《绿色短评》

 | | | 转寄

勇敢拒绝蓝白两党ê仇恨言论！

作者 李南衡, ChoânTâijī/全台字 by Chng Hūiphêng 2022.12.04

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　 Lí Lâmhêng

　　 Ióngkám kīchoa̍t nâ pe̍h nn̄g tóng ê siûhūn giânlūn!

　　2016 nî itgoe̍h cha̍pla̍k, Bînchìntóng Chhòa Engbûn tòngsoán chóngthóng, tēit thâuthiàⁿ ê būntê sī nîkim káikek. Ta̍kê lóng chaiiáⁿ nî kim nā bô káikek, kok chióng nîkim ē tī kúi nî lāi siosòa phòsán, kàusî ē khekkhui tio̍h thèhiu ê kunkongkàu jînoân niá bô chîⁿ. Chipchèng ê Bînchìntóng piàⁿsì tī 2017 nî la̍kgoe̍h jīchhit li̍phoatīⁿ siuchèng thongkòe káikek àn, 2018 nî chhitgoe̍h khaisí si̍tsi. Chúiáu sī kongbūoân thèhiu kim 18％ iuhūi chûnkhoán 2 nî pòaⁿ kui lêng kah kîtha káikek chhòsi, hō͘ chin chē lâng súnsit chîⁿchâi chhinchhiūⁿ koah tio̍h bah ē thiàⁿ. Kantāⁿ 18% iuhūi chûnkhoán pō͘hūn tio̍h chhiaukòe 33 bān gōalâng siū énghióng, chi̍tê katêng 3 ê lâng lâi sǹg tio̍h ū 100 bān lâng ē siūkhì. Cha̍pitgoe̍h jīsì choân kok káuha̍pit tōa soán, Tiongkok Kokbîntóng līiōng chittiám sòaⁿ pò siûhūn giânlūn, ínkhí chin chē lâng oànhūn chipchèng ê Bînchìntóng! Tōa soán ê kiatkó Bînchìntóng tōa su, ti̍thatchhī kah koān chhītiúⁿ Bînchìntóng ùi hiān ū ê13 se̍k kiám kah chhun 6 se̍k, Tiongkok Kokbîntóng ùi 6 se̍k tōatōa chēngka piàn 15 se̍k. Tēhng gīhōe chóngse̍kchhù, Bînchìntóng ùi 308 se̍k lo̍h kàu 238 se̍k, sit 70 se̍k; Tiongkok Kokbîntóng ùi 374 se̍k chēngka kàu 394 se̍k, ke 20 se̍k. Tiongkok Kokbîntóng huisiông tekì in ê siûhūn giânlūn chiâⁿ ūhāu.

　　 Chia̍hliáu chai chubī, kiⁿî káuha̍pit tōa soán, Tiongkok Kokbîntóng the̍h bē chhut siáⁿmi̍h hó chèngkiàn, kantāⁿ siūⁿkhí sì nî chêng ê phiat pō͘ — siûhūn giânlūn, kiⁿî sī chèchō jînbîn tùi Tâipak chhītiúⁿ hāusoánjîn Tân Sîtiong pō͘tiúⁿ ê siûhūn, iánhòa choh tùi chipchèng Bînchìntóng ê siûhūn, ùi Tâipakchhī thòaⁿ kàu choân kok. Tng iáubōe ū e̍kbiâu lán tio̍h ū chúnpī chîⁿ, hiòng sèkài kok e̍kbiâu kongsi tēng hòe, inūi Tiongkok ê chó͘gāi, kok e̍kbiâu kongsi bô beh chhut hòe hō͘ lán, hit sî Tiongkok pàng siaⁿ kóng ū e̍kbiâu ēsái bē lán, Tiongkok Kokbîntóng tōa sèsiaⁿ kóngtio̍h kín kā Tiongkok bé. Tongsî ê ōehok pō͘tiúⁿ Tân Sîtiong kóng nā chiàu nn̄ghōaⁿ tiâulē putchún hiòng Tiongkok bébē iio̍h kah e̍kbiâu, bô seng siuhoat biánkóng. Tiongkok Kokbîntóng mē kóng chèngtī ìsek hêngthài tìsú bô beh chiapsiū Tiongkok e̍kbiâu. Sèkài kok kok chaiiáⁿ lán ê chhùkéng, Ji̍tpún chêngāu sàng lán 420 bān gōa che AZ e̍kbiâu, Bíkok chêngāu sàng lán 400 bān che Moderna e̍kbiâu, liân 波兰、立陶宛、斯洛伐克、捷克 mā sàng lán kúi cha̍pbān che e̍kbiâu. Tiongkok Kokbîntóng mē kóng lán Tâioân sī "e̍kbiâu khitchia̍h".

