《绿色短评》

 | | | 转寄

中俄两国头人会谈，ná有可能带来乌克兰和平！

作者 李南衡, ChoânTâijī/全台字 by Chng Hūiphêng 2023.04.02


Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tiong Gô nn̄g kok thâulâng hōetâm, ná ū khólêng tòalâi 乌克兰 hôpêng!

　　 Saⁿgoe̍h jīcha̍p chì jījī, Tiongkok kok kechú 习近平 khì Bo̍hsukho kah Gôlô chóngthóng Phûteng hōetâm, lāṳông paukoat kachhim siang pêng koanhē, kengchè lénghe̍k, kokchè kio̍ksè kah 乌克兰 gûiki téng. Kîtiong hō͘ choân sèkài siōng koansim ê sī 乌克兰ê hôpêng. Saⁿgoe̍h chhecha̍p, toānkau chhit nî ê Ilóng kah 沙乌地阿拉伯 tī Tiongkok chhiâuchhiok hia̍pgī chi hā. Soanpò͘ tiôngkiàn gōakau koanhē, só͘í ū lâng jīnûi, 习近平 piàⁿsì beh chhioksêng Gô O͘ chiàncheng thêngchiàn, chhiamtēng hôpêng tiâuiok. 习近平 ū khólêng ē tittio̍h 诺贝尔 hôpêng chióng.

　　 Jīgoe̍h jīsì, Gô O͘ chiàncheng móa chi̍t nî hit kang, Tiongkok ū thêchhut "koanû chèngtī káikoat 乌克兰 gûiki ê Tiongkok li̍ptiûⁿ", thêchhut 12 tiám kónghoat, bô chi̍t tiám tùi kiatsok Gô O͘ chiàncheng ū pangchō͘.

　　 Saⁿgoe̍h cha̍psaⁿ, Tiongkok gōakaupō͘ soanpò͘ chi̍t lépài āu 习近平 beh khì hóngbūn Gôlô. Saⁿgoe̍h cha̍pchhit, kokchè hêngsū hoatīⁿ (ICC) í huihoat kā jîtông tòa līkhui 乌克兰 choh líiû, tùi Gôlô chóngthóng Phûteng hoatpò͘ chiàncheng chōe tāipó͘ lēng, sîkan chat kah chiah túhó? Náchhiūⁿ sī sūnsòa kéngkò chi̍t ji̍t kàu àm kóng bô beh hòngkhì búle̍k phah Tâioân ê 习近平, chhianbān m̄thang khì hoān tio̍h chiàncheng chōe!

Saⁿgoe̍h jīcha̍p chì jījī, Tiongkok kokka chúse̍k习近平 tī Bo̍hsukho kah Gôlô chóngthóng Phûteng kìⁿbīn hōetâm, sianghong tī hōe āu liânha̍p sengbêng tiong kiôngtiāu beh "thongkòe hôtâm" lâi káikoat 乌克兰 gûiki. Tānsī sehong kokka putchí kíntiuⁿ, khióngkiaⁿ Tiongkok ē chháichhú gōakau ásī kengchè ígōa ê chhiútōaⁿ, chìn chi̍tpō͘ chichhî Gôlô —— thêkiong búkhì hō͘ Phûteng tī chiàncheng tiong súiōng —— jîchhiáⁿ kiankò͘ chi̍tê hoántùi Pakiok kah Bíkok ê kiôngtōa chi̍pthoân. Sehong kokka ê hoânló sī kegia̍h・ê," kiankò͘ chi̍tê hoántùi Pakiok kah Bíkok ê kiôngtōa chi̍pthoân" sī chin・ê, tānsī "thêkiong búkhì hō͘ Phûteng tī chiàncheng tiong súiōng " sī bôkhólêng ê tāichì. Tiongkok piáubīn siōng késian kóng kiaⁿ Pakiok kah Bíkok kā chèchhâi, sūsi̍t siōng sī Tiongkok ài Gôlô kèsio̍k tī 乌克兰ê chiàncheng, 习近平 chúse̍k choa̍ttùi bôkhólêng hiòng Phûteng chóngthóng si ap, khǹg i thêngchí chiàncheng chōehêng kah pōhêng, sīmchì khǹg i thiat cháu kuntūi. Chiàn jú ke̍klia̍t, chiàn jú kú jú hó. Thi̍h phah ê sinthé mā bē khamtit saⁿ kang ê lo̍hsái, kèsio̍k chiàn・lo̍hkhì, Gôlô ittēng ē siausán lo̍hbah, kui bóe Gôlô ē piàn choh Tiongkok láutōa sengkhupiⁿ kiò chhùi ê "sèhàn ê". Tôngsî Pakiok kah Bíkok ê kok la̍t mā sī ē tōa sún, kàusî sèkài chinchiàⁿ ê láutōa tio̍h sī Tiongkok.

