《绿色短评》

 | | | 转寄

中国kám ē拍台湾？

作者 李南衡, ChoânTâijī/全台字 by Chng Hūiphêng 2022.11.27

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　　　　　　　　　　　 Tiongkok kám ē phah Tâioân?

　　 Cha̍pgoe̍h cha̍pla̍k chì jījī ê Τiongkiōng Jīcha̍ptōa, Τiongkiōng chóngsukì 习近平 koh chi̍t piàn kiôngtiāu kóng,"chó͘kok oânchoân thóngit ittēng tio̍h si̍thiān", jîchhiáⁿ" choa̍ttùi bô sênglo̍k hòngkhì súiōng búle̍k". Suijiân chhùi ngē kóng beh phah Tâioân, tānsī ē phah bē phah tio̍h khòaⁿ khehkoan ê tiâukiāⁿ. 《 Ji̍tpún Sánkengsinbûn 》 Tâioân ki tiàm tn̂g Yaita akio san（矢板明夫） kóng, kúi nî chêng i hóngbūn kòe Τiongkiōng kunhong koân chàn, hit ūi koaⁿoân kóng Τiongkiōng chhut peng phah Tâioân ū saⁿê tiâukiāⁿ, tēit, kunla̍t siōng Tiongkok tùi Tâioân ū phah sísí ê chhakū, ētàng tī té sîkan lāi kā Tâioân phah・lo̍hlâi; tējī, í Bíkok choh thâu ê tīniâⁿ bô kàiji̍p Τâihái koanhē, chhiūⁿkóng Bíkok chhuthiān chi̍tê chhin Tiong ê chóngthóng, á・sī chhuthiān lāiloān, á・sī hông kńg ji̍pkhì Tiongtang, Auchiu ê chiàncheng; tēsaⁿ, Tâioân chhuthiān giâmtiōng ê lāiloān, chi̍tê lūisū "bô chènghú" ê chōngthāi. Jîchhiáⁿ Τiongkiōng phòaⁿtoàn ittēng phah ē iâⁿ chiah ē tāngchhiú. Lēnggōa chi̍tê piàn sò͘ sī, nāsī 习近平 thâukhak bô chhengchhéⁿ.

　　 Tiongkok tangsî ē phah Tâioân? Bíkok Tiongiong Chêngpòkio̍k hù kio̍ktiúⁿ David Cohen kóng, 习近平 íkeng hālēng kiōngkun tī 2027 nî chìnchêng kūpī búthóng Tâioân ê lêngle̍k. Só͘í i jīnûi 2027 nî chìnchêng Tiongkok ē phah Tâioân. 《 Bíkok Chi Im 》 pòtō, cha̍pgoe̍h cha̍ppeh, Bíkok Kiōnghôtóng Chiònggīoân Kalúka（Meke Gallagher） piáusī, 习近平 thiánkhui tēsaⁿ jīm kî liáuāu, ē tī Tâioân būntê téngbīn piàn choh kohkhah khìsè pek jîn, 2024 nî Tâioân tōasoán āu khólêng sī "siōng gûihiám".

　　 Cha̍pgoe̍h jīla̍k, hoatbêng "Kújī kiōngsek", Tiongkok Kokbîntóng ê kokanhōe chêng pìsutiúⁿ 苏起 kóng kàu Tâioân tī Bí Tiong koanhē tiong ê kaksek, i khausé Chhòa Engbûn chóngthóng sī chi̍tê chiâⁿ hó ê kîchhiú, kā Tâioân chhau choh piànsêng "saⁿ tiuⁿ imiông bīn", paukoat nn̄g hōaⁿ koanhē, bînchú chūiû kah chiàntàu ìchì, tī Chhòa chóngthóng chhau choh chi hā, Bíkok kanta khòaⁿtio̍h iông ê chi̍t bīn, gō͘ phòaⁿ Tâioân tī nn̄ghōaⁿ sī îchhî hiānchōng, tī bînchú sī Pe̍hshekongchú, tī chiàntàu ìchì siōng sī ióngkám・ê, tānsī sūsi̍t siōng Tâioân lāipō͘ khiok tútú sī tòpéng. Kā Tâioân tòa kàu chiànlio̍k ê "choa̍tkéng". 苏起īgiân, Τiongkiōng Jīcha̍ptōa liáuāu, 习近平 tēsaⁿ jīm ê 5 nî lāi, le̍ksú ê símphòaⁿ khólêng chin kín to̍h ē kàu ah. Choân sèkài ê lâng lóng chaiiáⁿ Tiongkok 习近平 ittēng beh phah Tâioân, kanta苏起kā Tiongkok phah Tâioân kóng choh sī le̍ksú tùi Chhòa Engbûn chóngthóng ê símphòaⁿ, si̍tchāi chin khóò͘ⁿ!

