《绿色短评》

 | | | 转寄

中国国民党náē无骨头到chit款？

作者 李南衡, ChoânTâijī/全台字 by Chng Hūi-phêng 2023.11.26




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》　　 Lí Lâmhêng

　　 Tiongkok Kokbîntóng náē bô kutthâu kàu chit khoán?

2024 nî chóngthóng tōa soán, chi̍t khaisí, Tiongkok Kokbîntóng chúse̍k Chu Li̍plûn thêchhut "hui Le̍k tōa liânbêng", tio̍h íkeng piáubêng Tiongkok Kokbîntóng phah bē iâⁿ Bînchìntóng, kiaⁿ kah bōe chiàn tio̍h sengjīn su, si̍tchāi sī bô kutkhì. I hibāng chio pa̍t tóng tàu chhutla̍t, chòhóe phah iâⁿ Bînchìntóng. Lán bô engkai kóng Tiongkok Kokbîntóng bô kutthâu nńg siôsiô. Lán khòaⁿ Tiongkok Kokbîntóng li̍phoat úigoân ū 37 se̍k, bînchìntóng ū 62 se̍k, kanta chit hāng su niāniā. Kîtha chhiūⁿkóng choân kok koānchhītiúⁿ Tiongkok Kokbîntóng ū 14 ê, Bînchìntóng 5 ê; koānchhī gītiúⁿ hùgītiúⁿ Tiongkok Kokbîntóng ū 26 ê, Bînchìntóng 6 ê; koānchhī gīoân Tiongkok Kokbîntóng ū 394 ê, Bînchìntóng ū 238 ê; choân kok hiongtìn chhītiúⁿ Tiongkok Kokbîntóng ū 80 ê, Bînchìntóng 40 ê; choân kok chhunlítiúⁿ Tiongkok Kokbîntóng ū 1,221 ê, Bînchìntóng 285 ê. Lí khòaⁿ, Tiongkok Kokbîntóng tī tēhng ê cho͘chit tōngoân le̍kliōng násī Bînchìntóng ē pítit・ê? Chiahni̍h chho͘ióng ê Tiongkok Kokbîntóng náē m̄ káⁿ kah Bînchìntóng ko͘ tùisiah soán chóngthóng leh? sió siūⁿ chi̍tē, goânlâi sī i bô kutthâu!

　　 Tiongkok Kokbîntóng lāi m̄ sī ta̍kê lóng bô kutthâu. Hâu Iúgî kēngsoán pānkongsek chiphêngtiúⁿ Kim Phó͘chhong tio̍h siongtong bô jīntông soán chóngthóng tio̍h kah lâng ha̍p, cháchá tī chhitgoe̍h jīgō͘ tio̍h ti̍t peh,"Pe̍h chiàⁿ Nâ hù" bôkhólêng, bô hoattō͘ chiapsiū Tiongkok Kokbîntóng hông chia̍htiāu ê miāūn. Kah Bînchìntóng tèng ko͘ki, chún nāsī soán su "mātio̍h khiā thêngthêng tó・lo̍hkhì." khósioh ū kutkhì ê Kim sióto hông tèng kah móasin sī siong!

Tiongkok Kokbîntóng ê Chu Li̍plûn thâuchi̍tê chhōe Bînchiòngtóng ê Koa Bûntiat lâi "Nâ Pe̍h ha̍p", ha̍p lâi ha̍p khì ha̍p bē hósè,"Nâ Pe̍h ha̍p" soah piàn choh "Nâ Pe̍h thoa". Bô gîgō͘ cha̍pitgoe̍h chhecha̍p, Má Engkiú chêng chóngthóng thiàuchhut soantho̍k "sèngchí", Nâ Pe̍h ha̍p tio̍h ēng Koa Bûntiat thêchhut ê choân bîntiāu, Nâ Pe̍h bô ha̍h choa̍ttùi bē iâⁿ. Chu Li̍plûn, Hāu Iúgî, Koa Bûntiat lóng kūi teh hoah kóng, niá chí. Siā hôngun! Tiongkok Kokbîntóng kah Bînchiòngtóng lóng bô kutthâu kah chit khoán!

