《绿色短评》

 | | | 转寄

台湾kah中国，田无沟、水无流！

作者 李南衡, ChoânTâijī/全台字 by Chng Hūiphêng 2023.03.26

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tâioân kah Tiongkok, chhân bô kau, chúi bô lâu!

　　 Saⁿgoe̍h chhechhit, Tiongkok sin jīm gōakau pō͘tiúⁿ Chîn Kong tī "choân kok nn̄g hōe" Gōatiúⁿ kìchiáhōe téngbīn thâuchi̍t piàn kongkhai chhutbīn, kiôngtiāu Tâioân būntê sī Tiongkok he̍ksim līek tiong ê he̍ksim, TiongBí koanhē tēit tiâu bētàng hāⁿkòe ê ângsòaⁿ, i choankang the̍h chhut “ Tionghôa Jînbîn Kiōnghôkok hiànhoat”, íniōng "sūgiân" kóng,"Tâioân sī Tionghôa Jînbîn Kiōnghôkok sînsèng léngthó͘ ê chi̍tpō͘hūn. Oânsêng thóngit chó͘kok ê tōa gia̍p, sī paukoat Tâioân tôngpau chāilāi ê choân Tiongkok jînbîn ê sînsèng chitchek." Tôngtông chi̍tê gōakau pō͘tiúⁿ, koh sī thâuchi̍t piàn kah Tiong gōa kìchiá kìⁿbīn, mài the̍h hit pō͘ “ Tionghôa Jînbîn Kiōnghôkok hiànhoat” chhutlâi tián pó, khah bē iànkhì. Lán ná ē ánne kóng leh?

　　1970 nî saⁿgoe̍h khaisí, Tiongkok teh thólūn hiànhoat chhóàn ê kòethêngtiong, Mô͘ Te̍ktong ū kúi piàn thêchhut hùitû Kokka Chúsek chitbū, chosiūtio̍h paukoat Lîm Piu chāilāi ê chin chē tiongiong léngtō ê hoántùi. Tiongiong úigoân siosòa kā chitê hêngûi chún choh "khǹg chìn" pió tiong ê kihōe, 1970 nî pehgoe̍h, Τiongkiōng tiongiong Lô͘soaⁿ hōegī ê sî ta̍tkàu kotiau, tānsī inūi Tân Pekta̍t tòtâi soah tiām khì. Chhúāu, Mô͘ Te̍ktong ê ìkiàn tio̍h chiàm iâⁿ bīn, káu kài nn̄g tiong choânhōe tī 1970 nî káugoe̍h chhela̍k hêngsêng chi̍t hūn "kipún tôngì" ê ”Tionghôa Jînbîn Kiōnghôkok hiànhoat siukái chhóàn”, kîtiong tûliáu ū hùitû Kokka Chúsek chitbū ígōa, tī chiàⁿ bûn kuitēng Mô͘ Te̍ktong "sī góa kok bô sán kaikip choanchèng ê goânsiú, sī choânkok choânkun ê chòeko thóngsòe", Lîm Piu "sī Mô͘ chúse̍k ê chhinbi̍t chiàniú kah chiappanjîn, sī choânkok choânkun ê hù thóngsòe".

1971 nî káugoe̍h cha̍psaⁿ, Lîm Piu kah in bó͘ Ia̍p Kkûn, hāuseⁿ Lîm Li̍pkó téng kúi lâng ùi Chînhôngtó Soaⁿháikoan kitiûⁿ chē huiki chhut cháu, só͘ chē ê 256 hō saⁿchhekek choanki lak tī Bôngkó͘ Jînbîn Kiōnghôkok Ongtohàn, ki téng 9 ê lâng choânpō͘ sin bông. Tiongkok sú chhengchoh 913 sūkiāⁿ, Lîm Piu sûisî hông phah choh hoán kekbēng. Tēsì kài choân kok Jîntōa tiûpī kangchok chiāmthêng, siu hiàn chìntêng tiongtoān. 1975 nî, tēsì kài choân kok Jîntōa thongkòe ê sin hiànhoat chiah chèngsek kā iúkoan Lîm Piu ê jīgán santû tiāu.

