《绿色短评》

 | | | 转寄

俄罗做贼，koh teh喝掠贼！

作者 李南衡, ChoânTâijī/全台字 by Chng Hūiphêng 2022.06.05

Choânbîn Tâioânjī pán/全民台湾字版简称ChoânTâiJī

Le̍ksek toánphêng 》　　　 Lí Lâmhêng

　　　　　　　　 Gôlô chòchha̍t, koh teh hoah lia̍hchha̍t!

　　 Gō͘goe̍h cha̍psaⁿ, Gôlô gōakau pō͘tiúⁿ 拉夫罗夫（Lavrov） khì Tionga ê 塔吉克（Tajekistan） chhamka "To̍kli̍p Kokka Kokhia̍p "（CIS） hōegī, tī hōe āu ê kìchiá hōe i khuiphàu chí khòng "Aubêng" ū "chhimlio̍ksèng" koh "hóchiàn". Goânpún jīgoe̍h jīsì Gôlô ji̍pchhim 乌克兰ê líiû sī 乌克兰 siūⁿ beh kaji̍p "Pak Tāiseiûⁿ Kongiok Cho͘chit" kánchheng " Pakiok（NATO）", tānsī chiàncheng íāu, 乌克兰 itti̍t kiôngtiāu in bôkhólêng chiâⁿchoh " Pakiok " ê sêngoân, tānsī iûgoân ē tōala̍t chhuitōng sinchhiáⁿ kaji̍p "Aubêng". Kám sī ánne Gôlô gōakau pō͘tiúⁿ chiah ē mē "Aubêng" tú siàu?

　　Ùi Gôlô gōakau pō͘tiúⁿ kóng chiahê ōe, lán tio̍h chaiiáⁿ i ô͘giân loāngí. "Auchiu Liânbêng", kánchheng "Aubêng", sī Auchiu to kok kiōngtông kiànli̍p ê chèngtī kah kengchè liânbêng, ū 27 ê sêngoân kok. Siongsìn i goânpún beh mē ê sī " Pakiok", inūi " Pakiok" sī Auchiu kah Pakbí chiu kokka ūi si̍tsi hôngōe ha̍pchok só͘ kiànli̍p ê kokchè cho͘chit, ū tōaliōng hu̍t búkhì kah siôngsiat pō͘tūi, sī sehong ê tiōngiàu kunsū le̍kliōng. " Pakiok" sêngoân kok ū 30 ê. Pakiok kunsū khaichi chiàm sèkài kokhông khaichi ê 70% ísiōng.

　　 Lán lâi khòaⁿ tàuté sī siáⁿ lâng ū "chhimlio̍ksèng" koh "hó chiàn" ? Jīgoe̍h jīsì, Gôlô chhutpeng ji̍p chhim 乌克兰, pàngtiau káucha̍pla̍k tiámcheng, iā chiūsī sìkang lāi oânchoân chiàmniá 乌克兰, phài peng phài chiànchhia phài chiànki phài chiànchûn chhimchiàm kehpiah kok 乌克兰ê léngthó͘, ánne kám bô sǹg sī ū "chhimlio̍ksèng" koh "hó chiàn"?

　　 Chiàncheng tú khaisí ê sî," Pakiok" kokka ēsái kóng sī tiāmtiāmá khòaⁿ, bô chi̍tê kokka chhunchhiú chioân, itti̍t khòaⁿ 乌克兰 ko͘ kun hùnchiàn, Gôlô tāikun ji̍p chhim, khijîn thài sīm, "Pakiok" chiah chi̍tê chi̍tê ūnsàng siōng sin siōng hó ê búkhì chioân 乌克兰, hō͘ 乌克兰 jú phah jú ióng. Kàu kináji̍t ûichí,"Pakiok" iáu bô phài chi̍t peng chi̍t chut khì chān 乌克兰, só͘ū ê chiànkó lóngchóng sī 乌克兰 choânthé kun bîn àikok ōekok ê engióng piáuhiān. Hóchhiò ê sī Gôlô soah koài "Aubêng" ū "chhimlio̍ksèng" koh "hó chiàn".

