《绿色短评》

 | | | 转寄

眠梦kah现实分bē清楚ê柯文哲！

作者 李南衡, ChoânTâijī/全台字 by Chng Hūi-phêng 2023.10.29




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng

　 Bînbāng kah hiānsi̍t pun bē chhengchhó ê Koa Bûntiat!

　　 Cha̍pgoe̍h cha̍pkáu, Bînchìntóng chóngthóng chhamsoánjîn Lōa Chhengtek tiàukhui "Kokka hibāng kangtêng" kìchiáhōe, hoatpò͘ lênggoân choánhêng chèngchhek. Hōe āu chúchhîjîn chàisaⁿ thêchhéⁿ iáu ū kîtha hêngthêng, Lōa Chhengtek kóng "bô koanhē lah", 30 huncheng hō͘ mûithé mn̄g kah pá. Kìchiá mn̄g kàu Koa Bûntiat tùi Chhimò hiâⁿ thô͘thòaⁿ tiānchhiúⁿ ê chíkhòng, Koa Bûntiat kóng, 2018 nî Lōa Chhengtek tamjīm Hêngchèngīⁿtiúⁿ ê sî, bat chhinsin khì pàihóng i, pàithok i mài hoántùi khí Chhimò hiâⁿ thô͘thòaⁿ tiānchhiúⁿ, nā bô pak Tâioân ē khiàm tiān. Koa Bûntiat kóng i tongsî siongsìn Lōa Chhengtek, tānsī nn̄g lépài āu, Lōa Chhengtek tńgchhùi kóng bô beh khí ah, phoephêng Lōa Chhengtek bô sêngsìn. Lōa Chhengtek kóng, i khaksi̍t bat tùi Koa Bûntiat thêkhí pakpō͘ ēngtiān ê khùnlân, tānsī āulâi ná ē thêng kiàn, kòekhì tī Hêngchèngīⁿtiúⁿ jīmlāi pīsûn ê sî tio̍h ū hôeèng goânin, inūi bînchiòng kámsiūtio̍h khongkhì ùjiám. Nāsī Kengchèpō͘ ū pānhoat tiāucheh pakpō͘ tiānle̍k ê ūniōng, Hêngchèngīⁿ chuntiōng. Kóng Lōa Chhengtek bat chhinsin khì pàihóng i, Lōa Chhengtek hoánpo̍k kóng, Koa Bûntiat tio̍hkóng chhengchhó "góa siáⁿmi̍h sîchūn bat tengmn̂g khì pàihóng i? "tian tò sī Koa Bûntiat bat ūitio̍h chhōe hùchhītiúⁿ lâi Tâilâm pàihóng góa. Chiamtùi Koa Bûntiat kòekhì bat kóng "joa̍hthiⁿ Lōa Chhengtek ētàng chhēng sechong, chē kah chiok sìchiàⁿ, chia̍h saⁿtiámgōa cheng ê pn̄g, ùi thâu kàu bóe lóng sī chē 90 tō͘, íá chē saⁿhun chṳt." Lōa Chhengtek kuigoân tongsî kìⁿbīn ê kengkòe, sī Koa Bûntiat tēit piàn tamjīm Tâipakchhītiúⁿ ê sî, lâi Tâilâm beh chhōe Chóngthónghú chuchèng Ia̍p Kioklân, chhiáⁿ thok i pangbâng chhōe hù chhītiúⁿ, tongsî sinûi Tâilâm chhītiúⁿ ê góa, chūjiân pôetông hoangêng tongsî Bînchìntóng kiōngtông chichhî tòngsoán ê Koa Bûntiat, Lōa Chhengtek soeh, hit piàn kìⁿbīn, Koa Bûntiat mā mn̄g i tòngsoán āu tio̍h ánchóaⁿ káikoat choankho isu chipchiàu iânsio̍k ê būntê,"tī hit chióng chōnghóng hā, góa ná ū suiàu íá chē saⁿhun chṳt leh?" jîchhiáⁿ tongsî cháu kongbū hêngthêng tiongtô͘ chiânóng, chūjiân sī chhēng sechong kiat nekhútái." Le̍ksú siōng bat thiaⁿkòe íá chē saⁿhun chṳt ê, sī Lí Tenghui chêng chóngthóng bīntùi Chiúⁿ Kengkok chêng chóngthóng. Tānsī góa m̄ sī Lí Tenghui, Chitmá sī bînchú sîtāi, Koa Bûntiat mā m̄ sī Chiúⁿ Kengkok, mài siūⁿ kóng kakī sī Chiúⁿ Kengkok."Lōa Chhengtek kóng, kah Koa Bûntiat kìⁿbīn nn̄g piàn lóng ū kongkhai choánsu̍t, Koa Bûntiat kóng ê lāṳông ū kah sūsi̍t bô ha̍h.

