《绿色短评》

 | | | 转寄

马英九前总统专工去中国卸世众！

作者 李南衡, ChoânTâijī/全台字 by Chng Hūiphêng 2023.04.16



Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Má Engkiú chêng chóngthóng choankang khì Tiongkok siàsìchèng!

　　 Saⁿgoe̍h jīchhit tiongtàu, Má Engkiú chêng chóngthóng poe khì Tiongkok, i kakī kóng sī "chè chó͘ hôpêng chi lí", che sī nn̄g hōaⁿ hun tī 74 nî lâi, thâu chi̍tê Tionghôa Bînkok sià jīm chóngthóng khì Tiongkok. I ê chè chó͘ hêngthêng ītēng 12 kang, seng pe Siōnghái, liáuāu khì Lâmkiaⁿ, Búhàn, Tn̂gsoa, Tiōngkhèng kah Siōnghái téng siâⁿchhī. I iáu bōe chhuthoat seng hongtōng, Tiongkok ê bāng bîn chhut siaⁿ hoangêng kóng," 马娘娘来了!" "chhàu khitchia̍h lâi ah" "i lâi phiàn chia̍h phiàn lim phiàn keⁿ̄g!" Tiongkok Kokbîntóng ūkàu soe, hō͘ i liânlūi hông mē choh "百年烂党".

　　 Saⁿgoe̍h jīpeh, Má Engkiú thâu chi̍tê hêngthêng sī khì Lâmkiaⁿ Tiongsanlêng, i ū thêkhí Sun Tiongsan chhòng kiàn Bînkok, hoatpiáu kongkhai tì sû mā ū thêkhí Tionghôa Bînkok. Tānsī Tiongkok Tiongiong tiānsītâi hoat pò͘ ê sinbûn siòngphìⁿ kah iáⁿim ōebīn, kanta lâu i ê têjī kah sèⁿmiâ, kîtha lóng chóng chián tiāu. Lo̍h khoán siá "pah cha̍pjī・saⁿ・jīcha̍p peh", liân "Bînkok" nn̄gjī to m̄ káⁿ siá, mā hông chián chián tiāu. Chhamkoan Tiongsanlêng, Má Engkiú ê tìsû kóng, nn̄g hōaⁿ jînbîn kāngkhoán sio̍k Tionghôa bîncho̍k, lóng sī Iāmn̂g kiáⁿsun. I chòeāu thêchhut "hôpêng hùntàu, chínheng Tionghôa" ê bo̍kphiau, chhimchhim ǹgbāng nn̄g hōaⁿ kiōngtông ló͘le̍k, tuikiû hôpêng, phiahbián chiàncheng, chīnla̍t chínheng Tionghôa. Che sī nn̄g hōaⁿ Tiongkok lâng bētàng siámphiah ê chekjīm, lán ittēng tio̍h ló͘le̍k si̍thiān.

Chin sitlé, saⁿgoe̍h jīit, Tâioân bînì kikimhōe hoatpiáu saⁿgoe̍h Tâioân jînbîn cho̍k jīntông bîniāu pòkò, hoathiān, 78% jīnûi kakī sī Tâioân lâng, 7.7% jīnûi kakī sī Tiongkok lâng. Lēnggōa 9.1% jīnûi kakī sī Tâioân lâng mā sī Tiongkok lâng. Tē saⁿ chióng lâng lán mài kā kèsǹg. Lán ittēng ài thêchhéⁿ Má Engkiú kah Tiongkok lâng, sūsi̍t siōng kináji̍t tī Tâioân jīnûi kakī sī Tiongkok lâng ê kanta 7.7% niāniā, 78% chiàm tōatosò͘ ê lâng jīnûi kakī sī Tâioân lâng, ka lín Tiongkok lâng beh chhòng siáⁿ bô koanhē, mài kā goán thoa thoa lo̍hkhì!

Saⁿgoe̍h jīpeh ēpo͘, Má Engkiú khì chham hóng "Tiongkok kīntāisú ìchí phokbu̍tkoán", he sī cháchêng Tiongkok Kokbîntóng sîtāi Tionghôa Bînkok chènghú tī Lâmkiaⁿ ê Chóngthónghú. Bat choh kòe Tiongkok Kokbîntóng chúse̍k, Tionghôa Bînkok chóngthóng ê Má Engkiú, nā iáu ū chi̍t tiám tiám á chūchun sim, chai kiànsiàu, engkai siámkhui, phiahbián khì hitkhoán só͘chāi, i khì chhamkoan hitkhoán só͘chāi bêngbêng tio̍h sī phóng sái boah bīn, siàsì siàchèng.

