《绿色短评》

 | | | 转寄

原来乌克兰mā ē-sái拍俄罗！

作者 李南衡, ChoânTâijī/全台字 by Chng Hūiphêng 2022.12.25

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng

Goânlâi 乌克兰mā ēsái phah Gôlô!

　　2022 nî jīgoe̍h jīsì, Gôlô kuntūi chèngsek chhimlio̍k 乌克兰 kàu taⁿ 280 gōa kang, ēsái kóng sī 乌克兰hō͘ Gôlô chhi̍h teh thô͘kha phah, mānā chiànchhia, tōaphàu sìkè tōaⁿ, huitôaⁿ bô thêng, hoattiānchhiúⁿ, chúi khò͘, tiānle̍k tiān sìn hēthóng siū phòhoāi, liân chin chē pēⁿīⁿ, ha̍khāu mā hō in chàchàtiāu, si̍tchāi chin khóó͘ⁿ! hókachài í Bíkok chhōa thâu ê Pakiok kokka cheksî thêkiong kok chióng sin búkhì chioân, 乌克兰 chiah ētàng tòng kàu kináji̍t. Lán mā bat siūⁿ, 乌克兰ná ē bô ài kā phah tòtńgkhì?

　　 Bô gîgō͘ cha̍pjīgoe̍h chhegō͘ thàuchá 6 tiám 4 pun, tī Gôlô Salatobu（Saratov） chiu ê Unkosu（Engels） khongkun kitē chosiūtio̍h chūsat bôlângki se̍kkek, ínhoat chiok tōa ê po̍kchà siaⁿ. Chitê khongkun kitē lī 乌克兰 piankài ū 724 konglí, tī Gôlô siúto͘ Bo̍hsukho tanglâmhong iok 875 konglí ê só͘chāi, sī Gôlô hiòng 乌克兰 hoatsiā hóechìⁿtôaⁿ chiànki ê chúiàu khíkàng tē, mā sī Gôlô khongkun ū chhionghun siatpī, ētàng ūi chìnkong 乌克兰ê tōa hêng hongchàki thêkiong ûisiu póióng ê îit kitē. Kúi kang chêng kantia̍p ūichheⁿ ū show chhut TU90 kah TU160 hongchàki chūchi̍p ê só͘chāi. Po̍kchà hoatseng āu, bô siū hāi ê chiànki lóngchóng khí poe līkhui kitē.

　　 Kâng chi̍t kang thàuchá, lī 乌克兰 piankéng 482 konglí ê Gôlô tiongpō͘ siâⁿchhī Lachan(Ryazan) hūkīn ê Chiagilebô(Dyagilevo) khongkun kitē mā sī chosiūtio̍h bôlângki ê kongkek. Chitê khongkun kitē ū thêng chin chē chiah Gôlô tōa hêng chiànlio̍k hongchàki.

　　 乌克兰 lāichèng pō͘tiúⁿ kò͘būn Jielasenko (Anton Gerashchenko) tī Twitter téngbīn piáusī, ū siausit kóng Unkosu (Engels) khongkun kitē kah Chiagilebô(Dyagilevo) khongkun kitē ê kunki goânpún ūtēng beh tī cha̍pjīgoe̍h chhegō͘ chákhí chiphêng hongchà 乌克兰 lênggoân kichhó͘ siatsi ê jīmbū. Bô siūⁿtio̍h 乌克兰 seng chhutchhiú.

　　 Gôlô kokhôngpō͘ tī siausit pha̍kkng liáuāu thiàuchhut lâi piáusī, chit nn̄g piàn kongkek sūkiāⁿ ū chōsêng 3 sí 4 siong, 2 chiah Tu95 hongchàki kah 1 chiah Tu22M̀ hongchàki húi sún

　　 Bûsam putsênglé, cha̍pjīgoe̍h chhela̍k chákhí, lī 乌克兰 bô lōa hn̄g ê Khusukhu(Kursk) kun ēng kitiûⁿ mā chosiūtio̍h bôlângki se̍kkek, kitiûⁿ lāi chi̍t chō tûiûchô po̍kchà to̍h hóe, Gôlô koaⁿhong soanchheng bô jînoân siongbông.

Tēit kang po̍kchà hoatseng kúi tiámcheng āu, 乌克兰 choân kéng khangse̍k kéngpò kohchài hiángkhí. Gôlô koh hiòng 乌克兰 hoattōng sin chi̍tpho ê huitôaⁿ kongkek. 乌克兰 chóngthóng kóng, goán íkeng cha̍h tiāu chin chē lia̍p huitôaⁿ, tānsī iûgoân ínhoat chin chē só͘chāi thêng tiān.

