《绿色短评》

 | | | 转寄

中国开国门放毒出去，ē hông惊！

作者 李南衡, ChoânTâijī/全台字 by Chng Hūiphêng 2023.01.29

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》 Lí Lâmhêng

Tiongkok khui kokmn̂g pàng to̍k chhutkhì, ē hông kiaⁿ!

　　 Kòekhì chheng gōa kang Tiongkok tùi choânkiû koaiⁿ tiāu piankéng, Tiongkok lâng chosiūtio̍h hongsó, bētàng chhutkok ê khó͘lān. Tiongkok chènghú soanpò͘ ùi 2023 nî chiaⁿgoe̍h chhepeh khí, chèngsek khàihòng piankéng, chin chē Tiongkok lâng hoaⁿhí ēsái chhutkok. Tānsī kantāⁿ thiaⁿtio̍h chitê pàng to̍k khì gōakok ê siausit, hō͘ choân sèkài kokkok sînkeng peⁿ ânân, chìchió ū 21 kok siosòa siattēng "piankéng koánchè chhòsi", beh hôngchí chó͘tòng Búhàn hìiām piànīchu ji̍pchhim. Cha̍pjīgoe̍h jīchhit, Tiongkok gōakaupō͘ kóng, Tiongkok chènghú itti̍t lóng sī í "khoha̍k hônge̍k", kok ok tùi sinhêng koanchōng pēⁿ (Búhàn hìiām) pēⁿto̍k hônge̍k chhòsi mā engkai "ēng khoha̍k chengchún goânchek","tú hó tio̍h hó, bô engkai kòethâu", énghióng jînoân ê chèngsiông ónglâi.

　　 Sèkài kokkok ná ē hiah kíntiuⁿ? inūi chūchiông 2020 nî chhunthiⁿ, Búhàn hìiām ùi Tiongkok pàng chhutkhì choân sèkài liáuāu, ùi siōng khíchho͘ ê Alpha piàn sin choh Beta, itti̍t piàn sin, kàu Delta choân sèkài tōa kíntiuⁿ, siōng sin ê Omicron kok chióng piànīchu kohkhah līhāi. Hó kachài chit tiongkan ū kok chióng e̍kbiâu giánkiù sêngkong, chù chi̍t chiam bô kàu la̍t, chù nn̄g chiam chù saⁿ chiam chù sì chiam. Itgoe̍h, lán chènghú kó͘lē lāutōalâng kín koh ka chù "chhù sètāi e̍kbiâu", kiaⁿ nn̄g, saⁿgoe̍h Omicron piànchióng pēⁿto̍k ē tōa liûhêng. Ánne chiah jīnchin hônge̍k, choân sèkài kàu 2022 nî cha̍pitgoe̍h chhechhit ûichí, ū 6.37 ek lâng khakchín, 660 bān lâng síbông. Tiongkok khah te̍kpia̍t, kianchhî chheng lêng, hong siâⁿ, chū jīnūi Tiongkok génghoat chhut lâi ê e̍kbiâu sèkàṳt・ê, sūsi̍t siōng kàu Delta tio̍h bô i hoat ah, mài kóng lō͘bóe ê Omicron kok chióng piànīchu. Jîchhiáⁿ chù e̍kbiâu ê pílu̍t mā siuⁿ kē, chin chē lâng khakchín liáu mā bô hóhó tīliâu, tìsú kok chióng pēⁿto̍k ê piànīchu hō͘siong énghióng sánseng sin ê pēⁿto̍k, kasiōng Tiongkok e̍kchêng oânchoân sit khòng ê sî hutjiânkan khàihòng, oânchoân bô phòethò ê chhòsi, kok tōa to͘chhī ê pēⁿīⁿ kipchín hoānchiá piak móa, puthēng síbông ê lâng chē kah hóechòngtiûⁿ bē hù sio. Tiongkok koklāi tng teh tōa liûhêng ê sîchūn, hutjiânkan khàihòng Tiongkok lâng chhutkok, sèkài kokkok ná ē bē kiaⁿ?

