《绿色短评》

 | | | 转寄

马英九án-ne péng乌作白！

作者 李南衡, ChoânTâijī/全台字 by Chng Hūiphêng 2022.06.28

Choânbîn Tâioânjī pán/全民台湾字版简称ChoânTâiJī


《 Le̍ksek toánphêng 》 Lí Lâmhêng


Má Engkiú ánne hoán o͘ choh pe̍h!

　　 Kiⁿî "Lio̍ksù Thiananmn̂g sūkiāⁿ " 33 chiunî, Tâioân chêng chóngthóng Má Engkiú tī bīnchheh téngbīn hoat bûn ho͘io̍k Tiongkok tongkio̍k tio̍h ióngkám bīntùi le̍ksú, sêngtam chekjīm, chiah ētàng hiòngchêng māichìn. Má Engkiú chíchhut, kūnî cha̍pgoe̍h, Tiongkok kokka chúsek 习近平 tī Tiongiongjîntāi tōa kangchok hōegī ê sî ū kóngtio̍h bînchú, 习近平 kianchhî kokka itchhè koânle̍k sio̍k tī jînbîn, chòetōa hāntō͘ póchiòng jînbîn tngka chohchú, í hoat tī kok. Kîkoài, Tionghôa Jînbîn Kiōnghôkok hiànhoat tējī tiâu kóng, Tionghôa Jînbîn Kiōnghôkok ê itchhè koânle̍k sio̍ktī jînbîn. Tē saⁿcha̍pgō͘ tiâu kóng Tionghôa Jînbîn Kiōnghôkok kongbîn ū giânlūn, chhutpán, chi̍phōe, kiatsiā, iûhêng, sīui ê chūiû. Hiànhoat siáê to lóng chò bē kàu, sī ánchóaⁿ 习近平 kóng kāngkhoán ê ōe, Má Engkiú tio̍h jīnûi che sī tùi kiànli̍p hoattī siāhōe ê chèngkhak honghiòng. Má Engkiú ánne káⁿ bô kàu gōng?

Má Engkiú oló Tiongkok ê bînchú kiâⁿ tī chèngkhak honghiòng, iáu bô kàu, tio̍h ài koh sūnsòa mē Tâioân i chiah ē sóng. Tī "Lio̍ksù" kámgiân tiong, Má Engkiú kóng, Tâioân suijiân giâ tio̍h bînchú tōa kî, tānsī tī Bînchìntóng chènghú chipchèng ēbīn, khiok bānbāná tūilo̍h ji̍pkhì "put chūiû ê bînchú" lāité.

　　 Gō͘goe̍h chhesaⁿ, Sèkài Sinbûn Chūiûji̍t,"Bôkokkài Kìchiá Cho͘chit" hoatpò͘ 2022 "sèkài sinbûn chūiû chísò͘ ", Tâioân pâimiâ ùi kūnî tē 43 miâ seng kàu kiⁿî tē 38 miâ, iâⁿ kòe tē 43 miâ ê Hânkok kah tē 71 miâ ê Ji̍tpún, Tâioân sī Achiu tēit miâ. Che kah Má Engkiú só͘ kóng ê, Tâioân bānbāná tūilo̍h ji̍pkhì "put chūiû ê bînchú" lāité, tútú tian tòhoán. Má Engkiú só͘ kóng ê engkai sī chí i chhutsì ê Hiangkáng, Hiangkáng ê sinbûn chūiû, ùi kūnî tē 68 miâ tōa poa̍h kàu kiⁿî tē 148 miâ, chi̍t nî lāi poa̍h pehcha̍p miâ, sī pho̍k chi̍tē tūilo̍h ji̍pkhì "put chūiû ê bînchú" lāité. Kiⁿî choân sèkài iáu ū 28 ê kokka ê chênghóng "chiok hāi ê", Tiongkok tongjiân pâi tī lāité, sinbûn chūiû, kiⁿî choân sèkài 180 kok lāité Tiongkok sī tē 175 miâ, ùi bóeliu sǹg tò tńglâi tē 6 miâ. Má Engkiú ná ē bô kóng pòaⁿkù ōe?