　　 Gôlô chíchek 乌克兰 kongkek Gôlô léngthó͘. Chin kîkoài, Gôlô khì phah 乌克兰 léngthó͘ 280 gōa kang ná chhiūⁿ chiâⁿ chèngtong, 乌克兰tī Gôlô kénglāi khian saⁿê niāniā tio̍h kaiⁿkaiⁿ kiò!

　　Oh, goânlâi 乌克兰mā ēsái phah Gôlô!

Chù, 乌克兰　　 chhiáⁿ liām Hôagí


Pe̍h-ōe-jī-pán/白话字版



《 Le̍k-sek toán-phêng 》 Lí Lâm-hêng

Goân-lâi 乌克兰mā ē-sái phah Gô-lô!

　　2022 nî jī-goe̍h jī-sì, Gô-lô kun-tūi chèng-sek chhim-lio̍k 乌克兰 kàu taⁿ 280 gōa kang, ē-sái kóng sī 乌克兰hō͘ Gô-lô chhi̍h teh thô͘-kha phah, mā-nā chiàn-chhia, tōa-phàu sì-kè tōaⁿ, hui-tôaⁿ bô thêng, hoat-tiān-chhiúⁿ, chúi khò͘, tiān-le̍k tiān sìn hē-thóng siū phò-hoāi, liân chin chē pēⁿ-īⁿ, ha̍k-hāu mā hō in chà-chà-tiāu, si̍t-chāi chin khó-ó͘ⁿ! hó-ka-chài í Bí-kok chhōa thâu ê Pak-iok kok-ka chek-sî thê-kiong kok chióng sin bú-khì chi-oân, 乌克兰 chiah ē-tàng tòng kàu kin-á-ji̍t. Lán mā bat siūⁿ, 乌克兰ná ē bô ài kā phah tò-tńg-khì?

　　 Bô gî-gō͘ cha̍p-jī-goe̍h chhe-gō͘ thàu-chá 6 tiám 4 pun, tī Gô-lô Salatobu（Saratov） chiu ê Unkosu（Engels） khong-kun ki-tē cho-siū-tio̍h chū-sat bô-lâng-ki se̍k-kek, ín-hoat chiok tōa ê po̍k-chà siaⁿ. Chit-ê khong-kun ki-tē lī 乌克兰 pian-kài ū 724 kong-lí, tī Gô-lô siú-to͘ Bo̍h-su-kho tang-lâm-hong iok 875 kong-lí ê só͘-chāi, sī Gô-lô hiòng 乌克兰 hoat-siā hóe-chìⁿ-tôaⁿ chiàn-ki ê chú-iàu khí-kàng tē, mā sī Gô-lô khong-kun ū chhiong-hun siat-pī, ē-tàng ūi chìn-kong 乌克兰ê tōa hêng hong-chà-ki thê-kiong ûi-siu pó-ióng ê î-it ki-tē. Kúi kang chêng kan-tia̍p ūi-chheⁿ ū show chhut TU-90 kah TU-160 hong-chà-ki chū-chi̍p ê só͘-chāi. Po̍k-chà hoat-seng āu, bô siū hāi ê chiàn-ki lóng-chóng khí poe lī-khui ki-tē.

　　 Kâng chi̍t kang thàu-chá, lī 乌克兰 pian-kéng 482 kong-lí ê Gô-lô tiong-pō͘ siâⁿ-chhī Lachan(Ryazan) hū-kīn ê Chiagilebô(Dyagilevo) khong-kun ki-tē mā sī cho-siū-tio̍h bô-lâng-ki ê kong-kek. Chit-ê khong-kun ki-tē ū thêng chin chē chiah Gô-lô tōa hêng chiàn-lio̍k hong-chà-ki.

　　 乌克兰 lāi-chèng pō͘-tiúⁿ kò͘-būn Jielasenko (Anton Gerashchenko) tī Twitter téng-bīn piáu-sī, ū siau-sit kóng Unkosu (Engels) khong-kun ki-tē kah Chiagilebô(Dyagilevo) khong-kun ki-tē ê kun-ki goân-pún ū-tēng beh tī cha̍p-jī-goe̍h chhe-gō͘ chá-khí chip-hêng hong-chà 乌克兰 lêng-goân ki-chhó͘ siat-si ê jīm-bū. Bô siūⁿ-tio̍h 乌克兰 seng chhut-chhiú.

