《绿色短评》

 | | | 转寄

出兵保护台湾，拜登总统是表明决心！

作者 李南衡, ChoânTâijī/全台字 by Chng Hūiphêng 2022.06.12

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　 Lí Lâmhêng

　 Chhutpeng póhō͘ Tâioân,拜登chóngthóng sī piáubêng koatsim!

　　 Bíkok chóngthóng拜登 chiūjīm ílâi, thâuchi̍tpiàn lâi Achiu hóngbūn. Gō͘goe̍h jīsaⁿ,拜登chóngthóng kah Ji̍tpún 岸田文雄（Kishida Fumio）siúsiòng tī liânha̍p kìchiáhōe téngbīn, sianghong lóng têngsin Tâioân anchoân ê tiōngiàusèng. Ū chi̍t ūi kìchiá mn̄g拜登chóngthóng,"siatsú Tiongkok ji̍pchhim Tâioân, lí goānì ūi póhō͘ Tâioân kàiji̍p kunsū hêngtōng bò͘?" 拜登 chóngthóng ti̍tpeh ìn kóng,"sī." Chit ūi kìchiá koh tui mn̄g,"lí goānì?" 拜登 chóngthóng ìn kóng,"Che sī goán chòkòe ê sênglo̍k."

　　拜登chóngthóng pēng bô tùi chiahê ōe ū chò siáⁿmi̍h soatbêng a̍h sī têngchheng. I chitê sengbêng hō͘ chi̍tkóa tī kìchiáhōe hiāntiûⁿ ê Bíkok koaⁿoân tio̍hkiaⁿ, in bô siūⁿtio̍h chóngthóng ē piáuta̍t chhut chiahni̍h ti̍tchiap chiahni̍h pe̍h ê koatsim. Bíkok ithiòng kéngkò Tiongkok m̄thang tùi Tâioân tāngbú, tānsī siatsú nā hoatseng chit chióng chōnghóng ê sî, thêngtō͘ siōng ē ū gōa tōa oânchō͘ Tâioân, Bíkok khólêng sī ūitio̍h chiànlio̍k ê bo̍ktek, ithiòng lóng sī hâmhâm hô͘hô͘, bôngbū bô chheng ê thāitō͘.

Pe̍hkiong kianchhî kóng拜登 chóngthóng pēng bô phah phòa tn̂gkî ílâi ê chèngchhek. Che pēng m̄sī拜登 chóngthóng thâuchi̍t piàn àmsī Bíkok beh ūi Tâioân lâi chiàn, tānsī i téng piàn hoatpiáu lūisū giânlūn ê sî, mûithé lóng kā khòaⁿchoh sī tiánhêng ê拜登 sek "kháu gō͘". Chit piàn mûithé engkai chin chhengchhó i sī kóng chinê. I tī Tangkiaⁿ kiôngtiāu kóng, tùi Tâioân ê ji̍pchhim, ná chhiūⁿ 乌克兰 chiàncheng ê chailān —— i goānì chháichhú koh khah chē ê chhòsi lâi chó͘chí chit tiûⁿ chailān ê hoatseng. I hit tongsî hō͘ Gôlô chóngthóng 浮丁siuⁿchē líiû khì hoâigî Bíkok tùi 乌克兰ê chichhî la̍tthâu. Só͘í i chit piàn ài tùi Tiongkok Xíjìnpíng chúse̍k kóng chhengchhó.

