《绿色短评》

 | | | 转寄

柯文哲讲人kā i抹乌！

作者 李南衡, ChoânTâijī/全台字 by Chng Hūiphêng 2023.07.09



Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　 Lí Lâmhêng

　　　　　　　　　　Koa Bûntiat kóng lâng kā i boah o͘ !

　　 La̍kgoe̍h jījī, 《 Chūiû Sîpò 》 phiautê siá, Koa Bûntiat kóng,"sī Tiongkok hit hongbīn itti̍t beh ài góa soán chóngthóng". Lāi bûn kóng, Bînchiòngtóng chóngthóng chhamsoánjîn Koa Bûntiat tī 2016 nî, Tâipakchhītiúⁿ jīmlāi, chiapsiū 《 Tâitāi Isìn 》hóngbūn, tùi hóngbūn chiá thêchhut kám ē soán chóngthóng ê būntê, Koa Bûntiat ê hôetap sī,"kakī engkai bē chhutlâi soán chóngthóng, suijiân Tiongkok hit hongbīn itti̍t beh ài góa soán. Suijiân kakī khólêng soán ē tiâu, tānsī chúiàu inūi kakī bô chúnpī, jîchhiáⁿ soán chóngthóng chit hāng tāichì ê bo̍ktek sī beh hō͘ pa̍t lâng kòe tio̍h koh khah hó ê sengoa̍h, góa kámkak kakī chò bē pí kîtha ê lâng chò koh khah hó."chhamkhó i chiapsiū hóngbūn só͘ kóng ê ōe, gōakài tio̍hkóng Koa Bûntiat sī Tiongkok siū ì ê hāusoánjîn.

La̍kgoe̍h jījī ēpo͘, Koa Bûntiat hôeèng piáusī, inūi soánkí teh beh kàu ah, ittēng ē ū boah âng, boah o͘ ê soanthoân chiamtùi i lâi, i kiôngtiāu che sī 2016 nî káugoe̍h tī《 Tâitāi Isìn 》téngbīn ê hóngbūn, i tongsî sī Tâipakchhītiúⁿ, inūi kípān Siangsiâⁿ lūntôaⁿ（Tāipak, Siōng hái ）ê sî, ittēng ē kah Tiongkok ū chi̍tkóa kauthong, hit tongsî Tiongkok hongbīn ū mn̄g i, íóng chohkòe Tâipakchhītiúⁿ・ê lóng ē siūⁿ beh soán chóngthóng, mn̄g i sī m̄ sī ē siūⁿ beh soán chóngthóng? Koa Bûntiat piáusī, hit tongsî i sī kiôngtiāu i tongsî choh Tâipakchhītiúⁿ, mā bē soán chóngthóng, tānsī gōakài beh ánchóaⁿ kóng, i mā bô pānhoat.

Lán the̍h la̍kgoe̍h jījī ê sinbûn pòtō kah 2016 nî káugoe̍h tī《 Tâitāi Isìn 》téngbīn ê hóngbūn sio tùichiàu, si̍tchāi m̄chai iáⁿ, Koa Bûntiat ná ē kóng lâng kā i boah o͘. Tàuté tó kúi tōaⁿ ōe, tó kúi kù ōe kā I boah o͘ á・sī boah âng. Choân phiⁿ lóng sī Koa Bûntiat cháchêng kóng ê ōe, ùṳt chi̍t kù sī liânsióng,"gōakài tio̍hkóng Koa Bûntiat sī Tiongkok siū ì ê hāusoánjîn."inūi Koa Bûntiat kakī kóng,"Tiongkok hit hongbīn itti̍t beh ài góa soán."i chit kù ōe, hông kámkak sī i teh tián kóng, Tiongkok hit hongbīn chin kahì i. Tongjiân ē hông liânsióng kóng"Koa Bûntiat sī Tiongkok siūì ê hāusoánjîn." Che ná sī siáⁿmi̍h boah o͘ leh?

