《绿色短评》

 | | | 转寄

中国鹦哥鸟koh teh讲话ah！

作者 李南衡, ChoânTâijī/全台字 by Chng Hūiphêng 2023.01.01

Choânbîn Tâioânjī pán/全民台湾字版简称ChoânTâiJī


《 Le̍k-sek toán-phêng 》　　　 Lí Lâm-hêng

　　　　　　 Tiong-kok eng-ko-chiáu koh teh kóng-ōe ah!

　　 Tiong-kok chin chē só͘-chāi kian-chhî chi̍t kang chò nn̄g piàn hu̍t-sng kiám-chhek, khòaⁿ lí sī im-sèng ah-sī iông-sèng hoán-èng, nā iông-sèng tio̍h kiông-chè sàng-khì oân-choân bô tī-liâu ê hong-chhng pēⁿ-īⁿ, tāng-bē-tio̍h to̍h hong chit-ê siâⁿ, hong hit-ê chhī, si̍t-chāi chin hó-chhiò. Kang-chhiúⁿ thêng kang, kang-lâng bô kang chò, siong-tiàm koaiⁿ mn̂g, bú kah choân-kok jîn-bîn chia̍h bē siau, tòng bē-tiâu, cha̍p-it-goe̍h sì-kè hoat-khí "pe̍h-chóa kek-bēng" choh bû-giân ê khòng-gī. Cha̍p-jī-goe̍h chhe, Tiong-kok chèng-hú hut-jiân-kan thāi-tō͘ tōa se̍h-oan, bô beh koh kian-chhî "tōng-thài chheng lêng chèng-chhek", tōa-tōa pàng-sang hông-e̍k chhò-si. Pak-kiaⁿ chin chē siat-tì tī jîn-hêng-tō téng-bīn ê "hu̍t-sng chhái-iūⁿ têng" í-keng bô khì ah.

　　 Ū choan-ka hun-sek, án-ne ū khó-lêng ē biān-lîm tōa kui-bô͘ ê kám-jiám, bîn-chiòng soah sì-kè bé thè-sio-io̍h, bîn-chiòng chí-chek ū io̍h-tiàm tún-chek kám-mō͘ thè-sio-io̍h bô beh bē. Cha̍p-jī-goe̍h cha̍p-saⁿ, 《 New York Sî-pò 》 pò-tō, tī pak-kiaⁿ siōng hù-jū ê Tiau-iông-khu chi̍t keng pēⁿ-īⁿ gōa-kháu, cha̍p-jī-goe̍h chhe-káu, tī chha-put-to liap-sī lêng-tō͘ ê hân-léng khì-un hē ū chiong-kīn 100 lâng pâi-tūi teh tán-thāi hoat-sio mn̂g-chín, tī pēⁿ-īⁿ tán beh niá io̍h ê lâng tio̍h pâi-tūi pâi 5 tiám-cheng. Ū Pak-kiaⁿ chhī-bîn ek khì io̍h-pâng chhiúⁿ bé io̍h-á, Pak-kiaⁿ chhī io̍h-pâng ê thè-sio chí-thiàⁿ io̍h lóng bē kah khang-khang.

Chit pho tún io̍h jia̍t mā hoat-sio kàu Hiang-káng, ū Hiang-káng chhī-bîn pang-bâng sàu-hòe kià khì Tiong-kok, chō-sêng Hiang-káng io̍h-pâng mā khiàm hòe. Hiang-káng i-bū ōe-seng kio̍k kio̍k-tiúⁿ Lô͘ Thióng-bō͘ ho͘-io̍k, bô su-iàu tún siuⁿ chē io̍h-bu̍t, mā bô pit-iàu thâu kòe hoán-èng. Tâi-oân mā ū lâng ná siōng siáu-・ê bé thè sio, chí thiàⁿ, siau iām, chong-ha̍p kám-mō͘ ê io̍h-phín, kià khì Tiong-kok, siau-siū liōng chēng-ka sì, gō͘ siâⁿ, io̍h-pâng ê lâng kóng, kiaⁿ án-ne ē chō-sêng Tâi-oân ê io̍h-phín tōa khiàm-hòe.

