《绿色短评》

 | | | 转寄

马英九ê国家机密是啥物碗糕？

作者 李南衡, ChoânTâijī/全台字 by Chng Hūi-phêng 2023.10.15




Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng

Má Engkiú ê kokka kibi̍t sī siáⁿmi̍h óaⁿko?

Cha̍pgoe̍h chhejī chákhí sinbûn pòtō, Má Engkiú chêng chóngthóng putboán Bînchìntóng chènghú kā Siangcha̍p kokkhèng kiò choh “Taiwan National Day”, hoane̍k choh Hànbûn tio̍h sī "Tâioân kokkhèngji̍t", i jīnûi che sī cha̍pchiok ê "Tâito̍k" lō͘sòaⁿ, i tī Bīnchheh téngbīn hoatbûn chitbūn, kokmiâ tāngsîá kái choh Tâioân? "Tionghôa Bînkok" phah m̄ kìⁿ khì ah. Só͘í i kīchoa̍t chhutse̍k kiⁿî ê kokkhèng tāihōe.

Má Engkiú tī bīnchheh ánni kóng, kòekhì lán chènghú chū lâi m̄bat súiōng “Taiwan National Day” chitê Engbûn miâchheng, hiànhoat kah chènghú bûnsu lóng bô piànkeng kok miâ, kokkhèng tāihōe tio̍h engkai kèsio̍k súiōng "Tionghôa Bînkok kokkhèngji̍t" Engbûn “Republic of China National Day” chiah tio̍h. Súiōng "Tâioân kokkhèngji̍t", tûliáu thautō͘ Tâito̍k, káⁿ iáu ū jīmhô si̍tchit ê ìgī? Chhòa Engbûn chóngthóng tī jīmlāi chòeāu chi̍t piàn ê kokkhèng tāihōe, iûgoân chòchhut sionghāi Tionghôa Bînkok ê tāichì, hō͘ lâng sim chinthiàⁿ.

I kóng, góa kūnî ū kongkhai ho͘io̍k Chhòa Engbûn chóngthóng kahtiûpān kokkhèng tāihōe ê Li̍phoatīⁿ Iû Sekkhun īⁿtiúⁿ, mài koh ēng “Taiwan National Day” (Tâioân kokkhèngji̍t) choh kokkhèng ê Engbûn miâchheng, khósioh in chún choh bô thiaⁿtio̍h, kiⁿî iûgoân kāngkhoán. Kìjiân khó͘khǹg bô hāu, góa jīnûi kiⁿî nā kohchài chhutse̍k "Tâioân kokkhèngji̍t" tiánlé, ná chhiūⁿ sī ūi chit khoán se̍hoan, thautō͘ ê "Tâito̍k" lō͘sòaⁿ pōesu, ba̍kchiu kimkim khòaⁿ Bînchìntóng chènghú gûihāi Tâioân anchoân, sionghāi Tionghôa Bînkok, só͘í góa koattēng kīchoa̍t chhutse̍k kiⁿî ê kokkhèng tāihōe. Góa beh hiòng koklâng kah sèkài kóng, ūitio̍h Tâioân ê anchoân, kiáⁿsun ê hoklī, goán bētàng tiāmtiām bô chhut siaⁿ, tio̍h kiantēng kah "Tâito̍k" lō͘sòaⁿ chhiat koah, kiankoat hoántùi Tâito̍k!

Tùi chittiám, Hêngchèng Ītiúⁿ Tân Kiànjîn mn̄g kóng ùi 2021 nî tio̍h khaisí súiōng “Taiwan National Day”, chit kúi nî mā lóng sī ánni, chûnnî, kūnî, i lóng ū lâi chhamka. Bētàng líkái sī ánchóaⁿ kiⁿî hutjiânkan bô beh chhamka?

