《绿色短评》

 | | | 转寄

到底tó一党贪腐？

作者 李南衡, ChoânTâijī/全台字 by Chng Hūi-phêng 2024.01.14




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　　 Lí Lâmhêng

　　　　　　Tàuté tó chi̍t tóng thamhú?

　　2023 nî cha̍pjīgoe̍h jīchhit, Tiongkok Kokbîntóng li̍phoatīⁿ thoân tiàukhui kìchiáhōe, lia̍t kí Bînchìntóng 10 tōa thamhú ànkiāⁿ, paukoat e̍kbiâu chháikáng hong chûn 30 nî, Chhiausu Pase keⁿ̄g gîhûn téng. Tiongkok Kokbîntóng ánne khòaⁿtio̍h o͘iáⁿ tio̍h tôaⁿ chhèng, bô hó. Nā ū thamhú sūsi̍t in engkai chhiauchi̍p chuliāu thêchhut khòngkò; nāsī ū hoānchōe sūsi̍t hông phòaⁿ hêng・ ê, siōng hó sī chi̍t kiāⁿ chi̍t kiāⁿ thêchhut lâi kóng chhengchhó, lâng thiaⁿliáu chiah ē sìn chiah ē ho̍k.

Lán khòaⁿ Tiongkok Kokbîntóng ê thamhú, Má Engkiú chènghú ê Hêngchèngīⁿ pìsutiúⁿ kiam Tiongkok Kokbîntóng hù chúse̍k Lîm Eksè, tī li̍phoat úigoân jīmlāi siu thòaⁿsái gia̍pchiá iūkhoán 6,300 bān kho͘, 2012 nî cha̍pgoe̍h jīgō͘ thêkhí kongsò͘, 2013 nî sìgoe̍h saⁿcha̍p, Tâipak tēhng hoatīⁿ itsím phòaⁿchhú Lîm Eksè ha̍ppèng chiphêng iúkî tô͘hêng 7 nî 4 kògoe̍h, thítoa̍t kongkoân 5 nî, pēng kho hoa̍t kim 1,580 bān kho͘. Tamjīm kòe Má chènghú châichèng pō͘tiúⁿ Lí Su̍ttek, 2017 nî cha̍pgoe̍h hō͘ kiámhong khísò͘, 2004 nî Tâipakchhītiúⁿ Má Engkiú ê châichèng kio̍ktiúⁿ jīmlāi kiam jīm 大巨蛋 àn chinsím úigoân ê sî, sia̍phiâm tô͘ lī Oánhiông chìchió 30 ek kho͘ kah gūichō bûnsu phòaⁿ hêng 9 nî. Má Engkiú pānkongsek chújīm Lōa Sò͘jû hông khòngkò tī i Tâipakchhī gīoân jīmlāi Tāipak Siangchúchheⁿ àn siu iū, 2020 nî cha̍pjīgoe̍h jīsaⁿ, chòeko hoatīⁿ phòaⁿchhú iúkî tô͘hêng 7 nî 6 kògoe̍h tô͘hêng, thítoa̍t kongkoân 4 nî.

