《绿色短评》

 | | | 转寄

中国「武统台湾」ná ē lú hoah lú细声？

作者 李南衡, ChoânTâijī/全台字 by Chng Hūiphêng 2023.06.04

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　　 Lí Lâmhêng

　　 Tiongkok "búthóng Tâioân" ná ē lú hoah lú sèsiaⁿ?

　　 Gō͘goe̍h jīsì, Tiongkok Kokbîntóng tiàukhui kìchiáhōe, kóng mênî tōasoán sī chiàncheng kah hôpêng soánkí, phoephêng Chhòa Engbûn chóngthóng kah Lōa Chhengtek hù chóngthóng sī "chiàncheng hoàná" ê kiōng hoān kiatkò͘. Chhiò sílâng! "chiàncheng hoàná" sī Tiongkok, chi̍t ji̍t kàu àm kah "chiàncheng hoàná" sái ba̍kbóe・ê chiàⁿ sī Tiongkok Kokbîntóng. Tiongkok chitê "chiàncheng hoàná" itti̍t hoah kóng beh ēng búle̍k thóngit Tâioân ("búthóng Tâioân"), kiaⁿ lán Tâioânlâng bô ài siongsìn, Tiongkok kunki kunlām làng sî bô làng ji̍t lâi lán Tâioân Hângkhong Sekpia̍t Hhu kah Háikiap Tiongsòaⁿ hūkīn jiáuloān. Chòekīn "búthóng Tâioân" ê siaⁿim ná ē lú lâi lú sèsiaⁿ?

　　 Tiongkok ê khongkhì ná ē piàn hiah kín? Tiongkok thâulâng kúi nî lâi káⁿ m̄ sī itti̍t kiôngtiāu, Tiongkok bô beh hòngkhì ēng búle̍k phah Tâioân. Nn̄g kò͘ goe̍h chêng, Tiongkok Káihòngkun siōngchiong Lâu Achiu hoatpiáu chi̍t phiⁿ 《Κimmn̂g chiànek kiámthó 》, Κimmn̂g Ēmn̂g hiahni̍h kīn, Tiongkok to̍h phah bē iâⁿ, keh chi̍tê Tâioân háikiap pêngkin ū 180 konglí khoah, siōng e̍h ê ūi mā iáu ū 128 konglí khoah, Tiongkok Káihòngkun sī beh ánchóaⁿ phah Tâioân leh? ánne sé bīn oânchoân sī gāi tio̍h 习近平 ê phīⁿ! lia̍h・khílâi, náchhiūⁿ iáu bōe phòaⁿ hêng. Chiah kòe nn̄g kò͘ goe̍h, Tiongkok tio̍h ēsái mē kóng beh "búthóng Tâioân" ê lâng sī gōnglâng ásī siáⁿmi̍h pháiⁿ sim.

　　Chit saⁿ nî Búhàn hìiām, hāi Tiongkok kengchè hoattián thêngtùn, gōakok chhiúⁿsiong tōa thiatthè, cháu liáuliáu. Tùi Tiongkok kengchè hoattián tongjiân tōa siong. Tēhng chènghú hū chè lúilúi, tēhng gînhâng khiàm jînbîn chîⁿ bôchâitiāu hêng, jînbîn oànsiaⁿ sù khí. Chòekīn Búhàn hìiām koh hoatsio・khílâi, chiàu Tiongkok choanka Chiong Lâmsan kóng, kàu gō͘goe̍h té, pêngkin múi lépài ē ū 4,000 bān lâng khakchín, kàu la̍kgoe̍h té, pêngkin múi lépài ē ū 6,500 bān lâng khakchín. Chit nn̄g nî, Bíkok kakiông kasok búchong Tâioân. Hiānhiān khòaⁿ sèkài tējī tōa kunsū kiôngkok Gôlô, phah chi̍tê siósió ê 乌克兰, goânpún siūⁿ kóng chiàmniá 乌克兰náchhiūⁿ tohténg ni kam, bô siūⁿ tioh chiahni̍h khùnlân, ni kam ê chhiú hiámhiámá hông tok・khì. Tiongkok tongjiân ū tehkhòaⁿ, Gôlô khì 乌克兰ê lō͘ pêⁿ tháⁿtháⁿ, to̍h phah kah chiah kankhó͘, hôhòng Tiongkok Tâioân keh chi̍tê Tâioân háikiap?

