《绿色短评》

 | | | 转寄

台湾、中国，亘不隶属，马英九讲是违宪！

作者 李南衡, ChoânTâijī/全台字 by Chng Hūiphêng 2022.10.23

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　 Lí Lâmhêng

　　　　　 Tâioân, Tiongkok, hō͘ put lēsio̍k, Má Engkiú kóng sī ûihiàn!

　　 Chêng chóngthóng Má Engkiú nā bô kóngōe, kiaⁿ hông kóng i sī ékáu, só͘í kúkúá tio̍h ē kóng chi̍tê chhiòōe. Má Engkiú ê chhiòōe sī kóng, kūnî kok khèng tiánlé siōng, Chhòa Engbûn chóngthóng thêchhut "Tionghôa Bînkok kah Tionghôa Jînbîn Kiōnghôkok" hō͘ put lēsio̍k, sībô pitiàu ê thiauhùn khíkhang, kohkhah sī ûihoán Tionghôa Bînkok hiànhoat. Káugoe̍h jīpeh, Má Engkiú chhutse̍k "nn̄g hōaⁿ kau liû 35 nî hôekò͘ kah tiánbōng chōtâmhōe" ê sî, i ánne kóng・ê. Má Engkiú chitgî, Chhòa Engbûn bô khòaⁿkòe Tionghôa Bînkok hiànhoat chengsiu tiâubûn, kóng・ê sī khangōe, nāsī hō͘siong put lēsio̍k chinchiàⁿ si̍thiān, tio̍h ē piànsêng nn̄gê Tiongkok.

Káugoe̍h jīkáu, Lio̍kúihōe hôeèng kóng, Tionghôa Bînkok sī chúkoân to̍kli̍p kokka, chènghú kunkù《 Tionghôa Bînkok hiànhoat 》 tīlí kokka, kah Tionghôa Jînbîn Kiōnghôkok hō͘ put lēsio̍k, 《 Tionghôa Bînkok hiànhoat 》kah《chengsiu tiâubûn 》 só͘ū tiâubûn hian thàuthàu, chhōe bô Tionghôa Bînkok lēsio̍k sèkài siōng jīmhô chi̍tê kokka.

　　 Cha̍pgoe̍h chhejī, Tiongkok Kokbîntóng Tâipakchhītiúⁿ chhamsoánjîn Chiúⁿ Bānan kípān Bûnsankhu āuoānhōe sêngli̍p tāihōe, chêng Tâipakchhītiúⁿ Hok Liôngpin, Má Engkiú téng chi̍ttīn lâng lóng ū kàu tiûⁿ khiā tâi. Má Engkiú kohchài chitgî Chhòa Engbûn thêchhut nn̄g hōaⁿ hō͘siong put lēsio̍k, kinpún sībô khòaⁿkòe Tionghôa Bînkok hiànhoat chengsiu tiâubûn, chengsiu tiâubûn kóng Tâioân kah Tiongkok lóng sī Tionghôa Bînkok, Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘, chiahê léngthó͘ tī hiànhoat siōng iûgoân sī lán ê léngthó͘, tānsī tī Tiongkok hiànhoat tiong, Tâioân sī Tiongkok ê. Má Engkiú kóng kui po͘, káⁿ ū kóng tàuté tó chi̍t kok lēsio̍k tó chi̍t kok, bô. I chiah sī teh kóng khangōe.

　　2015 nî cha̍pitgoe̍h chhechhit, Má Engkiú í Tionghôa Bînkok chóngthóng sinhūn, 习近平 í Tionghôa Jînbîn Kiōnghôkok chúse̍k sin hūn, lâng chhengho͘ choh "nn̄g hōaⁿ léngtōjîn hōebiān" tī Sinkapho kíhêng hōetâm. Bôkoán sī kongkhai á・sī sutéhā, tongsî ê Má Engkiú chóngthóng káⁿ ū kā 习近平 chúse̍k kóng chhengchhó, kinkì goán Tionghôa Bînkok ê hiànhoat chengsiu tiâubûn, lín Tiongkok Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘? nāsī chiàu sinbûn pòtō lâi khòaⁿ, bôlūn kongkhai á・sī sutéhā, Má Engkiú sī lóng bô kóng. Ánne, chi̍tê tāipiáu Tionghôa Bînkok, chi̍tê tāipiáu Tionghôa Jînbîn Kiōnghôkok, in nn̄gê thâulâng kongkhai piáuián nn̄gê hō͘ put lēsio̍k ê kokka, káⁿ m̄ sī chinchiàⁿ si̍thiān tio̍h nn̄gê Tiongkok leh?