　　 Kàu gō͘goe̍h cha̍pkáu ûichí, Gôlô kun íkeng tīnbông iok 2 bān 8,500 gōalâng, 乌克兰 kun chhuihúi Gôlô kun 1,254 tâi chiànchhia, 3,063 tâi chngkahchhia, 595 mn̂g hóephàu hēthóng, 199 tâi tokoán hóechìⁿchhia, 93 cho͘ hôngkhong hēthóng, 202 chiah kunki, 1,167 chiah ti̍tsengki , 2,157 tâi koksek chhialióng kah iûkoànchhia, 13 tâi lāmthéng, 455 chiah bôjînki, 43 ê te̍ksû siatpī kah 103 lia̍p sûnhâng huitôaⁿ. Gôlô lio̍khái khongkun chiahni̍h chhámtāng ê súnsit, kám sī Gôlô kun ūitio̍h póūi kakī ê kokka, puthēng tī Gôlô kénglāi hō͘ ū "chhimlio̍ksèng" koh "hó chiàn" ê "Pakiok" kuntūi só͘ phah ê? Tongjiân m̄ sī!

Che sī gō͘goe̍h cha̍pkáu ēpo͘ 乌克兰 kokhôngpō͘ kongpò͘ siōng sin ê chiànkó thóngkè, 乌克兰 kokhôngpō͘ kóng, chūchiông Gôlô jīgoe̍h jīsì ji̍pchhim chì gō͘goe̍h cha̍pkáu thàuchá ûichí, 乌克兰 só͘ kongpò͘ siōng sin ê chiànkó. Lāité khaksi̍t ū chin chē "Pakiok" kokka só͘ chioân ê kok chióng siōng sin ê búkhì, tānsī chiànkó lóng sī 乌克兰 engióng ê kunbîn chi̍t kiāⁿ chi̍t kiāⁿ kiànli̍p ê. Tongjiân sī chiok bô kántan.

Lán khòaⁿtio̍h Gôlô chòchha̍t, koh teh hoah lia̍hchha̍t! 　　　　(220522)

Chù, 塔吉克　　 乌克兰　　 chhiáⁿ liām Hôagí


Pe̍h-ōe-jī-pán/白话字版

Le̍k-sek toán-phêng 》　　　 Lí Lâm-hêng

　　　　　　　　 Gô-lô chò-chha̍t, koh teh hoah lia̍h-chha̍t!

　　 Gō͘-goe̍h cha̍p-saⁿ, Gô-lô gōa-kau pō͘-tiúⁿ 拉夫罗夫（Lavrov） khì Tiong-a ê 塔吉克（Tajekistan） chham-ka "To̍k-li̍p Kok-ka Kok-hia̍p "（CIS） hōe-gī, tī hōe āu ê kì-chiá hōe i khui-phàu chí khòng "Au-bêng" ū "chhim-lio̍k-sèng" koh "hó-chiàn". Goân-pún jī-goe̍h jī-sì Gô-lô ji̍p-chhim 乌克兰ê lí-iû sī 乌克兰 siūⁿ beh ka-ji̍p "Pak Tāi-se-iûⁿ Kong-iok Cho͘-chit" kán-chheng " Pak-iok（NATO）", tān-sī chiàn-cheng í-āu, 乌克兰 it-ti̍t kiông-tiāu in bô-khó-lêng chiâⁿ-choh " Pak-iok " ê sêng-oân, tān-sī iû-goân ē tōa-la̍t chhui-tōng sin-chhiáⁿ ka-ji̍p "Au-bêng". Kám sī án-ne Gô-lô gōa-kau pō͘-tiúⁿ chiah ē mē "Au-bêng" tú siàu?