Lîm Seksan Li̍phoatīⁿ pìsutiúⁿ jīmlāi, siu Bāngoán khoki kongsi 2,800 bān kho͘ iūkhoán, 2023 nî cha̍pitgoe̍h chòeko hoatīⁿ pokhôe siōngsò͘ Lîm Seksan siu iū àn tēngàn, chiàu Koténg Hoatīⁿ í 7 ê ûihoán thamu tīchōe tiâulē siuiū chōe, 2 ê séchîⁿ chōe kah châisán lâigoân putbêng chōe kiōng phòaⁿ hêng 13 nî, íki̍p lēng chi̍tê siuiū chōe phòaⁿ hêng 4 nî 8 kògoe̍h, Koténg Hoatīⁿ chhâitēng ha̍ppèng chiphêng 13 nî 8 kògoe̍h. Li̍púi Liāu Koktòng, Tân Chhiaubêng khansia̍p li̍púi chi̍p thé sia̍ptham àn, 2022 nî chhitgoe̍h chhela̍k, hoatīⁿ itsím soanphòaⁿ Liāu Koktòng phòaⁿ hêng 8 nî 6 kògoe̍h, thítoa̍t kongkoân 4 nî. Tân Chhiaubêng phòaⁿ hêng 7 nî 8 kògoe̍h. Miâule̍k koāntiúⁿ Chhî Iāuchhiong hông khòngkò tī 1998 nî Miâule̍k koān Thâuhūn tìntiúⁿ jīmlāi, ûihoat he̍khoat khìthô͘ chèngbêng í tô͘ lī khìthô͘ gia̍p chiá. Tāipak Tēīⁿ kengkòe cha̍p kúi nî símlí, 2013 nî chhitgoe̍h jīsaⁿ, chiah i tô͘lī chōe soanphòaⁿ Chhî Iāuchhiong 9 nî tô͘hêng, thítoa̍t kongkoân 6 nî. Lí Tiâukhim tī 2005 nî chì 2012 nî Lâmtâu koāntiúⁿ jīmlāi, khansia̍p tio̍h 96 kiāⁿ hôekhàu àn, 15 kiāⁿ siuiū àn, 2022 nî káugoe̍h, keng nn̄gsím soanphòaⁿ 4 kiāⁿ bô chōe, kîtha 90 kiāⁿ ū chōe ha̍ppèng choh 81 chōe, hêng kî chóngkiōng 450 nî 4 kògoe̍h. Tongkim Tiongkok Kokbîntóng chúse̍k Chu Li̍plûn chò Thôhn̂g koāntiúⁿ sî ê hù koāntiúⁿ Ia̍p Sèbûn sia̍phiâm Pattek, Nâkháu Ā ha̍pgî chūthe̍h siu iū chhiaukòe 2,000 bān kah châisán lâigoân putbêng àn. 2019 nî la̍kgoe̍h chhechhit, Koténg Hoatīⁿ chhâitēng Ia̍p Sèbûn 3 chōe ha̍ppèng chiphêng 14 nî tô͘hêng, bu̍tsiu 3,317 bān kho͘. Chu Li̍plûn chò Sinpak chhītiúⁿ sî ê hù chhītiúⁿ Khó͘ Chìkian līiōng To͘keng àn, siu iū 615 bān kho͘. itsím, jīsím lóng phòaⁿ Khó͘ Chìkian 10 nî tô͘hêng, 2019 nî saⁿgoe̍h chhechhit Chòeko Hoatīⁿ pokhôe siōngsò͘ choân àn tēngàn.

Chútiuⁿ búle̍k thóngit Tâioân ê Tiongkok ha̍kchiá Lí Gē, ū sî mā ē kóng liôngsim ōe, chòekīn i kóng, Bînchìntóng tham koaⁿ bôkoán jōachē mā bô Tiongkok Kokbîntóng ê cha̍phun chi it.

　　 Chin・ê, Tiongkok Kokbîntóng ê tham koaⁿ ūkàu chē, sian kóng to kóng bē oân. (240105)

Chù, 大巨蛋　　 chhiáⁿ liām Hôagí




Pe̍h-ōe-jī-pán/白话字版



《 Le̍k-sek toán-phêng 》　　 Lí Lâm-hêng

　　　　　　Tàu-té tó chi̍t tóng tham-hú?

　　2023 nî cha̍p-jī-goe̍h jī-chhit, Tiong-kok Kok-bîn-tóng li̍p-hoat-īⁿ thoân tiàu-khui kì-chiá-hōe, lia̍t kí Bîn-chìn-tóng 10 tōa tham-hú àn-kiāⁿ, pau-koat e̍k-biâu chhái-káng hong chûn 30 nî, Chhiau-su Pa-se ke-nn̄g gî-hûn téng. Tiong-kok Kok-bîn-tóng án-ne khòaⁿ-tio̍h o͘-iáⁿ tio̍h tôaⁿ chhèng, bô hó. Nā ū tham-hú sū-si̍t in eng-kai chhiau-chi̍p chu-liāu thê-chhut khòng-kò; nā-sī ū hoān-chōe sū-si̍t hông phòaⁿ hêng-・ ê, siōng hó sī chi̍t kiāⁿ chi̍t kiāⁿ thê-chhut lâi kóng chheng-chhó, lâng thiaⁿ-liáu chiah ē sìn chiah ē ho̍k.