　　 Choân sèkài bînchú kokka ê hōegī lóng ē thêkhí, Tâioân háikiap ū tāichì, tio̍h sī sèkài ê tāichì. Náchhiūⁿ lóng sī kóng chin ê. Tiongkok bēsái tèⁿ m̄chai.

　　 Tiongkok chit kúi nî itti̍t soanthoân, hō͘ Tiongkok jînbîn siongsìn búthóng Tâioân ê chiàncheng ittēng ē hoatseng. Búthóng Tâioân chhá liáu siuⁿkòe thâu, gō͘goe̍h chhe, Tiongkok thiaukang hō͘ Tiongkok khólêng ē hāmji̍p"sì bīn chokchiàn" ê bûnchiuⁿ tī bānglō͘ téngbīn ti̍tti̍t thôaⁿ. Bûnchiuⁿ kóng Tiongkok nā "búthóng Tâioân", Tiongkok sûisî tio̍h bīntùi sì tiâu chiànsòaⁿ, tē 1 tiâu chiànsòaⁿ tī Tâioân háikiap, kah Bíkok, Tâioân, Ji̍tpún ê búchong le̍kliōng chiàntàu. Tē 2 tiâu chiànsòaⁿ tī tangpakhong, Bíkok khólêng liânha̍p Hânkok hiòng Tiongkok tangpak kongkek. Tē 3 tiâu chiànsòaⁿ tī Lâmhái, Bíkok khólêng liânha̍p Huilu̍tpin, sīmchì Òchiu kah Tanglâma kokka tùi Τiongkiōng kongkek. Tē 4 tiâu chiànsòaⁿ tī sailâmhong, Ìntō͘ khólêng ē thàn Tiongkok hāmji̍p chiànkio̍k lâi chìnkong TiongÌn piankéng.

　　 Lán bô kiaⁿ Tiongkok phah Tâioân. Siōng kiaⁿ Tâioân lâng bô kângsim. Chinchiàⁿ thoânkiat khílâi, siáⁿmi̍h mā m̄ kiaⁿ! (230526)

Chù, 习近平 乌克兰 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》　　 Lí Lâm-hêng

　　 Tiong-kok "bú-thóng Tâi-oân" ná ē lú hoah lú sè-siaⁿ?

　　 Gō͘-goe̍h jī-sì, Tiong-kok Kok-bîn-tóng tiàu-khui kì-chiá-hōe, kóng mê-nî tōa-soán sī chiàn-cheng kah hô-pêng soán-kí, phoe-phêng Chhòa Eng-bûn chóng-thóng kah Lōa Chheng-tek hù chóng-thóng sī "chiàn-cheng hoàn-á" ê kiōng hoān kiat-kò͘. Chhiò sí-lâng! "chiàn-cheng hoàn-á" sī Tiong-kok, chi̍t ji̍t kàu àm kah "chiàn-cheng hoàn-á" sái ba̍k-bóe-・ê chiàⁿ sī Tiong-kok Kok-bîn-tóng. Tiong-kok chit-ê "chiàn-cheng hoàn-á" it-ti̍t hoah kóng beh ēng bú-le̍k thóng-it Tâi-oân ("bú-thóng Tâi-oân"), kiaⁿ lán Tâi-oân-lâng bô ài siong-sìn, Tiong-kok kun-ki kun-lām làng sî bô làng ji̍t lâi lán Tâi-oân Hâng-khong Sek-pia̍t Hhu kah Hái-kiap Tiong-sòaⁿ hū-kīn jiáu-loān. Chòe-kīn "bú-thóng Tâi-oân" ê siaⁿ-im ná ē lú lâi lú sè-siaⁿ?