Bôkoán Tiongkok í tōa kuibô͘ kunián khiónghat Tâioân, phòhoāi Tâi hái hôpêng ê sî, mā bôkoán koklāi hoántùi siaⁿlōng, pehgoe̍h tiong, Tiongkok Kokbîntóng hùchúse̍k Hā Li̍pgiân iûgoân chhōa thoân khì Tiongkok, kah Tiongkok Koktâipān hùchújīm Tân Kho͘hong, Háihia̍phōetiúⁿ Tiuⁿ Chìkun kìⁿbīn. Goe̍h gōa ji̍tāu ê cha̍pgoe̍h chhesaⁿ, Hā Li̍pgiân kongkhai piáusī, i sī ûṳt chi̍tê káⁿ kongkhai tī Tiongkok koaⁿoân bīnchêng piáuta̍t Tiongkok tùi Tâi kunián putboán ê lâng. Hā Li̍pgiân kóng, i kā tùihōaⁿ koaⁿoân kóng "90% Tâioân lâng putboán Tiongkok tùi tâi kunián, tùi kunián kámkak bē sóng, kámkak hoânló". Chin sitlé, kóng choh lí kóng, Tiongkok oânchoân bô teh kā i sìntáu. Chiàusiông kunián. Hā Li̍pgiân tio̍h sī siūⁿ kóng Tâioân, Tiongkok hō͘ put lēsio̍k, m̄chiah ē ánne tata kiò.

　　 Tâioân, Tiongkok, hō͘ put lēsio̍k, Má Engkiú kóng sī ûihiàn! chhiò phòa lâng ê chhùi. 　 (221007)

Chù, 习近平 　　　　 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》　　　 Lí Lâm-hêng

　　　　　 Tâi-oân, Tiong-kok, hō͘ put lē-sio̍k, Má Eng-kiú kóng sī ûi-hiàn!

　　 Chêng chóng-thóng Má Eng-kiú nā bô kóng-ōe, kiaⁿ hông kóng i sī é-káu, só͘-í kú-kú-á tio̍h ē kóng chi̍t-ê chhiò-ōe. Má Eng-kiú ê chhiò-ōe sī kóng, kū-nî kok khèng tián-lé siōng, Chhòa Eng-bûn chóng-thóng thê-chhut "Tiong-hôa Bîn-kok kah Tiong-hôa Jîn-bîn Kiōng-hô-kok" hō͘ put lē-sio̍k, sī-bô pit-iàu ê thiau-hùn khí-khang, koh-khah sī ûi-hoán Tiong-hôa Bîn-kok hiàn-hoat. Káu-goe̍h jī-peh, Má Eng-kiú chhut-se̍k "nn̄g hōaⁿ kau liû 35 nî hôe-kò͘ kah tián-bōng chō-tâm-hōe" ê sî, i án-ne kóng-・ê. Má Eng-kiú chit-gî, Chhòa Eng-bûn bô khòaⁿ-kòe Tiong-hôa Bîn-kok hiàn-hoat cheng-siu tiâu-bûn, kóng-・ê sī khang-ōe, nā-sī hō͘-siong put lē-sio̍k chin-chiàⁿ si̍t-hiān, tio̍h ē piàn-sêng nn̄g-ê Tiong-kok.