　　 Lán beh ài hō͘ Koa Bûntiat chaiiáⁿ siáⁿmi̍h sī boa̍h o͘ ? boah o͘ tio̍h sī ēng bô kengkòe chèngsi̍t ê giânsû kongkek tùichhiú, paukoat chōiâu, tiòngsiong, chhiúhòa, oaikhiok sūsi̍t, á・sī kā pō͘hūn sūsi̍t thiⁿ iû ke bīsò͘, ēng pe̍hchha̍t ōe choh jînsin kongkek, hō͘ tùihong ê miâsiaⁿ bêngū kah khósìnsèng siūtio̍h chitgî. Lán kí chi̍tê lē lâi soatbêng, cháchêng ū chi̍t ūi Tâipakchhītiúⁿ miâ kiò choh Koa Bûntiat, 2018 nî saⁿgoe̍h cha̍pgō͘ àmsî, tī chi̍tê “Yo͘tuber” ti̍t pò chiatbo̍k téngbīn siūkhì khílâi mē pùnsòōe, i hiônghiông mē kóng,"bésiu miâchhùi tio̍h chîⁿ, bô siūⁿ beh khai hit tiâu chîⁿ. In tio̍h sī ánne loān kóng, lâng tio̍h chia̍h pn̄g, tio̍h ài hithō."ta̍kê miâchhùi lóng tio̍h chhèng. Hit ūi Koa Bûntiat chhītiúⁿ kàu taⁿ iáu bô kóngchhut siáⁿmi̍h sîkan, siáⁿmi̍h lâng tī siáⁿmi̍h só͘chāi, khui jōachē chîⁿ, siubé tó chi̍tê miâchhùi á・sī tó kúiê ê miâchhùi. Hit ūi Koa Bûntiat chhītiúⁿ íkeng lo̍hjīm ah, tānsī kàu kináji̍t iáubōe hêng Tâioân só͘ū ê miâchhùi chhengpe̍h. Che kiò choh boah o͘.

　　Koa Bûntiat kóng lâng kā i boah o͘ ! Kám ū?

　　 Ū chinchē miâchhùi kóng Koa Bûntiat chhītiúⁿ kā in boah o͘ ! kám bô? 　　(230630)


Pe̍h-ōe-jī-pán/白话字版


《 Le̍k-sek toán-phêng 》　 Lí Lâm-hêng

　　　　　　　　　　Koa Bûn-tiat kóng lâng kā i boah o͘ !

　　 La̍k-goe̍h jī-jī, 《 Chū-iû Sî-pò 》 phiau-tê siá, Koa Bûn-tiat kóng,"sī Tiong-kok hit hong-bīn it-ti̍t beh ài góa soán chóng-thóng". Lāi bûn kóng, Bîn-chiòng-tóng chóng-thóng chham-soán-jîn Koa Bûn-tiat tī 2016 nî, Tâi-pak-chhī-tiúⁿ jīm-lāi, chiap-siū 《 Tâi-tāi I-sìn 》hóng-būn, tùi hóng-būn chiá thê-chhut kám ē soán chóng-thóng ê būn-tê, Koa Bûn-tiat ê hôe-tap sī,"ka-kī eng-kai bē chhut-lâi soán chóng-thóng, sui-jiân Tiong-kok hit hong-bīn it-ti̍t beh ài góa soán. Sui-jiân ka-kī khó-lêng soán ē tiâu, tān-sī chú-iàu in-ūi ka-kī bô chún-pī, jî-chhiáⁿ soán chóng-thóng chit hāng tāi-chì ê bo̍k-tek sī beh hō͘ pa̍t lâng kòe tio̍h koh khah hó ê seng-oa̍h, góa kám-kak ka-kī chò bē pí kî-tha ê lâng chò koh khah hó."chham-khó i chiap-siū hóng-būn só͘ kóng ê ōe, gōa-kài tio̍h-kóng Koa Bûn-tiat sī Tiong-kok siū ì ê hāu-soán-jîn.