　　 乌克兰ê Chelensuki chóngthóng ū thàulō͘ kóng 乌克兰kah Gôlô ê hôpêng tâmphòaⁿ té sòaⁿ, Gôlô tio̍h hoeho̍k 乌克兰 léngthó͘ oânchéng, chuntiōng Liânha̍pkok hiànchiuⁿ, pôesióng itchhè chiàncheng súnsit, tênghoa̍t múi chi̍tê chhiokhoān chiàncheng chōe ê hoānlâng, íki̍p póchèng bē koh chhimhoān 乌克兰 téng chiântê.

Gôlô chóngthóng Phûteng lāisim chin siūⁿ beh thêng chiàn, tānsī i chhùi ta̍h chin ngē, i kóng 乌克兰tio̍h chinchiàⁿ chòkàu "khì Nazi hòa","khì kunsū hòa" kah oânchoân tiongli̍p ê saⁿ tōa iàukiāⁿ, siōng iàukín ê sī i kóng, Gôlô ê kuntūi bô beh ùi só͘ chiàm・tio̍h ê jīmhô thó͘tē thiatthè.

　　 Tiongkok, Gôlô nn̄g kok thâulâng hōetâm, ná ū khólêng tòalâi 乌克兰 hôpêng? góa khòaⁿ, nn̄gê thâulâng chíputkò sī ōe chi̍tê khangkhak piáⁿ, hō͘ gōnglâng chí íāu. 　　　(230324)

Chù, 习近平 　　 乌克兰　　 沙乌地阿拉伯 　　诺贝尔 chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng

Tiong Gô nn̄g kok thâu-lâng hōe-tâm, ná ū khó-lêng tòa-lâi 乌克兰 hô-pêng!

　　 Saⁿ-goe̍h jī-cha̍p chì jī-jī, Tiong-kok kok ke-chú 习近平 khì Bo̍h-su-kho kah Gô-lô chóng-thóng Phû-teng hōe-tâm, lāi-iông pau-koat ka-chhim siang pêng koan-hē, keng-chè léng-he̍k, kok-chè kio̍k-sè kah 乌克兰 gûi-ki téng. Kî-tiong hō͘ choân sè-kài siōng koan-sim ê sī 乌克兰ê hô-pêng. Saⁿ-goe̍h chhe-cha̍p, toān-kau chhit nî ê I-lóng kah 沙乌地阿拉伯 tī Tiong-kok chhiâu-chhiok hia̍p-gī chi hā. Soan-pò͘ tiông-kiàn gōa-kau koan-hē, só͘-í ū lâng jīn-ûi, 习近平 piàⁿ-sì beh chhiok-sêng Gô O͘ chiàn-cheng thêng-chiàn, chhiam-tēng hô-pêng tiâu-iok. 习近平 ū khó-lêng ē tit-tio̍h 诺贝尔 hô-pêng chióng.

　　 Jī-goe̍h jī-sì, Gô O͘ chiàn-cheng móa chi̍t nî hit kang, Tiong-kok ū thê-chhut "koan-û chèng-tī kái-koat 乌克兰 gûi-ki ê Tiong-kok li̍p-tiûⁿ", thê-chhut 12 tiám kóng-hoat, bô chi̍t tiám tùi kiat-sok Gô O͘ chiàn-cheng ū pang-chō͘.

