《绿色短评》

 | | | 转寄

Tang时á郭台铭chiah ē转大人？

作者 李南衡, ChoânTâijī/全台字 by Chng Hūiphêng 2023.05.28




Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tangsîá Koeh Tâibêng chiah ē tńgtōalâng?

　　 jīgoe̍h cha̍psì ēpo͘, Hónghái chhòngpānjîn Koeh Tâibêng kah li̍phoatīⁿ chêng īⁿtiúⁿ Ông Kimpêng hōebiān liáuāu, chiapsiū mûithé hóngbūn ê sî piáusī, khólêng 4 nî chêng i 年轻气盛, chi̍tsî ê chhiongtōng, chiah ē khì thèchhut Tiongkok Kokbîntóng. 年轻气盛, sī kóng lâng ū khah siàuliân, hia̍tkhì khah ōng. Chò tāichì khah chhongpōng. Kîkoài, ná ē kà bē ē, 4 nî āu Koeh táng kāngkhoán hiahni̍h 年轻气盛.

　　 Lán m̄ káⁿ sûipiān kóng Bînchiòngtóng chúse̍k Koa Bûntiat sī lāu hô͘lî, tānsī sió hô͘lî i choa̍ttùi tamtng ē khí. Koeh táng choân Tâioân cháu thàuthàu, pān kòe kúi tiûⁿ tōa hêng àmhōe, gō͘goe̍h chhecha̍p, tī phêⁿô͘ chōsè liáuāu, àmsî cha̍p tiám kóaⁿ tńglâi Tāipak kiû kìⁿ Koa Bûntiat chúse̍k, lâikàu chhù・ni̍h, Koa chúse̍k tēit kù ōe tio̍hkóng,"lí liân Kokbîntóng ê iûhì kuichek to m̄chai, tio̍h khì chhamka písài! "tējī kang,Koa chúse̍k thàulō͘, Koeh táng kā i kóng, Tiongkok Kokbîntóng chengtiàu i ê khólêngsèng ū 80%. Koeh táng iûgoân 年轻气盛!

Gō͘goe̍h chheit, Koeh Tâibêng tī Kohiông kóng ētàng tī "Pòaⁿpînsoaⁿ siat hu̍ttiān chām, anchoân hoattiān póchèng thàn chîⁿ", hông mē kah chhàuthâu, tējī kang kín hōe sitlé, iáu m̄ goān soah・khì, i kóng,"siatsú sióhêng lênggoân théchek kantaⁿ ū cha̍phun chi it, iūkoh chin anchoân, sī m̄ sī múi chi̍tê koānchhī lóng tio̍h khì chhōe anchoân ê hu̍t iôngha̍p ê tiānchhiúⁿ?" i chinchiàⁿ m̄ kiaⁿ Sinpak chhītiúⁿ Hâu Iúgî mn̄g i, hu̍t hùiliāu beh khǹg tó khì?

　　 Gō͘goe̍h chheit, Koeh táng tī Kohiông iánkáng ê sî kóng, beh tī saⁿ nî lāi kā kikhìlâng sángia̍p chò・khílâi, phài 8 bān kikhìlâng tíkhòng Kiōngkun ê ji̍p chhim. Koeh táng ê kikhìlâng sánphín, bo̍kchêng sī Siōnghái A kó͘ chiūⁿchhī ê "Kanggia̍p Pùliân"chèchō・ê. Lán seng mài kóng Hônghái kikhìlâng sī m̄ sī ū chiàntàula̍t, lán seng mn̄g Koeh táng, Tiongkok ná ē ínchún lí kā Siōnghái chèchō ê kikhìlâng ūn lâi Tâioân, kah Tiongkok Káihòngkun sio chiàn? siatsú Tiongkok ínchún lí ūn 8 bān kikhìlâng lâi Tâioân, tī Tâioân ê kikhìlâng káⁿ m̄ sī lóng ē siūtio̍h Tiongkok khòngchè? Beh ánchóaⁿ sio chiàn? Koeh támg íkeng m̄ sī 年轻气盛 ê būntê, sī káⁿ ū hoatsio?

