《绿色短评》

 | | | 转寄

借南京疫情chit面镜！

作者 李南衡, ChoânTâijī/全台字 by Chng Hūiphêng 2021.08.22

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Chioh Lâmkiaⁿ e̍kchêng chit bīn kiàⁿ!

　　 Chhitgoe̍h jīcha̍p, Lâmkiaⁿ Lo̍kkháu kokchè kitiûⁿ tùi oânkang chìnhêng lēhêng hu̍tsng kiámchhek ê sî, hoathiān ū 9 ê khakchín pēⁿlē, chit 9 ê lâng lóng sī tī kitiûⁿchò huiki chhengkiat kangchok ê chhengkiat oân. Kinkì Kangso͘ séng ōeseng kiānkhong úigoânhōe ê pòkò, chhitgoe̍h͘ jīgō͘ Kangso͘ séng sin chengka púnthó͘ khakchín pēⁿlē 39 lē tiong, Lâmkiaⁿ chhī chiàm 38 lē, kîtiong ū 8 lē sī bô chèngthâu kámjiám chiá choánchoh khakchín pēⁿlē. In tittio̍h ê Búhàn hìiām sī Delta ianchióng pēⁿto̍k.

　　 Chū ánne e̍kchêng ùi Lâmkiaⁿ khoktōa sin chi̍tliàn ê e̍kchêng, pēⁿto̍k íkeng thòaⁿ kàu Tiongkok tāilio̍k cha̍p kúi séng chhī, Tāiliân, Tiuⁿ kakài, Siâⁿto͘, Pakkiaⁿ, Búhàn téng siâⁿchhī siosòa chhuthiān ū koanliân sèng ê pēⁿlē, khakchín jînsò͘ chhîsiok seng koân. Búhàn chhī pehgoe̍h chheit kàu chhejī, kengkòe hu̍tsng kiámchhek hoathiān ū 7 ê lâng sī iôngsèng, che sī Búhàn chhī ùi kūnî la̍kgoe̍h͘ chheng lêng ílâi thâuchi̍t piàn chhuthiān sin ê àn. Kinkì 《 Pakkiaⁿ ji̍t pò 》 pòtō kóng, Lâmkiaⁿ e̍kchêng thoânpò͘ liān iântn̂g kàu chìchió 365 ê lâng, ek chhutkhì 24 ê siâⁿchhī. Tiongkok chhitgoe̍h lúikè sin chengka pēⁿlē téngî sī chêng gō͘ kò goe̍h ê chónghô.

　　 Choanka piáusī, bo̍kchêng tī Tiongkok thoânpò͘ ê to̍kchu chúiáu sī Delta to̍kchu, thoânpò͘ soktō͘ chin kín, thé lāi ho̍kchè mā chin kín, choánim ê sîkan khah tn̂g. Kok tē lóng thêchhéⁿ kubîn "hui pitiàu put chhut séng, put lī chhī". Bo̍kchêng íkeng ū 17 séng chhuthiān khakchín pēⁿlē; Tiongkok koaⁿmûi《 Jînbîn ji̍t pò 》 kóng, tûliáu Hûnlâm, Siōnghái ígōa, kîtha tēkhu ê khakchín sūkiāⁿ lóng kah Lâmkiaⁿ iúkoan, Pakkiaⁿ mā íkeng lûnhām.

Siósió chi̍tê LâmkiaⁿLo̍kkháu kokchè kitiûⁿ ê 9 ê chhengkiat kanglâng, ētàng bú kah choânkok tōa kíntiuⁿ.