Khah kîkoài・ê sī, cha̍pgoe̍h chhejī ēpo͘ Má Engkiú chhutse̍k chi̍tê kongkhai oa̍htāng, kìchiá mn̄g i éngnî lóng ū chhamka kokkhèng tāihōe, sī ánchóaⁿ kiⁿî bô beh chhamka? i ìn kóng,"Che sī kokka kibi̍t."

1949 nî gō͘goe̍h jīcha̍p khí, Tiongkok Kokbîntóng chènghú tī Tâioân si̍tsi kàigiâm, kàu 1987 nî chhitgoe̍h cha̍pgō͘ káitû kàigiâmlēng ûichí, lóng chóng ū kàigiâm sèkài kú ê 38 nî 56 kang. Tī chitê kîkan ū bē sǹgtit chē ê Tâioân lâng, tio̍h sī phāiⁿ tio̍h "siaplāu kokka kibi̍t chōe" hông lia̍hkhì khó͘hêng, koaiⁿkaⁿ, sīmchì pōngtiāu. Mā hō͘ lán siūⁿkhí So͘liân sîtāi Gôlô ê chi̍tê chèngtī chhiòōe, ū chi̍tê lâng tī Bo̍ksukho ângsek kóngtiûⁿ tōasiaⁿ mē So͘liân thâulâng,"布里滋湼夫 sī chi̍tê pe̍hchhi!" i sûisî hông lia̍h・khì, kengkòe hêngkiû khótáⁿ, chi̍tkò goe̍h āu, hoatīⁿ phòaⁿkoat hitê lâng 21 nî ê hêng kî, kîtiong ê 1 nî sī,"bújio̍k kokka goânsiú chōe", lēnggōa ê 20 nî sī,"siaplāu kokka kibi̍t chōe".

　　 Má Engkiú chêng chóngthóng kiⁿî bô ài khì chhamka kokkhèng tāihōe, i kòjîn ê chūiû. I ná ē kóngkah kokka kibi̍t khì leh? lán khah hò͘ⁿkî・ê sī Má Engkiú ê kokka kibi̍t sī siáⁿmi̍h óaⁿko? 　(231006)


Chù, 布里滋湼夫　chhiáⁿ liām Hôagí


《 Le̍k-sek toán-phêng 》 Lí Lâm-hêng

Má Eng-kiú ê kok-ka ki-bi̍t sī siáⁿ-mi̍h óaⁿ-ko?

Cha̍p-goe̍h chhe-jī chá-khí sin-bûn pò-tō, Má Eng-kiú chêng chóng-thóng put-boán Bîn-chìn-tóng chèng-hú kā Siang-cha̍p kok-khèng kiò choh “Taiwan National Day”, hoan-e̍k choh Hàn-bûn tio̍h sī "Tâi-oân kok-khèng-ji̍t", i jīn-ûi che sī cha̍p-chiok ê "Tâi-to̍k" lō͘-sòaⁿ, i tī Bīn-chheh téng-bīn hoat-bûn chit-būn, kok-miâ tāng-sî-á kái choh Tâi-oân? "Tiong-hôa Bîn-kok" phah m̄ kìⁿ khì ah. Só͘-í i kī-choa̍t chhut-se̍k kin-nî ê kok-khèng tāi-hōe.

Má Eng-kiú tī bīn-chheh án-ni kóng, kòe-khì lán chèng-hú chū lâi m̄-bat sú-iōng “Taiwan National Day” chit-ê Eng-bûn miâ-chheng, hiàn-hoat kah chèng-hú bûn-su lóng bô piàn-keng kok miâ, kok-khèng tāi-hōe tio̍h eng-kai kè-sio̍k sú-iōng "Tiong-hôa Bîn-kok kok-khèng-ji̍t" Eng-bûn “Republic of China National Day” chiah tio̍h. Sú-iōng "Tâi-oân kok-khèng-ji̍t", tû-liáu thau-tō͘ Tâi-to̍k, káⁿ iáu ū jīm-hô si̍t-chit ê ì-gī? Chhòa Eng-bûn chóng-thóng tī jīm-lāi chòe-āu chi̍t piàn ê kok-khèng tāi-hōe, iû-goân chò-chhut siong-hāi Tiong-hôa Bîn-kok ê tāi-chì, hō͘ lâng sim chin-thiàⁿ.

