-tiâng ê sî, tē-it piàn chèng-sek thê-chhut "两岸一家亲"ê kóng-hoat. 习近平 kóng,"nn̄g hōaⁿ siang-hong eng-kai kian-chhî kiâⁿ nn̄g hōaⁿ koan-hē hô-pêng hoat-tián ê chèng-khak tō-lō͘, soan-tō “两岸一家亲” ê lí-liām, ka-kiông kau-liû ha̍p-chok, kiōng-tông chhiok-chìn Tiong-hôa Bîn-cho̍k úi-tāi ho̍k-heng. "2014 nî jī-goe̍h cha̍p-peh, 习近平 tī Pak-kiaⁿ hōe-kiàn Tiong-kok Kok-bîn-tóng êng-ū chú-se̍k Liân Chiàn ê sî, hoat-piáu liáu "kiōng îⁿ Tiong-hôa Bîn-cho̍k úi-tāi ho̍k-heng ê Tiong-kok bāng" ê tiōng-iàu kóng-ōe, 习近平 kiông-tiāu,"hi-bāng nn̄g hōaⁿ siang-hong péng-chhî “两岸一家亲” ê lí-liām, sūn-sè jî-ūi, chê-sim hia̍p-le̍k, chhui-tōng nn̄g hōaⁿ koan-hē hô-pêng hoat-tián chhú-tit koh khah hó ê sêng-kó, chō-hok nn̄g hōaⁿ bîn-chiòng, kiōng îⁿ Tiong-hôa Bîn-cho̍k úi-tāi ho̍k-heng ê Tiong-kok bāng."che sī 习近平 tī sin hêng-sè hē bīn-tùi nn̄g hōaⁿ koan-hē hoat-tián só͘ choh ê tiōng-iàu koh choân-bīn ê lūn-su̍t.

Kin-nî chiaⁿ-goe̍h chhe-jī, Tiong-kok kok-ka chú-sek 习近平 hoat-piáu 2023 sin-nî tùi Tâi-oân hō-sû, kah kū-nî goân-tàn kiông-tiāu ê "it-kok-lióng-chè" bô kâng, kin-nî kan-taⁿ thê-khí" 海峡两岸一家亲". Sui-jiân ná-chhiūⁿ ū khah hô-oān, tān-sī Τiong-kiōng kun-ki kun-kàm chiàu-siông lâi "chhin", lâi jiáu-loān Tâi-oân. Lán ùi chit-tiám mā ē-tàng khòaⁿ-chhut 习近平 pún-lâng kah Tiong-kok chèng-hú, jōa-nī khòaⁿ-tiōng chit kù "两岸一家亲"!

Tùi Tiong-kok kio̍k-sè "hó-phīⁿ-sai" ê Koa Bûn-tiat chiok bô kán-tan, 2014 nî cha̍p-it-goe̍h jī-káu tòng-soán Tâi-pak-chhī-tiúⁿ, hoan-tńg-nî (2015) peh-goe̍h cha̍p-chhit khì Siōng-hái chham-ka "siang siâⁿ lūn tôaⁿ", tī hia thâu-chi̍t piàn kóng-chhut "两岸一家亲". I ná-chhiūⁿ chá-chá tio̍h phīⁿ chhut 习近平 ū chi̍t kang ē choh hông-tè, Koa Bûn-tiat kín tī Siōng-hái soan-tho̍k "sèng-chí". Tī Koa Bûn-tiat soan-tho̍k "sèng-chí" chìn-chêng, i tong-jiân mā chai-iáⁿ lán Hoat-bū-pō͘ Tiâu-cha-kiok chiam-tùi "两岸一家亲" ū choh kòe thóng-chiàn tiâu-cha pò-kò. Koa Bûn-tiat ê tiōng-tiám sī tī Tâi-oân it-ti̍t soan-tho̍k 习近平 ê sèng-chí "两岸一家亲", só͘-í chiah ē tit Tiong-kok sioh, chiah-ni̍h tit Tiong-kok sioh ê chèng-kheh tī Tâi-oân chhōe bô tē-jī-ê, bo̍k-koài Tiong-kok hit hong-bīn it-ti̍t beh ài Koa Bûn-tiat soán chóng-thóng.