Má Engkiú chêng chóngthóng jīmlāi ê Hêngchèngīⁿtiúⁿ Lâu Tiāuhiân, cha̍pitgoe̍h cha̍psì beh khì Lâmkiaⁿ chhamka "2023 nn̄g hōaⁿ khìgia̍pka honghōe nîhōe" chhuthoat chêng, choankang pàithok Má Engkiú chêng chóngthóng tio̍h chhutlâi chhioksêng "Nâ Pe̍h ha̍p"; chin túhó, Má Engkiú kikimhōe chiphêngtiúⁿ Siau Hiokgîm tī cha̍pitgoe̍h chhejī chì chhegō͘, khì Pakkiaⁿ hóngbūn saⁿ kang, chhutse̍k tī Tiòhîtâi pinkoán kíhêng ê Pakkiaⁿ lūntôaⁿ, tńglâi Tâioân liáuāu, Má Engkiú tio̍h chhutchhiú chhioksêng cha̍pitgoe̍h cha̍pgō͘ tējī chhù "Nâ Pe̍h ha̍p" chèngtóng hia̍psiong hōegī, tī Má Engkiú chêng chóngthóng kiànchèng ē ta̍tsêng 6 tiám kiōngsek. Ū chi̍t tiám kóng tôngì choânbîntiāu, tānsī bîntiāu kiatkó tī gō͘chha hoānûi 3% í lāi, Bînchiòngtóng tio̍h niū Tiongkok Kokbîntóng. Pah nî lāutiàm ê Tiongkok Kokbîntóng, káⁿ kóngchhut chiahni̍h bô kutthâu ê ōe!

Cha̍pitgoe̍h cha̍pgō͘, Tiongkok "choân kok Tâikhìliân" kiônglia̍t kiàngī, ūitio̍h káisiān Tâihái ê kíntiuⁿ koanhē, chhiokchìn nn̄ghōaⁿ ê hôpêng hoattián kah kengchè ê iôngha̍p hoattián, Nâ Pe̍h nn̄g pêng engkai í tāikio̍k ūi tiōng, bô hòngkhì jīmhô phah khui kiongkio̍k ê hongàn, kóaⁿkín oânsêng thóngha̍p, si̍thiān chèngtóng lûnthè. Che sī lēnggōa chi̍t tō sèngchí.

Ánne lán tio̍h chaiiáⁿ, sī ánchóaⁿ náē m̄nā Tiongkok Kokbîntóng, liân Bînchiòngtóng mā bô kutthâu! (231117)


Pe̍h-ōe-jī-pán/白话字版



《 Le̍k-sek toán-phêng 》　　 Lí Lâm-hêng

　　 Tiong-kok Kok-bîn-tóng náē bô kut-thâu kàu chit khoán?

2024 nî chóng-thóng tōa soán, chi̍t khai-sí, Tiong-kok Kok-bîn-tóng chú-se̍k Chu Li̍p-lûn thê-chhut "hui Le̍k tōa liân-bêng", tio̍h í-keng piáu-bêng Tiong-kok Kok-bîn-tóng phah bē iâⁿ Bîn-chìn-tóng, kiaⁿ kah bōe chiàn tio̍h seng-jīn su, si̍t-chāi sī bô kut-khì. I hi-bāng chio pa̍t tóng tàu chhut-la̍t, chò-hóe phah iâⁿ Bîn-chìn-tóng. Lán bô eng-kai kóng Tiong-kok Kok-bîn-tóng bô kut-thâu nńg siô-siô. Lán khòaⁿ Tiong-kok Kok-bîn-tóng li̍p-hoat úi-goân ū 37 se̍k, bîn-chìn-tóng ū 62 se̍k, kan-ta chit hāng su niā-niā. Kî-tha chhiūⁿ-kóng choân kok koān-chhī-tiúⁿ Tiong-kok Kok-bîn-tóng ū 14 ê, Bîn-chìn-tóng 5 ê; koān-chhī gī-tiúⁿ hù-gī-tiúⁿ Tiong-kok Kok-bîn-tóng ū 26 ê, Bîn-chìn-tóng 6 ê; koān-chhī gī-oân Tiong-kok Kok-bîn-tóng ū 394 ê, Bîn-chìn-tóng ū 238 ê; choân kok hiong-tìn chhī-tiúⁿ Tiong-kok Kok-bîn-tóng ū 80 ê, Bîn-chìn-tóng 40 ê; choân kok chhun-lí-tiúⁿ Tiong-kok Kok-bîn-tóng ū 1,221 ê, Bîn-chìn-tóng 285 ê. Lí khòaⁿ, Tiong-kok Kok-bîn-tóng tī tē-hng ê cho͘-chit tōng-oân le̍k-liōng ná-sī Bîn-chìn-tóng ē pí-tit-・ê? Chiah-ni̍h chho͘-ióng ê Tiong-kok Kok-bîn-tóng ná-ē m̄ káⁿ kah Bîn-chìn-tóng ko͘ tùi-siah soán chóng-thóng leh? sió siūⁿ chi̍t-ē, goân-lâi sī i bô kut-thâu!