La̍k-goe̍h jī-jī ē-po͘, Koa Bûn-tiat hôe-èng piáu-sī, in-ūi soán-kí teh beh kàu ah, it-tēng ē ū boah âng, boah o͘ ê soan-thoân chiam-tùi i lâi, i kiông-tiāu che sī 2016 nî káu-goe̍h tī《 Tâi-tāi I-sìn 》téng-bīn ê hóng-būn, i tong-sî sī Tâi-pak-chhī-tiúⁿ, in-ūi kí-pān Siang-siâⁿ lūn-tôaⁿ（Tāi-pak, Siōng hái ）ê sî, it-tēng ē kah Tiong-kok ū chi̍t-kóa kau-thong, hit tong-sî Tiong-kok hong-bīn ū mn̄g i, í-óng choh-kòe Tâi-pak-chhī-tiúⁿ-・ê lóng ē siūⁿ beh soán chóng-thóng, mn̄g i sī m̄ sī ē siūⁿ beh soán chóng-thóng? Koa Bûn-tiat piáu-sī, hit tong-sî i sī kiông-tiāu i tong-sî choh Tâi-pak-chhī-tiúⁿ, mā bē soán chóng-thóng, tān-sī gōa-kài beh án-chóaⁿ kóng, i mā bô pān-hoat.

Lán the̍h la̍k-goe̍h jī-jī ê sin-bûn pò-tō kah 2016 nî káu-goe̍h tī《 Tâi-tāi I-sìn 》téng-bīn ê hóng-būn sio tùi-chiàu, si̍t-chāi m̄-chai iáⁿ, Koa Bûn-tiat ná ē kóng lâng kā i boah o͘. Tàu-té tó kúi tōaⁿ ōe, tó kúi kù ōe kā I boah o͘ á-・sī boah âng. Choân phiⁿ lóng sī Koa Bûn-tiat chá-chêng kóng ê ōe, ùi-it chi̍t kù sī liân-sióng,"gōa-kài tio̍h-kóng Koa Bûn-tiat sī Tiong-kok siū ì ê hāu-soán-jîn."in-ūi Koa Bûn-tiat ka-kī kóng,"Tiong-kok hit hong-bīn it-ti̍t beh ài góa soán."i chit kù ōe, hông kám-kak sī i teh tián kóng, Tiong-kok hit hong-bīn chin kah-ì i. Tong-jiân ē hông liân-sióng kóng"Koa Bûn-tiat sī Tiong-kok siū-ì ê hāu-soán-jîn." Che ná sī siáⁿ-mi̍h boah o͘ leh?

　　 Lán beh ài hō͘ Koa Bûn-tiat chai-iáⁿ siáⁿ-mi̍h sī boa̍h o͘ ? boah o͘ tio̍h sī ēng bô keng-kòe chèng-si̍t ê giân-sû kong-kek tùi-chhiú, pau-koat chō-iâu, tiòng-siong, chhiú-hòa, oai-khiok sū-si̍t, á-・sī kā pō͘-hūn sū-si̍t thiⁿ iû ke bī-sò͘, ēng pe̍h-chha̍t ōe choh jîn-sin kong-kek, hō͘ tùi-hong ê miâ-siaⁿ bêng-ū kah khó-sìn-sèng siū-tio̍h chit-gî. Lán kí chi̍t-ê lē lâi soat-bêng, chá-chêng ū chi̍t ūi Tâi-pak-chhī-tiúⁿ miâ kiò choh Koa Bûn-tiat, 2018 nî saⁿ-goe̍h cha̍p-gō͘ àm-sî, tī chi̍t-ê “Yo͘tuber” ti̍t pò chiat-bo̍k téng-bīn siū-khì khí-lâi mē pùn-sò-ōe, i hiông-hiông mē kóng,"bé-siu miâ-chhùi tio̍h chîⁿ, bô siūⁿ beh khai hit tiâu chîⁿ. In tio̍h sī án-ne loān kóng, lâng tio̍h chia̍h pn̄g, tio̍h ài hit-hō."ta̍k-ê miâ-chhùi lóng tio̍h chhèng. Hit ūi Koa Bûn-tiat chhī-tiúⁿ kàu taⁿ iáu bô kóng-chhut siáⁿ-mi̍h sî-kan, siáⁿ-mi̍h lâng tī siáⁿ-mi̍h só͘-chāi, khui jōa-chē chîⁿ, siu-bé tó chi̍t-ê miâ-chhùi á-・sī tó kúi-ê ê miâ-chhùi. Hit ūi Koa Bûn-tiat chhī-tiúⁿ í-keng lo̍h-jīm ah, tān-sī kàu kin-á-ji̍t iáu-bōe hêng Tâi-oân só͘-ū ê miâ-chhùi chheng-pe̍h. Che kiò choh boah o͘.

