《绿色短评》

 | | | 转寄

台湾人hông háⁿ bē惊！hông骗bē行！

作者 李南衡, ChoânTâijī/全台字 by Chng Hūiphêng 2023.04.30



Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　 Lí Lâmhêng

　　　 Tâioân lâng hông háⁿ bē kiaⁿ! hông phiàn bē kiâⁿ!

Chhòa Engbûn chóngthóng chhōa thoân thiánkhui 10 kang ê "Bînchú tâng phōaⁿ kiōng iông chi lú", hôe têng kòekéng Bíkok Lo̍ksanki, Bí sai sîkan sìgoe̍h chhegō͘ chákhí kah Bíkok Chiònggīīⁿ gītiúⁿ 麦卡锡 hōetâm. Sìgoe̍h chhechhit, Chhòa Engbûn chóngthóng tńglâi kàu Tâioân. Tējī kang, Tiongkok to̍h tī Tâioân sìkho͘ûi chìnhêng saⁿ kang tōa kuibô͘ kunián. Ná chhiūⁿ kūnî (2022) pehgoe̍h chhejī chhesaⁿ Bíkok liânpang Chiònggīīⁿ gītiúⁿ 裴洛西 (Nancy Pelosi) chhōa chin chē ūi Bíkok kokhōe tāngliōng kip gīoân lâi Tâioân hóngbūn. Tńgkhì ê tējī kang, Tiongkok tī Tâioân sìkho͘ûi phah huitôaⁿ. Iáu koh ū ta̍kê chiok se̍ksāi ê Tiongkok kunki kunlām, saⁿ gō͘ tâi, cha̍p gōa tâi, sīmchì ū sî ū kúi cha̍p tâi, lâi lán Tâioân sailâm pêng ê Hângkhong sekpia̍t khu, kah Tâioân háikiap tiongsòaⁿ hūkīn jiáuloān, ēsái kóng sī làng sî bô làng ji̍t. Che tio̍h sī ēng bú・ê lâi khiónghat uihia̍p lán Tâioân.

　　 Ū sî, Tiongkok ē káiōaⁿ chi̍tê bô kâng ê hongsek, ēng bûn・ê lâi iúkoái khiphiàn lán Tâioân.

　　 Má Engkiú chêng chóngthóng khì Tiongkok "chè chó͘ hôpêng chi lú" ê tô͘tiong, saⁿgoe̍h jīpeh, Koktâipān chújīm Sòng Tô choankang khì Kangso͘ séng Khunsan chhī kah Má Engkiú chêng chóngthóng, Tâi khì, Tâi chheⁿ chō tâm. Ū lâng mn̄g kóng,"nn̄g hōaⁿ thóngit ū siáⁿ hóchhù?" Sòng Tô kóng chíiàu tī "chi̍tê Tiongkok goânchek" khengkè ēbīn, Tâioân tôngpau hibāng tit kàu siáⁿmi̍h lóng ēsái chhamsiông. Saⁿgoe̍h jīkáu, Koktâipān hoatgiânjîn Chu Hōngliân, tī chi̍tê lēhêng kìchiáhōe téngbīn chìn chi̍tpō͘ kóng,"thóngit liáuāu, Tâioân tôngpau ētàng hióngsiūtio̍h si̍tsi̍t chāichāi ê hóchhù."

　　Chu Hōngliân kóng,"thóngit liáuāu, Tâioân ētàng si̍thêng kah Tāilio̍k bô kâng ê siāhōe chètō͘. Tī khakpó kokka chúkoân, anchoân, hoattián līek ê chiântê hā, Tâioân tôngpau ê siāhōe chètō͘ kah sengoa̍h hongsek téng lóng ē tittio̍h chhionghun ê chuntiōng, Tâioân tôngpau ê sujîn châisán, chongkàu sìngióng, ha̍phoat koânek lóng ē tittio̍h chhionghun póchiòng. Tâioân ê châichèng siuji̍p lóng chóng ēsái ēng tī káisiān bînseng."