　　 Bíkok kah Tiongkok tī "chi̍tê Tiongkok" téngbīn ū jīnti siōng ê chengchha. Bíkok Kokbūīⁿ hoatgiânjîn 普莱斯（Ned Price）tī Twitter téngbīnsiōng hoánpo̍k Tiongkok kóng,"Tionghôa Jînbîn Kiōnghôkok kèsio̍k kongkhai chhògō͘ biâusu̍t Bíkok ê chèngchhek. Bíkok pēng bô tôngì Tionghôa Jînbîn Kiōnghôkok ê chi̍tê Tiongkok goânchek. Goán kútn̂g ílâi bô hun tóngphài itti̍t piàⁿsì tī Tâioân Koanhēhoat, saⁿê liânha̍p kongpò kah la̍k hāng póchèng chíín ēbīn ê chi̍tê Tiongkok chèngchhek."Sêngjīn" chi̍tê Tiongkok" sī kah Tiongkok kiànli̍p gōakau koanhē ê kichhó͘. Tī chitê chèngchhek ēbīn, Bíkok sêngjīn Tiongkok, kah Tiongkok kiànkau jîchhiáⁿ tn̄gchoán liáu kah Tâioân ê chèngsek gōakau koanhē. Tiongkok chènghú kakī só͘ kóng ê "chi̍tê Tiongkok" goânchek sī, Tâioân sī Tiongkok putkhó hunkoah ê chi̍tpō͘hūn, kuibóe tio̍h kah Tiongkok tāilio̍k thóngit. Tānsī Bíkok piáusī chi̍tê Tiongkok chèngchhek pēng m̄ sī tùi pakkiaⁿ li̍ptiûⁿ ê jīnkhó, sūsi̍t siōng, chokûi chèngchhek ê chi̍tpō͘hūn, Washengton kah Tâioân itti̍t ū póchhî "liônghó ê hui koaⁿhong" koanhē, paukoat kèsio̍k hiòng Tâioân chhutsiū búkhì, pangchō͘ Tâioân thêseng chūōe lêngle̍k.

"Tâioân Koanhēhoat" pēng bô iaukiû Bíkok tī Tâioân siū kongkek ê sî tio̍h kàiji̍p Tâioân ê hôngōe, kantāⁿ kuitēng Bíkok ìn hiòng Tâioân thêkiong chūōe ê búkhì. Paukoat 特朗普 chāilāi ê le̍kjīm Bíkok chóngthóng lóng bat àmsī Bíkok ē ūi Tâioân lâi chiàn, tānsī lóng thiau kang hâmhô͘ bô ài kóng chhengchhó.

Chit piàn Bíkok拜登 chóngthóng ti̍t kóng bêng kóng ē chhut peng póhō͘ Tâioân, sī piáubêng koatsim. (220527)


Chù,拜登　乌克兰　普莱斯　特朗普　 chhiáⁿ liām Hôagí


Pe̍h-ōe-jī-pán/白话字版

《 Le̍k-sek toán-phêng 》　　 Lí Lâm-hêng

　 Chhut-peng pó-hō͘ Tâi-oân,拜登chóng-thóng sī piáu-bêng koat-sim!

　　 Bí-kok chóng-thóng拜登 chiū-jīm í-lâi, thâu-chi̍t-piàn lâi A-chiu hóng-būn. Gō͘-goe̍h jī-saⁿ,拜登chóng-thóng kah Ji̍t-pún 岸田文雄（Kishida Fumio）siú-siòng tī liân-ha̍p kì-chiá-hōe téng-bīn, siang-hong lóng têng-sin Tâi-oân an-choân ê tiōng-iàu-sèng. Ū chi̍t ūi kì-chiá mn̄g拜登chóng-thóng,"siat-sú Tiong-kok ji̍p-chhim Tâi-oân, lí goān-ì ūi pó-hō͘ Tâi-oân kài-ji̍p kun-sū hêng-tōng bò͘?" 拜登 chóng-thóng ti̍t-peh ìn kóng,"sī." Chit ūi kì-chiá koh tui mn̄g,"lí goān-ì?" 拜登 chóng-thóng ìn kóng,"Che sī goán chò-kòe ê sêng-lo̍k."

　　拜登chóng-thóng pēng bô tùi chiah-ê ōe ū chò siáⁿ-mi̍h soat-bêng a̍h sī têng-chheng. I chit-ê seng-bêng hō͘ chi̍t-kóa tī kì-chiá-hōe hiān-tiûⁿ ê Bí-kok koaⁿ-oân tio̍h-kiaⁿ, in bô siūⁿ-tio̍h chóng-thóng ē piáu-ta̍t chhut chiah-ni̍h ti̍t-chiap chiah-ni̍h pe̍h ê koat-sim. Bí-kok it-hiòng kéng-kò Tiong-kok m̄-thang tùi Tâi-oân tāng-bú, tān-sī siat-sú nā hoat-seng chit chióng chōng-hóng ê sî, thêng-tō͘ siōng ē ū gōa tōa oân-chō͘ Tâi-oân, Bí-kok khó-lêng sī ūi-tio̍h chiàn-lio̍k ê bo̍k-tek, it-hiòng lóng sī hâm-hâm hô͘-hô͘, bông-bū bô chheng ê thāi-tō͘.