Kiⁿî "siangsi̍pcheh", Chhòa Engbûn chóngthóng tìsû ê sî kóng, Tâioân goānì ūi khue̍k ê hôpêng hoattián kònghiàn itkí chi la̍t. Tī nn̄g hōaⁿ koanhē ê li̍ptiûⁿ siōng, lán ê siānì bô piàn, sênglo̍k bô piàn, îchhî hiānchōng to̍h sī lán ê chútiuⁿ, lán ē choânle̍k chó͘chí hiānchōng hông phiànbīn káipiàn. I kiôngtiāu, káikoat nn̄g hōaⁿ bē ha̍h ê ìkiàn, ittēng tio̍h thàukòe pêngténg ê tùiōe. Lán bē khì chò mō͘hiám ê tāichì, tānsī choa̍ttùi m̄thang siūⁿ kóng Tâioân jînbîn ē tī aple̍k ēbīn khutho̍k. Lán ē kèsio̍k chhiongsi̍t kokhông, tiánhiān chūngó͘ hôngūi ê koatsim, khakpó bô lâng ētàng pek lán kiâⁿ hiòng Tiongkok só͘ siattēng ê lō͘kèng. Inūi Tiongkok só͘ siattēng ê lō͘kèng lāibīn, bē ū Tâioân bînchú chūiû ê sengoa̍h hongsek, koh khah bē ū nn̄g chheng saⁿpah bān lâng ê chúkoân.

　　 Tiongkok kám ē phah Tâioân? Tangsî ē phah? M̄ sī lán Tâioân lâng ētàng koattēng・ê. (221111)

Chù, 习近平 　苏起　 liām Hôagí


Pe̍h-ōe-jī-pán/白话字版

《 Le̍k-sek toán-phêng 》　　 Lí Lâm-hêng

　　　　　　　　　　　 Tiong-kok kám ē phah Tâi-oân?

　　 Cha̍p-goe̍h cha̍p-la̍k chì jī-jī ê Τiong-kiōng Jī-cha̍p-tōa, Τiong-kiōng chóng-su-kì 习近平 koh chi̍t piàn kiông-tiāu kóng,"chó͘-kok oân-choân thóng-it it-tēng tio̍h si̍t-hiān", jî-chhiáⁿ" choa̍t-tùi bô sêng-lo̍k hòng-khì sú-iōng bú-le̍k". Sui-jiân chhùi ngē kóng beh phah Tâi-oân, tān-sī ē phah bē phah tio̍h khòaⁿ kheh-koan ê tiâu-kiāⁿ. 《 Ji̍t-pún Sán-keng-sin-bûn 》 Tâi-oân ki tiàm tn̂g Ya-ita aki-o san（矢板明夫） kóng, kúi nî chêng i hóng-būn kòe Τiong-kiōng kun-hong koân chàn, hit ūi koaⁿ-oân kóng Τiong-kiōng chhut peng phah Tâi-oân ū saⁿ-ê tiâu-kiāⁿ, tē-it, kun-la̍t siōng Tiong-kok tùi Tâi-oân ū phah sí-sí ê chha-kū, ē-tàng tī té sî-kan lāi kā Tâi-oân phah-・lo̍h-lâi; tē-jī, í Bí-kok choh thâu ê tīn-iâⁿ bô kài-ji̍p Τâi-hái koan-hē, chhiūⁿ-kóng Bí-kok chhut-hiān chi̍t-ê chhin Tiong ê chóng-thóng, á-・sī chhut-hiān lāi-loān, á-・sī hông kńg ji̍p-khì Tiong-tang, Au-chiu ê chiàn-cheng; tē-saⁿ, Tâi-oân chhut-hiān giâm-tiōng ê lāi-loān, chi̍t-ê lūi-sū "bô chèng-hú" ê chōng-thāi. Jî-chhiáⁿ Τiong-kiōng phòaⁿ-toàn it-tēng phah ē iâⁿ chiah ē tāng-chhiú. Lēng-gōa chi̍t-ê piàn sò͘ sī, nā-sī 习近平 thâu-khak bô chheng-chhéⁿ.