　　 Chinchē kokka kuitēng ùi Tiongkok poe・lâi ê lúkheh, tī tengki chìnchêng tio̍h thêkiong Sinkoàn kiámchhek imsèng chèngbêng. Ū ê kokka te̍kpia̍t kuitēng ùi Pakkiaⁿ, Siōnghái lâi ê lúkheh lo̍h huiki tio̍h koh chò PCR chháikiám. Siōng līhāi・ê sī Bíkok kah Tekkok, cháchá tī 2022 nî cha̍pjīgoe̍h cha̍pgō͘, cha̍pla̍k, siosòa thêngchí Tiongkok lâng ê chhiamchèng, tn̄g tiāu goânthâu, m̄chai kiámchió kúi bān Tiongkok lâng khì in kok pàng to̍k, si̍tchāi ū kàu khiáu. Itgoe̍h chhecha̍p, Ji̍tpún kah Hânkok mā koattēng chiāmsî thêngchí Tiongkok lâng khì in nn̄g kok ê chhiamchèng, Tiongkok gōakaupō͘ sûisî hoánèng, thêngchí Ji̍tpún lâng kah Hânkok lâng khì Tiongkok ê chhiamchèng. Khah chhùbī・ê sī, Bíkok kah Tekkok soanpò͘ thêngchí Tiongkok lâng chhiamchèng ê sî, náchhiūⁿ bô thiaⁿtio̍h Tiongkok hng・ chi̍tsiaⁿ. Kah Tiongkok itlia̍pit ê Huichiu kokka Morocco kuitēng ùi itgoe̍h chhesaⁿ khaisí kìmchí só͘ū Tiongkok lâi ê panki kànglo̍h, siōng béng・ê sī Tiongkok ê hiaⁿtī kok Pak Tiâusián, itgoe̍h chheit khaisí kìmchí Tiongkok lâng ji̍pkéng. Lóng bô thiaⁿ Tiongkok kóng ánchóaⁿ.

Sèkài kokkok tùi Tiongkok lúkheh chháichhú giâmkeh kiámchhek chhòsi, Tiongkok mē kóng sī "khîsī sèng hānchè", tānsī sèkài ōeseng cho͘chit ti̍tpeh kóng m̄ sī khîsī, sī inūi Tiongkok e̍kchêng sìnsek bô thàubêng, ē hông kiaⁿ. (230113)


Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Tiong-kok khui kok-mn̂g pàng to̍k chhut-khì, ē hông kiaⁿ!

　　 Kòe-khì chheng gōa kang Tiong-kok tùi choân-kiû koaiⁿ tiāu pian-kéng, Tiong-kok lâng cho-siū-tio̍h hong-só, bē-tàng chhut-kok ê khó͘-lān. Tiong-kok chèng-hú soan-pò͘ ùi 2023 nî chiaⁿ-goe̍h chhe-peh khí, chèng-sek khài-hòng pian-kéng, chin chē Tiong-kok lâng hoaⁿ-hí ē-sái chhut-kok. Tān-sī kan-tāⁿ thiaⁿ-tio̍h chit-ê pàng to̍k khì gōa-kok ê siau-sit, hō͘ choân sè-kài kok-kok sîn-keng peⁿ ân-ân, chì-chió ū 21 kok sio-sòa siat-tēng "pian-kéng koán-chè chhò-si", beh hông-chí chó͘-tòng Bú-hàn hì-iām piàn-ī-chu ji̍p-chhim. Cha̍p-jī-goe̍h jī-chhit, Tiong-kok gōa-kau-pō͘ kóng, Tiong-kok chèng-hú it-ti̍t lóng sī í "kho-ha̍k hông-e̍k", kok -ok tùi sin-hêng koan-chōng pēⁿ (Bú-hàn hì-iām) pēⁿ-to̍k hông-e̍k chhò-si mā eng-kai "ēng kho-ha̍k cheng-chún goân-chek","tú hó tio̍h hó, bô eng-kai kòe-thâu", éng-hióng jîn-oân ê chèng-siông óng-lâi.

