《绿色短评》

 | | | 转寄

吴怡农tio̍h kah伊直球对决，chiah ē选赢！

作者 李南衡, ChoânTâijī/全台字 by Chng Hūiphêng 2023.01.08

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　 Lí Lâmhêng

　　　　Gô͘ Gîlông tio̍h kah i ti̍tkiû tùikoat, chiah ē soán iâⁿ!

2022 nî káuha̍pit tōasoán, Tiongkok Kokbîntóng Chiúⁿ Bānan tòngsoán Tâipakchhītiúⁿ , sîtiāu li̍phoat úigoân liáuāu, Tâipakchhī tēsaⁿ soán khu ( lâm Siongsan kah Tiongsankhu) ê li̍phoat úigoân tio̍h pó͘soán. Tútú tī tēsaⁿ soánkhu (Siôngsan Sìngī khu) í nn̄gbān gōa phiò koân phiò tòngsoán ê Tiongkok Kokbîntóng chhīgīgoân Ông Hôngbî soanpò͘, i beh chhamsoán 2023 nî itgoe̍h chhepeh ê li̍púi pó͘soán, jîchhiáⁿ mā khì tengkì liáu. I háu kóng lâng mē I "làuphâu". Káⁿ bôiáⁿ? M̄nā ánne, i iûgoân beh chhamka cha̍pjīgoe̍h jīgō͘ Tâipakchhī gīoân soansè chiūchit, koh beh tâuphiò soán gītiúⁿ, hùgītiúⁿ, i nā li̍púi pó͘soán lo̍ksoán iáu ēsái tńgkhì choh chhīgīgoân.

Kantāⁿ hongsiaⁿ Gô͘ Gîlông ū khólêng tāipiáu Bînchìntóng chhutlâi chhamsoán, ithiòng ēng iâugiân sòaⁿpò͘ siûhūn giânlūn ê Tiongkok Kokbîntóng, sûisî sòaⁿpò͘ iâugiân kóng, Gô͘ Gîlông sī "chèng jītāi", ìsù sī kóng i bô púnsū, sī khò i ê pēbú tììm・ê. Hiānchhúsî Tâioân chinchiàⁿ ê "chèng jītāi" móamóa sī, pēng m̄ sī siáⁿmi̍h kiànsiàu ê tāichì, būntê sī Gô͘ Gîlông m̄ sī "chèng jītāi", i ê lāupē Gô͘ Náitek sī Chikako tāiha̍k chèngtīha̍k phoksū, Tiongiong Giánkiùīⁿ chèngtī siāhōesó͘ thèhiu giánkiùoân. Ngē kā "chèngtī ha̍kchiá tē jītāi" kóng choh "chèng jītāi", ē hông chhiò "bô siôngsek". Iáu ū chi̍tê iâugiân koh Khah "bô siôngsek", kóng Gô͘ Gîlông kah o͘tō ū koanhē, sī "o͘tō siótī". Gô͘ Gîlông chin siūkhì kóng, ánne chō iâugiân ê lâng sī ba̍kchiu kimkim lâng siongtiōng! i kóng góa sin piⁿ bô o͘tō, tānsī se̍ksāi chin chē cháchêng siū Tiongkok Kokbîntóng pekhāi ê "o͘ miâtoaⁿ" ê lâng. Sūsi̍t sī Gô͘ Gîlông 1980 tī Bíkok chikako chhutsì, la̍k hòe kuike tńglâi Tâioân, kotiong chiah khì Bíkok liûha̍k, 耶鲁 tāiha̍k kengchè ha̍khē pitgia̍p liáuāu, ji̍pkhì Koânsēng chi̍pthoân kangchok. 2013 nî soánte̍k hòngkhì Bíkok kokchek, līkhui kimiônggia̍p tńglâi Tâioân, 2014 chì 2015 nî tī háikun lio̍kchiàntūi chòpeng. Chòpeng liáuāu bat tamjīm kòe Bînchìntóng Tâipakchhī tóngpō͘ chúúi. Nā kóng o͘tō, siáⁿ lâng káⁿ kah Tiongkok Kokbîntóng pí? Mai kóng i ê tóng sú o͘màmà khòaⁿ bô i ê chhengthian pe̍kji̍t tónghui, hiānchhúsî Tâioân chèng tôaⁿ, ū o͘té ê koānchhī gīgoân, gītiúⁿ hùgītiúⁿ ê Tiongkok Kokbîntóngoân, ēng kúi ê lâng siang chhiú chhiúchéngthâuá lâi sǹg mā sǹg bē oân, Tiongkok Kokbîntóng káⁿ o͘pe̍h chōiâu kóng Gô͘ Gîlông kah o͘tō ū koanhē? M̄ kiaⁿ chhiò phòa lâng ê chhùi!