　　 Tiong-kok tang-sî ē phah Tâi-oân? Bí-kok Tiong-iong Chêng-pò-kio̍k hù kio̍k-tiúⁿ David Cohen kóng, 习近平 í-keng hā-lēng kiōng-kun tī 2027 nî chìn-chêng kū-pī bú-thóng Tâi-oân ê lêng-le̍k. Só͘-í i jīn-ûi 2027 nî chìn-chêng Tiong-kok ē phah Tâi-oân. 《 Bí-kok Chi Im 》 pò-tō, cha̍p-goe̍h cha̍p-peh, Bí-kok Kiōng-hô-tóng Chiòng-gī-oân Ka-lú-ka（Meke Gallagher） piáu-sī, 习近平 thián-khui tē-saⁿ jīm kî liáu-āu, ē tī Tâi-oân būn-tê téng-bīn piàn choh koh-khah khì-sè pek jîn, 2024 nî Tâi-oân tōa-soán āu khó-lêng sī "siōng gûi-hiám".

　　 Cha̍p-goe̍h jī-la̍k, hoat-bêng "Kú-jī kiōng-sek", Tiong-kok Kok-bîn-tóng ê kok-an-hōe chêng pì-su-tiúⁿ 苏起 kóng kàu Tâi-oân tī Bí Tiong koan-hē tiong ê kak-sek, i khau-sé Chhòa Eng-bûn chóng-thóng sī chi̍t-ê chiâⁿ hó ê kî-chhiú, kā Tâi-oân chhau choh piàn-sêng "saⁿ tiuⁿ im-iông bīn", pau-koat nn̄g hōaⁿ koan-hē, bîn-chú chū-iû kah chiàn-tàu ì-chì, tī Chhòa chóng-thóng chhau choh chi hā, Bí-kok kan-ta khòaⁿ-tio̍h iông ê chi̍t bīn, gō͘ phòaⁿ Tâi-oân tī nn̄g-hōaⁿ sī î-chhî hiān-chōng, tī bîn-chú sī Pe̍h-she-kong-chú, tī chiàn-tàu ì-chì siōng sī ióng-kám-・ê, tān-sī sū-si̍t siōng Tâi-oân lāi-pō͘ khiok tú-tú sī tò-péng. Kā Tâi-oân tòa kàu chiàn-lio̍k ê "choa̍t-kéng". 苏起ī-giân, Τiong-kiōng Jī-cha̍p-tōa liáu-āu, 习近平 tē-saⁿ jīm ê 5 nî lāi, le̍k-sú ê sím-phòaⁿ khó-lêng chin kín to̍h ē kàu ah. Choân sè-kài ê lâng lóng chai-iáⁿ Tiong-kok 习近平 it-tēng beh phah Tâi-oân, kan-ta苏起kā Tiong-kok phah Tâi-oân kóng choh sī le̍k-sú tùi Chhòa Eng-bûn chóng-thóng ê sím-phòaⁿ, si̍t-chāi chin khó-ò͘ⁿ!

Kin-nî "siang-si̍p-cheh", Chhòa Eng-bûn chóng-thóng tì-sû ê sî kóng, Tâi-oân goān-ì ūi khu-e̍k ê hô-pêng hoat-tián kòng-hiàn it-kí chi la̍t. Tī nn̄g hōaⁿ koan-hē ê li̍p-tiûⁿ siōng, lán ê siān-ì bô piàn, sêng-lo̍k bô piàn, î-chhî hiān-chōng to̍h sī lán ê chú-tiuⁿ, lán ē choân-le̍k chó͘-chí hiān-chōng hông phiàn-bīn kái-piàn. I kiông-tiāu, kái-koat nn̄g hōaⁿ bē ha̍h ê ì-kiàn, it-tēng tio̍h thàu-kòe pêng-téng ê tùi-ōe. Lán bē khì chò mō͘-hiám ê tāi-chì, tān-sī choa̍t-tùi m̄-thang siūⁿ kóng Tâi-oân jîn-bîn ē tī ap-le̍k ē-bīn khut-ho̍k. Lán ē kè-sio̍k chhiong-si̍t kok-hông, tián-hiān chū-ngó͘ hông-ūi ê koat-sim, khak-pó bô lâng ē-tàng pek lán kiâⁿ hiòng Tiong-kok só͘ siat-tēng ê lō͘-kèng. In-ūi Tiong-kok só͘ siat-tēng ê lō͘-kèng lāi-bīn, bē ū Tâi-oân bîn-chú chū-iû ê seng-oa̍h hong-sek, koh khah bē ū nn̄g chheng saⁿ-pah bān lâng ê chú-koân.