Káu-goe̍h jī-káu, Lio̍k-úi-hōe hôe-èng kóng, Tiong-hôa Bîn-kok sī chú-koân to̍k-li̍p kok-ka, chèng-hú kun-kù《 Tiong-hôa Bîn-kok hiàn-hoat 》 tī-lí kok-ka, kah Tiong-hôa Jîn-bîn Kiōng-hô-kok hō͘ put lē-sio̍k, 《 Tiong-hôa Bîn-kok hiàn-hoat 》kah《cheng-siu tiâu-bûn 》 só͘-ū tiâu-bûn hian thàu-thàu, chhōe bô Tiong-hôa Bîn-kok lē-sio̍k sè-kài siōng jīm-hô chi̍t-ê kok-ka.

　　 Cha̍p-goe̍h chhe-jī, Tiong-kok Kok-bîn-tóng Tâi-pak-chhī-tiúⁿ chham-soán-jîn Chiúⁿ Bān-an kí-pān Bûn-san-khu āu-oān-hōe sêng-li̍p tāi-hōe, chêng Tâi-pak-chhī-tiúⁿ Hok Liông-pin, Má Eng-kiú téng chi̍t-tīn lâng lóng ū kàu tiûⁿ khiā tâi. Má Eng-kiú koh-chài chit-gî Chhòa Eng-bûn thê-chhut nn̄g hōaⁿ hō͘-siong put lē-sio̍k, kin-pún sī-bô khòaⁿ-kòe Tiong-hôa Bîn-kok hiàn-hoat cheng-siu tiâu-bûn, cheng-siu tiâu-bûn kóng Tâi-oân kah Tiong-kok lóng sī Tiong-hôa Bîn-kok, Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘, chiah-ê léng-thó͘ tī hiàn-hoat siōng iû-goân sī lán ê léng-thó͘, tān-sī tī Tiong-kok hiàn-hoat tiong, Tâi-oân sī Tiong-kok ê. Má Eng-kiú kóng kui po͘, káⁿ ū kóng tàu-té tó chi̍t kok lē-sio̍k tó chi̍t kok, bô. I chiah sī teh kóng khang-ōe.

　　2015 nî cha̍p-it-goe̍h chhe-chhit, Má Eng-kiú í Tiong-hôa Bîn-kok chóng-thóng sin-hūn, 习近平 í Tiong-hôa Jîn-bîn Kiōng-hô-kok chú-se̍k sin hūn, lâng chheng-ho͘ choh "nn̄g hōaⁿ léng-tō-jîn hōe-biān" tī Sin-ka-pho kí-hêng hōe-tâm. Bô-koán sī kong-khai á-・sī su-té-hā, tong-sî ê Má Eng-kiú chóng-thóng káⁿ ū kā 习近平 chú-se̍k kóng chheng-chhó, kin-kì goán Tiong-hôa Bîn-kok ê hiàn-hoat cheng-siu tiâu-bûn, lín Tiong-kok Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘? nā-sī chiàu sin-bûn pò-tō lâi khòaⁿ, bô-lūn kong-khai á-・sī su-té-hā, Má Eng-kiú sī lóng bô kóng. Án-ne, chi̍t-ê tāi-piáu Tiong-hôa Bîn-kok, chi̍t-ê tāi-piáu Tiong-hôa Jîn-bîn Kiōng-hô-kok, in nn̄g-ê thâu-lâng kong-khai piáu-ián nn̄g-ê hō͘ put lē-sio̍k ê kok-ka, káⁿ m̄ sī chin-chiàⁿ si̍t-hiān tio̍h nn̄g-ê Tiong-kok leh?

Bô-koán Tiong-kok í tōa kui-bô͘ kun-ián khióng-hat Tâi-oân, phò-hoāi Tâi hái hô-pêng ê sî, mā bô-koán kok-lāi hoán-tùi siaⁿ-lōng, peh-goe̍h tiong, Tiong-kok Kok-bîn-tóng hù-chú-se̍k Hā Li̍p-giân iû-goân chhōa thoân khì Tiong-kok, kah Tiong-kok Kok-tâi-pān hù-chú-jīm Tân Kho͘-hong, Hái-hia̍p-hōe-tiúⁿ Tiuⁿ Chì-kun kìⁿ-bīn. Goe̍h gōa ji̍t-āu ê cha̍p-goe̍h chhe-saⁿ, Hā Li̍p-giân kong-khai piáu-sī, i sī ûi-it chi̍t-ê káⁿ kong-khai tī Tiong-kok koaⁿ-oân bīn-chêng piáu-ta̍t Tiong-kok tùi Tâi kun-ián put-boán ê lâng. Hā Li̍p-giân kóng, i kā tùi-hōaⁿ koaⁿ-oân kóng "90% Tâi-oân lâng put-boán Tiong-kok tùi tâi kun-ián, tùi kun-ián kám-kak bē sóng, kám-kak hoân-ló". Chin sit-lé, kóng choh lí kóng, Tiong-kok oân-choân bô teh kā i sìn-táu. Chiàu-siông kun-ián. Hā Li̍p-giân tio̍h sī siūⁿ kóng Tâi-oân, Tiong-kok hō͘ put lē-sio̍k, m̄-chiah ē án-ne ta-ta kiò.