　　 la̍kgoe̍h chhesì àm, Má Engkiú pānkongsek mē Bînchìntóng chènghú kóng, liân "chin chē gíná kiâⁿ khì ah" chit chióng ōe to putchún kóng ê chènghú, khòaⁿtio̍h bô kâng ìkiàn tio̍h niúkhiok boah âng ê chipchèngtóng, iáu ū siáⁿmi̍h bīn lâi kóng kakī sī chūiû bînchú leh? Má Engkiú pānkongsek chinchiàⁿ m̄chai iáⁿ, jīmhô bînchú chūiû ê kokka, lóng bô chō iâugiân ê chūiû!?

　　 Chokka, chèngtīha̍k chiá 汪浩tī bīnchheh téngbīn khausé kóng, Má Engkiú tī Tâioân "put chūiû ê bînchú" tiong oa̍h kah chiahni̍h thòngkhó͘, putjû îbîn Pakkiaⁿ, chò chi̍tê Tiongkok Chènghia̍p Hùchúse̍k, tī 习近平 ê léngtōhā, chiongsin tamjīm tóng kah kokka léngtōjîn, hióngsiū choânbîn bînchú, chū ánne kòe tio̍h khoàilo̍k chūiû ê sengoa̍h. 汪浩koh ēng "lī" kā iúkoái Má Engkiú kóng, Tiongkok Chènghia̍p Hùchúse̍k ê thāigū pí Tâioân chêng chóngthóng ê légū koh khah hó O͘ !

Má Engkiú chêng chóngthóng nā sī tiāmtiām bô kóngōe, bô lâng ē kóng i sī ékáu. I hômi̍hkhó͘ ánne péng o͘ chò pe̍h, kakī phóng sái boah bīn leh? 　　(220610)

Chù, 习近平 　　汪浩　　 chhiáⁿ liām Hôagí

Pe̍h-ōe-jī-pán/白话字版

《 Le̍k-sek toán-phêng 》 Lí Lâm-hêng

Má Eng-kiú án-ne hoán o͘ choh pe̍h!

　　 Kin-nî "Lio̍k-sù Thian-an-mn̂g sū-kiāⁿ " 33 chiu-nî, Tâi-oân chêng chóng-thóng Má Eng-kiú tī bīn-chheh téng-bīn hoat bûn ho͘-io̍k Tiong-kok tong-kio̍k tio̍h ióng-kám bīn-tùi le̍k-sú, sêng-tam chek-jīm, chiah ē-tàng hiòng-chêng māi-chìn. Má Eng-kiú chí-chhut, kū-nî cha̍p-goe̍h, Tiong-kok kok-ka chú-sek 习近平 tī Tiong-iong-jîn-tāi tōa kang-chok hōe-gī ê sî ū kóng-tio̍h bîn-chú, 习近平 kian-chhî kok-ka it-chhè koân-le̍k sio̍k tī jîn-bîn, chòe-tōa hān-tō͘ pó-chiòng jîn-bîn tng-ka choh-chú, í hoat tī kok. Kî-koài, Tiong-hôa Jîn-bîn Kiōng-hô-kok hiàn-hoat tē-jī tiâu kóng, Tiong-hôa Jîn-bîn Kiōng-hô-kok ê it-chhè koân-le̍k sio̍k-tī jîn-bîn. Tē saⁿ-cha̍p-gō͘ tiâu kóng Tiong-hôa Jîn-bîn Kiōng-hô-kok kong-bîn ū giân-lūn, chhut-pán, chi̍p-hōe, kiat-siā, iû-hêng, sī-ui ê chū-iû. Hiàn-hoat siá--ê to lóng chò bē kàu, sī án-chóaⁿ 习近平 kóng kāng-khoán ê ōe, Má Eng-kiú tio̍h jīn-ûi che sī tùi kiàn-li̍p hoat-tī siā-hōe ê chèng-khak hong-hiòng. Má Eng-kiú án-ne káⁿ bô kàu gōng?