　　Sìgoe̍h jījī, Koeh táng piáusī, tùihōaⁿ ū chin chē kunki jiáuloān Tâioân, sī chiamtùi Bînchìntóng "būsi̍t Tâito̍k kangchokchiá". Lán ài hôpêng, siongsìn tùihōaⁿ mā sī ài hôpêng, in ê kuntūi mā bô goānì sio chiàn, jînbîn mā bô goānì sio chiàn. Só͘í chíiàu Kokbîntóng, sīmchì i Koeh Tâibêng tòngsoán, kunki tio̍h bē koh lâi,"inūi góa put to̍k, lí put bú, goán tio̍h sī Tionghôa Bînkok", chíiàu Tionghôa Bînkok kokkî giâ koânkoân, chhiùⁿ Tionghôa Bînkok kokkoa,"góa kámkak in tio̍h bē lâi". Sió thêng leh! lán chaiiáⁿ 1958 nî pehgoe̍h jīsaⁿ ēpo͘ 6 tiám 30 pun, Tiongkok jînbîn Káihòngkun khaisí phàu phah Κimmn̂g,"Patjīsan Phàuchiàn" khaisí, itti̍t phah kàu 1979 nî chiah chèngsek thêng chiàn. Lán kok siongbông koaⁿpeng ū 2,661 lâng. Τiongkiōng phàu phah Κimmn̂g hit tongsî ê chipchèngchiá sī Tiongkok Kokbîntóng ê Chiúⁿ Κàichio̍h chóngthóng, siōng kài hoántùi Tâioân to̍kli̍p. Sī ánchóaⁿ nā ōaⁿ Tiongkok Kokbîntóng chipchèng á・sī Koeh táng choh chóngthóng, Tiongkok káihòng kun tio̍h bē phah Tâioân? Koeh táng kóng chiahê ōe íkeng pí 年轻气盛 koh khah siàuliân, chhaputto sī gō͘ hòe gíná kóng ê ōe.

Koeh 董hông phiàn nn̄g piàn, lú phiàn lú nîkhin. M̄ chai tang sîá Koeh Tâibêng chiah ē tńgtōalâng? 　(230519)

Chù, 年轻气盛 chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng

Tang-sî-á Koeh Tâi-bêng chiah ē tńg-tōa-lâng?

　　 jī-goe̍h cha̍p-sì ē-po͘, Hóng-hái chhòng-pān-jîn Koeh Tâi-bêng kah li̍p-hoat-īⁿ chêng īⁿ-tiúⁿ Ông Kim-pêng hōe-biān liáu-āu, chiap-siū mûi-thé hóng-būn ê sî piáu-sī, khó-lêng 4 nî chêng i 年轻气盛, chi̍t-sî ê chhiong-tōng, chiah ē khì thè-chhut Tiong-kok Kok-bîn-tóng. 年轻气盛, sī kóng lâng ū khah siàu-liân, hia̍t-khì khah ōng. Chò tāi-chì khah chhong-pōng. Kî-koài, ná ē kà bē ē, 4 nî āu Koeh táng kāng-khoán hiah-ni̍h 年轻气盛.

　　 Lán m̄ káⁿ sûi-piān kóng Bîn-chiòng-tóng chú-se̍k Koa Bûn-tiat sī lāu hô͘-lî, tān-sī sió hô͘-lî i choa̍t-tùi tam-tng ē khí. Koeh táng choân Tâi-oân cháu thàu-thàu, pān kòe kúi tiûⁿ tōa hêng àm-hōe, gō͘-goe̍h chhe-cha̍p, tī phêⁿ-ô͘ chō-sè liáu-āu, àm-sî cha̍p tiám kóaⁿ tńg-lâi Tāi-pak kiû kìⁿ Koa Bûn-tiat chú-se̍k, lâi-kàu chhù-・ni̍h, Koa chú-se̍k tē-it kù ōe tio̍h-kóng,"lí liân Kok-bîn-tóng ê iû-hì kui-chek to m̄-chai, tio̍h khì chham-ka pí-sài! "tē-jī kang,Koa chú-se̍k thàu-lō͘, Koeh táng kā i kóng, Tiong-kok Kok-bîn-tóng cheng-tiàu i ê khó-lêng-sèng ū 80%. Koeh táng iû-goân 年轻气盛!