　　 Saⁿ-goe̍h cha̍p-saⁿ, Tiong-kok gōa-kau-pō͘ soan-pò͘ chi̍t lé-pài āu 习近平 beh khì hóng-būn Gô-lô. Saⁿ-goe̍h cha̍p-chhit, kok-chè hêng-sū hoat-īⁿ (ICC) í hui-hoat kā jî-tông tòa lī-khui 乌克兰 choh lí-iû, tùi Gô-lô chóng-thóng Phû-teng hoat-pò͘ chiàn-cheng chōe tāi-pó͘ lēng, sî-kan chat kah chiah tú-hó? Ná-chhiūⁿ sī sūn-sòa kéng-kò chi̍t ji̍t kàu àm kóng bô beh hòng-khì bú-le̍k phah Tâi-oân ê 习近平, chhian-bān m̄-thang khì hoān tio̍h chiàn-cheng chōe!

Saⁿ-goe̍h jī-cha̍p chì jī-jī, Tiong-kok kok-ka chú-se̍k习近平 tī Bo̍h-su-kho kah Gô-lô chóng-thóng Phû-teng kìⁿ-bīn hōe-tâm, siang-hong tī hōe āu liân-ha̍p seng-bêng tiong kiông-tiāu beh "thong-kòe hô-tâm" lâi kái-koat 乌克兰 gûi-ki. Tān-sī se-hong kok-ka put-chí kín-tiuⁿ, khióng-kiaⁿ Tiong-kok ē chhái-chhú gōa-kau á-sī keng-chè í-gōa ê chhiú-tōaⁿ, chìn chi̍t-pō͘ chi-chhî Gô-lô —— thê-kiong bú-khì hō͘ Phû-teng tī chiàn-cheng tiong sú-iōng —— jî-chhiáⁿ kian-kò͘ chi̍t-ê hoán-tùi Pak-iok kah Bí-kok ê kiông-tōa chi̍p-thoân. Se-hong kok-ka ê hoân-ló sī ke-gia̍h-・ê," kian-kò͘ chi̍t-ê hoán-tùi Pak-iok kah Bí-kok ê kiông-tōa chi̍p-thoân" sī chin-・ê, tān-sī "thê-kiong bú-khì hō͘ Phû-teng tī chiàn-cheng tiong sú-iōng " sī bô-khó-lêng ê tāi-chì. Tiong-kok piáu-bīn siōng ké-sian kóng kiaⁿ Pak-iok kah Bí-kok kā chè-chhâi, sū-si̍t siōng sī Tiong-kok ài Gô-lô kè-sio̍k tī 乌克兰ê chiàn-cheng, 习近平 chú-se̍k choa̍t-tùi bô-khó-lêng hiòng Phû-teng chóng-thóng si ap, khǹg i thêng-chí chiàn-cheng chōe-hêng kah pō-hêng, sīm-chì khǹg i thiat cháu kun-tūi. Chiàn jú ke̍k-lia̍t, chiàn jú kú jú hó. Thi̍h phah ê sin-thé mā bē kham-tit saⁿ kang ê lo̍h-sái, kè-sio̍k chiàn-・lo̍h-khì, Gô-lô it-tēng ē siau-sán lo̍h-bah, kui bóe Gô-lô ē piàn choh Tiong-kok láu-tōa seng-khu-piⁿ kiò chhùi ê "sè-hàn ê". Tông-sî Pak-iok kah Bí-kok ê kok la̍t mā sī ē tōa sún, kàu-sî sè-kài chin-chiàⁿ ê láu-tōa tio̍h sī Tiong-kok.

　　 乌克兰ê Chelen-su-ki chóng-thóng ū thàu-lō͘ kóng 乌克兰kah Gô-lô ê hô-pêng tâm-phòaⁿ té sòaⁿ, Gô-lô tio̍h hoe-ho̍k 乌克兰 léng-thó͘ oân-chéng, chun-tiōng Liân-ha̍p-kok hiàn-chiuⁿ, pôe-sióng it-chhè chiàn-cheng sún-sit, têng-hoa̍t múi chi̍t-ê chhiok-hoān chiàn-cheng chōe ê hoān-lâng, í-ki̍p pó-chèng bē koh chhim-hoān 乌克兰 téng chiân-tê.