Pe̍h-kiong kian-chhî kóng拜登 chóng-thóng pēng bô phah phòa tn̂g-kî í-lâi ê chèng-chhek. Che pēng m̄-sī拜登 chóng-thóng thâu-chi̍t piàn àm-sī Bí-kok beh ūi Tâi-oân lâi chiàn, tān-sī i téng piàn hoat-piáu lūi-sū giân-lūn ê sî, mûi-thé lóng kā khòaⁿ-choh sī tián-hêng ê拜登 sek "kháu gō͘". Chit piàn mûi-thé eng-kai chin chheng-chhó i sī kóng chin-ê. I tī Tang-kiaⁿ kiông-tiāu kóng, tùi Tâi-oân ê ji̍p-chhim, ná chhiūⁿ 乌克兰 chiàn-cheng ê chai-lān —— i goān-ì chhái-chhú koh khah chē ê chhò-si lâi chó͘-chí chit tiûⁿ chai-lān ê hoat-seng. I hit tong-sî hō͘ Gô-lô chóng-thóng 浮丁siuⁿ-chē lí-iû khì hoâi-gî Bí-kok tùi 乌克兰ê chi-chhî la̍t-thâu. Só͘-í i chit piàn ài tùi Tiong-kok Xíjìnpíng chú-se̍k kóng chheng-chhó.

　　 Bí-kok kah Tiong-kok tī "chi̍t-ê Tiong-kok" téng-bīn ū jīn-ti siōng ê cheng-chha. Bí-kok Kok-bū-īⁿ hoat-giân-jîn 普莱斯（Ned Price）tī Twitter téng-bīn-siōng hoán-po̍k Tiong-kok kóng,"Tiong-hôa Jîn-bîn Kiōng-hô-kok kè-sio̍k kong-khai chhò-gō͘ biâu-su̍t Bí-kok ê chèng-chhek. Bí-kok pēng bô tông-ì Tiong-hôa Jîn-bîn Kiōng-hô-kok ê chi̍t-ê Tiong-kok goân-chek. Goán kú-tn̂g í-lâi bô hun tóng-phài it-ti̍t piàⁿ-sì tī Tâi-oân Koan-hē-hoat, saⁿ-ê liân-ha̍p kong-pò kah la̍k hāng pó-chèng chí-ín ē-bīn ê chi̍t-ê Tiong-kok chèng-chhek."Sêng-jīn" chi̍t-ê Tiong-kok" sī kah Tiong-kok kiàn-li̍p gōa-kau koan-hē ê ki-chhó͘. Tī chit-ê chèng-chhek ē-bīn, Bí-kok sêng-jīn Tiong-kok, kah Tiong-kok kiàn-kau jî-chhiáⁿ tn̄g-choán liáu kah Tâi-oân ê chèng-sek gōa-kau koan-hē. Tiong-kok chèng-hú ka-kī só͘ kóng ê "chi̍t-ê Tiong-kok" goân-chek sī, Tâi-oân sī Tiong-kok put-khó hun-koah ê chi̍t-pō͘-hūn, kui-bóe tio̍h kah Tiong-kok tāi-lio̍k thóng-it. Tān-sī Bí-kok piáu-sī chi̍t-ê Tiong-kok chèng-chhek pēng m̄ sī tùi pak-kiaⁿ li̍p-tiûⁿ ê jīn-khó, sū-si̍t siōng, chok-ûi chèng-chhek ê chi̍t-pō͘-hūn, Washengton kah Tâi-oân it-ti̍t ū pó-chhî "liông-hó ê hui koaⁿ-hong" koan-hē, pau-koat kè-sio̍k hiòng Tâi-oân chhut-siū bú-khì, pang-chō͘ Tâi-oân thê-seng chū-ōe lêng-le̍k.