Choân sèkài píkàu khah chiâⁿ iūⁿ ê kokka, choa̍ttùi bôkhólêng ē tī hiànhoat téngbīn siá kóng bó͘ bó͘ lâng sī bó͘ bó͘ lâng ê chhinbi̍t chiàniú kah chiappanjîn. Hó tit Lîm Piu siak sí, nā bô, ” Tionghôa Jînbîn Kiōnghôkok hiànhoat” ē piàn choh sèkài hiànhoat súsiōng ê chi̍tê tōa chhiòōe. Tiongkok sin jīm gōatiúⁿ Chîn Kong káⁿ the̍h chhut “Tionghôa Jînbîn Kiōnghôkok hiànhoat” íniōng "sūgiân" kóng,"Tâioân sī Tionghôa Jînbîn Kiōnghôkok sînsèng léngthó͘ ê chi̍tpō͘hūn."si̍tchāi ūkàu m̄ bat jī, ngē kā nn̄gê oânchoân bô kâng khoán, nn̄gê oânchoân m̄bat hō͘siong thóngtī kòe ê kokka, siá ji̍pkhì hiànhoat, kóng Tâioân sī Tiongkok ê. Ū chi̍t kang Tiongkok kiôngtōa khílâi, kāngkhoán tī hiànhoat lāité siá kóng Bôngkó͘ sī Tiongkok ê, kóng Oa̍tlâm sī Tiongkok ê, kóng Tionga gō͘ kok mā sī Tiongkok ê, sīmchì kóng chi̍tê kha̍h tōa ê, kóng choân sèkài lóng sī Tiongkok ê! lí mā m̄bián kámkak kîkoài.

　　 Tionghôa Jînbîn Kiōnghôkok chūchiông 1949 nî cha̍pgoe̍h chheit kiànkok ílâi, Tâioân kah Tiongkok itti̍t sī "chhân bô kau, chúi bô lâu," sianghong oânchoân bô koanhē. Mài ánne chia̍hpá êngêng liān siáuōe, bô êngióng! (230317)


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Tâi-oân kah Tiong-kok, chhân bô kau, chúi bô lâu!

　　 Saⁿ-goe̍h chhe-chhit, Tiong-kok sin jīm gōa-kau pō͘-tiúⁿ Chîn Kong tī "choân kok nn̄g hōe" Gōa-tiúⁿ kì-chiá-hōe téng-bīn thâu-chi̍t piàn kong-khai chhut-bīn, kiông-tiāu Tâi-oân būn-tê sī Tiong-kok he̍k-sim lī-ek tiong ê he̍k-sim, Tiong-Bí koan-hē tē-it tiâu bē-tàng hāⁿ-kòe ê âng-sòaⁿ, i choan-kang the̍h chhut “ Tiong-hôa Jîn-bîn Kiōng-hô-kok hiàn-hoat”, ín-iōng "sū-giân" kóng,"Tâi-oân sī Tiong-hôa Jîn-bîn Kiōng-hô-kok sîn-sèng léng-thó͘ ê chi̍t-pō͘-hūn. Oân-sêng thóng-it chó͘-kok ê tōa gia̍p, sī pau-koat Tâi-oân tông-pau chāi-lāi ê choân Tiong-kok jîn-bîn ê sîn-sèng chit-chek." Tông-tông chi̍t-ê gōa-kau pō͘-tiúⁿ, koh sī thâu-chi̍t piàn kah Tiong gōa kì-chiá kìⁿ-bīn, mài the̍h hit pō͘ “ Tiong-hôa Jîn-bîn Kiōng-hô-kok hiàn-hoat” chhut-lâi tián pó, khah bē iàn-khì. Lán ná ē án-ne kóng leh?

