《绿色短评》

 | | | 转寄

感谢美国国防授权法案对台湾ê帮助！

作者 李南衡, ChoânTâijī/全台字 by Chng Hūiphêng 2023.01.22

Choânbîn Tâioânjī pán/全民台湾字版简称ChoânTâiJī

《 Le̍ksek toánphêng 》　　　　 Lí Lâmhêng

Kámsiā Bíkok Kokhông Siūkoân Hoatàn tùi Tâioân ê pangchō͘!

　　 Bíkok sîkan 2022 nî cha̍pjīgoe̍h chhepeh, Bíkok Chiònggīīⁿ í 350 tiuⁿ chichhî phiò tùi 80 tiuⁿ hoántùi phiò, thongkòe 2023 châinî Kokhông Siūkoân Hoatàn (NDAA). Cha̍pjīgoe̍h cha̍pla̍k àm, Bíkok chhamgīīⁿ í 83 phiò chànsêng tùi 11 phiò hoántùi, thongkòe 2023 châichèng nîtō͘ Kokhông Siūkoân Hoatàn. Chitê hoatàn thongkòe ê chónggia̍h sī bíkim 8,580 ek (iok sin tâipè 26 tiāu 5250 ek). Chitê hoatàn nn̄g tiâu chîⁿ kah Tâioân ū koanhē, hoatàn siūkoân Bíkok Kokbūīⁿ tī 2023 nî chì 2027 nî 5 nî châichèng nîtō͘ lāi, thêkiong hō͘ Tâioân bíkim 100 ek (iok sin tâipè 3,064 ek ) bián hêng ê kunsū oânchō͘, múi nî ke̍k ke thêkiong bíkim 20 ek (iok sin tâipè 612.8 ek); lēnggōa chi̍t tiâu sī siūkoân thêkiong Tâioân bíkim 20 ek (iok sin tâipè 612.8 ek) "gōakok kunsū iôngchu" (FMF) ti̍tchiap tāikhoán. Hêngkhoán kîhān sī 12 nî. Lēnggōa iáu ētàng poah ēng siōng chē bíkim 10 ek ê hôngūi bu̍tchu á・.sī ho̍kbū hō͘ Tâioân, koh te̍ktēng Tâioân choh chúiàu hui Pakiok bêngkok, ētàng iusian the̍h tio̍h Bíkok "chhiau gia̍h hôngūi bu̍tchu".

Bíkok sîkan 2022 nî cha̍pjīgoe̍h jīsaⁿ, Bíkok chóngthóng Pàiteng chhiamsú Kokhông Siūkoân Hoatàn, tûliáu kunoân ígōa, hoatàn mā siūkoân Bíkok ūi Tâioân phah chō "khue̍k èngpiàn kunpī khò͘" (regional contengency stockpile), ētàng iusian the̍h tio̍h Bíkok chhiau gia̍h hôngūi bu̍tchu, jîchhiáⁿ iauchhiáⁿ Tâioân háikun chhamka 2024 nî khoân Thàipêngiûⁿ kunsū iánsi̍p. Khah khósioh・ê sī, 5 nî thêkiong hō͘ Tâioân bíkim 100 ek ( iok sin tâipè 3,064 ek kho͘ ) bián hêng ê kunsū oânchō͘ chit tiâu, iáu tī Bíkok Poah khoán Úigoânhōe pêngko͘.

Cha̍pjīgoe̍h jīsì, Tiongkok Koktâipān hoatgiânjîn Chu Hōngliân tap kìchiá mn̄g piáusī, Tâioân sī Tiongkok ê Tâioân. Tâioân būntê sûnjiân sio̍k Tiongkok lāichèng. Bíkok "2023 nî Kokhông Siūkoân Hoatàn"goânpún sī Bíkok koklāihoat, kongjiân tī Tâioân būntê téngbīn kóngtang kóngsai, sīmchì pauhâm thêkiong hō͘ Tiongkok Tâioân tēkhu "kunsū iôngchu" kah bē búkhì hō͘ Tâioân téng lāṳông. Giâmtiōng ûihoán chi̍tê Tiongkok goânchek kah TiongBí saⁿê Liânha̍p Kongpò kuitēng, giâmtiōng ûipōe Bíhong tī Tâioân būntê téngbīn tùi Tionghong só͘ choh ê giâmsiok chèngtī sênglo̍k, giâmtiōng kansia̍p Tiongkok lāichèng, hiòng "Tâito̍k" hunlia̍t sèle̍k hoatchhut giâmtiōng chhògō͘ sìn hō, hō͘ Tâihái hôpêng úntēng chōsêng giâmtiōng súnhāi. Goán tùi che piáusī kiônglia̍t putboán kah kiankoat hoántùi.