I kóng, góa kū-nî ū kong-khai ho͘-io̍k Chhòa Eng-bûn chóng-thóng kahtiû-pān kok-khèng tāi-hōe ê Li̍p-hoat-īⁿ Iû Sek-khun īⁿ-tiúⁿ, mài koh ēng “Taiwan National Day” (Tâi-oân kok-khèng-ji̍t) choh kok-khèng ê Eng-bûn miâ-chheng, khó-sioh in chún choh bô thiaⁿ-tio̍h, kin-nî iû-goân kāng-khoán. Kì-jiân khó͘-khǹg bô hāu, góa jīn-ûi kin-nî nā koh-chài chhut-se̍k "Tâi-oân kok-khèng-ji̍t" tián-lé, ná chhiūⁿ sī ūi chit khoán se̍h-oan, thau-tō͘ ê "Tâi-to̍k" lō͘-sòaⁿ pōe-su, ba̍k-chiu kim-kim khòaⁿ Bîn-chìn-tóng chèng-hú gûi-hāi Tâi-oân an-choân, siong-hāi Tiong-hôa Bîn-kok, só͘-í góa koat-tēng kī-choa̍t chhut-se̍k kin-nî ê kok-khèng tāi-hōe. Góa beh hiòng kok-lâng kah sè-kài kóng, ūi-tio̍h Tâi-oân ê an-choân, kiáⁿ-sun ê hok-lī, goán bē-tàng tiām-tiām bô chhut siaⁿ, tio̍h kian-tēng kah "Tâi-to̍k" lō͘-sòaⁿ chhiat koah, kian-koat hoán-tùi Tâi-to̍k!

Tùi chit-tiám, Hêng-chèng Ī-tiúⁿ Tân Kiàn-jîn mn̄g kóng ùi 2021 nî tio̍h khai-sí sú-iōng “Taiwan National Day”, chit kúi nî mā lóng sī án-ni, chûn-nî, kū-nî, i lóng ū lâi chham-ka. Bē-tàng lí-kái sī án-chóaⁿ kin-nî hut-jiân-kan bô beh chham-ka?

Khah kî-koài-・ê sī, cha̍p-goe̍h chhe-jī ē-po͘ Má Eng-kiú chhut-se̍k chi̍t-ê kong-khai oa̍h-tāng, kì-chiá mn̄g i éng-nî lóng ū chham-ka kok-khèng tāi-hōe, sī án-chóaⁿ kin-nî bô beh chham-ka? i ìn kóng,"Che sī kok-ka ki-bi̍t."

1949 nî gō͘-goe̍h jī-cha̍p khí, Tiong-kok Kok-bîn-tóng chèng-hú tī Tâi-oân si̍t-si kài-giâm, kàu 1987 nî chhit-goe̍h cha̍p-gō͘ kái-tû kài-giâm-lēng ûi-chí, lóng chóng ū kài-giâm sè-kài kú ê 38 nî 56 kang. Tī chit-ê kî-kan ū bē sǹg-tit chē ê Tâi-oân lâng, tio̍h sī phāiⁿ tio̍h "siap-lāu kok-ka ki-bi̍t chōe" hông lia̍h-khì khó͘-hêng, koaiⁿ-kaⁿ, sīm-chì pōng-tiāu. Mā hō͘ lán siūⁿ-khí So͘-liân sî-tāi Gô-lô ê chi̍t-ê chèng-tī chhiò-ōe, ū chi̍t-ê lâng tī Bo̍k-su-kho âng-sek kóng-tiûⁿ tōa-siaⁿ mē So͘-liân thâu-lâng,"布里滋湼夫 sī chi̍t-ê pe̍h-chhi!" i sûi-sî hông lia̍h-・khì, keng-kòe hêng-kiû khó-táⁿ, chi̍t-kò goe̍h āu, hoat-īⁿ phòaⁿ-koat hit-ê lâng 21 nî ê hêng kî, kî-tiong ê 1 nî sī,"bú-jio̍k kok-ka goân-siú chōe", lēng-gōa ê 20 nî sī,"siap-lāu kok-ka ki-bi̍t chōe".