　　1970 nî saⁿ-goe̍h khai-sí, Tiong-kok teh thó-lūn hiàn-hoat chhó-àn ê kòe-thêng-tiong, Mô͘ Te̍k-tong ū kúi piàn thê-chhut hùi-tû Kok-ka Chú-sek chit-bū, cho-siū-tio̍h pau-koat Lîm Piu chāi-lāi ê chin chē tiong-iong léng-tō ê hoán-tùi. Tiong-iong úi-goân sio-sòa kā chit-ê hêng-ûi chún choh "khǹg chìn" pió tiong ê ki-hōe, 1970 nî peh-goe̍h, Τiong-kiōng tiong-iong Lô͘-soaⁿ hōe-gī ê sî ta̍t-kàu ko-tiau, tān-sī in-ūi Tân Pek-ta̍t tò-tâi soah tiām khì. Chhú-āu, Mô͘ Te̍k-tong ê ì-kiàn tio̍h chiàm iâⁿ bīn, káu kài nn̄g tiong choân-hōe tī 1970 nî káu-goe̍h chhe-la̍k hêng-sêng chi̍t hūn "ki-pún tông-ì" ê ”Tiong-hôa Jîn-bîn Kiōng-hô-kok hiàn-hoat siu-kái chhó-àn”, kî-tiong tû-liáu ū hùi-tû Kok-ka Chú-sek chit-bū í-gōa, tī chiàⁿ bûn kui-tēng Mô͘ Te̍k-tong "sī góa kok bô sán kai-kip choan-chèng ê goân-siú, sī choân-kok choân-kun ê chòe-ko thóng-sòe", Lîm Piu "sī Mô͘ chú-se̍k ê chhin-bi̍t chiàn-iú kah chiap-pan-jîn, sī choân-kok choân-kun ê hù thóng-sòe".

1971 nî káu-goe̍h cha̍p-saⁿ, Lîm Piu kah in bó͘ Ia̍p Kkûn, hāu-seⁿ Lîm Li̍p-kó téng kúi lâng ùi Chîn-hông-tó Soaⁿ-hái-koan ki-tiûⁿ chē hui-ki chhut cháu, só͘ chē ê 256 hō saⁿ-chhe-kek choan-ki lak tī Bông-kó͘ Jîn-bîn Kiōng-hô-kok Ong-to-hàn, ki téng 9 ê lâng choân-pō͘ sin bông. Tiong-kok sú chheng-choh 913 sū-kiāⁿ, Lîm Piu sûi-sî hông phah choh hoán kek-bēng. Tē-sì kài choân kok Jîn-tōa tiû-pī kang-chok chiām-thêng, siu hiàn chìn-têng tiong-toān. 1975 nî, tē-sì kài choân kok Jîn-tōa thong-kòe ê sin hiàn-hoat chiah chèng-sek kā iú-koan Lîm Piu ê jī-gán san-tû- tiāu.

Choân sè-kài pí-kàu khah chiâⁿ iūⁿ ê kok-ka, choa̍t-tùi bô-khó-lêng ē tī hiàn-hoat téng-bīn siá kóng bó͘ bó͘ lâng sī bó͘ bó͘ lâng ê chhin-bi̍t chiàn-iú kah chiap-pan-jîn. Hó tit Lîm Piu siak sí, nā bô, ” Tiong-hôa Jîn-bîn Kiōng-hô-kok hiàn-hoat” ē piàn choh sè-kài hiàn-hoat sú-siōng ê chi̍t-ê tōa chhiò-ōe. Tiong-kok sin jīm gōa-tiúⁿ Chîn Kong káⁿ the̍h chhut “Tiong-hôa Jîn-bîn Kiōng-hô-kok hiàn-hoat” ín-iōng "sū-giân" kóng,"Tâi-oân sī Tiong-hôa Jîn-bîn Kiōng-hô-kok sîn-sèng léng-thó͘ ê chi̍t-pō͘-hūn."si̍t-chāi ū-kàu m̄- bat jī, ngē kā nn̄g-ê oân-choân bô kâng khoán, nn̄g-ê oân-choân m̄-bat hō͘-siong thóng-tī kòe ê kok-ka, siá ji̍p-khì hiàn-hoat, kóng Tâi-oân sī Tiong-kok ê. Ū chi̍t kang Tiong-kok kiông-tōa khí-lâi, kāng-khoán tī hiàn-hoat lāi-té siá kóng Bông-kó͘ sī Tiong-kok ê, kóng Oa̍t-lâm sī Tiong-kok ê, kóng Tiong-a gō͘ kok mā sī Tiong-kok ê, sīm-chì kóng chi̍t-ê kha̍h tōa ê, kóng choân sè-kài lóng sī Tiong-kok ê! lí mā m̄-bián kám-kak kî-koài.