Lán mā beh tùi Tiongkok thêchhut giâmtiōng khònggī, Tâihái hôpêng úntēng piànchoh giâmtiōng súnhāi・ê sī Tiongkok jiákhí・ê, Tiongkok ta̍k kang phài kunki kunlām lâi Tâioân ê hângkhong sekpia̍tkhu kah háikiap tiongsòaⁿ pianiân jiáuloān. Tâioân goânpún sī chi̍tê pótó, bôhoân bôló. Puthēng chhut chi̍tê pháiⁿ chhùpiⁿ, chi̍t ji̍t kàu àm hoah kóng bô beh hòngkhì búle̍k phah Tâioân. Tiongkok í Tâioân bētàng píphēng・tit ê kiôngtōa kunle̍k uihia̍p Tâioân, Tâioân chiah tio̍h khai chiok chē chîⁿ bé búkhì, puttekí kā kakī búchong choh chi̍t lia̍p "chhìti tó", Bíkok chiah tio̍h kunsū oânchō͘ Tâioân. Kîsi̍t Tiongkok khah iàukín・ê sī Búhàn hìiām tng teh tōa liûhêng, kā Tiongkok lâng ê kiānkhong seⁿmiā kò͘ hō͘ hó, hō͘ puthēng kòesin ê lâng ētàng kínkín hóe chòng. Tâioân sī Tâioân lâng ê Tâioân, kah Tiongkok oânchoân bô koanhē, mài tī hia iaupáchhá. Tâioân kah Bíkok ê iúhó koanhē, bián lí Tiongkok koán! (230102)


Pe̍h-ōe-jī-pán/白话字版


《 Le̍k-sek toán-phêng 》　　　　 Lí Lâm-hêng

Kám-siā Bí-kok Kok-hông Siū-koân Hoat-àn tùi Tâi-oân ê pang-chō͘!

　　 Bí-kok sî-kan 2022 nî cha̍p-jī-goe̍h chhe-peh, Bí-kok Chiòng-gī-īⁿ í 350 tiuⁿ chi-chhî phiò tùi 80 tiuⁿ hoán-tùi phiò, thong-kòe 2023 châi-nî Kok-hông Siū-koân Hoat-àn (NDAA). Cha̍p-jī-goe̍h cha̍p-la̍k àm, Bí-kok chham-gī-īⁿ í 83 phiò chàn-sêng tùi 11 phiò hoán-tùi, thong-kòe 2023 châi-chèng nî-tō͘ Kok-hông Siū-koân Hoat-àn. Chit-ê hoat-àn thong-kòe ê chóng-gia̍h sī bí-kim 8,580 ek (iok sin tâi-pè 26 tiāu 5250 ek). Chit-ê hoat-àn nn̄g tiâu chîⁿ kah Tâi-oân ū koan-hē, hoat-àn siū-koân Bí-kok Kok-bū-īⁿ tī 2023 nî chì 2027 nî 5 nî châi-chèng nî-tō͘ lāi, thê-kiong hō͘ Tâi-oân bí-kim 100 ek (iok sin tâi-pè 3,064 ek ) bián hêng ê kun-sū oân-chō͘, múi nî ke̍k ke thê-kiong bí-kim 20 ek (iok sin tâi-pè 612.8 ek); lēng-gōa chi̍t tiâu sī siū-koân thê-kiong Tâi-oân bí-kim 20 ek (iok sin tâi-pè 612.8 ek) "gōa-kok kun-sū iông-chu" (FMF) ti̍t-chiap tāi-khoán. Hêng-khoán kî-hān sī 12 nî. Lēng-gōa iáu ē-tàng poah ēng siōng chē bí-kim 10 ek ê hông-ūi bu̍t-chu á-・.sī ho̍k-bū hō͘ Tâi-oân, koh te̍k-tēng Tâi-oân choh chú-iàu hui Pak-iok bêng-kok, ē-tàng iu-sian the̍h tio̍h Bí-kok "chhiau gia̍h hông-ūi bu̍t-chu".