Goânlâi sī káugoe̍h cha̍psì ēpo͘, Bînchiòngtóng chúse̍k Koa Bûntiat lâikàu Tâitiongchhī Chhengchúi chhamka chhīgīoân Tân Têngsiù chú pān ê "soán Tiat chōtâmhōe", Koa Bûntiat kiôngtiāu nāsī hō͘ Lōa Chhengtek tòngsoán, Tâioân kengchè ē piàn chha, mā ē hāmji̍p chiàncheng gûiki. I kóng 2018 nî Lōa Chhengtek tamjīm Hêngchèngīⁿtiúⁿ ê sî, bat chhinsin lâi pàihóng i, pàithok mài hoántùi khí Chhimò tiānchhiúⁿ, nā bô pak Tâioân ē khiàm tiān, tānsī nn̄g lépài āu Lōa Chhengtek tńgchhùi kóng bô beh khí ah. Tōa mē Lōa Chhengtek ê sêngsìn putchiok.

Tâioân sī chi̍tê chūiû bînchú ê kokka, múi chi̍tê lâng lóng ū o͘pe̍h bînbāng ê chūiû. Kui thâukhak "thàikàm hôngsiōng" siūⁿhoat ê Koa Bûntiat, chin ū khólêng bînbāngtio̍h Lōa Chhengtek koaikoai lâi tiâukìⁿ i, íá chē saⁿhun chṳt. Ū lâng mē Koa Bûntiat kóng pe̍hchha̍t, koànsì kóng pe̍hchha̍t. Ū siókhóa khah tîmtāng.

　　 Lán tiantò siongsìn, M̄ sī Koa Bûntiat kóng pe̍hchha̍t, sī i bînbāng kah hiānsi̍t pun bē chhengchhó! (231020)



Pe̍h-ōe-jī-pán/白话字版



《 Le̍k-sek toán-phêng 》 Lí Lâm-hêng

　 Bîn-bāng kah hiān-si̍t pun bē chheng-chhó ê Koa Bûn-tiat!