　　Ùi Gô-lô gōa-kau pō͘-tiúⁿ kóng chiah-ê ōe, lán tio̍h chai-iáⁿ i ô͘-giân loān-gí. "Au-chiu Liân-bêng", kán-chheng "Au-bêng", sī Au-chiu to kok kiōng-tông kiàn-li̍p ê chèng-tī kah keng-chè liân-bêng, ū 27 ê sêng-oân kok. Siong-sìn i goân-pún beh mē ê sī " Pak-iok", in-ūi " Pak-iok" sī Au-chiu kah Pak-bí chiu kok-ka ūi si̍t-si hông-ōe ha̍p-chok só͘ kiàn-li̍p ê kok-chè cho͘-chit, ū tōa-liōng hu̍t bú-khì kah siông-siat pō͘-tūi, sī se-hong ê tiōng-iàu kun-sū le̍k-liōng. " Pak-iok" sêng-oân kok ū 30 ê. Pak-iok kun-sū khai-chi chiàm sè-kài kok-hông khai-chi ê 70% í-siōng.

　　 Lán lâi khòaⁿ tàu-té sī siáⁿ lâng ū "chhim-lio̍k-sèng" koh "hó- chiàn" ? Jī-goe̍h jī-sì, Gô-lô chhut-peng ji̍p chhim 乌克兰, pàng-tiau káu-cha̍p-la̍k tiám-cheng, iā chiū-sī sì-kang lāi oân-choân chiàm-niá 乌克兰, phài peng phài chiàn-chhia phài chiàn-ki phài chiàn-chûn chhim-chiàm keh-piah kok 乌克兰ê léng-thó͘, án-ne kám bô sǹg sī ū "chhim-lio̍k-sèng" koh "hó chiàn"?

　　 Chiàn-cheng tú khai-sí ê sî," Pak-iok" kok-ka ē-sái kóng sī tiām-tiām-á khòaⁿ, bô chi̍t-ê kok-ka chhun-chhiú chi-oân, it-ti̍t khòaⁿ 乌克兰 ko͘ kun hùn-chiàn, Gô-lô tāi-kun ji̍p chhim, khi-jîn thài sīm, "Pak-iok" chiah chi̍t-ê chi̍t-ê ūn-sàng siōng sin siōng hó ê bú-khì chi-oân 乌克兰, hō͘ 乌克兰 jú phah jú ióng. Kàu kin-á-ji̍t ûi-chí,"Pak-iok" iáu bô phài chi̍t peng chi̍t chut khì chān 乌克兰, só͘-ū ê chiàn-kó lóng-chóng sī 乌克兰 choân-thé kun bîn ài-kok ōe-kok ê eng-ióng piáu-hiān. Hó-chhiò ê sī Gô-lô soah koài "Au-bêng" ū "chhim-lio̍k-sèng" koh "hó chiàn".

　　 Kàu gō͘-goe̍h cha̍p-káu ûi-chí, Gô-lô kun í-keng tīn-bông iok 2 bān 8,500 gōa-lâng, 乌克兰 kun chhui-húi Gô-lô kun 1,254 tâi chiàn-chhia, 3,063 tâi chng-kah-chhia, 595 mn̂g hóe-phàu hē-thóng, 199 tâi to-koán hóe-chìⁿ-chhia, 93 cho͘ hông-khong hē-thóng, 202 chiah kun-ki, 1,167 chiah ti̍t-seng-ki , 2,157 tâi kok-sek chhia-lióng kah iû-koàn-chhia, 13 tâi lām-théng, 455 chiah bô-jîn-ki, 43 ê te̍k-sû siat-pī kah 103 lia̍p sûn-hâng hui-tôaⁿ. Gô-lô lio̍k-hái khong-kun chiah-ni̍h chhám-tāng ê sún-sit, kám sī Gô-lô kun ūi-tio̍h pó-ūi ka-kī ê kok-ka, put-hēng tī Gô-lô kéng-lāi hō͘ ū "chhim-lio̍k-sèng" koh "hó chiàn" ê "Pak-iok" kun-tūi só͘ phah ê? Tong-jiân m̄ sī!