　　 Tiong-kok kám ē phah Tâi-oân? Tang-sî ē phah? M̄ sī lán Tâi-oân lâng ē-tàng koat-tēng-・ê. (221111)

Chù, 习近平 　苏起　liām Hôa-gí



　　十月十六至二二ê中共二十大，中共总书记习近平koh一遍强调讲，「祖国完全统一一定tio̍h实现」，而且「绝对无承诺放弃使用武力」。虽然嘴硬讲beh拍台湾，但是ē拍bē拍tio̍h看客观ê条件。《日本产经新闻》台湾支店长Ya-ita aki-o san（矢板明夫）讲，几年前伊访问过中共军方高层，hit位官员讲中共出兵拍台湾有三个条件：第一，军力上中国对台湾有拍死死ê差距，ē-tàng tī短时间内kā台湾拍落来；第二，以美国作头ê阵营无介入台海关系，像讲美国出现一个亲中ê总统，抑是出现内乱，抑是hông卷入去中东、欧洲ê战争；第三，台湾出现严重ê内乱，一个类似「无政府」ê状态。而且中共判断一定拍ē赢才ē动手。另外一个变数是，若是习近平头壳无清醒。

　　中国tang时ē拍台湾？美国中央情报局副局长可亨（David Cohen）讲，习近平已经下令共军tī 2027年进前具备武统台湾ê能力。所以伊认为2027年进前中国ē拍台湾。《美国之音》报导，十月十八，美国共和党众议员Ka-lú-ka（Mike Gallagher）表示，习近平展开第三任期了后，ētī台湾问题顶面变作koh-khah气势逼人，2024年台湾大选后可能是「上危险」。

　　十月二六，发明「九二共识」、中国国民党ê国安会前秘书长苏起讲到台湾tī美中关系中ê角色，伊khau洗蔡英文总统是一个chiâⁿ好ê棋手，kā台湾操作变成「三张阴阳面」，包括两岸关系、民主自由kah战斗意志，tī蔡总统操作之下，美国kan-ta看tio̍h阳ê一面，误判台湾tī两岸是维持现状，tī民主是白雪公主，tī战斗意志上是勇敢ê，但是事实上台湾内部却抵抵是倒péng。Kā台湾带到战略ê「绝境」。苏起预言，中共二十大了后、习近平第三任ê 5年内，历史ê审判可能真紧tio̍hē到ah。全世界ê人lóng知影中国习近平一定beh拍台湾，kan-ta苏起kā中国拍台湾讲作是历史对蔡英文总统ê审判，实在真可恶！

今年「双十节」，蔡英文总统致词ê时讲：台湾愿意为区域ê和平发展贡献一己之力。tī两岸关系ê立场上，咱ê善意无变、承诺无变，维持现状tio̍h是咱ê主张，咱ē全力阻止现状hông片面改变。伊强调，解决两岸bē ha̍hê意见，一定tio̍h透过平等ê对话。咱bē去做冒险ê代志，但是绝对m̄-thang想讲台湾人民ētī压力下面屈服。咱ē继续充实国防，展现自我防卫ê决心，确保无人ē-tàng逼咱行向中国所设定ê路径。因为中国所设定ê路径内面，bē有台湾民主自由ê生活方式，koh khah bē有两千三百万人ê主权。

　　中国kám ē拍台湾？Tang时ē拍？M̄是咱台湾人ē-tàng决定ê。 (221111)

注：习近平　　苏起　　念华语