《绿色短评》

 | | | 转寄

中国有够bē见笑！

作者 李南衡, ChoânTâijī/全台字 by Chng Hūiphêng 2023.02.26



Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tiongkok ūkàu bē kiànsiàu!

　　 Jīgoe̍h chhela̍k thàuchá 4 tiám 17 hun chìniong tī Thó͘níkî lâmpō͘ kah Sūlīa piankài ê só͘chāi, hoatseng kuibô͘ 7.8 chhiau kiôngtōa tētāng, chhimtō͘ kanta 17.9 konglí, hiān chai ū kúi chheng lâng síbông kah siūsiong, kasiōng îchìn bô thêng, siongsìn sísiong jînsò͘ ē itti̍t chēngka, siūⁿkhí 1999 nî 921 tōa tētāng ê sî, Thó͘níkî tī tēit sîkan phài kiùchhiau tūi lâi Tâioân thêkiong oânchō͘, lán kok Siauhôngsú sûisî thàukòe Gōakaupō͘ liânhē, khaktēng beh phài "Tâioân kokchè sokiù tūi" chiânóng Thó͘níkî kiùoān, tēit the pái 40 lâng, 3 chiah sokiùkhián kah tōa phoe sokiù khìkū, Sokiùtūi iû gōakau pō͘tiúⁿ Gô͘ Chiausiat, lāichèng pō͘tiúⁿ Lîm Iūchhiong siūkî liáuāu, chhela̍k àm tah cha̍p tiám 30 hun panki chhuthoat. Tējī the phài khián 90 lâng, 2 chiah sokiùkhián kah tōa phoe sokiù khìkū, iliâu io̍hphín, sokiùtūi iû Hêngchèng īⁿtíⁿ Tân Kiànjîn siūkî liáuāu tī jīgoe̍h chhechhit chhuthoat.

　　 Tēit the 40 lâng sokiùtūi tī Jīgoe̍h chhepeh tiongtàu tio̍h kàu tāngchaikhu, kah Bíkok, Czech, Pholân téng kok chòhóe chiphêng sokiù hêngtōng, m̄nā Bíkok CNN te̍kpia̍t pòtō, Engkok BBC IG tah bûn hongbīn siòngphìⁿ tio̍h sī giâ kokkî ê Tâioân sokiùtūi. Téngbīn siá kóng, tētāng liáuāu, ùi sèkài kok só͘chāi lâi Thó͘níkî kah Sūlīa ê kok kok sokiùtūi.. Liânha̍pkok mā kā lánkok sokiùtūi chèngsek lia̍t tī koaⁿhong bāngchām, piomiâ sī "Tâioân (Taiwan) sokiùtūi".

　　 Sàng unloán khì Thó͘níkî, Tâioânlâng kā kok chióng chīnchài bu̍tchu sàng kàu Thó͘níkî chùTâi pānsūchhù Lāiô͘ chhngkhò͘ íkeng chē kah móa・chhutlâi, pānsūchhù kóaⁿkín hoah thêng. Thó͘níkî mûithé tōa phiⁿ pòtō "Tâioân bô bē kìtit 1999 nî 921 tōa tētāng ê sî, Thó͘níkî ê pangbâng", jîchhiáⁿ tōatōa oló Chhòa Engbûn chóngthóng kah chēchē ê hêngchèng siútiúⁿ koankhoán siān kí. Ōeseng Hoklī Pō͘ Jīgoe̍h 15 kong pò͘, khaihòng chínchai choanhō͘ lúikè thóngkè kàu 14 ēpo͘ 5 tiám ûichí, íkeng ū chóngkè koankhoán 13 bān 8,696 pit, sintâipè 6 ek 8,224 bān gōa kho͘.

　　 Kok kok kiùlântūi siosòa thiatthè, Iāichèngpō͘ Siauhôngsú mā koattēng sokiùtūi thiatlī. Ūitio̍h kèsio̍k hia̍pchō͘ Thô͘ kok siūchai bînchiòng, kah ūitio̍h bīlâi khólêng chhàngchûn ê chìnchai chò chúnpī, Tâioân sokiùtūi tī Jīgoe̍h cha̍psì thiat chhut chaikhu chêng, kā só͘ tòalâi ê 4 tùn sokiù chongpī khìchâi, chēngsàng hō͘ Thô͘ kok sokiùtūi (AKUT), tôngsî kàutō, chítō súiōng honghoat; Tâioân sokiùtūi ītēng ē tī Jīgoe̍h cha̍pgō͘ hôekok.

　　 Chin・ê, Tâioân ētàng pangbâng （TAIWAN CAN HELP）

　　 Tiongkok tiānchú mûithé "Bîpoa̍h" thau ēng Tâioân sokiùtūi chhuthoat chêng ê siòngphìⁿ, siá kóng, Thó͘níkî tētāng, Tiongkok Tâioân tūi chhōa thâu chhuthoat! Tiongkok Tâioân tēkhu tēit phoe phài 40 miâ te̍kso͘ tūioân kah saⁿ chiah kiùoān káu, Jīgoe̍h chhela̍k àm chhuthoat chiânóng Thó͘níkî tētāng chaikhu. Siongkoan hūchekjîn piáusī, Tâioân tī 921 tētāng ê sî, Thó͘níkî kiùoântūi sī siōng chá kàuūi ê kokchè kiùoântūi. Chit piàn Thó͘níkî ū chailān, goán Tâioân lâi tàu siokāng.