　　 Gô-lô kok-hông-pō͘ tī siau-sit pha̍k-kng liáu-āu thiàu-chhut lâi piáu-sī, chit nn̄g piàn kong-kek sū-kiāⁿ ū chō-sêng 3 sí 4 siong, 2 chiah Tu-95 hong-chà-ki kah 1 chiah Tu-22M̀ hong-chà-ki húi sún

　　 Bû-sam put-sêng-lé, cha̍p-jī-goe̍h chhe-la̍k chá-khí, lī 乌克兰 bô lōa hn̄g ê Khusukhu(Kursk) kun ēng ki-tiûⁿ mā cho-siū-tio̍h bô-lâng-ki se̍k-kek, ki-tiûⁿ lāi chi̍t chō tû-iû-chô po̍k-chà to̍h hóe, Gô-lô koaⁿ-hong soan-chheng bô jîn-oân siong-bông.

Tē-it kang po̍k-chà hoat-seng kúi tiám-cheng āu, 乌克兰 choân kéng khang-se̍k kéng-pò koh-chài hiáng-khí. Gô-lô koh hiòng 乌克兰 hoat-tōng sin chi̍t-pho ê hui-tôaⁿ kong-kek. 乌克兰 chóng-thóng kóng, goán í-keng cha̍h tiāu chin chē lia̍p hui-tôaⁿ, tān-sī iû-goân ín-hoat chin chē só͘-chāi thêng tiān.

　　 Gô-lô chí-chek 乌克兰 kong-kek Gô-lô léng-thó͘. Chin kî-koài, Gô-lô khì phah 乌克兰 léng-thó͘ 280 gōa kang ná chhiūⁿ chiâⁿ chèng-tong, 乌克兰tī Gô-lô kéng-lāi khian saⁿ-ê niā-niā tio̍h kaiⁿ-kaiⁿ kiò!

　　Oh, goân-lâi 乌克兰mā ē-sái phah Gô-lô!

Chù, 乌克兰　　 chhiáⁿ liām Hôa-gí




　　2022年二月二四，俄罗军队正式侵略乌克兰到taⁿ280外工，ē-sái讲是乌克兰hō͘俄罗chhih teh土脚拍，mā-nā战车、大炮四界弹，飞弹无停，发电厂、水库、电力电信系统受破坏，连真chē病院、学校mā hō in炸炸掉，实在真可恶！好佳哉以美国chhōa头ê北约国家即时提供各种新武器支援，乌克兰才ētàng挡到今á日。咱mā bat想，乌克兰náē无爱kā拍倒转去？

　　无疑误十二月初五透早6点4分，tī俄罗Salatobu（Saratov）州êUnkosu（Engels）空军基地遭受tio̍h自杀无人机袭击，引发足大ê爆炸声。Chit-ê空军基地离乌克兰边界有724公里，tī俄罗首都莫斯科东南方约875公里ê所在，是俄罗向乌克兰发射火箭弹战机ê主要起降地，mā是俄罗空军有充分设备、ē-tàng为进攻乌克兰ê大型轰炸机提供维修保养ê唯一基地。几工前间谍卫星有show出TU-90 kah TU-160轰炸机聚集ê所在。爆炸发生后，无受害ê战机lóng总起飞离开基地。

　　仝一工透早，离乌克兰边境482公里ê俄罗中部城市Lachan（Ryazan）附近êChiagilebô（Dyagilevo）空军基地mā是遭受tio̍h无人机ê攻击。Chit-ê空军基地有停真chē只俄罗大型战略轰炸机。

　　乌克兰内政部长顾问Jielasenko（Anton Gerashchenko）tīTwitter顶面表示，有消息讲Unkosu（Engels）空军基地kah Chiagilebô（Dyagilevo）空军基地ê军机原本预订beh tī十二月初五早起执行轰炸乌克兰能源基础设施ê任务。无想tio̍h乌克兰先出手。

　　俄罗国防部tī消息曝光了后跳出来表示，chit两遍攻击事件有造成3死4伤，2只Tu-95轰炸机kah 1只Tu-22M̀轰炸机毁损

　　无三不成礼，十二月初六早起，离乌克兰无lōa远êKhusukhu（Kursk）军用机场mā遭受tio̍h无人机袭击，机场内一座储油槽爆炸to̍h火，俄罗官方宣称无人员伤亡。

第一工爆炸发生几点钟后，乌克兰全境空袭警报再度响起。俄罗koh向乌克兰发动新一波ê飞弹攻击。乌克兰总统讲，阮已经cha̍h掉真chē粒飞弹，但是犹原引发真chē所在停电。

　　俄罗指责乌克兰攻击俄罗领土。真奇怪，俄罗去拍乌克兰领土280外工那像诚正当，乌克兰tī俄罗境内khian三个niā-niā tio̍h kaiⁿ-kaiⁿ叫！

　　Oh，原来乌克兰māē-sái拍俄罗！

注：乌克兰　　请念华语