　　 Tiong-hôa Jîn-bîn Kiōng-hô-kok chū-chiông 1949 nî cha̍p-goe̍h chhe-it kiàn-kok í-lâi, Tâi-oân kah Tiong-kok it-ti̍t sī "chhân bô kau, chúi bô lâu," siang-hong oân-choân bô koan-hē. Mài án-ne chia̍h-pá êng-êng liān siáu-ōe, bô êng-ióng! (230317)



　　三月初七，中国新任外交部长秦刚tī「全国两会」外长记者会顶面头一遍公开出面，强调台湾问题是中国核心利益中ê核心、中美关系第一条bē-tàng跨过（hāⁿ-kòe）ê红线，伊专工the̍h出《中华人民共和国宪法》，引用「序言」讲：「台湾是中华人民共和国神圣领土ê一部分。完成统一祖国ê大业，是包括台湾同胞在内ê全中国人民ê神圣职责。」堂堂一个外交部长、koh是头一遍kah中外记者见面，mài the̍h hit部《中华人民共和国宪法》出来展宝，khah bē iàn-气。咱náēán-ne讲leh？

　　1970年三月开始，中国teh讨论宪法草案ê过程中，毛泽东有几遍提出废除国家主席职务，遭受tio̍h包括林彪在内ê真chē中央领导ê反对。中央委员相续kā chit-ê行为准作「劝进」表忠ê机会，1970年八月，中共中央庐山会议ê时达到高潮，但是因为陈伯达倒台soah tiām去。 此后，毛泽东ê意见tio̍h占嬴面，九届二中全会tī 1970年九月初六形成一份「基本同意」ê《中华人民共和国宪法修改草案》，其中除了有废除国家主席职务以外，tī正文规定毛泽东「是我国无产阶级专政ê元首，是全国全军ê最高统帅」，林彪「是毛主席ê亲密战友kah接班人，是全国全军ê副统帅」。

1971年九月十三，林彪kah in某叶群、后生林立果等几人ùi秦皇岛山海关机场坐飞机出走，所坐ê256号三叉戟专机laktī蒙古人民共和国Ong-to-hàn，机顶9个人全部身亡。中国史称作九一三事件，林彪随时hông拍作反革命。第四届全国人大筹备工作暂停，修宪进程中断。1975年，第四届全国人大通过ê新宪法才正式kā有关林彪ê字眼删除掉。

全世界比较khah成样ê国家，绝对无可能ētī宪法顶面写讲某某人是某某人ê亲密战友kah接班人。好得林彪摔死，若无，《中华人民共和国宪法》ē变作世界宪法史上ê一个大笑话。中国新任外长秦刚敢the̍h出《中华人民共和国宪法》引用「序言」讲：「台湾是中华人民共和国神圣领土ê一部分。」实在有够m̄-bat字，硬kā两个完全无仝款、两个完全m̄-bat互相统治过ê国家，写入去宪法，讲台湾是中国ê。有一工中国强大起来，仝款tī宪法内底写讲蒙古是中国ê，讲越南是中国ê，讲中亚五国mā是中国ê，甚至讲一个kha̍h大ê，讲全世界lóng是中国ê！你mā m̄免感觉奇怪。

　　中华人民共和国自从1949年十月初一建国以来，台湾kah中国一直是「田无沟，水无流，」双方完全无关系。Mài án-ne食饱闲闲炼siáu话，无营养！ (230317)