　　 Ông Hôngbî kóng beh iauchhiáⁿ Gô͘ Gîlông piānlūn, Gô͘ Gîlông kóng,"bô chèngkiàn sī beh ùi tóūi piān khí?" chi̍tsiaⁿ kā tôaⁿ tòtńgkhì. Ánne to̍htio̍h! Ông Hôngbî koh kóng che, koh kóng he. Gô͘ Gîlông koh kóng,"chiàu góa phiauchún lâi khòaⁿ, chiahê lóng m̄ sī chèngkiàn. Ông Hôngbî náchhiūⁿ iáu m̄chaiiáⁿ li̍phoat úigoân sī beh chò siáⁿmi̍h. "Ū kìchiá ti̍tti̍t mn̄g kóng ná ē bô beh chiapsiū Ông Hôngbî piānlūn chiànthiap? Gô͘ Gîlông ti̍tpeh kóng, piānlūn sī chiamtùi si̍tchit chèngkiàn ū kūthé ê chútiuⁿ, ùi soánkí kàu taⁿ kantāⁿ khòaⁿtio̍h Ông Hôngbî phùn chhùinōa kah o͘pe̍h mē lâng, bô pitiàu piānlūn hō͘ i koh līiōng kihōe boah o͘, phùn chhùinōa mē lâng.

Gô͘ Gîlông tú tio̍h chit khoán oanoan khiaukhiau ê Tiongkok Kokbîntóng, nā kah i lilí lolo, tio̍h ē hō͘ i khankhì se̍h. Gô͘ Gîlông ánne kah i ti̍tkiû tùikoat, tongjiân sī tio̍h mā chiah ē soán iâⁿ! (221223)

Chù, 落跑（làuphâu）."黑道小弟"　耶鲁 chhiáⁿ liām Hôagí 　　



Pe̍h-ōe-jī-pán/白话字版


《 Le̍k-sek toán-phêng 》　 Lí Lâm-hêng

　　　　Gô͘ Gî-lông tio̍h kah i ti̍t-kiû tùi-koat, chiah ē soán iâⁿ!

2022 nî káu-ha̍p-it tōa-soán, Tiong-kok Kok-bîn-tóng Chiúⁿ Bān-an tòng-soán Tâi-pak-chhī-tiúⁿ , sî-tiāu li̍p-hoat úi-goân liáu-āu, Tâi-pak-chhī tē-saⁿ soán khu ( lâm Siong-san kah Tiong-san-khu) ê li̍p-hoat úi-goân tio̍h pó͘-soán. Tú-tú tī tē-saⁿ soán-khu (Siông-san Sìn-gī khu) í nn̄g-bān gōa phiò koân phiò tòng-soán ê Tiong-kok Kok-bîn-tóng chhī-gī-goân Ông Hông-bî soan-pò͘, i beh chham-soán 2023 nî it-goe̍h chhe-peh ê li̍p-úi pó͘-soán, jî-chhiáⁿ mā khì teng-kì liáu. I háu kóng lâng mē I "làu-phâu". Káⁿ bô-iáⁿ? M̄-nā án-ne, i iû-goân beh chham-ka cha̍p-jī-goe̍h jī-gō͘ Tâi-pak-chhī gī-oân soan-sè chiū-chit, koh beh tâu-phiò soán gī-tiúⁿ, hù-gī-tiúⁿ, i nā li̍p-úi pó͘-soán lo̍k-soán iáu ē-sái tńg-khì choh chhī-gī-goân.