　　 Tiong-kok Kok-bîn-tóng lāi m̄ sī ta̍k-ê lóng bô kut-thâu. Hâu Iú-gî kēng-soán pān-kong-sek chip-hêng-tiúⁿ Kim Phó͘-chhong tio̍h siong-tong bô jīn-tông soán chóng-thóng tio̍h kah lâng ha̍p, chá-chá tī chhit-goe̍h jī-gō͘ tio̍h ti̍t peh,"Pe̍h chiàⁿ Nâ hù" bô-khó-lêng, bô hoat-tō͘ chiap-siū Tiong-kok Kok-bîn-tóng hông chia̍h-tiāu ê miā-ūn. Kah Bîn-chìn-tóng tèng ko͘-ki, chún nā-sī soán su "mā-tio̍h khiā thêng-thêng tó-・lo̍h-khì." khó-sioh ū kut-khì ê Kim sió-to hông tèng kah móa-sin sī siong!

Tiong-kok Kok-bîn-tóng ê Chu Li̍p-lûn thâu-chi̍t-ê chhōe Bîn-chiòng-tóng ê Koa Bûn-tiat lâi "Nâ Pe̍h ha̍p", ha̍p lâi ha̍p khì ha̍p bē hó-sè,"Nâ Pe̍h ha̍p" soah piàn choh "Nâ Pe̍h thoa". Bô gî-gō͘ cha̍p-it-goe̍h chhe-cha̍p, Má Eng-kiú chêng chóng-thóng thiàu-chhut soan-tho̍k "sèng-chí", Nâ Pe̍h ha̍p tio̍h ēng Koa Bûn-tiat thê-chhut ê choân bîn-tiāu, Nâ Pe̍h bô ha̍h choa̍t-tùi bē iâⁿ. Chu Li̍p-lûn, Hāu Iú-gî, Koa Bûn-tiat lóng kūi teh hoah kóng, niá chí. Siā hông-un! Tiong-kok Kok-bîn-tóng kah Bîn-chiòng-tóng lóng bô kut-thâu kah chit khoán!

Má Eng-kiú chêng chóng-thóng jīm-lāi ê Hêng-chèng-īⁿ-tiúⁿ Lâu Tiāu-hiân, cha̍p-it-goe̍h cha̍p-sì beh khì Lâm-kiaⁿ chham-ka "2023 nn̄g hōaⁿ khì-gia̍p-ka hong-hōe nî-hōe" chhut-hoat chêng, choan-kang pài-thok Má Eng-kiú chêng chóng-thóng tio̍h chhut-lâi chhiok-sêng "Nâ Pe̍h ha̍p"; chin tú-hó, Má Eng-kiú ki-kim-hōe chip-hêng-tiúⁿ Siau Hiok-gîm tī cha̍p-it-goe̍h chhe-jī chì chhe-gō͘, khì Pak-kiaⁿ hóng-būn saⁿ kang, chhut-se̍k tī Tiò-hî-tâi pin-koán kí-hêng ê Pak-kiaⁿ lūn-tôaⁿ, tńg-lâi Tâi-oân liáu-āu, Má Eng-kiú tio̍h chhut-chhiú chhiok-sêng cha̍p-it-goe̍h cha̍p-gō͘ tē-jī chhù "Nâ Pe̍h ha̍p" chèng-tóng hia̍p-siong hōe-gī, tī Má Eng-kiú chêng chóng-thóng kiàn-chèng ē ta̍t-sêng 6 tiám kiōng-sek. Ū chi̍t tiám kóng tông-ì choân-bîn-tiāu, tān-sī bîn-tiāu kiat-kó tī gō͘-chha hoān-ûi 3% í lāi, Bîn-chiòng-tóng tio̍h niū Tiong-kok Kok-bîn-tóng. Pah nî lāu-tiàm ê Tiong-kok Kok-bîn-tóng, káⁿ kóng-chhut chiah-ni̍h bô kut-thâu ê ōe!