　　Chu Hōngliân kóng thóngit liáuāu, Tâioân lâng ē tittio̍h ê hóchhù, Tâioân lâng chitmá tio̍h sī ánne, ná tio̍h tán kàu thóngit? chin túhó i kóng chiahê mā lóng sī Tiongkok só͘ bô ê. Beh kóng m̄tio̍hkóng chi̍t kóa Tiongkok ū ê, lán Tâioân hiānsî bô ê, jîchhiáⁿ chiok kîthāi, chiok ǹgbāng ū ê, chhiūⁿkóng bo̍kchêng lán Tâioân "jînkin só͘tek" sī bíkim 32,811 kho͘, i nā kóng thóngit liáuāu, Tâioân ētàng kah Tiongkok kāngkhoán "jinku só͘tek" bíkim 5,000 kho͘. Ū lâng thiaⁿtio̍h chîⁿ ba̍kchiu tio̍h kim・khílâi, kekiám ū iúhe̍k sèng. Khósioh Chu Hōngliân kóng bē chhut chhùi, inūi bo̍kchêng Tiongkok " jinku só͘tek "bíkim 12,741 kho͘, sī Tâioân ê 38.9%," jinku só͘tek "choân kok tē 1 miâ ê Pakkiaⁿ chhī sī bíkim 25,789 kho͘, sī Tâioân ê 78.6%.

Chu Hōngliân kóng,"thóngit liáuāu, Tâioân ê châichèng siuji̍p lóng chóng ēsái ēng tī káisiān bînseng."i bô kóng bêng, sūsi̍t siōng i sī àmsī thóngit liáuāu, Tâioân bô pitiàu khui hiah chē chîⁿ bé kunhóe bé búkhì. I káⁿ m̄chai iáⁿ, Tio̍h sī ū Tiongkok chitê pháiⁿ chhùpiⁿ, chi̍t ji̍t kàu àm phài kunki kunlām lâi loān Tâioân, koh kóng bô beh hòngkhì ēng búle̍k káikoat Tâioân, Tâioân chiah suiàu khai hiah chē chîⁿ bé kunhóe bé búkhì!

　　 Hòngsim, Tâioân lâng hông háⁿ bē kiaⁿ! hông phiàn bē kiâⁿ! 　　 (230421)

Chù, 麦卡锡 　裴洛西 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》　 Lí Lâm-hêng

　　　 Tâi-oân lâng hông háⁿ bē kiaⁿ! hông phiàn bē kiâⁿ!

Chhòa Eng-bûn chóng-thóng chhōa thoân thián-khui 10 kang ê "Bîn-chú tâng phōaⁿ kiōng iông chi lú", hôe têng kòe-kéng Bí-kok Lo̍k-san-ki, Bí sai sî-kan sì-goe̍h chhe-gō͘ chá-khí kah Bí-kok Chiòng-gī-īⁿ gī-tiúⁿ 麦卡锡 hōe-tâm. Sì-goe̍h chhe-chhit, Chhòa Eng-bûn chóng-thóng tńg-lâi kàu Tâi-oân. Tē-jī kang, Tiong-kok to̍h tī Tâi-oân sì-kho͘-ûi chìn-hêng saⁿ kang tōa kui-bô͘ kun-ián. Ná chhiūⁿ kū-nî (2022) peh-goe̍h chhe-jī chhe-saⁿ Bí-kok liân-pang Chiòng-gī-īⁿ gī-tiúⁿ 裴洛西 (Nancy Pelosi) chhōa chin chē ūi Bí-kok kok-hōe tāng-liōng kip gī-oân lâi Tâi-oân hóng-būn. Tńg-khì ê tē-jī kang, Tiong-kok tī Tâi-oân sì-kho͘-ûi phah hui-tôaⁿ. Iáu koh ū ta̍k-ê chiok se̍k-sāi ê Tiong-kok kun-ki kun-lām, saⁿ gō͘ tâi, cha̍p gōa tâi, sīm-chì ū sî ū kúi cha̍p tâi, lâi lán Tâi-oân sai-lâm pêng ê Hâng-khong sek-pia̍t khu, kah Tâi-oân hái-kiap tiong-sòaⁿ hū-kīn jiáu-loān, ē-sái kóng sī làng sî bô làng ji̍t. Che tio̍h sī ēng bú-・ê lâi khióng-hat ui-hia̍p lán Tâi-oân.