Lán khòaⁿ Tiong-kok Kok-bîn-tóng ê tham-hú, Má Eng-kiú chèng-hú ê Hêng-chèng-īⁿ pì-su-tiúⁿ kiam Tiong-kok Kok-bîn-tóng hù chú-se̍k Lîm Ek-sè, tī li̍p-hoat úi-goân jīm-lāi siu thòaⁿ-sái gia̍p-chiá iū-khoán 6,300 bān kho͘, 2012 nî cha̍p-goe̍h jī-gō͘ thê-khí kong-sò͘, 2013 nî sì-goe̍h saⁿ-cha̍p, Tâi-pak tē-hng hoat-īⁿ it-sím phòaⁿ-chhú Lîm Ek-sè ha̍p-pèng chip-hêng iú-kî tô͘-hêng 7 nî 4 kò-goe̍h, thí-toa̍t kong-koân 5 nî, pēng kho hoa̍t kim 1,580 bān kho͘. Tam-jīm kòe Má chèng-hú châi-chèng pō͘-tiúⁿ Lí Su̍t-tek, 2017 nî cha̍p-goe̍h hō͘ kiám-hong khí-sò͘, 2004 nî Tâi-pak-chhī-tiúⁿ Má Eng-kiú ê châi-chèng kio̍k-tiúⁿ jīm-lāi kiam jīm 大巨蛋 àn chin-sím úi-goân ê sî, sia̍p-hiâm tô͘ lī Oán-hiông chì-chió 30 ek kho͘ kah gūi-chō bûn-su phòaⁿ hêng 9 nî. Má Eng-kiú pān-kong-sek chú-jīm Lōa Sò͘-jû hông khòng-kò tī i Tâi-pak-chhī gī-oân jīm-lāi Tāi-pak Siang-chú-chheⁿ àn siu iū, 2020 nî cha̍p-jī-goe̍h jī-saⁿ, chòe-ko hoat-īⁿ phòaⁿ-chhú iú-kî tô͘-hêng 7 nî 6 kò-goe̍h tô͘-hêng, thí-toa̍t kong-koân 4 nî.

Lîm Sek-san Li̍p-hoat-īⁿ pì-su-tiúⁿ jīm-lāi, siu Bāng-oán kho-ki kong-si 2,800 bān kho͘ iū-khoán, 2023 nî cha̍p-it-goe̍h chòe-ko hoat-īⁿ pok-hôe siōng-sò͘ Lîm Sek-san siu iū àn tēng-àn, chiàu Ko-téng Hoat-īⁿ í 7 ê ûi-hoán tham-u tī-chōe tiâu-lē siu-iū chōe, 2 ê sé-chîⁿ chōe kah châi-sán lâi-goân put-bêng chōe kiōng phòaⁿ hêng 13 nî, í-ki̍p lēng chi̍t-ê siu-iū chōe phòaⁿ hêng 4 nî 8 kò-goe̍h, Ko-téng Hoat-īⁿ chhâi-tēng ha̍p-pèng chip-hêng 13 nî 8 kò-goe̍h. Li̍p-úi Liāu Kok-tòng, Tân Chhiau-bêng khan-sia̍p li̍p-úi chi̍p thé sia̍p-tham àn, 2022 nî chhit-goe̍h chhe-la̍k, hoat-īⁿ it-sím soan-phòaⁿ Liāu Kok-tòng phòaⁿ hêng 8 nî 6 kò-goe̍h, thí-toa̍t kong-koân 4 nî. Tân Chhiau-bêng phòaⁿ hêng 7 nî 8 kò-goe̍h. Miâu-le̍k koān-tiúⁿ Chhî Iāu-chhiong hông khòng-kò tī 1998 nî Miâu-le̍k koān Thâu-hūn tìn-tiúⁿ jīm-lāi, ûi-hoat he̍k-hoat khì-thô͘ chèng-bêng í tô͘ lī khì-thô͘ gia̍p chiá. Tāi-pak Tē-īⁿ keng-kòe cha̍p kúi nî sím-lí, 2013 nî chhit-goe̍h jī-saⁿ, chiah i tô͘-lī chōe soan-phòaⁿ Chhî Iāu-chhiong 9 nî tô͘-hêng, thí-toa̍t kong-koân 6 nî. Lí Tiâu-khim tī 2005 nî chì 2012 nî Lâm-tâu koān-tiúⁿ jīm-lāi, khan-sia̍p tio̍h 96 kiāⁿ hôe-khàu àn, 15 kiāⁿ siu-iū àn, 2022 nî káu-goe̍h, keng nn̄g-sím soan-phòaⁿ 4 kiāⁿ bô chōe, kî-tha 90 kiāⁿ ū chōe ha̍p-pèng choh 81 chōe, hêng kî chóng-kiōng 450 nî 4 kò-goe̍h. Tong-kim Tiong-kok Kok-bîn-tóng chú-se̍k Chu Li̍p-lûn chò Thô-hn̂g koān-tiúⁿ sî ê hù koān-tiúⁿ Ia̍p Sè-bûn sia̍p-hiâm Pat-tek, Nâ-kháu Ā ha̍p-gî chū-the̍h siu iū chhiau-kòe 2,000 bān kah châi-sán lâi-goân put-bêng àn. 2019 nî la̍k-goe̍h chhe-chhit, Ko-téng Hoat-īⁿ chhâi-tēng Ia̍p Sè-bûn 3 chōe ha̍p-pèng chip-hêng 14 nî tô͘-hêng, bu̍t-siu 3,317 bān kho͘. Chu Li̍p-lûn chò Sin-pak chhī-tiúⁿ sî ê hù chhī-tiúⁿ Khó͘ Chì-kian lī-iōng To͘-keng àn, siu iū 615 bān kho͘. it-sím, jī-sím lóng phòaⁿ Khó͘ Chì-kian 10 nî tô͘-hêng, 2019 nî saⁿ-goe̍h chhe-chhit Chòe-ko Hoat-īⁿ pok-hôe siōng-sò͘ choân àn tēng-àn.