Bí-kok sî-kan 2022 nî cha̍p-jī-goe̍h jī-saⁿ, Bí-kok chóng-thóng Pài-teng chhiam-sú Kok-hông Siū-koân Hoat-àn, tû-liáu kun-oân í-gōa, hoat-àn mā siū-koân Bí-kok ūi Tâi-oân phah chō "khu-e̍k èng-piàn kun-pī khò͘" (regional contengency stockpile), ē-tàng iu-sian the̍h tio̍h Bí-kok chhiau gia̍h hông-ūi bu̍t-chu, jî-chhiáⁿ iau-chhiáⁿ Tâi-oân hái-kun chham-ka 2024 nî khoân Thài-pêng-iûⁿ kun-sū ián-si̍p. Khah khó-sioh-・ê sī, 5 nî thê-kiong hō͘ Tâi-oân bí-kim 100 ek ( iok sin tâi-pè 3,064 ek kho͘ ) bián hêng ê kun-sū oân-chō͘ chit tiâu, iáu tī Bí-kok Poah- khoán Úi-goân-hōe pêng-ko͘.

Cha̍p-jī-goe̍h jī-sì, Tiong-kok Kok-tâi-pān hoat-giân-jîn Chu Hōng-liân tap kì-chiá mn̄g piáu-sī, Tâi-oân sī Tiong-kok ê Tâi-oân. Tâi-oân būn-tê sûn-jiân sio̍k Tiong-kok lāi-chèng. Bí-kok "2023 nî Kok-hông Siū-koân Hoat-àn"goân-pún sī Bí-kok kok-lāi-hoat, kong-jiân tī Tâi-oân būn-tê téng-bīn kóng-tang kóng-sai, sīm-chì pau-hâm thê-kiong hō͘ Tiong-kok Tâi-oân tē-khu "kun-sū iông-chu" kah bē bú-khì hō͘ Tâi-oân téng lāi-iông. Giâm-tiōng ûi-hoán chi̍t-ê Tiong-kok goân-chek kah Tiong-Bí saⁿ-ê Liân-ha̍p Kong-pò kui-tēng, giâm-tiōng ûi-pōe Bí-hong tī Tâi-oân būn-tê téng-bīn tùi Tiong-hong só͘ choh ê giâm-siok chèng-tī sêng-lo̍k, giâm-tiōng kan-sia̍p Tiong-kok lāi-chèng, hiòng "Tâi-to̍k" hun-lia̍t sè-le̍k hoat-chhut giâm-tiōng chhò-gō͘ sìn hō, hō͘ Tâi-hái hô-pêng ún-tēng chō-sêng giâm-tiōng sún-hāi. Goán tùi che piáu-sī kiông-lia̍t put-boán kah kian-koat hoán-tùi.