　　 Ū sî, Tiong-kok ē kái-ōaⁿ chi̍t-ê bô kâng ê hong-sek, ēng bûn-・ê lâi iú-koái khi-phiàn lán Tâi-oân.

　　 Má Eng-kiú chêng chóng-thóng khì Tiong-kok "chè chó͘ hô-pêng chi lú" ê tô͘-tiong, saⁿ-goe̍h jī-peh, Kok-tâi-pān chú-jīm Sòng Tô choan-kang khì Kang-so͘ séng Khun-san chhī kah Má Eng-kiú chêng chóng-thóng, Tâi khì, Tâi chheⁿ chō tâm. Ū lâng mn̄g kóng,"nn̄g hōaⁿ thóng-it ū siáⁿ hó-chhù?" Sòng Tô kóng chí-iàu tī "chi̍t-ê Tiong-kok goân-chek" kheng-kè ē-bīn, Tâi-oân tông-pau hi-bāng tit kàu siáⁿ-mi̍h lóng ē-sái chham-siông. Saⁿ-goe̍h jī-káu, Kok-tâi-pān hoat-giân-jîn Chu Hōng-liân, tī chi̍t-ê lē-hêng kì-chiá-hōe téng-bīn chìn chi̍t-pō͘ kóng,"thóng-it liáu-āu, Tâi-oân tông-pau ē-tàng hióng-siū-tio̍h si̍t-si̍t chāi-chāi ê hó-chhù."

　　Chu Hōng-liân kóng,"thóng-it liáu-āu, Tâi-oân ē-tàng si̍t-hêng kah Tāi-lio̍k bô kâng ê siā-hōe chè-tō͘. Tī khak-pó kok-ka chú-koân, an-choân, hoat-tián lī-ek ê chiân-tê hā, Tâi-oân tông-pau ê siā-hōe chè-tō͘ kah seng-oa̍h hong-sek téng lóng ē tit-tio̍h chhiong-hun ê chun-tiōng, Tâi-oân tông-pau ê su-jîn châi-sán, chong-kàu sìn-gióng, ha̍p-hoat koân-ek lóng ē tit-tio̍h chhiong-hun pó-chiòng. Tâi-oân ê châi-chèng siu-ji̍p lóng chóng ē-sái ēng tī kái-siān bîn-seng."

　　Chu Hōng-liân kóng thóng-it liáu-āu, Tâi-oân lâng ē tit-tio̍h ê hó-chhù, Tâi-oân lâng chit-má tio̍h sī án-ne, ná tio̍h tán kàu thóng-it? chin tú-hó i kóng chiah-ê mā lóng sī Tiong-kok só͘ bô ê. Beh kóng m̄-tio̍h-kóng chi̍t kóa Tiong-kok ū ê, lán Tâi-oân hiān-sî bô ê, jî-chhiáⁿ chiok kî-thāi, chiok ǹg-bāng ū ê, chhiūⁿ-kóng bo̍k-chêng lán Tâi-oân "jîn-kin só͘-tek" sī bí-kim 32,811 kho͘, i nā kóng thóng-it liáu-āu, Tâi-oân ē-tàng kah Tiong-kok kāng-khoán "jin-ku só͘-tek" bí-kim 5,000 kho͘. Ū lâng thiaⁿ-tio̍h chîⁿ ba̍k-chiu tio̍h kim-・khí-lâi, ke-kiám ū iú-he̍k sèng. Khó-sioh Chu Hōng-liân kóng bē chhut chhùi, in-ūi bo̍k-chêng Tiong-kok " jin-ku só͘-tek "bí-kim 12,741 kho͘, sī Tâi-oân ê 38.9%," jin-ku só͘-tek "choân kok tē 1 miâ ê Pak-kiaⁿ chhī sī bí-kim 25,789 kho͘, sī Tâi-oân ê 78.6%.