　　 Cha̍p-jī-goe̍h cha̍p-saⁿ, Tiong-kok Kok-bîn-tóng chú-se̍k Chu Li̍p-lûn kóng,"Tiong-kok nā su-iàu i-liâu chu-goân, chèng-hú eng-kai chīn-la̍t hia̍p-chō͘, mā tùi oān-hô nn̄g hōaⁿ khì-hun ū pang-chō͘." chêng li̍p-úi Tân Pek-ûi kā tôaⁿ tò-tńg, i kóng, chū-chiông e̍k-chêng thòa kàu choân sè-kài í-lâi, Tiong-kok Kok-bîn-tóng tio̍h it-ti̍t phoe-phêng lán tiong-iong hông-e̍k bô kàu la̍t, chi̍t-lō͘ í-lâi ê lūn-su̍t lóng sī Tâi-oân hông-e̍k piáu-hiān chiâⁿ bái chiâⁿ chha,"ūi siáⁿ-mi̍h tī chit-ê sî-chūn chú-tiuⁿ Tâi-oân nā-sī i-liâu chu-goân ū-kàu gia̍h tio̍h eng-kai hia̍p-chō͘ Tiong-kok?" tē-jī, Tiong-kok Kok-bîn-tóng li̍p-hoat-īⁿ tóng thoân kin-nî gō͘-goe̍h ū khui kì-chiá-hōe, piáu-sī tio̍h koan-chhiat i-liâu jîn-oân tī e̍k-chêng hē ê ap-le̍k, kóng i-liâu jîn-oân chha-put-to beh pang-・lo̍h-khì,"nā-sī chin-chiàⁿ koan-sim i-liâu jîn-oân, hông-e̍k jîn-oân ê sin-khó͘, sī án-chóaⁿ ē jīn-ûi Tiong-kok nā ū su-iàu, Tâi-oân tio̍h eng-kai hia̍p-chō͘ Tiong-kok i-liâu chu-goân leh? ūi siáⁿ-mi̍h chi̍t kù ' Tiong-kok su-iàu’, tio̍h kiò lán Tâi-oân ê i-liâu jîn-oân khì hù-chhut, pe̍h-pe̍h chēng-ka Tâi-oân i-liâu ê hong-hiám kah kang-chok liōng leh?" Tân Pek-ûi ín-iōng Tiong-kok cha̍p-jī-goe̍h cha̍p-jī kong-pò͘ ê e̍k-chêng sò͘-jī, Tiong-kok hit kang sin cheng-ka khak-chín ê pēⁿ-lē kan-tāⁿ 2,315 lē. "Nā-sī chin-chiàⁿ chiah-ni̍h lī-hāi, ūi-sím-mi̍h ē su-iàu Tâi-oân i-liâu chu-goân ê hia̍p-chō͘? nā Tiong-kok koaⁿ-hong sin-cheng pēⁿ-lē ê chu-liāu sī chin-・ê, tio̍h sī chiah-ni̍h chió, ūi-sím-mi̍h ē thoân-chhut chhiúⁿ io̍h kià sàng Tiong-kok ê siau-sit? Tân Pek-ûi kiám kóng chi̍t kù, cha̍p-jī-goe̍h cha̍p-jī lán Tâi-oân khak-chín jîn-sò͘ sī 10,824 lē, khak-chín lē sī Tiong-kok ê sì pōe la̍k, sī án-chóaⁿ khak-chín lē khah chē ê Tâi-oân tio̍h chi-oân khak-chín lē khah chió ê Tiong-kok i-io̍h leh?

　　 Tiong-kok eng-ko-chiáu nā koh teh kóng-ōe, pài-thok ta̍k-ê mài kā thiaⁿ! 　　(221216)


Pe̍h-ōe-jī-pán/白话字版


《 Le̍k-sek toán-phêng 》　　　 Lí Lâm-hêng

　　　　　　 Tiong-kok eng-ko-chiáu koh teh kóng-ōe ah!

　　 Tiong-kok chin chē só͘-chāi kian-chhî chi̍t kang chò nn̄g piàn hu̍t-sng kiám-chhek, khòaⁿ lí sī im-sèng ah-sī iông-sèng hoán-èng, nā iông-sèng tio̍h kiông-chè sàng-khì oân-choân bô tī-liâu ê hong-chhng pēⁿ-īⁿ, tāng-bē-tio̍h to̍h hong chit-ê siâⁿ, hong hit-ê chhī, si̍t-chāi chin hó-chhiò. Kang-chhiúⁿ thêng kang, kang-lâng bô kang chò, siong-tiàm koaiⁿ mn̂g, bú kah choân-kok jîn-bîn chia̍h bē siau, tòng bē-tiâu, cha̍p-it-goe̍h sì-kè hoat-khí "pe̍h-chóa kek-bēng" choh bû-giân ê khòng-gī. Cha̍p-jī-goe̍h chhe, Tiong-kok chèng-hú hut-jiân-kan thāi-tō͘ tōa se̍h-oan, bô beh koh kian-chhî "tōng-thài chheng lêng chèng-chhek", tōa-tōa pàng-sang hông-e̍k chhò-si. Pak-kiaⁿ chin chē siat-tì tī jîn-hêng-tō téng-bīn ê "hu̍t-sng chhái-iūⁿ têng" í-keng bô khì ah.