Chú-tiuⁿ bú-le̍k thóng-it Tâi-oân ê Tiong-kok ha̍k-chiá Lí Gē, ū sî mā ē kóng liông-sim ōe, chòe-kīn i kóng, Bîn-chìn-tóng tham koaⁿ bô-koán jōa-chē mā bô Tiong-kok Kok-bîn-tóng ê cha̍p-hun chi it.

　　 Chin-・ê, Tiong-kok Kok-bîn-tóng ê tham koaⁿ ū-kàu chē, sian kóng to kóng bē oân. (240105)

Chù, 大巨蛋　　 chhiáⁿ liām Hôa-gí




　　2023年十二月二七，中国国民党立法院团召开记者会，列举民进党10大贪腐案件，包括疫苗采购封存30年、超思巴西鸡卵疑云等。中国国民党án-ne看tio̍h乌影tio̍h弹铳，无好。若有贪腐事实in应该搜集资料提出控告；若是有犯罪事实hông判刑ê，上好是一件一件提出来讲清楚，人听了chiahē信chiahē服。

咱看中国国民党ê贪腐：马英九政府ê行政院秘书长兼中国国民党副主席林益世，tī立法委员任内收炭屎业者贿款6,300万元，2012年十月二五提起公诉，2013年四月三十，台北地方法院一审判处林益世合并执行有期徒刑7年4个月，褫夺公权5年，并科罚金1,580万元。担任过马政府财政部长李述德，2017年十月hō͘检方起诉，2004年台北市长马英九ê财政局长任内兼任大巨蛋案甄审委员ê时，涉嫌图利远雄至少30亿元kah伪造文书判刑9年。马英九办公室主任赖素如hông控告tī伊台北市议员任内台北双子星案收贿，2020年十二月二三，最高法院判处有期徒刑7年6个月徒刑，褫夺公权4年。

林锡山立法院秘书长任内，收网远科技公司2,800万元贿款，2023年十一月最高法院驳回上诉林锡山收贿案定案，照高等法院以7个违反贪污治罪条例收贿罪、2个洗钱罪kah财产来源不明罪共判刑13年、以及另一个收贿罪判刑4年8个月，高等法院裁定合并执行13年8个月。立委廖国栋、陈超明牵涉立委集体涉贪案，2022年七月初六，法院一审宣判廖国栋判刑8年6个月、褫夺公权4年。陈超明判刑7年8个月。苗栗县长徐耀昌hông控告tī 1998年苗栗县头份镇长任内，违法核发弃土证明以图利弃土业者。台北地院经过十几年审理，2013年七月二三，chiah依图利罪宣判徐耀昌9年徒刑、褫夺公权6年。李朝卿tī 2005年至2012年南投县长任内，牵涉tio̍h 96件回扣案、15件收贿案，2022年九月，更二审宣判4件无罪，其他90件有罪合并作81罪，刑期总共450年4个月。当今中国国民党主席朱立伦做桃园县长时ê副县长叶世文涉嫌八德、林口Ā合宜住宅收贿超过2,000万kah财产来源不明案。2019年六月初七，高等法院裁定叶世文3罪合并执行14年徒刑，没收3,317万元。朱立伦做新北市长时ê副市长许志坚利用都更案，收贿615万元。一审、二审lóng判许志坚10年徒刑，2019年三月初七最高法院驳回上诉全案定案。

主张武力统一台湾ê中国学者李毅，有时māē讲良心话，最近伊讲：民进党贪官无管jōa-chē mā无中国国民党ê十分之一。

　　真ê，中国国民党ê贪官有够chē，仙讲to讲bē完。 (240105)

注：大巨蛋　　请念华语