Tâioân sī Tâioân, Tiongkok sī Tiongkok, kóng siáⁿmi̍h"Tiongkok Tâioân tūi". Phúi! Phúi! Phúi! Tiongkok si̍tchāi ūkàu bē kiànsiàu! (230217))


Pe̍h-ōe-jī-pán/白话字版


《 Le̍k-sek toán-phêng 》 Lí Lâm-hêng

Tiong-kok ū-kàu bē kiàn-siàu!

　　 Jī-goe̍h chhe-la̍k thàu-chá 4 tiám 17 hun chìn-iong tī Thó͘-ní-kî lâm-pō͘ kah Sū-lī-a pian-kài ê só͘-chāi, hoat-seng kui-bô͘ 7.8 chhiau kiông-tōa tē-tāng, chhim-tō͘ kan-ta 17.9 kong-lí, hiān chai ū kúi chheng lâng sí-bông kah siū-siong, ka-siōng î-chìn bô thêng, siong-sìn sí-siong jîn-sò͘ ē it-ti̍t chēng-ka, siūⁿ-khí 1999 nî 921 tōa tē-tāng ê sî, Thó͘-ní-kî tī tē-it sî-kan phài kiù-chhiau -tūi lâi Tâi-oân thê-kiong oân-chō͘, lán kok Siau-hông-sú sûi-sî thàu-kòe Gōa-kau-pō͘ liân-hē, khak-tēng beh phài "Tâi-oân kok-chè so-kiù tūi" chiân-óng Thó͘-ní-kî kiù-oān, tē-it -the pái 40 lâng, 3 chiah so-kiù-khián kah tōa phoe so-kiù khì-kū, So-kiù-tūi iû gōa-kau pō͘-tiúⁿ Gô͘ Chiau-siat, lāi-chèng pō͘-tiúⁿ Lîm Iū-chhiong siū-kî liáu-āu, chhe-la̍k àm tah cha̍p tiám 30 hun pan-ki chhut-hoat. Tē-jī the phài khián 90 lâng, 2 chiah so-kiù-khián kah tōa phoe so-kiù khì-kū, i-liâu io̍h-phín, so-kiù-tūi iû Hêng-chèng īⁿ-tíⁿ Tân Kiàn-jîn siū-kî liáu-āu tī jī-goe̍h chhe-chhit chhut-hoat.

　　 Tē-it the 40 lâng so-kiù-tūi tī Jī-goe̍h chhe-peh tiong-tàu tio̍h kàu tāng-chai-khu, kah Bí-kok, Czech, Pho-lân téng kok chò-hóe chip-hêng so-kiù hêng-tōng, m̄-nā Bí-kok CNN te̍k-pia̍t pò-tō, Eng-kok BBC IG tah bûn hong-bīn siòng-phìⁿ tio̍h sī giâ kok-kî ê Tâi-oân so-kiù-tūi. Téng-bīn siá kóng, tē-tāng liáu-āu, ùi sè-kài kok só͘-chāi lâi Thó͘-ní-kî kah Sū-lī-a ê kok kok so-kiù-tūi.. Liân-ha̍p-kok mā kā lán-kok so-kiù-tūi chèng-sek lia̍t tī koaⁿ-hong bāng-chām, pio-miâ sī "Tâi-oân (Taiwan) so-kiù-tūi".

　　 Sàng un-loán khì Thó͘-ní-kî, Tâi-oân-lâng kā kok chióng chīn-chài bu̍t-chu sàng kàu Thó͘-ní-kî chù-Tâi pān-sū-chhù Lāi-ô͘ chhng-khò͘ í-keng chē kah móa-・chhut-lâi, pān-sū-chhù kóaⁿ-kín hoah thêng. Thó͘-ní-kî mûi-thé tōa phiⁿ pò-tō "Tâi-oân bô bē kì-tit 1999 nî 921 tōa tē-tāng ê sî, Thó͘-ní-kî ê pang-bâng", jî-chhiáⁿ tōa-tōa o-ló Chhòa Eng-bûn chóng-thóng kah chē-chē ê hêng-chèng siú-tiúⁿ koan-khoán siān kí. Ōe-seng Hok-lī Pō͘ Jī-goe̍h 15 kong pò͘, khai-hòng chín-chai choan-hō͘ lúi-kè thóng-kè kàu 14 ē-po͘ 5 tiám ûi-chí, í-keng ū chóng-kè koan-khoán 13 bān 8,696 pit, sin-tâi-pè 6 ek 8,224 bān gōa kho͘.