　　 Ū choan-ka hun-sek, án-ne ū khó-lêng ē biān-lîm tōa kui-bô͘ ê kám-jiám, bîn-chiòng soah sì-kè bé thè-sio-io̍h, bîn-chiòng chí-chek ū io̍h-tiàm tún-chek kám-mō͘ thè-sio-io̍h bô beh bē. Cha̍p-jī-goe̍h cha̍p-saⁿ, 《 New York Sî-pò 》 pò-tō, tī pak-kiaⁿ siōng hù-jū ê Tiau-iông-khu chi̍t keng pēⁿ-īⁿ gōa-kháu, cha̍p-jī-goe̍h chhe-káu, tī chha-put-to liap-sī lêng-tō͘ ê hân-léng khì-un hē ū chiong-kīn 100 lâng pâi-tūi teh tán-thāi hoat-sio mn̂g-chín, tī pēⁿ-īⁿ tán beh niá io̍h ê lâng tio̍h pâi-tūi pâi 5 tiám-cheng. Ū Pak-kiaⁿ chhī-bîn ek khì io̍h-pâng chhiúⁿ bé io̍h-á, Pak-kiaⁿ chhī io̍h-pâng ê thè-sio chí-thiàⁿ io̍h lóng bē kah khang-khang.

Chit pho tún io̍h jia̍t mā hoat-sio kàu Hiang-káng, ū Hiang-káng chhī-bîn pang-bâng sàu-hòe kià khì Tiong-kok, chō-sêng Hiang-káng io̍h-pâng mā khiàm hòe. Hiang-káng i-bū ōe-seng kio̍k kio̍k-tiúⁿ Lô͘ Thióng-bō͘ ho͘-io̍k, bô su-iàu tún siuⁿ chē io̍h-bu̍t, mā bô pit-iàu thâu kòe hoán-èng. Tâi-oân mā ū lâng ná siōng siáu-・ê bé thè sio, chí thiàⁿ, siau iām, chong-ha̍p kám-mō͘ ê io̍h-phín, kià khì Tiong-kok, siau-siū liōng chēng-ka sì, gō͘ siâⁿ, io̍h-pâng ê lâng kóng, kiaⁿ án-ne ē chō-sêng Tâi-oân ê io̍h-phín tōa khiàm-hòe.

　　 Cha̍p-jī-goe̍h cha̍p-saⁿ, Tiong-kok Kok-bîn-tóng chú-se̍k Chu Li̍p-lûn kóng,"Tiong-kok nā su-iàu i-liâu chu-goân, chèng-hú eng-kai chīn-la̍t hia̍p-chō͘, mā tùi oān-hô nn̄g hōaⁿ khì-hun ū pang-chō͘." chêng li̍p-úi Tân Pek-ûi kā tôaⁿ tò-tńg, i kóng, chū-chiông e̍k-chêng thòa kàu choân sè-kài í-lâi, Tiong-kok Kok-bîn-tóng tio̍h it-ti̍t phoe-phêng lán tiong-iong hông-e̍k bô kàu la̍t, chi̍t-lō͘ í-lâi ê lūn-su̍t lóng sī Tâi-oân hông-e̍k piáu-hiān chiâⁿ bái chiâⁿ chha,"ūi siáⁿ-mi̍h tī chit-ê sî-chūn chú-tiuⁿ Tâi-oân nā-sī i-liâu chu-goân ū-kàu gia̍h tio̍h eng-kai hia̍p-chō͘ Tiong-kok?" tē-jī, Tiong-kok Kok-bîn-tóng li̍p-hoat-īⁿ tóng thoân kin-nî gō͘-goe̍h ū khui kì-chiá-hōe, piáu-sī tio̍h koan-chhiat i-liâu jîn-oân tī e̍k-chêng hē ê ap-le̍k, kóng i-liâu jîn-oân chha-put-to beh pang-・lo̍h-khì,"nā-sī chin-chiàⁿ koan-sim i-liâu jîn-oân, hông-e̍k jîn-oân ê sin-khó͘, sī án-chóaⁿ ē jīn-ûi Tiong-kok nā ū su-iàu, Tâi-oân tio̍h eng-kai hia̍p-chō͘ Tiong-kok i-liâu chu-goân leh? ūi siáⁿ-mi̍h chi̍t kù ' Tiong-kok su-iàu’, tio̍h kiò lán Tâi-oân ê i-liâu jîn-oân khì hù-chhut, pe̍h-pe̍h chēng-ka Tâi-oân i-liâu ê hong-hiám kah kang-chok liōng leh?" Tân Pek-ûi ín-iōng Tiong-kok cha̍p-jī-goe̍h cha̍p-jī kong-pò͘ ê e̍k-chêng sò͘-jī, Tiong-kok hit kang sin cheng-ka khak-chín ê pēⁿ-lē kan-tāⁿ 2,315 lē. "Nā-sī chin-chiàⁿ chiah-ni̍h lī-hāi, ūi-sím-mi̍h ē su-iàu Tâi-oân i-liâu chu-goân ê hia̍p-chō͘? nā Tiong-kok koaⁿ-hong sin-cheng pēⁿ-lē ê chu-liāu sī chin-・ê, tio̍h sī chiah-ni̍h chió, ūi-sím-mi̍h ē thoân-chhut chhiúⁿ io̍h kià sàng Tiong-kok ê siau-sit? Tân Pek-ûi kiám kóng chi̍t kù, cha̍p-jī-goe̍h cha̍p-jī lán Tâi-oân khak-chín jîn-sò͘ sī 10,824 lē, khak-chín lē sī Tiong-kok ê sì pōe la̍k, sī án-chóaⁿ khak-chín lē khah chē ê Tâi-oân tio̍h chi-oân khak-chín lē khah chió ê Tiong-kok i-io̍h leh?