Chu Hōng-liân kóng,"thóng-it liáu-āu, Tâi-oân ê châi-chèng siu-ji̍p lóng chóng ē-sái ēng tī kái-siān bîn-seng."i bô kóng bêng, sū-si̍t siōng i sī àm-sī thóng-it liáu-āu, Tâi-oân bô pit-iàu khui hiah chē chîⁿ bé kun-hóe bé bú-khì. I káⁿ m̄-chai iáⁿ, Tio̍h sī ū Tiong-kok chit-ê pháiⁿ chhù-piⁿ, chi̍t ji̍t kàu àm phài kun-ki kun-lām lâi loān Tâi-oân, koh kóng bô beh hòng-khì ēng bú-le̍k kái-koat Tâi-oân, Tâi-oân chiah su-iàu khai hiah chē chîⁿ bé kun-hóe bé bú-khì!

　　 Hòng-sim, Tâi-oân lâng hông háⁿ bē kiaⁿ! hông phiàn bē kiâⁿ! 　　 (230421)

Chù, 麦卡锡 　裴洛西 chhiáⁿ liām Hôa-gí




蔡英文总统chhōa团展开10天ê「民主同伴共荣之旅」，回程过境美国洛杉矶，美西时间四月初五早起kah美国众议院议长麦卡锡会谈。四月初七，蔡英文总统转来到台湾。第二工，中国tio̍htī台湾四箍围进行三工大规模军演。Ná像旧年（2022）八月初二初三美国联邦众议院议长裴洛西（Nancy Pelosi）chhōa真chē位美国国会重量级议员来台湾访问。转去ê第二工，中国tī台湾四箍围拍飞弹。犹koh有ta̍k个足熟似ê中国军机军舰，三五台、十外台、甚至有时有几十台，来咱台湾西南旁ê航空识别区、kah台湾海峡中线附近扰乱，ē-sái讲是làng时无làng日。Che tio̍h是用武ê来恐吓威胁咱台湾。

　　有时，中国ē改换一个无仝ê方式，用文ê来诱拐欺骗咱台湾。

　　马英九前总统去中国「祭祖和平之旅」ê途中，三月二八，国台办主任宋涛专工去江苏省昆山市kah马英九前总统、台企、台青座谈。有人问讲：「两岸统一有啥好处？」宋涛讲只要tī「一个中国原则」框架下面，台湾同胞希望得到啥物lóng ē-sái参详。三月二九，国台办发言人朱凤莲，tī一个例行记者会顶面进一步讲，「统一了后，台湾同胞ētàng享受tio̍h实实在在ê好处。」

　　朱凤莲讲：「统一了后，台湾ē-tàng实行kah大陆无仝ê社会制度。tī确保国家主权、安全、发展利益ê前提下，台湾同胞ê社会制度kah生活方式等lóngē得tio̍h充分ê尊重，台湾同胞ê私人财产、宗教信仰、合法权益lóngē得tio̍h充分保障。台湾ê财政收入lóng总ē-sái用tī改善民生。」

　　朱凤莲讲统一了后，台湾人ē得tio̍hê好处，台湾人chit-má tio̍h是án-ne，ná tio̍h等到统一？真tú好伊讲chiah-ê mā lóng是中国所无ê。Beh讲m̄-tio̍h讲一kóa中国有ê、咱台湾现时无ê，而且足期待、足ǹg望有ê，像讲目前咱台湾「人均所得」是美金32,811 kho͘，伊若讲统一了后，台湾ētàng kah中国仝款「人均所得」美金5,000 kho͘。有人听tio̍h钱目睭tio̍h金起来，加减有诱惑性。可惜朱凤莲讲bē出嘴，因为目前中国「人均所得」美金12,741 kho͘，是台湾ê 38.9%，「人均所得」全国第1名ê北京市是美金25,789 kho͘，是台湾ê 78.6%。

朱凤莲讲：「统一了后，台湾ê财政收入lóng总ē-sái用tī改善民生。」伊无讲明，事实上伊是暗示统一了后，台湾无必要开hiahchē钱买军火买武器。伊敢m̄知影：Tio̍h是有中国chit-ê pháiⁿ厝边，一日到暗派军机军舰来乱台湾，koh讲无beh放弃用武力解决台湾，台湾chiah需要开hiahchē钱买军火买武器！

　　放心，台湾人hôngháⁿbē惊！hông骗bē行！　　 (230421)

注：麦卡锡　　裴洛西　　　请念华语