Gō͘-goe̍h chhe-it, Koeh Tâi-bêng tī Ko-hiông kóng ē-tàng tī "Pòaⁿ-pîn-soaⁿ siat hu̍t-tiān chām, an-choân hoat-tiān pó-chèng thàn chîⁿ", hông mē kah chhàu-thâu, tē-jī kang kín hōe sit-lé, iáu m̄ goān soah-・khì, i kóng,"siat-sú sió-hêng lêng-goân thé-chek kan-taⁿ ū cha̍p-hun chi it, iū-koh chin an-choân, sī m̄ sī múi chi̍t-ê koān-chhī lóng tio̍h khì chhōe an-choân ê hu̍t iông-ha̍p ê tiān-chhiúⁿ?" i chin-chiàⁿ m̄ kiaⁿ Sin-pak chhī-tiúⁿ Hâu Iú-gî mn̄g i, hu̍t hùi-liāu beh khǹg tó khì?

　　 Gō͘-goe̍h chhe-it, Koeh táng tī Ko-hiông ián-káng ê sî kóng, beh tī saⁿ nî lāi kā ki-khì-lâng sán-gia̍p chò-・khí-lâi, phài 8 bān ki-khì-lâng tí-khòng Kiōng-kun ê ji̍p chhim. Koeh táng ê ki-khì-lâng sán-phín, bo̍k-chêng sī Siōng-hái A kó͘ chiūⁿ-chhī ê "Kang-gia̍p Pù-liân"chè-chō-・ê. Lán seng mài kóng Hông-hái ki-khì-lâng sī m̄ sī ū chiàn-tàu-la̍t, lán seng mn̄g Koeh táng, Tiong-kok ná ē ín-chún lí kā Siōng-hái chè-chō ê ki-khì-lâng ūn lâi Tâi-oân, kah Tiong-kok Kái-hòng-kun sio chiàn? siat-sú Tiong-kok ín-chún lí ūn 8 bān ki-khì-lâng lâi Tâi-oân, tī Tâi-oân ê ki-khì-lâng káⁿ m̄ sī lóng ē siū-tio̍h Tiong-kok khòng-chè? Beh án-chóaⁿ sio chiàn? Koeh támg í-keng m̄ sī 年轻气盛 ê būn-tê, sī káⁿ ū hoat-sio?

　　Sì-goe̍h jī-jī, Koeh táng piáu-sī, tùi-hōaⁿ ū chin chē kun-ki jiáu-loān Tâi-oân, sī chiam-tùi Bîn-chìn-tóng "bū-si̍t Tâi-to̍k kang-chok-chiá". Lán ài hô-pêng, siong-sìn tùi-hōaⁿ mā sī ài hô-pêng, in ê kun-tūi mā bô goān-ì sio chiàn, jîn-bîn mā bô goān-ì sio chiàn. Só͘-í chí-iàu Kok-bîn-tóng, sīm-chì i Koeh Tâi-bêng tòng-soán, kun-ki tio̍h bē koh lâi,"in-ūi góa put to̍k, lí put bú, goán tio̍h sī Tiong-hôa Bîn-kok", chí-iàu Tiong-hôa Bîn-kok kok kî giâ koân-koân, chhiùⁿ Tiong-hôa Bîn-kok kok-koa,"góa kám-kak in tio̍h bē lâi". Sió thêng leh! lán chai-iáⁿ 1958 nî peh-goe̍h jī-saⁿ ē-po͘ 6 tiám 30 pun, Tiong-kok jîn-bîn Kái-hòng-kun khai-sí phàu phah Κim-mn̂g,"Pat-jī-san Phàu-chiàn" khai-sí, it-ti̍t phah kàu 1979 nî chiah chèng-sek thêng chiàn. Lán kok siong-bông koaⁿ-peng ū 2,661 lâng. Τiong-kiōng phàu phah Κim-mn̂g hit tong-sî ê chip-chèng-chiá sī Tiong-kok Kok-bîn-tóng ê Chiúⁿ Κài-chio̍h chóng-thóng, siōng kài hoán-tùi Tâi-oân to̍k-li̍p. Sī án-chóaⁿ nā ōaⁿ Tiong-kok Kok-bîn-tóng chip-chèng á-・sī Koeh táng choh chóng-thóng, Tiong-kok kái-hòng -kun tio̍h bē phah Tâi-oân? Koeh táng kóng chiah-ê ōe í-keng pí 年轻气盛 koh khah siàu-liân, chha-put-to sī gō͘ hòe gín-á kóng ê ōe.