　　 Má Eng-kiú chêng chóng-thóng kin-nî bô ài khì chham-ka kok-khèng tāi-hōe, i kò-jîn ê chū-iû. I ná ē kóng-kah kok-ka ki-bi̍t khì leh? lán khah hò͘ⁿ-kî-・ê sī Má Eng-kiú ê kok-ka ki-bi̍t sī siáⁿ-mi̍h óaⁿ-ko? 　(231006)


Chù, 布里滋湼夫　chhiáⁿ liām Hôa-gí





十月初二早起新闻报导，马英九前总统不满民进党政府kā双十国庆叫作“Taiwan National Day”，翻译作汉文tio̍h是「台湾国庆日」，伊认为che是十足ê「台独」路线，伊tī面册顶面发文质问，国名tāng时á改作台湾？「中华民国」拍m̄见去ah。所以伊拒绝出席今年ê国庆大会。

马英九tī面册án-ni讲：过去咱政府自来m̄-bat使用“Taiwan National Day”chit-ê英文名称，宪法kah政府文书lóng无变更国名，国庆大会tio̍h应该继续使用「中华民国国庆日」英文“Republic of China National Day”才tio̍h。使用「台湾国庆日」，除了偷渡台独，敢犹有任何实质ê意义？蔡英文总统tī任内最后一遍ê国庆大会，犹原做出伤害中华民国ê代志，hō͘人心真thiàⁿ。

伊讲，我旧年有公开呼吁蔡英文总统kah筹办国庆大会ê立法院游锡堃院长，mài koh用“Taiwan National Day”（台湾国庆日）作国庆ê英文名称，可惜in准作无听tio̍h，今年犹原仝款。既然苦劝无效，我认为今年若koh再出席「台湾国庆日」典礼，ná像是为chit款旋（se̍h）弯、偷渡ê「台独」路线背书，目睭金金看民进党政府危害台湾安全、伤害中华民国，所以我决定拒绝出席今年ê国庆大会。我beh向国人kah世界讲，为tio̍h台湾ê安全，子孙ê福利，阮bē-tàng恬恬无出声，tio̍h坚定kah「台独」路线切割，坚决反对台独！

对chit点，行政院长陈建仁问讲 ùi 2021年tio̍h开始使用“Taiwan National Day”，chit几年mā lóng是án-ni，前年（chûn-nî）、旧年，伊lóng有来参加。Bē-tàng理解是按怎今年忽然间无beh参加？

Khah奇怪ê是，十月初二下晡马英九出席一个公开活动，记者问伊永年lóng有参加国庆大会，是按怎今年无beh参加？伊应讲：「Che是国家机密。」

1949年五月二十起，中国国民党政府tī台湾实施戒严，到1987年七月十五解除戒严令为止，lóng总有戒严世界久ê38年56工。Tī chit-ê期间有bē算得chēê台湾人，tio̍h是背（phāiⁿ）tio̍h「泄漏国家机密罪」hông掠去苦刑、关监，甚至砰掉。Mā hō͘咱想起苏联时代俄罗ê一个政治笑话，有一个人tī莫斯科红色广场大声骂苏联头人：「布里滋湼夫是一个白痴！」伊随时hông掠去，经过刑求拷打，一个月后，法院判决hit-ê人21年ê刑期，其中ê1年是：「侮辱国家元首罪」，另外ê20年是：「泄漏国家机密罪」。

　　马英九前总统今年无爱去参加国庆大会，伊个人ê自由。伊náē讲kah国家机密去咧？咱khah好奇ê是马英九ê国家机密是啥物碗糕？　(231006)


注：布里滋湼夫　　请念华语