　　 Kok kok kiù-lân-tūi sio-sòa thiat-thè, Iāi-chèng-pō͘ Siau-hông-sú mā koat-tēng so-kiù-tūi thiat-lī. Ūi-tio̍h kè-sio̍k hia̍p-chō͘ Thô͘ kok siū-chai bîn-chiòng, kah ūi-tio̍h bī-lâi khó-lêng chhàng-chûn ê chìn-chai chò chún-pī, Tâi-oân so-kiù-tūi tī Jī-goe̍h cha̍p-sì thiat chhut chai-khu chêng, kā só͘ tòa-lâi ê 4 tùn so-kiù chong-pī khì-châi, chēng-sàng hō͘ Thô͘ kok so-kiù-tūi (AKUT), tông-sî kàu-tō, chí-tō sú-iōng hong-hoat; Tâi-oân so-kiù-tūi ī-tēng ē tī Jī-goe̍h cha̍p-gō͘ hôe-kok.

　　 Chin-・ê, Tâi-oân ē-tàng pang-bâng （TAIWAN CAN HELP）

　　 Tiong-kok tiān-chú mûi-thé "Bî-poa̍h" thau ēng Tâi-oân so-kiù-tūi chhut-hoat chêng ê siòng-phìⁿ, siá kóng, Thó͘-ní-kî tē-tāng, Tiong-kok Tâi-oân tūi chhōa thâu chhut-hoat! Tiong-kok Tâi-oân tē-khu tē-it phoe phài 40 miâ te̍k-so͘ tūi-oân kah saⁿ chiah kiù-oān káu, Jī-goe̍h chhe-la̍k àm chhut-hoat chiân-óng Thó͘-ní-kî tē-tāng chai-khu. Siong-koan hū-chek-jîn piáu-sī, Tâi-oân tī 921 tē-tāng ê sî, Thó͘-ní-kî kiù-oân-tūi sī siōng chá kàu-ūi ê kok-chè kiù-oân-tūi. Chit piàn Thó͘-ní-kî ū chai-lān, goán Tâi-oân lâi tàu sio-kāng.

Tâi-oân sī Tâi-oân, Tiong-kok sī Tiong-kok, kóng siáⁿ-mi̍h"Tiong-kok Tâi-oân tūi". Phúi! Phúi! Phúi! Tiong-kok si̍t-chāi ū-kàu bē kiàn-siàu! (230217))




　　二月初六透早4点17分震央tī土耳其南部kah敍利亚边界ê所在，发生规模7.8超强大地动，深度kan-ta17.9公里，现知有几千人死亡kah受伤，加上余震无停，相信死伤人数会一直增加，想起1999年921大地动ê时，土耳其tī第一时间派遣救搜队来台湾提供援助，咱国消防署随时透过外交部连系，确定beh派遣「台湾国际搜救队」前往土耳其救援，第一梯40人、3只搜救犬kah大批搜救器具，搜救队由外交部长吴钊燮、内政部长林右昌授旗了后，初六暗搭十点30分班机出发。第二梯派遣90人、2只搜救犬kah大批搜救器具、医疗药品，搜救队由行政院长陈建仁授旗了后tī二月初七出发。

　　第一梯40人搜救队tī 二月初八中昼tio̍h到重灾区，kah美国、捷克、波兰等国做伙执行搜救行动，m̄-nā美国CNN特别报导，英国BBC IG贴文封面相片tio̍h是giâ国旗ê台湾搜救队。顶面写讲：地动了后，ùi世界各所在来土耳其kah敍利亚ê各国搜救队.。联合国mā kā咱国搜救队正式列tī官方网站，标名是「台湾（Taiwan）搜救队」。

　　送温暖去土耳其，台湾人kā各种赈灾物资送到土耳其驻台办事处内湖仓库已经chē kah满出来，办事处赶紧喝停。土耳其媒体大篇报导「台湾无bē记得1999年921大地动ê时，土耳其ê帮忙」，而且大大o-ló蔡英文总统kahchēchēê行政首长捐款善举。卫生福利部二月15公布，开放赈灾专户累计统计到14下晡5点为止，已经有总计捐款13万8,696笔、新台币6亿8,224万外元。

　　各国救难队相续撤退，内政部消防署mā决定搜救队撤离。为tio̍h继续协助土国受灾民众，kah为tio̍h未来可能潜存ê震灾做准备，台湾搜救队tī二月十四撤出灾区前，kā所带来ê4吨搜救装备器材，赠送hō͘土国搜救队（AKUT），同时教导、指导使用方法；台湾搜救队预定会tī二月十五回国。

　　真ê，台湾会tàng帮忙（TAIWAN CAN HELP）

　　中国电子媒体「微博」偷用台湾搜救队出发前ê相片，写讲：土耳其地动，中国台湾队chhōa头出发！中国台湾地区第一批次40名特搜队员kah三只救援狗，二月初六暗出发前往土耳其地动灾区。相关负责人表示，台湾tī 921地动ê时，土耳其救援队是siōng早到位ê国际救援队。Chit遍土耳其有灾难，阮台湾来斗相仝。

台湾是台湾，中国是中国，讲啥物「中国台湾队」。Phúi！Phúi！Phúi！中国实在有够bē见笑！ (230217))