Saⁿgoe̍h saⁿcha̍p, Má Engkiú chêng chóngthóng chhamhóng Tiongkok Búhàn chhī tòngànkoán, tōatōa oló Tiongkok hônge̍k sêngkó bô tōapak hiòng gōa khoktiong, sī "tùi jînlūi ê kònghiàn". Lán lóng chaiiáⁿ 2000 nî itgoe̍h jīsaⁿ, Búhàn khaisí hong siâⁿ chìnchêng, chi̍t tōatīn lâng tio̍h cháulī Búhàn, cháukhì choân Tiongkok múi chi̍tê kaklo̍h, chi̍t tōatīn lâng cháukhì Kńgchiu, Hiangkáng, choánpoe khì choân sèkài kok só͘chāi, chin kín choân Tiongkok bô chi̍tê séng chhī chūtì khu bô tio̍hche, Búhàn hìiām chin kín tio̍h thòaⁿ kàu choân sèkài kok kok. Kàu kiⁿî sìgoe̍h chhesì ûichí, choân sèkài ū tio̍h kòe Búhàn hìiām ê lâng chhiaukòe 6 ek 7,664 bān, síbông jînsò͘ chhiaukòe 686 bān, iáu bô sǹg kengchè hoattián kah lângbîn sengoa̍h só͘ siūtio̍h ê pichhám énghióng, chiahê lóng sī Tiongkok Búhàn ê hó khankhioh. Kàu kináji̍t iáu ū chin chē kikò͘ teh tuicha, Búhàn hìiām ū khólêng hoatseng ê khígoân tē Búhàn si̍tgiām sek. Má Engkiú tōatōa oló Tiongkok hônge̍k sêngkó bô tōapak hiòng gōa khoktiong, sī "tùi jînlūi ê kònghiàn". Si̍tchāi siàsìchèng! (230407)

Chù , 马娘娘来了 百年烂党 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Má Eng-kiú chêng chóng-thóng choan-kang khì Tiong-kok sià-sì-chèng!

　　 Saⁿ-goe̍h jī-chhit tiong-tàu, Má Eng-kiú chêng chóng-thóng poe khì Tiong-kok, i ka-kī kóng sī "chè chó͘ hô-pêng chi lí", che sī nn̄g hōaⁿ hun tī 74 nî lâi, thâu chi̍t-ê Tiong-hôa Bîn-kok sià jīm chóng-thóng khì Tiong-kok. I ê chè chó͘ hêng-thêng ī-tēng 12 kang, seng pe Siōng-hái, liáu-āu khì Lâm-kiaⁿ, Bú-hàn, Tn̂g-soa, Tiōng-khèng kah Siōng-hái téng siâⁿ-chhī. I iáu bōe chhut-hoat seng hong-tōng, Tiong-kok ê bāng bîn chhut siaⁿ hoan-gêng kóng," 马娘娘来了!" "chhàu khit-chia̍h lâi ah" "i lâi phiàn chia̍h phiàn lim phiàn ke-nn̄g!" Tiong-kok Kok-bîn-tóng ū-kàu soe, hō͘ i liân-lūi hông mē choh "百年烂党".