Má Eng-kiú o-ló Tiong-kok ê bîn-chú kiâⁿ tī chèng-khak hong-hiòng, iáu bô kàu, tio̍h ài koh sūn-sòa mē Tâi-oân i chiah ē sóng. Tī "Lio̍k-sù" kám-giân tiong, Má Eng-kiú kóng, Tâi-oân sui-jiân giâ tio̍h bîn-chú tōa kî, tān-sī tī Bîn-chìn-tóng chèng-hú chip-chèng ē-bīn, khiok bān-bān-á tūi-lo̍h ji̍p-khì "put chū-iû ê bîn-chú" lāi-té.

　　 Gō͘-goe̍h chhe-saⁿ, Sè-kài Sin-bûn Chū-iû-ji̍t,"Bô-kok-kài Kì-chiá Cho͘-chit" hoat-pò͘ 2022 "sè-kài sin-bûn chū-iû chí-sò͘ ", Tâi-oân pâi-miâ ùi kū-nî tē 43 miâ seng kàu kin-nî tē 38 miâ, iâⁿ kòe tē 43 miâ ê Hân-kok kah tē 71 miâ ê Ji̍t-pún, Tâi-oân sī A-chiu tē-it miâ. Che kah Má Eng-kiú só͘ kóng-- ê, Tâi-oân bān-bān-á tūi-lo̍h ji̍p-khì "put chū-iû ê bîn-chú" lāi-té, tú-tú tian- tò-hoán. Má Eng-kiú só͘ kóng-- ê eng-kai sī chí i chhut-sì ê Hiang-káng, Hiang-káng ê sin-bûn chū-iû, ùi kū-nî tē 68 miâ tōa poa̍h kàu kin-nî tē 148 miâ, chi̍t nî lāi poa̍h peh-cha̍p miâ, sī pho̍k-- chi̍t-ē tūi-lo̍h ji̍p-khì "put chū-iû ê bîn-chú" lāi-té. Kin-nî choân sè-kài iáu ū 28 ê kok-ka ê chêng-hóng "chiok hāi ê", Tiong-kok tong-jiân pâi tī lāi-té, sin-bûn chū-iû, kin-nî choân sè-kài 180 kok lāi-té Tiong-kok sī tē 175 miâ, ùi bóe-liu sǹg tò tńg-lâi tē 6 miâ. Má Eng-kiú ná ē bô kóng pòaⁿ-kù ōe?

　　 la̍k-goe̍h chhe-sì àm, Má Eng-kiú pān-kong-sek mē Bîn-chìn-tóng chèng-hú kóng, liân "chin chē gín-á kiâⁿ-- khì ah" chit chióng ōe to put-chún kóng ê chèng-hú, khòaⁿ-tio̍h bô kâng ì-kiàn tio̍h niú-khiok boah âng ê chip-chèng-tóng, iáu ū siáⁿ-mi̍h bīn lâi kóng ka-kī sī chū-iû bîn-chú leh? Má Eng-kiú pān-kong-sek chin-chiàⁿ m̄-chai iáⁿ, jīm-hô bîn-chú chū-iû ê kok-ka, lóng bô chō iâu-giân ê chū-iû!?