　　 Bíkok chènghú ēng chhiaukòe 180 ek bíkim chànchō͘ io̍h chhiúⁿ géng chè Covid19 e̍kbiâu, tī té sîkan lāi géng chè chhut koân hāule̍k e̍kbiâu; kantāⁿ ū e̍kbiâu bô kàu, Bíkok chènghú koh tâuji̍p 32 ek bíkim géng chè khòngpēⁿ to̍k io̍h phìⁿ. Lán chènghú kó͘lē púnkok io̍h chhiúⁿ géng chè e̍kbiâu, Kotoan sêngkong liáu, kó͘lē tāike chù Kotoan e̍kbiâu. Tiongkok Kokbîntóng ê siûhūn giânlūn kóng chènghú tô͘lī chhiúⁿsiong. Chō iâu kóng chènghú bé Kotoan e̍kbiâu kùi jōachē. Liân goânpún khòaⁿ・khílâi chiâⁿ chiàⁿphài ê 黄珊珊, kèngjiân ēng "bô͘châi hāibēng" chiah okto̍k ê ōe lâi mē Tân Sîtiong pō͘tiúⁿ.

　　 Chêng kúi kang, Ji̍tpún Nagasaki Shinbun pòtō Bînchìntóng Hoaliân koāntiúⁿ hāusoánjîn Kolas Yotaka chham soán sinbûn, kóng i jīnûi che sī chi̍t tiûⁿ kokí goânchūbîn cho̍k jīntông jîchhiáⁿ kā chūsìn chhōe・tńglâi ê ūntōng. Kolas kiôngtiāu,"lán lāisim bô siûhūn, tútú kah in tòhoán, lán sī simkoaⁿ té ū ài." siānliông ê Tâioân lâng, lán bô khiàm siûhūn, ióngkám kīchoa̍t nâ pe̍h nn̄g tóng ê siûhūn giânlūn. (221117)

Chù, 波兰、立陶宛、斯洛伐克、捷克　黄珊珊　 chhiáⁿ liām Hôagí


Pe̍h-ōe-jī-pán/白话字版


《 Le̍k-sek toán-phêng 》　 Lí Lâm-hêng

　　 Ióng-kám kī-choa̍t nâ pe̍h nn̄g tóng ê siû-hūn giân-lūn!

　　2016 nî it-goe̍h cha̍p-la̍k, Bîn-chìn-tóng Chhòa Eng-bûn tòng-soán chóng-thóng, tē-it thâu-thiàⁿ ê būn-tê sī nî-kim kái-kek. Ta̍k-ê lóng chai-iáⁿ nî kim nā bô kái-kek, kok chióng nî-kim ē tī kúi nî lāi sio-sòa phò-sán, kàu-sî ē khek-khui tio̍h thè-hiu ê kun-kong-kàu jîn-oân niá bô chîⁿ. Chip-chèng ê Bîn-chìn-tóng piàⁿ-sì tī 2017 nî la̍k-goe̍h jī-chhit li̍p-hoat-īⁿ siu-chèng thong-kòe kái-kek àn, 2018 nî chhit-goe̍h khai-sí si̍t-si. Chú-iáu sī kong-bū-oân thè-hiu kim 18％ iu-hūi chûn-khoán 2 nî pòaⁿ kui lêng kah kî-tha kái-kek chhò-si, hō͘ chin chē lâng sún-sit chîⁿ-châi chhin-chhiūⁿ koah tio̍h bah ē thiàⁿ. Kan-tāⁿ 18% iu-hūi chûn-khoán pō͘-hūn tio̍h chhiau-kòe 33 bān gōa-lâng siū éng-hióng, chi̍t-ê ka-têng 3 ê lâng lâi sǹg tio̍h ū 100 bān lâng ē siū-khì. Cha̍p-it-goe̍h jī-sì choân kok káu-ha̍p-it tōa soán, Tiong-kok Kok-bîn-tóng lī-iōng chit-tiám sòaⁿ pò siû-hūn giân-lūn, ín-khí chin chē lâng oàn-hūn chip-chèng ê Bîn-chìn-tóng! Tōa soán ê kiat-kó Bîn-chìn-tóng tōa su, ti̍t-hat-chhī kah koān chhī-tiúⁿ Bîn-chìn-tóng ùi hiān ū ê13 se̍k kiám kah chhun 6 se̍k, Tiong-kok Kok-bîn-tóng ùi 6 se̍k tōa-tōa chēng-ka piàn 15 se̍k. Tē-hng gī-hōe chóng-se̍k-chhù, Bîn-chìn-tóng ùi 308 se̍k lo̍h kàu 238 se̍k, sit 70 se̍k; Tiong-kok Kok-bîn-tóng ùi 374 se̍k chēng-ka kàu 394 se̍k, ke 20 se̍k. Tiong-kok Kok-bîn-tóng hui-siông tek-ì in ê siû-hūn giân-lūn chiâⁿ ū-hāu.