Cha̍p-it-goe̍h cha̍p-gō͘, Tiong-kok "choân kok Tâi-khì-liân" kiông-lia̍t kiàn-gī, ūi-tio̍h kái-siān Tâi-hái ê kín-tiuⁿ koan-hē, chhiok-chìn nn̄g-hōaⁿ ê hô-pêng hoat-tián kah keng-chè ê iông-ha̍p hoat-tián, Nâ Pe̍h nn̄g pêng eng-kai í tāi-kio̍k ūi tiōng, bô hòng-khì jīm-hô phah khui kiong-kio̍k ê hong-àn, kóaⁿ-kín oân-sêng thóng-ha̍p, si̍t-hiān chèng-tóng lûn-thè. Che sī lēng-gōa chi̍t tō sèng-chí.

Án-ne lán tio̍h chai-iáⁿ, sī án-chóaⁿ ná-ē m̄-nā Tiong-kok Kok-bîn-tóng, liân Bîn-chiòng-tóng mā bô kut-thâu! (231117)




2024年总统大选，一开始，中国国民党主席朱立伦提出「非绿大联盟」，tio̍h已经表明中国国民党拍bē嬴民进党，惊kah未战tio̍h先认输，实在是无骨气。伊希望招别党斗出力、做伙拍嬴民进党。咱无应该讲中国国民党无骨头软siô-siô。咱看中国国民党立法委员有37席，民进党有62席，kan-ta chit项输niā-niā。其他像讲全国县市长中国国民党有14个、民进党5个；县市议长副议长中国国民党有26个、民进党6个；县市议员中国国民党有394个、民进党有238个；全国乡镇市长中国国民党有80个、民进党40个；全国村里长中国国民党有1,221个、民进党285个。你看，中国国民党tī地方ê组织动员力量ná是民进党ē比得ê？Chiah-ni̍h粗勇ê中国国民党ná-ēm̄敢kah民进党孤对削选总统咧？小想一下，原来是伊无骨头！

　　中国国民党内m̄是ta̍k个lóng无骨头。侯友宜竞选办公室执行长金溥聪tio̍h相当无认同选总统tio̍h kah人合，早早tī七月二五tio̍h直剖：「白正蓝副」无可能，无法度接受中国国民党hông食掉ê命运。Kah民进党钉孤枝，准若是选输「mā-tio̍h khiā挺挺倒落去。」可惜有骨气ê金小刀hông钉kah满身是伤！

中国国民党ê朱立伦头一个chhōe民众党ê柯文哲来「蓝白合」，合来合去合bē好势，「蓝白合」煞变作「蓝白拖」。无疑误十一月初十，马英九前总统跳出宣读「圣旨」：蓝白合tio̍h用柯文哲提出ê全民调，蓝白无合绝对bē嬴。朱立伦、侯有宜、柯文哲lóng跪teh喝讲：领旨。谢皇恩！中国国民党kah民众党lóng无骨头kah chit款！

马英九前总统任内ê行政院长刘兆玄，十一月十四beh去南京参加「2023两岸企业家峰会年会」出发前，专工拜托马英九前总统tio̍h出来促成「蓝白合」；真tú好，马英九基金会执行长萧旭岑tī 十一月初二至初五，去北京访问三工，出席tī钓鱼台宾馆举行ê北京论坛，转来台湾了后，马英九tio̍h出手促成十一月十五第二次「蓝白合」政党协商会议，tī马英九前总统见证下达成6点共识。有一点讲同意全民调，但是民调结果tī误差范围3%以内，民众党tio̍h让中国国民党。百年老店ê中国国民党，敢讲出chiah-ni̍h无骨头ê话！

十一月十五，中国「全国台企联」强烈建议，为tio̍h改善台海ê紧张关系，促进两岸ê和平发展kah经济ê融合发展，蓝白二旁应该以大局为重，无放弃任何拍开僵局ê方案，赶紧完成统合，实现政党轮替。Che是另外一道圣旨。

Án-ne咱tio̍h知影，是按怎náēm̄-nā中国国民党、连民众党mā无骨头！ (231117)