Án-ne lán tio̍h chai, phô͘ Tiong-kok ê kha-chhng ài phô͘ tio̍h ūi! (230707)

Chù, 两岸一家人　两岸一家亲　习近平　海峡两岸一家亲 chhiáⁿ liām Hôa-gí




六月二三，中国国民党总统参选人侯友宜去桃园chham香，讲tio̍h两岸议题ê时表示伊ē继续努力，hō͘两岸之间ē-tàng亲像一家人，和谐稳定，密切ê对话kah交流。下晡媒体问起伊两岸论述「两岸一家人」，kah民众党总统参选人柯文哲ê「两岸一家亲」有啥无仝？侯友宜直接批讲，柯文哲ê两岸政策变来变去，讲ê话颠颠倒倒。错了！柯文哲ùi头到尾tio̍h是一句话「两岸一家亲」。

听侯友宜án-ne讲，咱tio̍h知影伊用chit句话beh phô͘中国ê尻川，差柯文哲一万八千里！有新闻媒体讲：「两岸一家亲」m̄是柯文哲头一个讲ê。当然！若是柯文哲头一个讲「两岸一家亲」，kah侯友宜讲「两岸一家人」仝款，ná像放屁一声，无人ē插伊。重要ê是「两岸一家亲」啥人先讲ê？习近平。

　　咱知影，2013年十月初六，中国国家主席习近平tī印尼巴厘岛参加亚太经济合作会议 (APEC) 第21届会议，Koh会见萧万长ê时，第一遍正式提出「两岸一家亲」ê讲法。习近平讲：「两岸双方应该坚持行两岸关系和平发展ê正确道路，宣导『两岸一家亲』ê理念，加强交流合作，共同促进中华民族伟大复兴。」2014年二月十八，习近平tī北京会见中国国民党荣誉主席连战ê时，发表了「共圆中华民族伟大复兴ê中国梦」ê重要讲话，习近平强调，「希望两岸双方秉持『两岸一家亲』ê理念，顺势而为，齐心协力，推动两岸关系和平发展取得koh khah好ê成果，造福两岸民众，共圆中华民族伟大复兴ê中国梦。」这是习近平tī新形势下面对两岸关系发展所作ê重要koh全面ê论述。

今年正月初二，中国国家主席习近平发表2023新年对台湾贺词，kah旧年元旦强调ê「一国两制」无仝，今年kan-taⁿ提起「海峡两岸一家亲」．虽然ná像有khah和缓，但是中共军机军舰照常来「亲」、来扰乱台湾。咱ùi chit点māē-tàng看出习近平本人kah中国政府，jōa-nī看重chit句「两岸一家亲」！

对中国局势「好鼻师」ê柯文哲足无简单，2014年十一月二九当选台北市长，翻转年（2015）八月十七去上海参加「双城论坛」，tīhia头一遍讲出「两岸一家亲」。伊ná像早早tio̍h鼻出习近平有一工ē作皇帝，柯文哲紧tī上海宣读「圣旨」。Tī柯文哲宣读「圣旨」进前，伊当然mā知影咱法务部调查局针对「两岸一家亲」有作过统战调查报告。柯文哲ê重点是tī台湾一直宣读习近平ê圣旨「两岸一家亲」，所以才ē得中国惜，chiah-ni̍h得中国惜ê政客tī台湾chhōe无第二个，莫怪中国hit方面一直beh爱柯文哲选总统。

Án-ne咱tio̍h知：phô͘中国ê尻川爱phô͘ tio̍h位！ (230707)

注：两岸一家人　　两岸一家亲　　习近平　　海峡两岸一家亲　请念华语