Kan-tāⁿ hong-siaⁿ Gô͘ Gî-lông ū khó-lêng tāi-piáu Bîn-chìn-tóng chhut-lâi chham-soán, it-hiòng ēng iâu-giân sòaⁿ-pò͘ siû-hūn giân-lūn ê Tiong-kok Kok-bîn-tóng, sûi-sî sòaⁿ-pò͘ iâu-giân kóng, Gô͘ Gî-lông sī "chèng jī-tāi", ì-sù sī kóng i bô pún-sū, sī khò i ê pē-bú tì-ìm-・ê. Hiān-chhú-sî Tâi-oân chin-chiàⁿ ê "chèng jī-tāi" móa-móa sī, pēng m̄ sī siáⁿ-mi̍h kiàn-siàu ê tāi-chì, būn-tê sī Gô͘ Gî-lông m̄ sī "chèng jī-tāi", i ê lāu-pē Gô͘ Nái-tek sī Chi-ka-ko tāi-ha̍k chèng-tī-ha̍k phok-sū, Tiong-iong Gián-kiù-īⁿ chèng-tī siā-hōe-só͘ thè-hiu gián-kiù-oân. Ngē kā "chèng-tī ha̍k-chiá tē jī-tāi" kóng choh "chèng jī-tāi", ē hông chhiò "bô siông-sek". Iáu ū chi̍t-ê iâu-giân koh Khah "bô siông-sek", kóng Gô͘ Gî-lông kah o͘-tō ū koan-hē, sī "o͘-tō sió-tī". Gô͘ Gî-lông chin siū-khì kóng, án-ne chō iâu-giân ê lâng sī ba̍k-chiu kim-kim lâng siong-tiōng! i kóng góa sin piⁿ bô o͘-tō, tān-sī se̍k-sāi chin chē chá-chêng siū Tiong-kok Kok-bîn-tóng pek-hāi ê "o͘ miâ-toaⁿ" ê lâng. Sū-si̍t sī Gô͘ Gî-lông 1980 tī Bí-kok chi-ka-ko chhut-sì, la̍k hòe kui-ke tńg-lâi Tâi-oân, ko-tiong chiah khì Bí-kok liû-ha̍k, 耶鲁 tāi-ha̍k keng-chè ha̍k-hē pit-gia̍p liáu-āu, ji̍p-khì Koân-sēng chi̍p-thoân kang-chok. 2013 nî soán-te̍k hòng-khì Bí-kok kok-chek, lī-khui kim-iông-gia̍p tńg-lâi Tâi-oân, 2014 chì 2015 nî tī hái-kun lio̍k-chiàn-tūi chò-peng. Chò-peng liáu-āu bat tam-jīm kòe Bîn-chìn-tóng Tâi-pak-chhī tóng-pō͘ chú-úi. Nā kóng o͘-tō, siáⁿ lâng káⁿ kah Tiong-kok Kok-bîn-tóng pí? Mai kóng i ê tóng sú o͘-mà-mà khòaⁿ bô i ê chheng-thian pe̍k-ji̍t tóng-hui, hiān-chhú-sî Tâi-oân chèng tôaⁿ, ū o͘-té ê koān-chhī gī-goân, gī-tiúⁿ hù-gī-tiúⁿ ê Tiong-kok Kok-bîn-tóng-oân, ēng kúi ê lâng siang chhiú chhiú-chéng-thâu-á lâi sǹg mā sǹg bē oân, Tiong-kok Kok-bîn-tóng káⁿ o͘-pe̍h chō-iâu kóng Gô͘ Gî-lông kah o͘-tō ū koan-hē? M̄ kiaⁿ chhiò phòa lâng ê chhùi!

　　 Ông Hông-bî kóng beh iau-chhiáⁿ Gô͘ Gî-lông piān-lūn, Gô͘ Gî-lông kóng,"bô chèng-kiàn sī beh ùi tó-ūi piān khí?" chi̍t-siaⁿ kā tôaⁿ tò-tńg-khì. Án-ne to̍h-tio̍h! Ông Hông-bî koh kóng che, koh kóng he. Gô͘ Gî-lông koh kóng,"chiàu góa phiau-chún lâi khòaⁿ, chiah-ê lóng m̄ sī chèng-kiàn. Ông Hông-bî ná-chhiūⁿ iáu m̄-chai-iáⁿ li̍p-hoat úi-goân sī beh chò siáⁿ-mi̍h. "Ū kì-chiá ti̍t-ti̍t mn̄g kóng ná ē bô beh chiap-siū Ông Hông-bî piān-lūn chiàn-thiap? Gô͘ Gî-lông ti̍t-peh kóng, piān-lūn sī chiam-tùi si̍t-chit chèng-kiàn ū kū-thé ê chú-tiuⁿ, ùi soán-kí kàu taⁿ kan-tāⁿ khòaⁿ-tio̍h Ông Hông-bî phùn chhùi-nōa kah o͘-pe̍h mē lâng, bô pit-iàu piān-lūn hō͘ i koh lī-iōng ki-hōe boah o͘, phùn chhùi-nōa mē lâng.