Lán mā beh tùi Tiong-kok thê-chhut giâm-tiōng khòng-gī, Tâi-hái hô-pêng ún-tēng piàn-choh giâm-tiōng sún-hāi-・ê sī Tiong-kok jiá-khí-・ê, Tiong-kok ta̍k kang phài kun-ki kun-lām lâi Tâi-oân ê hâng-khong sek-pia̍t-khu kah hái-kiap tiong-sòaⁿ pian-iân jiáu-loān. Tâi-oân goân-pún sī chi̍t-ê pó-tó, bô-hoân bô-ló. Put-hēng chhut chi̍t-ê pháiⁿ chhù-piⁿ, chi̍t ji̍t kàu àm hoah kóng bô beh hòng-khì bú-le̍k phah Tâi-oân. Tiong-kok í Tâi-oân bē-tàng pí-phēng-・tit ê kiông-tōa kun-le̍k ui-hia̍p Tâi-oân, Tâi-oân chiah tio̍h khai chiok chē chîⁿ bé bú-khì, put-tek-í kā ka-kī bú-chong choh chi̍t lia̍p "chhì-ti tó", Bí-kok chiah tio̍h kun-sū oân-chō͘ Tâi-oân. Kî-si̍t Tiong-kok khah iàu-kín-・ê sī Bú-hàn hì-iām tng teh tōa liû-hêng, kā Tiong-kok lâng ê kiān-khong seⁿ-miā kò͘ hō͘ hó, hō͘ put-hēng kòe-sin ê lâng ē-tàng kín-kín hóe chòng. Tâi-oân sī Tâi-oân lâng ê Tâi-oân, kah Tiong-kok oân-choân bô koan-hē, mài tī hia iau-pá-chhá. Tâi-oân kah Bí-kok ê iú-hó koan-hē, bián lí Tiong-kok koán! (230102)


《绿色短评》　　　　李南衡

感谢美国国防授权法案对台湾ê帮助！

　　美国时间2022年十二月初八，美国众议院以350张支持票对80张反对票，通过2023财年国防授权法案（NDAA）。十二月十六暗，美国参议院以83票赞成对11票反对，通过2023财政年度国防授权法案。Chit-ê法案通过ê总额是美金8,580亿（约新台币26兆5250亿）。Chit-ê法案两条钱kah台湾有关系：法案授权美国国务院tī 2023年至2027年5年财政年度内，提供hō͘台湾美金100亿（约新台币3,064亿）免还ê军事援助，每年极加提供美金20亿（约新台币612.8亿）；另外一条是授权提供台湾美金20亿美（约新台币612.8亿）「外国军事融资」（FMF）直接贷款。还款期限是12年。另外犹ē-tàng拨用上chē美金10亿ê防卫物资抑是服务hō͘台湾，koh特定台湾作主要非北约盟国，ē-tàng优先the̍h tio̍h美国「超额防卫物资」。

美国时间2022年十二月二三，美国总统拜登签署国防授权法案，除了军援以外，法案mā授权美国为台湾打造「区域应变军备库」（regional contingency stockpile），ē-tàng优先the̍h tio̍h美国超额防卫物资，而且邀请台湾海军参加2024年环太平洋军事演习。Khah可惜ê是，5年提供hō͘台湾美金100亿（约新台币3,064亿元）免还ê军事援助chit条，犹tī美国拨款委员会评估。

十二月二四，中国国台办发言人朱凤莲答记者问表示，台湾是中国ê台湾。台湾问题纯然属中国内政。美国「2023年国防授权法案」原本是美国国内法，公然tī台湾问题顶面讲东讲西，甚至包含提供hō͘中国台湾地区「军事融资」kah卖武器hō͘台湾等内容。严重违反一个中国原则kah中美三个联合公报规定，严重违背美方tī台湾问题顶面对中方所作ê严肃政治承诺，严重干涉中国内政，向「台独」分裂势力发出严重错误信号，hō͘台海和平稳定造成严重损害。阮对che表示强烈不满kah坚决反对。

咱mā beh对中国提出严重抗议，台海和平稳定变作严重损害ê是中国惹起ê，中国逐工派军机军舰来台湾ê航空识别区kah海峡中线边缘扰乱。台湾原本是一个宝岛、无烦无恼。不幸出一个pháiⁿ厝边，一日到暗喝讲无beh放弃武力拍台湾。中国以台湾bē-tàng比并得ê强大军力威胁台湾，台湾才tio̍h开足chē钱买武器，不得已kā家己武装作一粒「刺猪岛」，美国才tio̍h军事援助台湾。其实中国khah要紧ê是武汉肺炎当teh大流行，kā中国人ê健康生命顾hō͘好，hō͘不幸过身ê人ē-tàng紧紧火葬。台湾是台湾人ê台湾，kah中国完全无关系，mài tīhia枵饱吵。台湾kah美国ê友好关系，免你中国管！(230102)