　　 Sè-kài kok-kok ná ē hiah kín-tiuⁿ? in-ūi chū-chiông 2020 nî chhun-thiⁿ, Bú-hàn hì-iām ùi Tiong-kok pàng chhut-khì choân sè-kài liáu-āu, ùi siōng khí-chho͘ ê Alpha piàn sin choh Beta, it-ti̍t piàn sin, kàu Delta choân sè-kài tōa kín-tiuⁿ, siōng sin ê Omicron kok chióng piàn-ī-chu koh-khah lī-hāi. Hó ka-chài chit tiong-kan ū kok chióng e̍k-biâu gián-kiù sêng-kong, chù chi̍t chiam bô kàu la̍t, chù nn̄g chiam chù saⁿ chiam chù sì chiam. It-goe̍h, lán chèng-hú kó͘-lē lāu-tōa-lâng kín koh ka chù "chhù sè-tāi e̍k-biâu", kiaⁿ nn̄g, saⁿ-goe̍h Omicron piàn-chióng pēⁿ-to̍k ē tōa liû-hêng. Án-ne chiah jīn-chin hông-e̍k, choân sè-kài kàu 2022 nî cha̍p-it-goe̍h chhe-chhit ûi-chí, ū 6.37 ek lâng khak-chín, 660 bān lâng sí-bông. Tiong-kok khah te̍k-pia̍t, kian-chhî chheng lêng, hong siâⁿ, chū jīn-ūi Tiong-kok géng hoat chhut-lâi ê e̍k-biâu sè-kài-it-・ê, sū-si̍t siōng kàu Delta tio̍h bô i hoat ah, mài kóng lō͘-bóe ê Omicron kok chióng piàn-ī-chu. Jî-chhiáⁿ chù e̍k-biâu ê pí-lu̍t mā siuⁿ kē, chin chē lâng khak-chín liáu mā bô hó-hó tī-liâu, tì-sú kok chióng pēⁿ-to̍k ê piàn-ī-chu hō͘-siong éng-hióng sán-seng sin ê pēⁿ-to̍k, ka-siōng Tiong-kok e̍k-chêng oân-choân sit khòng ê sî hut-jiân-kan khài-hòng, oân-choân bô phòe-thò ê chhò-si, kok tōa to͘-chhī ê pēⁿ-īⁿ kip-chín hoān-chiá piak móa, put-hēng sí-bông ê lâng chē kah hóe-chòng-tiûⁿ bē hù sio. Tiong-kok kok-lāi tng teh tōa liû-hêng ê sî-chūn, hut-jiân-kan khài-hòng Tiong-kok lâng chhut-kok, sè-kài kok-kok ná ē bē kiaⁿ?

　　 Chin-chē kok-ka kui-tēng ùi Tiong-kok poe-・lâi ê lú-kheh, tī teng-ki chìn-chêng tio̍h thê-kiong Sin-koàn kiám-chhek im-sèng chèng-bêng. Ū ê kok-ka te̍k-pia̍t kui-tēng ùi Pak-kiaⁿ, Siōng-hái lâi ê lú-kheh lo̍h hui-ki tio̍h koh chò PCR chhái-kiám. Siōng lī-hāi-・ê sī Bí-kok kah Tek-kok, chá-chá tī 2022 nî cha̍p-jī-goe̍h cha̍p-gō͘, cha̍p-la̍k, sio-sòa thêng-chí Tiong-kok lâng ê chhiam-chèng, tn̄g tiāu goân-thâu, m̄-chai kiám-chió kúi bān Tiong-kok lâng khì in kok pàng to̍k, si̍t-chāi ū kàu khiáu. It-goe̍h chhe-cha̍p, Ji̍t-pún kah Hân-kok mā koat-tēng chiām-sî thêng-chí Tiong-kok lâng khì in nn̄g kok ê chhiam-chèng, Tiong-kok gōa-kau-pō͘ sûi-sî hoán-èng, thêng-chí Ji̍t-pún lâng kah Hân-kok lâng khì Tiong-kok ê chhiam-chèng. Khah chhù-bī-・ê sī, Bí-kok kah Tek-kok soan-pò͘ thêng-chí Tiong-kok lâng chhiam-chèng ê sî, ná-chhiūⁿ bô thiaⁿ-tio̍h Tiong-kok hng-・ chi̍t-siaⁿ. Kah Tiong-kok it-lia̍p-it ê Hui-chiu kok-ka Morocco kui-tēng ùi it-goe̍h chhe-saⁿ khai-sí kìm-chí só͘-ū Tiong-kok lâi ê pan-ki kàng-lo̍h, siōng béng-・ê sī Tiong-kok ê hiaⁿ-tī kok Pak Tiâu-sián, it-goe̍h chhe-it khai-sí kìm-chí Tiong-kok lâng ji̍p-kéng. Lóng bô thiaⁿ Tiong-kok kóng án-chóaⁿ.