Siūⁿkhí 2019 nî cha̍pjīgoe̍h, tī Ōeho̍kpō͘ chi̍tkoánsú tamjīm Hùsútiúⁿ ê Lô Itkun isu, tī bānglō͘ téngbīn hoathiān ū bāngiú thêkhí Tiongkok Búhàn ê Hôalâm háisán chhītiûⁿ ū chhuthiān chhinchhiūⁿ SARS ê ànlē, i sûisî hiòng téngsi pòkò, hiòng Tiongkok siongkoan tanūi chhâchèng, jîchhiáⁿ hiòng sèkài ōeseng cho͘chit (WHO) thongpò. Cha̍pjīgoe̍h saⁿcha̍pit, lán chènghú tùi Búhàn ti̍thâng panki si̍tsi tengki kiáme̍k. 2020 nî itgoe̍h cha̍psaⁿ, anpâi thoânjiámpēⁿ hôngtī iliâu bāng Chng Gînchheng chíhuikoaⁿ kah hônge̍k isu Âng Bínlâm khì Tiongkok Búhàn, siuchi̍p chi̍t kóa kah e̍kchêng siongkoan ê chusìn, itgoe̍h cha̍pla̍k tńglâi tiàukhui soatbênghōe. Chiah chaiiáⁿ tāichì giâmtiōng. Itgoe̍h cha̍pgō͘, Chi̍tkoánsú kongkò sin chengka "giâmtiōng te̍ksû thoânjiámsèng hìiām" choh tēgō͘ lūi thoânjiámpēⁿ. Itgoe̍h jīsaⁿ, Búhàn hong siâⁿ, lánkok kìmchí Búhàn ê lâng ji̍pkéng, ti̍thâng panki thêng poe, liáuāu chiah kái Tiongkok lâng lóng putchún ji̍pkéng téng chhòsi. Itgoe̍h jīsì, kìmchí iliâuēng chhùiam chhutkháu; itgoe̍h saⁿcha̍pit,tengēng choânkok chhùiam kangchhiúⁿ sengsán ê iliâuēng chhùiam; jīgoe̍h chhela̍k si̍tsi choânkok chhùiam si̍tmiâchè, ta̍k lâng lóng bé ū chhùiam. Ánne, Tâioân chiah pí choân sèkài jīmhô kokka lóng khah chá choh īhông, tī tēit pho choân sèkài tòe Tiongkok tio̍hche ê e̍kchêng tiong, Tâioân itti̍t sī hônge̍k ê bô͘hōanseng. Ūisímmih? Inūi lán cháchá chioh tio̍h Búhàn e̍kchêng hitbīn kiàⁿ.

　　 Kináji̍t, lán chioh tio̍h Lâmkiaⁿ e̍kchêng chit bīn kiàⁿ, siongsìn ētàng kā hông Búhàn hìiām Delta pēⁿto̍k chitê hônge̍k kangchok, iûgoân choh sèkài ê bô͘hōanseng. 　　(210806)


Pe̍h-ōe-jī-pán/白话字版
《 Le̍k-sek toán-phêng 》 Lí Lâm-hêng

Chioh Lâm-kiaⁿ e̍k-chêng chit bīn kiàⁿ!

　　 Chhit-goe̍h jī-cha̍p, Lâm-kiaⁿ Lo̍k-kháu kok-chè ki-tiûⁿ tùi oân-kang chìn-hêng lē-hêng hu̍t-sng kiám-chhek ê sî, hoat-hiān ū 9 ê khak-chín pēⁿ-lē, chit 9 ê lâng lóng sī tī ki-tiûⁿchò hui-ki chheng-kiat kang-chok ê chheng-kiat oân. Kin-kì Kang-so͘ séng ōe-seng kiān-khong úi-goân-hōe ê pò-kò, chhit-goe̍h͘ jī-gō͘ Kang-so͘ séng sin cheng-ka pún-thó͘ khak-chín pēⁿ-lē 39 lē tiong, Lâm-kiaⁿ chhī chiàm 38 lē, kî-tiong ū 8 lē sī bô chèng-thâu kám-jiám chiá choán-choh khak-chín pēⁿ-lē. In tit-tio̍h ê Bú-hàn hì-iām sī Delta ian-chióng pēⁿ-to̍k.