"Tâi-oân Koan-hē-hoat" pēng bô iau-kiû Bí-kok tī Tâi-oân siū kong-kek ê sî tio̍h kài-ji̍p Tâi-oân ê hông-ōe, kan-tāⁿ kui-tēng Bí-kok ìn hiòng Tâi-oân thê-kiong chū-ōe ê bú-khì. Pau-koat 特朗普 chāi-lāi ê le̍k-jīm Bí-kok chóng-thóng lóng bat àm-sī Bí-kok ē ūi Tâi-oân lâi chiàn, tān-sī lóng thiau kang hâm-hô͘ bô ài kóng chheng-chhó.

Chit piàn Bí-kok拜登 chóng-thóng ti̍t kóng bêng kóng ē chhut peng pó-hō͘ Tâi-oân, sī piáu-bêng koat-sim. (220527)


Chù,拜登　乌克兰　普莱斯　特朗普　 chhiáⁿ liām Hôa-gí


　　美国总统拜登就任以来，头一遍来亚洲访问。五月二三，拜登总统kah日本岸田文雄（Kishida Fumio）首相tī联合记者会顶面，双方lóng重申台湾安全ê重要性。有一位记者问拜登总统，「设使中国入侵台湾，你愿意为保护台湾介入军事行动吗？」拜登总统直剖应讲：「是。」Chit位记者koh追问：「你愿意？」拜登总统应讲：「Che是阮做过ê承诺。」

　　拜登总统并无对chiah-ê话有做啥物说明a̍h是澄清。伊chit-ê声明hō͘一寡tī记者会现场ê美国官员tio̍h惊，in无想tio̍h总统会表达出chiahni̍h直接chiahni̍h白ê决心。美国一向警告中国m̄-thang对台湾动武，但是设使若发生chit种状况ê时，程度上会有gōa大援助台湾，美国可能是为tio̍h战略ê目的，一向lóng是含含糊糊、蒙雾无清ê态度。

白宫坚持讲拜登总统并无打破长期以来ê政策。Che并m̄是拜登总统头一遍暗示美国beh为台湾来战，但是伊顶遍发表类似言论ê时，媒体lóng kā看作是典型ê拜登式「口误」。Chit遍媒体应该真清楚伊是讲真ê。他tī东京强调讲，对台湾ê入侵，那像乌克兰战争ê灾难——伊愿意采取koh khah chē ê措施来阻止chit场灾难ê发生。伊hit当时hō͘俄罗总统浮丁siuⁿchē理由去怀疑美国对乌克兰ê支持力头。所以伊chit遍爱对中国习近平主席讲清楚。

　　美国kah中国tī「一个中国」顶面有认知上ê增差。美国国务院发言人普莱斯（Ned Price）tīTwitter顶面上反驳中国讲：「中华人民共和国继续公开错误描述美国ê政策。美国并无同意中华人民共和国ê一个中国原则。阮久长以来无分党派一直拼势tī台湾关系法、三个联合公报kah六项保证指引下面ê一个中国政策。」承认「一个中国」是kah中国建立外交关系ê基础。Tīchit-ê政策下面，美国承认中国、kah中国建交而且断絶了kah台湾ê正式外交关系。中国政府家己所讲ê「一个中国」原则是，台湾是中国不可分割ê一部分，归尾tio̍h kah中国大陆统一。但是美国表示一个中国政策并m̄是对北京立场ê认可，事实上，作为政策ê一部分，华盛顿kah台湾一直有保持「良好ê非官方」关系，包括继续向台湾出售武器，帮助台湾提升自卫能力。

「台湾关系法」并无要求美国tī台湾受攻击ê时tio̍h介入台湾ê防卫，干单规定美国应向台湾提供自卫ê武器。包括特朗普在内ê历任美国总统lóng bat 暗示美国会为台湾来战，但是lóng thiau工含糊无爱讲清楚。

Chit遍美国拜登总统直讲明讲会出兵保护台湾，是表明决心。 (220527)


注：拜登　　乌克兰　　普莱斯　　特朗普　　　请念华语