Sè-kài kok-kok tùi Tiong-kok lú-kheh chhái-chhú giâm-keh kiám-chhek chhò-si, Tiong-kok mē kóng sī "khî-sī sèng hān-chè", tān-sī sè-kài ōe-seng cho͘-chit ti̍t-peh kóng m̄ sī khî-sī, sī in-ūi Tiong-kok e̍k-chêng sìn-sek bô thàu-bêng, ē hông kiaⁿ. (230113)



　　过去千外工中国对全球关掉边境，中国人遭受tio̍h封锁、bē-tàng出国ê苦难。中国政府宣布ùi 2023年正月初八起，正式开放边境，真chē中国人欢喜ē-sái出国。但是kan-tāⁿ听tio̍h chit-ê放毒去外国ê消息，hō͘全世界各国神经绷ân-ân，至少有21国相续设定「边境管制措施」，beh防止阻挡武汉肺炎变异株入侵。十二月二七，中国外交部讲，中国政府一直lóng是以「科学防疫」，各国对新型冠状病（武汉肺炎）病毒防疫措施mā应该「用科学精准原则」，「抵好tio̍h好，无应该过头」，影响人员ê正常往来。

　　世界各国ná ē hiah紧张？因为自从2020年春天，武汉肺炎ùi中国放出去全世界了后，ùi上起初ê Alpha变身作Beta，一直变身，到Delta全世界大紧张，上新ê Omicron各种变异株koh-khah厉害。好ka-chài chit中间有各种疫苗研究成功，注一针无够力，注两针注三针注四针。一月，咱政府鼓励老大人紧koh加注「次世代疫苗」，惊二、三月Omicron变种病毒ē 大流行。Án-ne chiah认真防疫，全世界到2022年十一月初七为止，有6.37亿人确诊、660万人死亡。中国khah特别，坚持清零、封城，自认为中国研发出来ê疫苗世界一-・ê，事实上到Delta tio̍h无伊法ah，mài讲路尾ê Omicron各种变异株。而且注疫苗ê比率mā siuⁿ低，真chē人确诊了mā无好好治疗，致使各种病毒ê变异株互相影响产生新ê病毒，加上中国内疫情完全失控ê时忽然间开放，完全无配套ê措施，各大都市ê病院急诊患者爆满，不幸死亡ê人chē kah火葬场bē赴烧。中国国内当teh大流行ê时阵，忽然间开放中国人出国，世界各国ná ē bē惊？

　　真chē国家规定ùi中国飞来ê旅客，tī登机进前tio̍h提供新冠检测阴性证明。有ê国家特别规定ùi北京、上海来ê旅客落飞机tio̍h koh做PCR采检。上厉害-・ê是美国kah德国，早早tī 2022年十二月十五、十六，相续停止中国人ê签证，断掉源头，m̄知减少几万中国人去in国放毒，实在有够巧。一月初十，日本kah韩国mā决定暂时停止中国人去in两国ê签证，中国外交部随时反应，停止日本人kah韩国人去中国ê签证。Khah趣味-・ê是，美国kah德国宣布停止中国人签证ê时，ná-chhiūⁿ无听tio̍h中国hng一声。Kah中国一粒一ê非洲国家Morocco规定ùi 一月初三开始禁止所有中国来ê班机降落，上猛-・ê是中国ê兄弟国北朝鲜，一月初一开始禁止中国人入境。Lóng无听中国讲án-chóaⁿ。

世界各国对中国旅客采取严格检测措施，中国骂讲是「歧视性限制」，但是世界卫生组织直剖讲m̄是歧视，是因为中国疫情讯息无透明，ē hông惊。 (230113)