　　 Chū án-ne e̍k-chêng ùi Lâm-kiaⁿ khok-tōa sin chi̍t-liàn ê e̍k-chêng, pēⁿ-to̍k í-keng thòaⁿ kàu Tiong-kok tāi-lio̍k cha̍p kúi séng chhī, Tāi-liân, Tiuⁿ -ka-kài, Siâⁿ-to͘, Pak-kiaⁿ, Bú-hàn téng siâⁿ-chhī sio-sòa chhut-hiān ū koan-liân sèng ê pēⁿ-lē, khak-chín jîn-sò͘ chhî-siok seng koân. Bú-hàn chhī peh-goe̍h chhe-it kàu chhe-jī, keng-kòe hu̍t-sng kiám-chhek hoat-hiān ū 7 ê lâng sī iông-sèng, che sī Bú-hàn chhī ùi kū-nî la̍k-goe̍h͘ chheng- lêng í-lâi thâu-chi̍t piàn chhut-hiān sin ê àn. Kin-kì 《 Pak-kiaⁿ ji̍t pò 》 pò-tō kóng, Lâm-kiaⁿ e̍k-chêng thoân-pò͘ -liān iân-tn̂g kàu chì-chió 365 ê lâng, ek chhut-khì 24 ê siâⁿ-chhī. Tiong-kok chhit-goe̍h lúi-kè sin cheng-ka pēⁿ-lē téng-î sī chêng gō͘ kò goe̍h ê chóng-hô.

　　 Choan-ka piáu-sī, bo̍k-chêng tī Tiong-kok thoân-pò͘ ê to̍k-chu chú-iáu sī Delta to̍k-chu, thoân-pò͘ sok-tō͘ chin kín, thé lāi ho̍k-chè mā chin kín, choán-im ê sî-kan khah tn̂g. Kok tē lóng thê-chhéⁿ ku-bîn "hui pit-iàu put chhut séng, put lī chhī". Bo̍k-chêng í-keng ū 17 séng chhut-hiān khak-chín pēⁿ-lē; Tiong-kok koaⁿ-mûi《 Jîn-bîn ji̍t pò 》 kóng, tû-liáu Hûn-lâm, Siōng-hái í-gōa, kî-tha tē-khu ê khak-chín sū-kiāⁿ lóng kah Lâm-kiaⁿ iú-koan, Pak-kiaⁿ mā í-keng lûn-hām.

Sió-sió chi̍t-ê Lâm-kiaⁿLo̍k-kháu kok-chè ki-tiûⁿ ê 9 ê chheng-kiat kang-lâng, ē-tàng bú kah choân-kok tōa kín-tiuⁿ.

Siūⁿ-khí 2019 nî cha̍p-jī-goe̍h, tī Ōe-ho̍k-pō͘ chi̍t-koán-sú tam-jīm Hù-sú-tiúⁿ ê Lô It-kun i-su, tī bāng-lō͘ téng-bīn hoat-hiān ū bāng-iú thê-khí Tiong-kok Bú-hàn ê Hôa-lâm hái-sán chhī-tiûⁿ ū chhut-hiān chhin-chhiūⁿ SARS ê àn-lē, i sûi-sî hiòng téng-si pò-kò, hiòng Tiong-kok siong-koan tan-ūi chhâ-chèng, jî-chhiáⁿ hiòng sè-kài ōe-seng cho͘-chit (WHO) thong-pò. Cha̍p-jī-goe̍h saⁿ-cha̍p-it, lán chèng-hú tùi Bú-hàn ti̍t-hâng pan-ki si̍t-si teng-ki kiám-e̍k. 2020 nî it-goe̍h cha̍p-saⁿ, an-pâi thoân-jiám-pēⁿ hông-tī i-liâu bāng Chng Gîn-chheng chí-hui-koaⁿ kah hông-e̍k i-su Âng Bín-lâm khì Tiong-kok Bú-hàn, siu-chi̍p chi̍t kóa kah e̍k-chêng siong-koan ê chu-sìn, it-goe̍h cha̍p-la̍k tńg-lâi tiàu-khui soat-bêng-hōe. Chiah chai-iáⁿ tāi-chì giâm-tiōng. It-goe̍h cha̍p-gō͘, Chi̍t-koán-sú kong-kò sin cheng-ka "giâm-tiōng te̍k-sû thoân-jiám-sèng hì-iām" choh tē-gō͘ lūi thoân-jiám-pēⁿ. It-goe̍h jī-saⁿ, Bú-hàn hong siâⁿ, lán-kok kìm-chí Bú-hàn ê lâng ji̍p-kéng, ti̍t-hâng pan-ki thêng poe, liáu-āu chiah kái Tiong-kok lâng lóng put-chún ji̍p-kéng téng chhò-si. It-goe̍h jī-sì, kìm-chí i-liâu-ēng chhùi-am chhut-kháu; it-goe̍h saⁿ-cha̍p-it,teng-ēng choân-kok chhùi-am kang-chhiúⁿ seng-sán ê i-liâu-ēng chhùi-am; jī-goe̍h chhe-la̍k si̍t-si choân-kok chhùi-am si̍t-miâ-chè, ta̍k lâng lóng bé ū chhùi-am. Án-ne, Tâi-oân chiah pí choân sè-kài jīm-hô kok-ka lóng khah chá choh ī-hông, tī tē-it pho choân sè-kài tòe Tiong-kok tio̍h-che ê e̍k-chêng tiong, Tâi-oân it-ti̍t sī hông-e̍k ê bô͘-hōan-seng. Ūi-sím-mih? In-ūi lán chá-chá chioh tio̍h Bú-hàn e̍k-chêng hit-bīn kiàⁿ.