Gô-lô chóng-thóng Phû-teng lāi-sim chin siūⁿ beh thêng chiàn, tān-sī i chhùi ta̍h chin ngē, i kóng 乌克兰tio̍h chin-chiàⁿ chò-kàu "khì Nazi hòa","khì kun-sū hòa" kah oân-choân tiong-li̍p ê saⁿ tōa iàu-kiāⁿ, siōng iàu-kín ê sī i kóng, Gô-lô ê kun-tūi bô beh ùi só͘ chiàm-・tio̍h ê jīm-hô thó͘-tē thiat-thè.

　　 Tiong-kok, Gô-lô nn̄g kok thâu-lâng hōe-tâm, ná ū khó-lêng tòa-lâi 乌克兰 hô-pêng? góa khòaⁿ, nn̄g-ê thâu-lâng chí-put-kò sī ōe chi̍t-ê khang-khak piáⁿ, hō͘ gōng-lâng chí í-āu. 　　　(230324)

Chù, 习近平 　　 乌克兰　　 沙乌地阿拉伯 　　诺贝尔 chhiáⁿ liām Hôa-gí



　　三月二十至二二，中国国家主席习近平去莫斯科kah俄罗总统浮丁会谈，内容包括加深双旁关系，经济领域，国际局势kah乌克兰危机等。其中hō͘全世界上关心ê是乌克兰ê和平。三月初十，断交七年ê伊朗kah沙乌地阿拉伯tī中国chhiâu促协议之下。宣布重建外交关系，所以有人认为，习近平拼势beh促成俄乌战争停战、签订和平条约。习近平有可能ē得tio̍h诺贝尔和平奖。

　　二月二四，俄乌战争满一年hit工，中国有提出「关于政治解决乌克兰危机ê中国立场」，提出12点讲法，无一点对结束俄乌战争有帮助。

　　三月十三，中国外交部宣布一礼拜后习近平beh去访问俄罗。三月十七，国际刑事法院（ICC）以非法kā儿童带离开乌克兰作理由，对俄罗总统浮丁发布战争罪逮捕令，时间chat kah chiah tú好？ná像是顺续警告一日到暗讲无beh放弃武力拍台湾ê习近平，千万m̄-thang去犯tio̍h战争罪！

三月二十至二二，中国国家主席习近平tī莫斯科kah俄罗总统浮丁见面会谈，双方tī会后联合声明中强调beh「通过和谈」来解决乌克兰危机。但是西方国家不止紧张，恐惊中国ē采取外交抑是经济以外ê手段，进一步支持俄罗——提供武器hō͘浮丁tī战争中使用——而且坚固一个反对北约kah美国ê强大集团。西方国家ê烦恼是加额ê，「坚固一个反对北约kah美国ê强大集团」是真ê，但是「提供武器hō͘浮丁tī战争中使用」是无可能ê代志。中国表面上假仙讲惊北约kah美国kā制裁，事实上是中国爱俄罗继续tī乌克兰ê战争，习近平主席绝对无可能向浮丁总统施压，劝伊停止战争罪行kah暴行，甚至劝伊撤走军队。战愈激烈、战愈久愈好。铁拍ê身体mā bē堪得三工ê落屎，继续战落去，俄罗一定ē消瘦落肉，归尾俄罗ē变作中国老大身躯边叫嘴ê「细汉ê」。同时北约kah美国ê国力mā是ē大损，到时世界真正ê老大tio̍h是中国。

　　乌克兰ê Chelen-su-ki总统有透露讲乌克兰kah俄罗ê和平谈判底线：俄罗tio̍h恢复乌克兰领土完整、尊重联合国宪章、赔偿一切战争损失、惩罚每一个触犯战争罪ê犯人，以及保证bē koh侵犯乌克兰等前提。

俄罗总统浮丁内心真想beh停战，但是伊嘴踏真硬，伊讲乌克兰tio̍h真正做到「去纳粹化」、「去军事化」kah完全中立ê三大要件，上要紧ê是伊讲，俄罗ê军队无beh ùi所占tio̍hê任何土地撤退。

　　中国、俄罗两国头人会谈，ná有可能带来乌克兰和平？我看，两个头人只不过是画一个空壳饼，hō͘戆人止枵。　　　(230324)

注：习近平　　乌克兰　　沙乌地阿拉伯　　诺贝尔 请念华语