　　 Tiong-kok ê khong-khì ná ē piàn hiah kín? Tiong-kok thâu-lâng kúi nî lâi káⁿ m̄ sī it-ti̍t kiông-tiāu, Tiong-kok bô beh hòng-khì ēng bú-le̍k phah Tâi-oân. Nn̄g kò͘ goe̍h chêng, Tiong-kok Kái-hòng-kun siōng-chiong Lâu A-chiu hoat-piáu chi̍t phiⁿ 《Κim-mn̂g chiàn-ek kiám-thó 》, Κim-mn̂g Ē-mn̂g hiah-ni̍h kīn, Tiong-kok to̍h phah bē iâⁿ, keh chi̍t-ê Tâi-oân hái-kiap pêng-kin ū 180 kong-lí khoah, siōng e̍h ê ūi mā iáu ū 128 kong-lí khoah, Tiong-kok Kái-hòng-kun sī beh án-chóaⁿ phah Tâi-oân leh? án-ne sé bīn oân-choân sī gāi tio̍h 习近平 ê phīⁿ! lia̍h-・khí-lâi, ná-chhiūⁿ iáu bōe phòaⁿ hêng. Chiah kòe nn̄g kò͘ goe̍h, Tiong-kok tio̍h ē-sái mē kóng beh "bú-thóng Tâi-oân" ê lâng sī gōng-lâng á-sī siáⁿ-mi̍h pháiⁿ sim.

　　Chit saⁿ nî Bú-hàn hì-iām, hāi Tiong-kok keng-chè hoat-tián thêng-tùn, gōa-kok chhiúⁿ-siong tōa thiat-thè, cháu liáu-liáu. Tùi Tiong-kok keng-chè hoat-tián tong-jiân tōa siong. Tē-hng chèng-hú hū chè lúi-lúi, tē-hng gîn-hâng khiàm jîn-bîn chîⁿ bô-châi-tiāu hêng, jîn-bîn oàn-siaⁿ sù khí. Chòe-kīn Bú-hàn hì-iām koh hoat-sio-・khí-lâi, chiàu Tiong-kok choan-ka Chiong Lâm-san kóng, kàu gō͘-goe̍h té, pêng-kin múi lé-pài ē ū 4,000 bān lâng khak-chín, kàu la̍k-goe̍h té, pêng-kin múi lé-pài ē ū 6,500 bān lâng khak-chín. Chit nn̄g nî, Bí-kok ka-kiông ka-sok bú-chong Tâi-oân. Hiān-hiān khòaⁿ sè-kài tē-jī tōa kun-sū kiông-kok Gô-lô, phah chi̍t-ê sió-sió ê 乌克兰, goân-pún siūⁿ kóng chiàm-niá 乌克兰ná-chhiūⁿ toh-téng ni kam, bô siūⁿ tioh chiah-ni̍h khùn-lân, ni kam ê chhiú hiám-hiám-á hông tok-・khì. Tiong-kok tong-jiân ū teh-khòaⁿ, Gô-lô khì 乌克兰ê lō͘ pêⁿ tháⁿ-tháⁿ, to̍h phah kah chiah kan-khó͘, hô-hòng Tiong-kok Tâi-oân keh chi̍t-ê Tâi-oân hái-kiap?

　　 Choân sè-kài bîn-chú kok-ka ê hōe-gī lóng ē thê-khí, Tâi-oân hái-kiap ū tāi-chì, tio̍h sī sè-kài ê tāi-chì. Ná-chhiūⁿ lóng sī kóng chin ê. Tiong-kok bē-sái tèⁿ m̄-chai.

　　 Tiong-kok chit kúi nî it-ti̍t soan-thoân, hō͘ Tiong-kok jîn-bîn siong-sìn bú-thóng Tâi-oân ê chiàn-cheng it-tēng ē hoat-seng. Bú-thóng Tâi-oân chhá liáu siuⁿ-kòe thâu, gō͘-goe̍h chhe, Tiong-kok thiau-kang hō͘ Tiong-kok khó-lêng ē hām-ji̍p"sì bīn chok-chiàn" ê bûn-chiuⁿ tī bāng-lō͘ téng-bīn ti̍t-ti̍t thôaⁿ. Bûn-chiuⁿ kóng Tiong-kok nā "bú-thóng Tâi-oân", Tiong-kok sûi-sî tio̍h bīn-tùi sì tiâu chiàn-sòaⁿ, tē 1 tiâu chiàn-sòaⁿ tī Tâi-oân hái-kiap, kah Bí-kok, Tâi-oân, Ji̍t-pún ê bú-chong le̍k-liōng chiàn-tàu. Tē 2 tiâu chiàn-sòaⁿ tī tang-pak-hong, Bí-kok khó-lêng liân-ha̍p Hân-kok hiòng Tiong-kok tang-pak kong-kek. Tē 3 tiâu chiàn-sòaⁿ tī Lâm-hái, Bí-kok khó-lêng liân-ha̍p Hui-lu̍t-pin, sīm-chì Ò-chiu kah Tang-lâm-a kok-ka tùi Τiong-kiōng kong-kek. Tē 4 tiâu chiàn-sòaⁿ tī sai-lâm-hong, Ìn-tō͘ khó-lêng ē thàn Tiong-kok hām-ji̍p chiàn-kio̍k lâi chìn-kong Tiong-Ìn pian-kéng.