　　 Tâi-oân, Tiong-kok, hō͘ put lē-sio̍k, Má Eng-kiú kóng sī ûi-hiàn! chhiò phòa lâng ê chhùi. 　 (221007)

Chù, 习近平 　　　　 chhiáⁿ liām Hôa-gí



　　前总统马英九若无讲话，惊hông讲伊是哑口，所以久久á tio̍hē讲一个笑话。马英九ê笑话是讲：旧年国庆典礼上，蔡英文总统提出「中华民国kah中华人民共和国」互不隶属，是无必要ê挑衅（hùn）起空，koh-khah是违反中华民国宪法。九月二八，马英九出席「两岸交流35年回顾kah展望座谈会」ê时，伊án-ne讲-・ê。马英九质疑，蔡英文无看过中华民国宪法增修条文、讲-・ê是空话，若是互相不隶属真正实现，tio̍hē变成两个中国。

九月二九，陆委会回应讲，中华民国是主权独立国家，政府依据《中华民国宪法》治理国家，kah中华人民共和国互不隶属，《中华民国宪法》kah《增修条文》所有条文hian透透，chhōe无中华民国隶属世界上任何一个国家。

　　十月初二，中国国民党台北市长参选人蒋万安举办文山区后援会成立大会，前台北市长郝龙斌、马英九等一阵人lóng有到场khiā台。马英九koh再质疑蔡英文提出两岸互相不隶属，根本是无看过中华民国宪法增修条文，增修条文讲台湾kah中国lóng是中华民国，大陆地区是台、澎、金马以外ê中华民国领土，chiah-ê领土tī宪法上犹原是咱ê领土，但是tī中国宪法中，台湾是中国ê。马英九讲归晡，敢有讲到底tó一国隷属tó一国，无。伊chiah是teh讲空话。

　　2015年十一月初七，马英九以中华民国总统身份、习近平以中华人民共和国主席身份，人称呼作「两岸领导人会面」tī新加坡举行会谈。无管是公开抑是私底下，当时ê马英九总统敢有kā习近平主席讲清楚：根据阮中华民国ê宪法增修条文，lín中国大陆地区是台、澎、金马以外ê中华民国领土？若是照新闻报导来看，无论公开抑是私底下，马英九是lóng无讲。án-ne，一个代表中华民国，一个代表中华人民共和国，in两个头人公开表演两个亘不隶属ê国家，敢m̄是真正实现tio̍h两个中国咧？

无管中国以大规模军演恫吓台湾、破坏台海和平ê时，mā无管国内反对声浪，八月中，中国国民党副主席夏立言犹原chhōa团去中国，kah中国国台办副主任陈元丰、海协会长张志军见面。月外日后ê十月初三，夏立言公开表示，伊是唯一一个敢公开tī中国官员面前表达中国对台军演不满ê人。夏立言讲，伊kā对岸官员讲「90%台湾人不满中国对台军演，对军演感觉bē爽，感觉烦恼」。真失礼，讲作你讲，中国完全无teh kā伊sìn-táu。照常军演。夏立言tio̍h是想讲台湾、中国亘不隶属，m̄chiahēán-ne ta-ta叫。

　　台湾、中国，亘不隶属，马英九讲是违宪！笑破人ê嘴。　 (221007)

注：习近平　　　　请念华语