　　 Saⁿ-goe̍h jī-peh, Má Eng-kiú thâu chi̍t-ê hêng-thêng sī khì Lâm-kiaⁿ Tiong-san-lêng, i ū thê-khí Sun Tiong-san chhòng kiàn Bîn-kok, hoat-piáu kong-khai tì sû mā ū thê-khí Tiong-hôa Bîn-kok. Tān-sī Tiong-kok Tiong-iong tiān-sī-tâi hoat pò͘ ê sin-bûn siòng-phìⁿ kah iáⁿ-im ōe-bīn, kan-ta lâu i ê tê-jī kah sèⁿ-miâ, kî-tha lóng chóng chián tiāu. Lo̍h khoán siá "pah cha̍p-jī・saⁿ・jī-cha̍p peh", liân "Bîn-kok" nn̄g-jī to m̄ káⁿ siá, mā hông chián chián tiāu. Chham-koan Tiong-san-lêng, Má Eng-kiú ê tì-sû kóng, nn̄g hōaⁿ jîn-bîn kāng-khoán sio̍k Tiong-hôa bîn-cho̍k, lóng sī Iām-n̂g kiáⁿ-sun. I chòe-āu thê-chhut "hô-pêng hùn-tàu, chín-heng Tiong-hôa" ê bo̍k-phiau, chhim-chhim ǹg-bāng nn̄g hōaⁿ kiōng-tông ló͘-le̍k, tui-kiû hô-pêng, phiah-bián chiàn-cheng, chīn-la̍t chín-heng Tiong-hôa. Che sī nn̄g hōaⁿ Tiong-kok lâng bē-tàng siám-phiah ê chek-jīm, lán it-tēng tio̍h ló͘-le̍k si̍t-hiān.

Chin sit-lé, saⁿ-goe̍h jī-it, Tâi-oân bîn-ì ki-kim-hōe hoat-piáu saⁿ-goe̍h Tâi-oân jîn-bîn cho̍k jīn-tông bîn-iāu pò-kò, hoat-hiān, 78% jīn-ûi ka-kī sī Tâi-oân lâng, 7.7% jīn-ûi ka-kī sī Tiong-kok lâng. Lēng-gōa 9.1% jīn-ûi ka-kī sī Tâi-oân lâng mā sī Tiong-kok lâng. Tē saⁿ chióng lâng lán mài kā kè-sǹg. Lán it-tēng ài thê-chhéⁿ Má Eng-kiú kah Tiong-kok lâng, sū-si̍t siōng kin-á-ji̍t tī Tâi-oân jīn-ûi ka-kī sī Tiong-kok lâng ê kan-ta 7.7% niā-niā, 78% chiàm tōa-to-sò͘ ê lâng jīn-ûi ka-kī sī Tâi-oân lâng, ka lín Tiong-kok lâng beh chhòng siáⁿ bô koan-hē, mài kā goán thoa thoa lo̍h-khì!

Saⁿ-goe̍h jī-peh ē-po͘, Má Eng-kiú khì chham hóng "Tiong-kok kīn-tāi-sú ì-chí phok-bu̍t-koán", he sī chá-chêng Tiong-kok Kok-bîn-tóng sî-tāi Tiong-hôa Bîn-kok chèng-hú tī Lâm-kiaⁿ ê Chóng-thóng-hú. Bat choh kòe Tiong-kok Kok-bîn-tóng chú-se̍k, Tiong-hôa Bîn-kok chóng-thóng ê Má Eng-kiú, nā iáu ū chi̍t tiám tiám á chū-chun sim, chai kiàn-siàu, eng-kai siám-khui, phiah-bián khì hit-khoán só͘-chāi, i khì chham-koan hit-khoán só͘-chāi bêng-bêng tio̍h sī phóng sái boah bīn, sià-sì sià-chèng.

Saⁿ-goe̍h saⁿ-cha̍p, Má Eng-kiú chêng chóng-thóng chham-hóng Tiong-kok Bú-hàn chhī tòng-àn-koán, tōa-tōa o-ló Tiong-kok hông-e̍k sêng-kó bô tōa-pak hiòng gōa khok-tiong, sī "tùi jîn-lūi ê kòng-hiàn". Lán lóng chai-iáⁿ 2000 nî it-goe̍h jī-saⁿ, Bú-hàn khai-sí hong siâⁿ chìn-chêng, chi̍t- tōa-tīn lâng tio̍h cháu-lī Bú-hàn, cháu-khì choân Tiong-kok múi chi̍t-ê kak-lo̍h, chi̍t- tōa-tīn lâng cháu-khì Kńg-chiu, Hiang-káng, choán-poe khì choân sè-kài kok só͘-chāi, chin kín choân Tiong-kok bô chi̍t-ê séng chhī chū-tì khu bô tio̍h-che, Bú-hàn hì-iām chin kín tio̍h thòaⁿ kàu choân sè-kài kok kok. Kàu kin-nî sì-goe̍h chhe-sì ûi-chí, choân sè-kài ū tio̍h kòe Bú-hàn hì-iām ê lâng chhiau-kòe 6 ek 7,664 bān, sí-bông jîn-sò͘ chhiau-kòe 686 bān, iáu bô sǹg keng-chè hoat-tián kah lâng-bîn seng-oa̍h só͘ siū-tio̍h ê pi-chhám éng-hióng, chiah-ê lóng sī Tiong-kok Bú-hàn ê hó khan-khioh. Kàu kin-á-ji̍t iáu ū chin chē ki-kò͘ teh tui-cha, Bú-hàn hì-iām ū khó-lêng hoat-seng ê khí-goân tē -- Bú-hàn si̍t-giām sek. Má Eng-kiú tōa-tōa o-ló Tiong-kok hông-e̍k sêng-kó bô tōa-pak hiòng gōa khok-tiong, sī "tùi jîn-lūi ê kòng-hiàn". Si̍t-chāi sià-sì-chèng! (230407)