　　 Lán bô kiaⁿ Tiong-kok phah Tâi-oân. Siōng kiaⁿ Tâi-oân lâng bô kâng-sim. Chin-chiàⁿ thoân-kiat khí-lâi, siáⁿ-mi̍h mā m̄ kiaⁿ! (230526)

Chù, 习近平 乌克兰 chhiáⁿ liām Hôa-gí




　　五月二四，中国国民党召开记者会，讲明年大选是战争kah和平选举，批评蔡英文总统kah赖清德副总统是「战争贩á」ê共犯结构。笑死人！「战争贩á」是中国，一日到暗kah「战争贩á」sái目尾ê正是中国国民党。中国chit-ê「战争贩á」一直hoah讲beh用武力统一台湾（「武统台湾」），惊咱台湾人无ài相信，中国军机军舰làng时无làng日来咱台湾航空识别区kah海峡中线附近扰乱。最近「武统台湾」ê声音ná ē lú来lú细声？

　　中国ê空气ná ē变hiah紧？中国头人几年来敢m̄是一直强调，中国无beh放弃用武力拍台湾。两个月前，中国解放军上将刘亚洲发表一篇《金门战役检讨》，金门厦门hiah-ni̍h近，中国to̍h拍bē赢，隔一个台湾海峡平均有180公里阔，上狭ê位mā犹有128公里阔，中国解放军是beh按怎拍台湾leh？按呢洗面完全是碍tio̍h习近平ê鼻！掠起来，ná-chhiūⁿ犹未判刑。才过两个月，中国tio̍hē-sái骂讲beh「武统台湾」ê人是戆人抑是啥物pháiⁿ心。

　　Chit三年武汉肺炎，害中国经济发展停顿，外国厂商大撤退、走了了。对中国经济发展当然大伤。地方政府负债累累，地方银行欠人民钱无才调还，人民怨声四起。最近武汉肺炎koh发烧起来，照中国专家钟南山讲：到五月底，平均每礼拜ē有4,000万人确诊、到六月底，平均每礼拜ē有6,500万人确诊。Chit两年，美国加强加速武装台湾。现现看世界第二大军事强国俄罗，拍一个小小ê乌克兰，原本想讲占领乌克兰ná-chhiūⁿ桌顶ni柑，无想tioh chiah-ni̍h困难、ni柑ê手险险á hông剁去。中国当然有teh看，俄罗去乌克兰ê路平坦坦，to̍h拍kah chiah艰苦，何况中国台湾隔一个台湾海峡？

　　全世界民主国家ê会议lóng -ē提起，台湾海峡有代志，tio̍h是世界ê代志。Ná-chhiūⁿ lóng是讲真ê。中国bē-sái tèⁿ m̄知。

　　中国chit几年一直宣传，hō͘中国人民相信武统台湾ê战争一定-ē发生。武统台湾炒了siuⁿ过头，五月初，中国thiau工hō͘中国可能ē陷入「四面作战」ê文章tī网路顶面直直传。文章讲中国若「武统台湾」，中国随时tio̍h面对四条战线：第1条战线tī台湾海峡，kah美国、台湾、日本ê武装力量战斗。第2条战线tī东北方，美国可能联合韩国向中国东北攻击。第3条战线tī南海，美国可能联合菲律宾，甚至澳洲kah东南亚国家对中共攻击。第4条战线tī西南方，印度可能ē趁中国陷入战局来进攻中印边境。

　　咱无惊中国拍台湾。上惊台湾人无仝心。真正团结起来，啥物mā m̄惊！ (230526)

注：习近平　　乌克兰　　　请念华语