Gô͘ Gî-lông tú tio̍h chit khoán oan-oan khiau-khiau ê Tiong-kok Kok-bîn-tóng, nā kah i li-lí lo-lo, tio̍h ē hō͘ i khan-khì se̍h. Gô͘ Gî-lông án-ne kah i ti̍t-kiû tùi-koat, tong-jiân sī tio̍h mā chiah ē soán iâⁿ! (221223)

Chù, 落跑（làu-phâu）."黑道小弟"　耶鲁 chhiáⁿ liām Hôa-gí 　　



2022年九合一大选，中国国民党蒋万安当选台北市长，辞掉立法委员了后，台北市第三选区（南松山kah中山区）ê立法委员tio̍h补选。Tútútī第三选区（松山信义区）以两万外票高票当选ê中国国民党市议员王鸿薇宣布，伊beh参选2023年一月初八ê立委补选、而且mā去登记了。伊哮讲人骂伊「落跑」。敢无影？M̄-nā án-ne，伊犹原beh参加十二月二五台北市议员宣誓就职，koh beh投票选议长、副议长，伊nā立委补选落选犹ē-sái转去作市议员。

Kan-tāⁿ风声吴怡农有可能代表民进党出来参选，一向用谣言散布仇恨言论ê中国国民党，随时散布谣言讲：吴怡农是「政二代」，意思是讲伊无本事，是靠伊ê父母致荫-・ê。现此时台湾真正ê「政二代」满满是，并m̄是啥物见笑ê代志，问题是吴怡农m̄是「政二代」，伊ê老父吴乃德是芝加哥大学政治学博士，中央研究院政治社会所退休研究员。硬kā「政治学者第二代」讲作「政二代」，ē hông笑「无常识」。犹有一个谣言koh Khah「无常识」：讲吴怡农kah乌道有关系、是「黑道小弟」。吴怡农真受气讲，án-ne造谣言ê人是目睭金金人伤重！伊讲我身边无乌道，但是熟似真chē早前受中国国民党迫害ê「黑名单」ê人。事实是吴怡农1980tī美国芝加哥出世，六岁kui家转来台湾，高中chiah去美国求学，耶鲁大学经济学系毕业了后，入去高盛集团工作。2013年选择放弃美国国籍、离开金融业转来台湾，2014至2015年tī海军陆战队服役。服役了后bat担任过民进党台北市党部主委。若讲乌道，啥人敢kah中国国民党比？Mai讲伊ê党史乌mà-mà看无伊ê青天白日党徽，现此时台湾政坛，有乌底ê县市议员、议长副议长ê中国国民党员，用kúi个人双手手指头á来算mā算bē完，中国国民党敢乌白造谣讲吴怡农kah乌道有关系？M̄惊笑破人ê嘴！

　　王鸿薇讲beh邀请吴怡农辩论，吴怡农讲：「无政见是beh ùi tó位辩起？」一声kā弹倒转去。Án-ne to̍h-tio̍h！王鸿薇koh讲che、koh讲he。吴怡农koh讲：「照我标准来看，chiah-ê lóng m̄是政见。王鸿薇ná像犹m̄知影立法委员是beh做啥物。」有记者直直问讲ná 那ē无beh接受王鸿薇辩论战帖？吴怡农直剖讲：辩论是针对实质政见有具体ê主张，ùi选举到taⁿ kan-tāⁿ看tio̍h王鸿薇喷嘴澜kah乌白骂人，无必要辩论hō͘伊koh利用机ē抺乌、喷嘴澜骂人。

吴怡农tú tio̍h chit款弯弯曲曲（khiau）ê中国国民党，若kah伊li-lí lo-lo，tio̍h ēhō͘伊牵去se̍h。吴怡农án-ne kah伊直球对决，当然是tio̍h māchiahē选赢！ (221223)

注：落跑（làu-phâu）。「黑道小弟」　耶鲁　请念华语　　手指头á 　　（chhiú chéng-thâu-á）