Chù , 马娘娘来了 百年烂党 chhiáⁿ liām Hôa-gí





　　三月二七中昼，马英九前总统飞去中国，伊家己讲是「祭祖和平之旅」，che是两岸分治74年来，头一个中华民国卸任总统去中国。伊ê祭祖行程预定12工，先飞上海，了后去南京、武汉、长沙、重庆kah上海等城市。伊犹未出发先轰动，中国ê网民出声欢迎讲：「马娘娘来了！」「臭乞食来ah」「伊来骗食骗饮骗鸡卵！」中国国民党有够衰，hō͘伊连累hông骂作「百年烂党」。

　　三月二八，马英九头一个行程是去南京中山陵，伊有提起国父孙中山创建民国，发表公开致词mā有提起中华民国。但是中国中央电视台发布ê新闻相片kah影音画面，kan-ta留伊ê题字kah姓名，其他lóng总剪掉。落款写「百十二．三．廿八」，连「民国」两字都m̄敢写，mā hông剪剪掉。参观中山陵，马英九ê致词讲：两岸人民仝款属中华民族，lóng是炎黄子孙。伊最后提出「和平奋斗、振兴中华」ê目标，深深向望两岸共同努力，追求和平、避免战争，尽力振兴中华。che是两岸中国人bē-tàng闪避ê责任，咱一定tio̍h努力实现。

真失礼，三月二一，台湾民意基金会发表三月台湾人民族认同民调报告，发现：78%认为家己是台湾人，7.7%认为家己是中国人。另外9.1%认为家己是台湾人mā是中国人。第三种人咱mài kā计算。咱一定爱提醒马英九kah中国人，事实上今á日tī台湾认为家己是中国人ê kan-ta 7.7% niā-niā，78%占大多数ê人认为家己是台湾人，ka恁中国人beh创啥无关系，mài kā阮拖拖落去！

三月二八下晡，马英九去参访「中国近代史遗址博物馆」，he是早前中国国民党时代中华民国政府tī南京ê总统府。Bat作过中国国民党主席、中华民国总统ê马英九，若犹有一点点á自尊心、知见笑，应该闪开、避免去hit款所在，伊去参观hit款所在明明tio̍h是捧屎抹面，卸世卸众。

三月三十，马英九前总统参访中国武汉市档案馆，大大o-ló中国防疫成果无大幅向外扩张，是「对人类ê贡献」。咱lóng知影2000年一月二三，武汉开始封城进前，一大阵人tio̍h走离武汉，走去全中国每一个角落，一大阵人走去广州、香港，转飞去全世界各所在，真紧全中国无一个省市自治区无tio̍h灾，武汉肺炎真紧tio̍h湠到全世界各国。到今年四月初四为止，全世界有tio̍h过武汉肺炎ê人超过6亿7,664万，死亡人数超过686万，犹无算经济发展kah人民生活所受tio̍hê悲惨影响，chiah-êlóng是中国武汉ê好牵拾。到今á日犹有真chē机构teh追查，武汉肺炎有可能发生ê起源地—武汉实验室。马英九大大o-ló中国防疫成果无大幅向外扩张，是「对人类ê贡献」。实在卸世众！ (230407)
注1：卸世众（sìa-sì-chèng） 注2：马娘娘来了　百年烂党 请念华语