　　 Tiong-kok eng-ko-chiáu nā koh teh kóng-ōe, pài-thok ta̍k-ê mài kā thiaⁿ! 　　(221216)




　　中国真chē所在坚持一工做两遍核酸检测，看你是阴性ah是阳性反应，若阳性tio̍h强制送去完全无治疗ê方舱病院，动bē-tio̍h to̍h封chit-ê城、封hit-ê市，实在真好笑。工厂停工、工人无工做，商店关门，舞kah全国人民食bē消、挡bē-tiâu，十一月四界发起「白纸革命」作无言ê抗议。十二月初，中国政府忽然间态度大se̍h弯，无beh koh坚持「动态清零政策」，大大放松防疫措施。北京真chē设置tī人行道顶面ê「核酸采样亭」已经无去ah。

　　有专家分析，án-ne有可能ē面临大规模ê感染，民众煞四界买退烧药，民众指责有药店囤积感冒退烧药无beh卖。十二月十三，《纽约时报》报导，tī北京上富裕ê朝阳区一间病院外口，十二月初九，tī差不多摄氏零度ê寒冷气温下有将近100人排队teh等待发烧门诊，tī病院等beh领药ê人tio̍h排队排5点钟。有北京市民溢去药房抢买药á，北京市药房ê退烧止疼药lóng卖kah空空。

Chit波囤药热mā发烧到香港，有香港市民帮忙扫货寄去中国，造成香港药房mā欠货。香港医务卫生局局长卢宠茂呼吁，无需要囤siuⁿchē药物，mā无必要头过反应。台湾mā有人ná像siáu-・ê买退烧、止疼、消炎、综合感冒ê药品，寄去中国，销售量增加四、五成，药房ê人讲，惊án-neē造成台湾ê药品大欠货。

　　十二月十三，中国国民党主席朱立伦讲：「中国若需要医疗资源，政府应该尽力协助，mā对缓和两岸气氛有帮助。」前立委陈柏惟kā弹倒转，伊讲：自从疫情thòa到全世界以来，中国国民党tio̍h一直批评咱中央防疫无够力，一路以来ê论述lóng是台湾防疫表现chiâⁿ báichiâⁿ差，「为啥物tī chit-ê时阵主张台湾若是医疗资源有够额tio̍h应该协助中国？」第二，中国国民党立法院党团今年五月有开记者会，表示tio̍h关切医疗人员tī疫情下ê压力，讲医疗人员差不多beh崩落去，「若是真正关心医疗人员、防疫人员ê辛苦，是按怎ē认为中国若有需要，台湾tio̍h应该协助中国医疗资源咧？为啥物一句『中国需要』，tio̍h叫咱台湾ê医疗人员去付出，白白增加台湾医疗ê风险kah工作量咧？」陈柏惟引用中国十二月十二公布ê疫情数字，中国hit工新增加确诊ê病例干单2,315例。「若是真正chiah-ni̍h厉害，为什么ē需要台湾医疗资源ê协助？若中国官方新增病例ê资料是真ê，tio̍h是chiah-ni̍h少，为什么ē传出抢药寄送中国ê消息？陈柏惟减讲一句，十二月十二咱台湾确诊人数是10,824例，确诊例是中国ê四倍六，是按怎确诊例khahchēê台湾tio̍h支援确诊例khah少ê中国医药咧？

　　中国鹦哥鸟若koh teh讲话，拜托ta̍k个mài kā听！　　(221216)