　　 Cha̍p-goe̍h cha̍p-káu, Bîn-chìn-tóng chóng-thóng chham-soán-jîn Lōa Chheng-tek tiàu-khui "Kok-ka hi-bāng kang-têng" kì-chiá-hōe, hoat-pò͘ lêng-goân choán-hêng chèng-chhek. Hōe āu chú-chhî-jîn chài-saⁿ thê-chhéⁿ iáu ū kî-tha hêng-thêng, Lōa Chheng-tek kóng "bô koan-hē lah", 30 hun-cheng hō͘ mûi-thé mn̄g kah pá. Kì-chiá mn̄g kàu Koa Bûn-tiat tùi Chhim-ò hiâⁿ thô͘-thòaⁿ tiān-chhiúⁿ ê chí-khòng, Koa Bûn-tiat kóng, 2018 nî Lōa Chheng-tek tam-jīm Hêng-chèng-īⁿ-tiúⁿ ê sî, bat chhin-sin khì pài-hóng i, pài-thok i mài hoán-tùi khí Chhim-ò hiâⁿ thô͘-thòaⁿ tiān-chhiúⁿ, nā bô pak Tâi-oân ē khiàm tiān. Koa Bûn-tiat kóng i tong-sî siong-sìn Lōa Chheng-tek, tān-sī nn̄g lé-pài āu, Lōa Chheng-tek tńg-chhùi kóng bô beh khí ah, phoe-phêng Lōa Chheng-tek bô sêng-sìn. Lōa Chheng-tek kóng, i khak-si̍t bat tùi Koa Bûn-tiat thê-khí pak-pō͘ ēng-tiān ê khùn-lân, tān-sī āu-lâi ná ē thêng kiàn, kòe-khì tī Hêng-chèng-īⁿ-tiúⁿ jīm-lāi pī-sûn ê sî tio̍h ū hôe-èng goân-in, in-ūi bîn-chiòng kám-siū-tio̍h khong-khì ù-jiám. Nā-sī Keng-chè-pō͘ ū pān-hoat tiāu-cheh pak-pō͘ tiān-le̍k ê ūn-iōng, Hêng-chèng-īⁿ chun-tiōng. Kóng Lōa Chheng-tek bat chhin-sin khì pài-hóng i, Lōa Chheng-tek hoán-po̍k kóng, Koa Bûn-tiat tio̍h-kóng chheng-chhó "góa siáⁿ-mi̍h sî-chūn bat teng-mn̂g khì pài-hóng i? "tian- tò sī Koa Bûn-tiat bat ūi-tio̍h chhōe hù-chhī-tiúⁿ lâi Tâi-lâm pài-hóng góa. Chiam-tùi Koa Bûn-tiat kòe-khì bat kóng "joa̍h-thiⁿ Lōa Chheng-tek ē-tàng chhēng se-chong, chē kah chiok sì-chiàⁿ, chia̍h saⁿ-tiám-gōa cheng ê pn̄g, ùi thâu kàu bóe lóng sī chē 90 tō͘, í-á chē saⁿ-hun chi-it." Lōa Chheng-tek kui-goân tong-sî kìⁿ-bīn ê keng-kòe, sī Koa Bûn-tiat tē-it piàn tam-jīm Tâi-pak-chhī-tiúⁿ ê sî, lâi Tâi-lâm beh chhōe Chóng-thóng-hú chu-chèng Ia̍p Kiok-lân, chhiáⁿ thok i pang-bâng chhōe hù chhī-tiúⁿ, tong-sî sin-ûi Tâi-lâm chhī-tiúⁿ ê góa, chū-jiân pôe-tông hoan-gêng tong-sî Bîn-chìn-tóng kiōng-tông chi-chhî tòng-soán ê Koa Bûn-tiat, Lōa Chheng-tek soeh, hit piàn kìⁿ-bīn, Koa Bûn-tiat mā mn̄g i tòng-soán āu tio̍h án-chóaⁿ kái-koat choan-kho i-su chip-chiàu iân-sio̍k ê būn-tê,"tī hit chióng chōng-hóng hā, góa ná ū su-iàu í-á chē saⁿ-hun chi-it leh?" jî-chhiáⁿ tong-sî cháu kong-bū hêng-thêng tiong-tô͘ chiân-óng, chū-jiân sī chhēng se-chong kiat ne-khú-tái." Le̍k-sú siōng bat thiaⁿ-kòe í-á chē saⁿ-hun chi-it ê, sī Lí Teng-hui chêng chóng-thóng bīn-tùi Chiúⁿ Keng-kok chêng chóng-thóng. Tān-sī góa m̄ sī Lí Teng-hui, Chit-má sī bîn-chú sî-tāi, Koa Bûn-tiat mā m̄ sī Chiúⁿ Keng-kok, mài siūⁿ kóng ka-kī sī Chiúⁿ Keng-kok."Lōa Chheng-tek kóng, kah Koa Bûn-tiat kìⁿ-bīn nn̄g piàn lóng ū kong-khai choán-su̍t, Koa Bûn-tiat kóng ê lāi-iông ū kah sū-si̍t bô ha̍h.

Goân-lâi sī káu-goe̍h cha̍p-sì ē-po͘, Bîn-chiòng-tóng chú-se̍k Koa Bûn-tiat lâi-kàu Tâi-tiong-chhī Chheng-chúi chham-ka chhī-gī-oân Tân Têng-siù chú pān ê "soán Tiat chō-tâm-hōe", Koa Bûn-tiat kiông-tiāu nā-sī hō͘ Lōa Chheng-tek tòng-soán, Tâi-oân keng-chè ē piàn chha, mā ē hām-ji̍p chiàn-cheng gûi-ki. I kóng 2018 nî Lōa Chheng-tek tam-jīm Hêng-chèng-īⁿ-tiúⁿ ê sî, bat chhin-sin lâi pài-hóng i, pài-thok mài hoán-tùi khí Chhim-ò tiān-chhiúⁿ, nā bô pak Tâi-oân ē khiàm tiān, tān-sī nn̄g lé-pài āu Lōa Chheng-tek tńg-chhùi kóng bô beh khí ah. Tōa mē Lōa Chheng-tek ê sêng-sìn put-chiok.