　　 Chok-ka, chèng-tī-ha̍k chiá 汪浩tī bīn-chheh téng-bīn khau-sé kóng, Má Eng-kiú tī Tâi-oân "put chū-iû ê bîn-chú" tiong oa̍h kah chiah-ni̍h thòng-khó͘, put-jû î-bîn Pak-kiaⁿ, chò chi̍t-ê Tiong-kok Chèng-hia̍p Hù-chú-se̍k, tī 习近平 ê léng-tō-hā, chiong-sin tam-jīm tóng kah kok-ka léng-tō-jîn, hióng-siū choân-bîn bîn-chú, chū án-ne kòe tio̍h khoài-lo̍k chū-iû ê seng-oa̍h. 汪浩koh ēng "lī" kā iú-koái Má Eng-kiú kóng, Tiong-kok Chèng-hia̍p Hù-chú-se̍k ê thāi-gū pí Tâi-oân chêng chóng-thóng ê lé-gū koh khah hó O͘ !

Má Eng-kiú chêng chóng-thóng nā sī tiām-tiām bô kóng-ōe, bô lâng ē kóng i sī é-káu. I hô-mi̍h-khó͘ án-ne péng o͘ chò pe̍h, ka-kī phóng sái boah bīn leh? 　　(220610)

Chù, 习近平 　　汪浩　　 chhiáⁿ liām Hôa-gí



　　今年「六四天安门事件」33周年，台湾前总统马英九tī面册顶面发文呼吁中国当局tio̍h勇敢面对历史、承担责任，chiahē-tàng向前迈进。马英九指出，旧年十月，中国国家主席习近平tī中央人大工作会议ê时有讲tio̍h民主，习近平坚持国家一切权力属tī人民，最大限度保障人民当家作主、依法治国。奇怪，中华人民共和国宪法第二条讲，中华人民共和国ê一切权力属于人民。第三十五条讲中华人民共和国公民有言论、出版、集会、结社、游行、示威ê自由。宪法写ê tolóng做bē到，是án-chóaⁿ习近平讲仝款ê话，马英九tio̍h认为che是对建立法治社会ê正确方向。马英九án-ne敢无够戆？

马英九o-ló中国ê民主行tī正确方向，犹无够，tio̍h爱koh顺续骂台湾伊chiahē爽。Tī「六四」感言中，马英九讲，台湾虽然夯tio̍h民主大旗，但是tī民进党政府执政下面，却慢慢á堕落入去「不自由ê民主」内底。

　　五月初三，世界新闻自由日，「无国界记者组织」发布2022「世界新闻自由指数」，台湾排名ùi 旧年第43名升到今年第38名，赢过第43名ê韩国kah第71名ê日本，台湾是亚洲第一名。Che kah马英九所讲ê，台湾慢慢á堕落入去「不自由ê民主」内底，抵抵顚倒反。马英九所讲ê应该是指伊出世ê香港，香港ê新闻自由，ùi旧年第68名大跋到今年第148名，一年内跋八十名，是pho̍k一下堕落入去「不自由ê民主」内底。今年全世界犹有28个国家ê情况「足害ê」，中国当然排tī内底，新闻自由，今年全世界180国内底中国是第175名，ùi尾溜算倒转来第6名。马英九ná ē无讲半句话？

　　六月初四暗，马英九办公室骂民进党政府讲，连「真chēgín-á行去ah」chit种话都不准讲ê政府，看tio̍h无仝意见tio̍h扭曲抹红ê执政党，犹有啥物面来讲家己是自由民主咧？马英九办公室真正m̄知影，任何民主自由ê国家，lóng无造谣言ê自由！？

　　作家、政治学者汪浩tī面册顶面刨（khau）洗讲：马英九tī台湾「不自由ê民主」中活kah chiah-ni̍h痛苦，不如移民北京，做一个中国政协副主席，tī习近平ê领导下，终身担任党kah国家领导人，享受全民民主，自án-ne过tio̍h快乐自由ê生活。汪浩koh用「利」kā诱拐马英九讲：中国政协副主席ê待遇比台湾前总统ê礼遇koh khah好O͘！

马英九前总统nā是恬恬无讲话，无人ē讲伊是哑口。伊何mih苦án-ne péng乌做白，家己捧屎抹面咧？　　(220610)

注：习近平　　汪浩　　请念华语