　　Koa Bûn-tiat kóng lâng kā i boah o͘ ! Kám ū?

　　 Ū chin-chē miâ-chhùi kóng Koa Bûn-tiat chhī-tiúⁿ kā in boah o͘ ! kám bô? 　　(230630)



　　六月二二，《自由时报》标题写，柯文哲讲：「是中国hit方面一直beh ài我选总统」。内文讲：民众党总统参选人柯文哲tī 2016年，台北市长任内，接受《台大医讯》访问，对访问者提出敢ē选总统ê问题，柯文哲ê回答是：「家己应该bē出来选总统，虽然中国hit方面一直beh ài我选。虽然家己可能选ē tiâu，但是主要因为家己无准备，而且选总统这项代志ê目的是beh hō͘ 别人过着koh khah好ê生活，我感觉家己做bē比其他ê人做koh khah好。」参考i接受访问所讲ê话，外界tio̍h讲柯文哲是中国授意ê候选人。

六月二二下晡，柯文哲回应表示，因为选举teh beh到ah，一定ē有抹红、抹乌ê宣传针对i来，伊强调che是2016年九月tī《台大医讯》顶面ê访问，伊当时是台北市长，因为举办双城论坛（台北、上海）ê时，一定ē kah中国有一kóa沟通，hit当时中国方面有问i，以往作过台北市长ê lóngē想beh选总统，问i是m̄是ē想beh选总统？柯文哲表示，hit当时i是强调i当时作台北市长，mā bē选总统，但是外界beh按怎讲，i mā无办法。

咱the̍h六月二二ê新闻报导kah 2016年九月tī《台大医讯》顶面ê访问相对照，实在m̄知影，柯文哲ná ē讲人kā伊抺乌。到底tó几段话、tó几句话kā i抺乌抑是抺红。全篇lóng是柯文哲早前讲ê话，唯一一句是联想：「外界tio̍h讲柯文哲是中国授意ê候选人。」因为柯文哲家己讲：「中国hit方面一直beh ài我选。」i chit句话，hông感觉是I teh展讲：中国hit方面真合意i。当然ē hông联想讲「柯文哲是中国授意ê候选人。」Che ná那是啥物抺乌咧？

　　咱beh ài hō͘柯文哲知影啥物是抺乌？抺乌tio̍h是用无经过证实ê言词攻击对手，包括造谣、中伤、丑化、歪曲事实、抑是kā部份事实添油加味素、用白贼话作人身攻击，hō͘对方ê名声名誉kah可信性受tio̍h质疑。咱举一个例来说明：早前有一位台北市长名叫作柯文哲，2018年三月十五暗时，tī一个“Youtuber”直播节目顶面受气起来骂垃圾话，伊雄雄骂讲，「买收名嘴tio̍h钱，无想beh开hit条钱。In tio̍h是án-ne乱讲，人tio̍h食饭、tio̍h ài hit号。」Ta̍k个名嘴lóng tio̍h铳。Hit位柯文哲市长到taⁿ犹无讲出啥物时间、啥物人tī啥物所在，开jōa-chē钱，收买tó一个名嘴抑是tó几个个名嘴。Hit位柯文哲市长已经落任ah，但是到今á日犹未还台湾所有ê名嘴清白。Che叫作抺乌。

　　柯文哲讲人kā i抹乌！敢有？

　　有真chē名嘴讲柯文哲市长kā in抹乌！敢无？　　(230630)