Tâi-oân sī chi̍t-ê chū-iû bîn-chú ê kok-ka, múi chi̍t-ê lâng lóng ū o͘-pe̍h bîn-bāng ê chū-iû. Kui thâu-khak "thài-kàm hông-siōng" siūⁿ-hoat ê Koa Bûn-tiat, chin ū khó-lêng bîn-bāng-tio̍h Lōa Chheng-tek koai-koai lâi tiâu-kìⁿ i, í-á chē saⁿ-hun chi-it. Ū lâng mē Koa Bûn-tiat kóng pe̍h-chha̍t, koàn-sì kóng pe̍h-chha̍t. Ū sió-khóa khah tîm-tāng.

　　 Lán tian-tò siong-sìn, M̄ sī Koa Bûn-tiat kóng pe̍h-chha̍t, sī i bîn-bāng kah hiān-si̍t pun bē chheng-chhó! (231020)




　　十月十九，民进党总统参选人赖清德召开「国家希望工程」记者会，发布能源转型政策。会后主持人再三提醒犹有其他行程，赖清德讲「无关系啦」，30分钟hō͘媒体问kah饱。记者问到柯文哲对深澳hiâⁿ土碳电厂ê指控，柯文哲讲，2018年赖清德担任行政院长ê时，bat亲身去拜访伊，拜托伊mài反对起深澳hiâⁿ土碳电厂，若无北台湾ē欠电。柯文哲讲伊当时相信赖清德，但是两礼拜后，赖清德转嘴讲无beh起ah，批评赖清德无诚信。赖清德讲，伊确实bat对柯文哲提起北部用电ê困难，但是后来náē停建，过去tī行政院长任内备询ê时tio̍h有回应原因，因为民众感受tio̍h空气污染。若是经济部有办法调节北部电力ê运用，行政院尊重。讲赖清德bat亲身去拜访伊，赖清德反驳讲，柯文哲tio̍h讲清楚「我啥物时阵bat登门去拜访伊？」顚倒是柯文哲bat为tio̍h chhōe副市长来台南拜访我。针对柯文哲过去bat讲「热天赖清德ētàng穿西装，坐kah足四正，食三点外钟ê饭，ùi头到尾lóng是坐90度，椅á坐三分之一。」赖清德还原当时见面ê经过，是柯文哲第一遍担任台北市长ê时，来台南beh chhōe总统府资政叶菊兰，请托伊帮忙chhōe副市长，当时身为台南市长ê我，自然陪同欢迎当时民进党共同支持当选ê柯文哲，赖清德说，hit遍见面，柯文哲mā问伊当选后tio̍h按怎解决专科医师执照延续ê问题，「tīhit种状况下，我ná有需要椅á坐三分之一咧？」而且当时走公务行程中途前往，自然是穿西装结ne-khú-tái。「历史上bat听过椅á坐三分之一ê，是李登辉前总统面对蒋经国前总统。但是我m̄是李登辉，Chit-má是民主时代，柯文哲mā m̄是蒋经国，mài想讲家己是蒋经国。」赖清德讲，kah柯文哲见面两遍lóng有公开转述、柯文哲讲ê内容有kah事实无ha̍h。

原来是九月十四下晡，民众党主席柯文哲来到台中市清水参加市议员陈廷秀主办ê「选哲座谈会」，柯文哲强调若是hō͘赖清德当选，台湾经济ē变差，māē陷入战争危机。伊讲2018年赖清德担任行政院长ê时，bat亲身来拜访伊，拜托mài反对起深澳电厂，若无北台湾ē欠电，但是两礼拜后赖清德转嘴讲无beh起ah。大骂赖清德ê诚信不足。

台湾是一个自由民主ê国家，每一个人lóng有乌白眠梦ê自由。Kui头壳「太监皇上」想法ê柯文哲，真有可能眠梦tio̍h赖清德乖乖来朝见伊，椅á坐三分之一。有人骂柯文哲讲白贼、惯势讲白贼。有小可khah沉重。

　　咱顚倒相信：M̄是柯文哲讲白贼，是伊眠梦kah现实分bē清楚！ (231020)