　　 Kin-á-ji̍t, lán chioh tio̍h Lâm-kiaⁿ e̍k-chêng chit bīn kiàⁿ, siong-sìn ē-tàng kā hông Bú-hàn hì-iām Delta pēⁿ-to̍k chit-ê hông-e̍k kang-chok, iû-goân choh sè-kài ê bô͘-hōan-seng. 　　(210806)


　　七月二十，南京禄口国际机场对员工进行例行核酸检测ê时，发现有9个确诊病例，chit 9个人lóng是tī机场做飞机清洁工作ê清洁员。根据江苏省卫生健康委员会ê报告，七月二五江苏省新增加本土确诊病例39例中，南京市占38例，其中有8例是无症头感染者转作确诊病例。In得tio̍h ê武汉肺炎是Delta变种病毒。

　　自án-ne疫情ùi南京扩大新一轮ê疫情，病毒已经湠（thòaⁿ）到中国大陆十几省市，大连、张家界、成都、北京、武汉等城市相续出现有关联性ê病例，确诊人数持续升koân。武汉市八月初一到初二，经过核酸检测发现有7个人是阳性，che是武汉市ùi旧年六月清零以来头一遍出现新个案。根据《北京日报》报导讲，南京疫情传播链延长到至少365个人，溢出去24个城市。中国七月累计新增加病例等于是前五个月ê总和。

　　专家表示，目前tī中国传播ê毒株主要是Delta毒株，传播速度真紧、体内复制mā真紧、转阴ê时间khah长。各地lóng提醒居民「非必要不出省、不离市」。目前已经有17省出现确诊病例；中国官媒《人民日报》讲，除了云南、上海以外，其他地区ê确诊事件lóng kah南京有关，北京mā已经沦陷。

小小一个南京禄口国际机场ê 9个清洁工人，ē-tàng舞kah全国大紧张。 想起2019年十二月，tī卫服部疾管署担任副署长ê罗一钧医师，tī网路顶面发现有网友提起中国武汉ê华南海产市场有出现亲像SARS ê案例，伊随时向顶司报告、向中国相关单位查证，而且向世界卫生组织（WHO）通报。十二月三十一，咱政府对武汉直航班机实施登机检疫。2020年一月十三，安排传染病防治医疗网庄银清指挥官kah防疫医师洪敏南去中国武汉，收集一kóakah疫情相关ê资讯，一月十六转来召开说明会。才知影tāi-chì严重。一月十五，疾管署公告新增加「严重特殊传染性肺炎」作第五类传染病。一月二三，武汉封城，咱国禁止武汉ê人入境，直航班机停飞，了后才改中国人lóng不准入境等措施。一月二四，禁止医疗用嘴am出口；一月三十一，徵用全国嘴am工厂生产ê医疗用嘴am；二月初六实施全国嘴am实名制，逐人lóng买有嘴am。Án-ne，台湾才比全世界任何国家lóng khah早作预防，tī第一波全世界tòe中国tio̍h灾ê疫情中，台湾一直是防疫ê模范生。为什么？因为咱早早借tio̍h武汉疫情hit面镜。

　　今á日，咱借tio̍h南京疫情chit面镜，相信ē-tàng kā防武汉肺炎Delta病毒chit-ê防疫工作，犹原作世界ê模范生。　　(210806)