Che sī gō͘-goe̍h cha̍p-káu ē-po͘ 乌克兰 kok-hông-pō͘ kong-pò͘ siōng sin ê chiàn-kó thóng-kè, 乌克兰 kok-hông-pō͘ kóng, chū-chiông Gô-lô jī-goe̍h jī-sì ji̍p-chhim chì gō͘-goe̍h cha̍p-káu thàu-chá ûi-chí, 乌克兰 só͘ kong-pò͘ siōng sin ê chiàn-kó. Lāi-té khak-si̍t ū chin chē "Pak-iok" kok-ka só͘ chi-oân ê kok chióng siōng sin ê bú-khì, tān-sī chiàn-kó lóng sī 乌克兰 eng-ióng ê kun-bîn chi̍t kiāⁿ chi̍t kiāⁿ kiàn-li̍p ê. Tong-jiân sī chiok bô kán-tan.

Lán khòaⁿ-tio̍h Gô-lô chò-chha̍t, koh teh hoah lia̍h-chha̍t! 　　　　(220522)

Chù, 塔吉克　　 乌克兰　　 chhiáⁿ liām Hôa-gí



　　五月十三，俄罗外交部长拉夫罗夫（Lavrov）去中亚ê塔吉克（Tajikistan）参加「独立国家国协」（CIS）会议，tī会后ê记者会伊开炮指控「欧盟」有「侵略性」koh「好战」。原本二月二四俄罗入侵乌克兰ê理由是乌克兰想beh加入「北大西洋公约组织」简称「北约（NATO）」，但是战争以后，乌克兰一直强调in无可能成作「北约」ê成员，但是犹原会大力推动申请加入「欧盟」。Kám是án-ne俄罗外交部长才会骂「欧盟」tú数？

　　Ui俄罗外交部长讲chiah-ê话，咱tio̍h知影伊胡言乱语。「欧洲联盟」，简称「欧盟」，是欧洲多国共同建立ê政治kah经chē联盟，有27个成员国。相信伊原本beh骂ê是「北约」，因为「北约」是欧洲kah北美洲国家为实施防卫合作所建立ê国际组织，有大量核武器kah常设部队，是西方ê重要军事力量。「北约」成员国有30个。北约军事开支占世界国防开支ê70%以上。

　　咱来看到底是啥人有「侵略性」koh「好战」？二月二四，俄罗出兵入侵乌克兰，放调九十六点钟、也就是四工内完全占领乌克兰，派兵派战车派战机派战船侵占隔壁国乌克兰ê领土，án-ne kám无算是有「侵略性」koh「好战」？

　　战争tú开始ê时，「北约」国家会使讲是tiāmtiāmá看，无一个国家伸手支援，一直看乌克兰孤军奋战、俄罗大军入侵、欺人太甚，「北约」才一个一个运送上新上好ê武器支援乌克兰，hō͘乌克兰愈拍愈勇。到今á日为止，「北约」犹无派一兵一卒去赞乌克兰，所有ê战果lóng总是乌克兰全体军民爱国卫国ê英勇表现。好笑ê是俄罗煞怪「欧盟」有「侵略性」koh「好战」。

　　到五月十九为止，俄罗军已经阵亡约2万8,500外人，乌克兰军摧毁俄罗军1,254台战车、3,063台装甲车、595门火炮系统、199台多管火箭车、93组防空系统、202只军机、1,167只直升机、2,157台各式车辆kah油罐车、13台舰艇、455只无人机、43个特殊设备kah 103粒巡弋飞弹。俄罗陆海空军chiahnih惨重ê损失，kám是俄罗军为tio̍h保卫家己ê国家，不幸tī俄罗境内hō͘有「侵略性」koh「好战」ê「北约」军队所拍ê？当然m̄是！

Che是五月十九下晡乌克兰国防部公布上新ê战果统计，乌克兰国防部讲，自从俄罗二月二四入侵至五月十九透早为止，乌克兰所公布上新ê战果。内底确实有真chē「北约」国家所支援ê各种上新ê武器，但是战果lóng是乌克兰英勇ê军民一件一件建立ê。当然是足无简单。

咱看tio̍h俄罗做贼，koh teh喝掠贼！　　　　(220522)

注：塔吉克　　乌克兰　　请念华语