　　 Chia̍h-liáu chai chu-bī, kin-nî káu-ha̍p-it tōa soán, Tiong-kok Kok-bîn-tóng the̍h bē chhut siáⁿ-mi̍h hó chèng-kiàn, kan-tāⁿ siūⁿ-khí sì nî chêng ê phiat pō͘ — siû-hūn giân-lūn, kin-nî sī chè-chō jîn-bîn tùi Tâi-pak chhī-tiúⁿ hāu-soán-jîn Tân Sî-tiong pō͘-tiúⁿ ê siû-hūn, ián-hòa choh tùi chip-chèng Bîn-chìn-tóng ê siû-hūn, ùi Tâi-pak-chhī thòaⁿ kàu choân kok. Tng iáu-bōe ū e̍k-biâu lán tio̍h ū chún-pī chîⁿ, hiòng sè-kài kok e̍k-biâu kong-si tēng hòe, in-ūi Tiong-kok ê chó͘-gāi, kok e̍k-biâu kong-si bô beh chhut hòe hō͘ lán, hit sî Tiong-kok pàng siaⁿ kóng ū e̍k-biâu ē-sái bē lán, Tiong-kok Kok-bîn-tóng tōa sè-siaⁿ kóng-tio̍h kín kā Tiong-kok bé. Tong-sî ê ōe-hok pō͘-tiúⁿ Tân Sî-tiong kóng nā chiàu nn̄g-hōaⁿ tiâu-lē put-chún hiòng Tiong-kok bé-bē i-io̍h kah e̍k-biâu, bô seng siu-hoat bián-kóng. Tiong-kok Kok-bîn-tóng mē kóng chèng-tī ì-sek hêng-thài tì-sú bô beh chiap-siū Tiong-kok e̍k-biâu. Sè-kài kok kok chai-iáⁿ lán ê chhù-kéng, Ji̍t-pún chêng-āu sàng lán 420 bān gōa che AZ e̍k-biâu, Bí-kok chêng-āu sàng lán 400 bān che Moderna e̍k-biâu, liân 波兰、立陶宛、斯洛伐克、捷克 mā sàng lán kúi cha̍p-bān che e̍k-biâu. Tiong-kok Kok-bîn-tóng mē kóng lán Tâi-oân sī "e̍k-biâu khit-chia̍h".

　　 Bí-kok chèng-hú ēng chhiau-kòe 180 ek bí-kim chàn-chō͘ io̍h chhiúⁿ géng chè Covid-19 e̍k-biâu, tī té sî-kan lāi géng chè chhut koân hāu-le̍k e̍k-biâu; kan-tāⁿ ū e̍k-biâu bô kàu, Bí-kok chèng-hú koh tâu-ji̍p 32 ek bí-kim géng chè khòng-pēⁿ to̍k io̍h phìⁿ. Lán chèng-hú kó͘-lē pún-kok io̍h chhiúⁿ géng chè e̍k-biâu, Ko-toan sêng-kong liáu, kó͘-lē tāi-ke chù Ko-toan e̍k-biâu. Tiong-kok Kok-bîn-tóng ê siû-hūn giân-lūn kóng chèng-hú tô͘-lī chhiúⁿ-siong. Chō iâu kóng chèng-hú bé Ko-toan e̍k-biâu kùi jōa-chē. Liân goân-pún khòaⁿ-・khí-lâi chiâⁿ chiàⁿ-phài ê 黄珊珊, kèng-jiân ēng "bô͘-châi hāi-bēng" chiah ok-to̍k ê ōe lâi mē Tân Sî-tiong pō͘-tiúⁿ.