Koeh 董hông phiàn nn̄g piàn, lú phiàn lú nî-khin. M̄ chai tang sî-á Koeh Tâi-bêng chiah ē tńg-tōa-lâng? 　(230519)

Chù, 年轻气盛 chhiáⁿ liām Hôa-gí




　　二月十四下晡，鸿海创办人郭台铭kah立法院前院长王金平会面了后，接受媒体访问ê时表示，可能四年前伊年轻气盛，一时ê冲动，chiah ē去退出中国国民党。年轻气盛，是讲人有khah少年，血气khah旺。做代志khah仓皇（chhong-pōng）。奇怪，ná ē教bēē，四年后郭董仝款hiah-ni̍h年轻气盛。

　　咱m̄敢随便讲民众党主席柯文哲是老狐狸，但是小狐狸伊绝对担当ē起。郭董全台湾走透透，办过几场大型暗会，五月初十，tī澎湖造势了后，暗时十点赶转来台北求见柯文哲主席，来到厝里，柯主席第一句话tio̍h讲：「你连国民党ê游戏规则都m̄知，tio̍h去参加比赛！」第二工，柯主席透露，郭董kā伊讲，中国国民党徵召伊ê可能性有80%。郭董犹原年轻气盛！

五月初一，郭台铭tī高雄讲ētàngtī「半屏山设核电站，安全发电保证赚钱」，hông骂kah臭头，第二工紧会失礼，犹m̄愿煞去，伊讲：「设使小型能源体积kan-taⁿ有十分之一，又koh真安全，是m̄是每一个县市lóng tio̍h去chhōe安全ê核融合ê电厂？」伊真正m̄惊新北市长侯友宜问伊：核废料beh khǹg tó去？

　　五月初一，郭董tī高雄演讲ê时讲，beh tī 三年内kā机器人产业做起来，派8万机器人抵抗共军ê入侵。郭董ê机器人产品，目前是上海A股上市ê「工业富联」制造ê。咱先mài讲鸿海机器人是m̄是有战斗力，咱先问郭董，中国ná ē允准你kā上海制造ê机器人运来台湾，kah中国解放军sio战？设使中国允准你运8万机器人来台湾，tī台湾ê机器人敢m̄是lóngē受tio̍h中国控制？Beh按怎sio战？郭董已经m̄是年轻气盛ê问题，是káⁿ有发烧？

　　四月二二，郭董表示，对岸有真chē军机扰乱台湾，是针对民进党「务实台独工作者」。咱爱和平，相信对岸mā是爱和平，inê军队mā无愿意sio战，人民mā无愿意sio战。所以只要国民党、甚至伊郭台铭当选，军机tio̍h bē koh来，「因为我不独、你不武，阮tio̍h是中华民国」，只要中华民国国旗夯koân-koân，唱中华民国国歌，「我感觉in tio̍h bē来」。小停leh！咱知影1958年八月二三下晡6点30分，中国人民解放军开始炮拍金门，「八二三炮战」开始，一直拍到1979年才正式停战。咱国伤亡官兵有2,661人。中共炮拍金门hit当时ê执政者是中国国民党ê蒋介石总统，上kài反对台湾独立。是按怎若换中国国民党执政抑是郭董作总统，中国解放军tio̍h bē 拍台湾？郭董讲chiah-ê话已经比年轻气盛koh khah少年，差不多是五岁gín-á讲ê话。

郭董hông骗两遍，lú骗lú年轻。M̄知tang时á郭台铭chiahē转大人？　(230519)

注：年轻气盛　　请念华语