　　 Chêng kúi kang, Ji̍t-pún Nagasaki Shinbun pò-tō Bîn-chìn-tóng Hoa-liân koān-tiúⁿ hāu-soán-jîn Kolas Yotaka chham soán sin-bûn, kóng i jīn-ûi che sī chi̍t tiûⁿ ko-kí goân-chū-bîn cho̍k jīn-tông jî-chhiáⁿ kā chū-sìn chhōe-・tńg-lâi ê ūn-tōng. Kolas kiông-tiāu,"lán lāi-sim bô siû-hūn, tú-tú kah in tò-hoán, lán sī sim-koaⁿ té ū ài." siān-liông ê Tâi-oân lâng, lán bô khiàm siû-hūn, ióng-kám kī-choa̍t nâ pe̍h nn̄g tóng ê siû-hūn giân-lūn. (221117)

Chù, 波兰、立陶宛、斯洛伐克、捷克　黄珊珊　 chhiáⁿ liām Hôa-gí



　　2016年一月十六，民进党蔡英文当选总统，第一头疼ê问题是年金改革。Ta̍k个lóng知影年金若无改革，各种年金ē tī几年内相续破产，到时ē克亏tio̍h退休ê军公教人员领无钱。执政ê民进党拼势tī 2017年六月二七立法院修正通过改革案，2018年七月开始实施。主要是公务员退休金18％优惠存款2年半归零kah其他改革措施，hō͘真chē人损失钱财亲像割tio̍h肉ē疼。干单18%优惠存款部分tio̍h超过33万外人受影响，一个家庭3个人来算tio̍h有100万人ē受气。十一月二四全国九合一大选，中国国民党利用chit点散播仇恨言论，引起真chē人怨恨执政ê民进党！大选ê结果民进党大输：直辖市kah县市长民进党ùi现有ê13席减kah chhun 6席，中国国民党ùi 6席大大增加变15席。地方议会总席次，民进党ùi 308席落到238席、失70席；中国国民党ùi 374席增加到394席，加20席。中国国民党非常得意inê仇恨言论chiâⁿ有效。

　　食了知滋味，今年九合一大选，中国国民党提bē出啥物好政见，干单想起四年前ê phiat步—仇恨言论，今年是制造人民对台北市长候选人陈时中ê仇恨，演化作对执政民进党ê仇恨，ùi台北市thòaⁿ到全国。当犹未有疫苗咱tio̍h有准备钱，向世界各疫苗公司订货，因为中国ê阻扰，各疫苗公司无beh出货hō͘咱，hit时中国放声讲有疫苗ē-sái卖咱，中国国民党大细声讲tio̍h紧kā中国买。当时ê卫福部长陈时中讲若照两岸条例不准向中国买卖医药kah疫苗，无先修法免讲。中国国民党骂讲政治意识形态致使无beh接受中国疫苗。世界各国知影咱ê处境，日本前后送咱420万外剂AZ疫苗，美国前后送咱400万剂Moderna疫苗，连波兰、立陶宛、斯洛伐克、捷克mā送咱几十万剂疫苗。中国国民党骂讲咱台湾是「疫苗乞食」。

　　美国政府用超过180亿美元资助药厂研制Covid-19疫苗，tī短时间内研制出高效力疫苗；干单有疫苗无够，美国政府koh投入32亿美元研制抗病毒药片。咱政府鼓励本国药厂研制疫苗，高端成功了，鼓励tāi-ke注高端疫苗。中国国民党ê仇恨言论讲政府图利厂商。造谣讲政府买高端疫苗贵jōa-chē。连原本看起来chiâⁿ正派ê黄珊珊，竟然用「谋财害命」chiah恶毒ê话来骂陈时中。

　　前几工，日本Nagasaki Shinbun（「长崎新闻」）报导民进党花莲县长候选人Kolas Yotaka参选新闻，讲伊认为che是一场高举原住民族认同而且kā自信chhōe转来ê运动。Kolas强调：「咱内心无仇恨，tú-tú kah in倒反，咱是心肝底有爱。」善良ê台湾人，咱无欠仇恨，勇敢拒绝蓝白两党ê仇恨言论。 (221117)

注：波兰、立陶宛、斯洛伐克、捷克　　黄珊珊　　请念华语