《绿色短评》

 | | | 转寄

空气铳phah天，赵少康上gâu！

作者 李南衡, ChoânTâijī/全台字 by Chng Hūi-phêng 2024.02.11





Choânbîn Tâioânjī pán/全民台湾字版简称ChoânTâiJī



《 Le̍ksek toánphêng 》　　 Lí Lâmhêng

　　　 khongkhì chhèng phah thiⁿ, Tiō Siáukhong siōng gâu!

　　2024 nî chóngthóng hù chóngthóng tōasoán, ū kúiūi hāusoánjîn chin ài piáuián khongkhì chhèng phah thiⁿ. Ū thiaⁿtio̍h chhèng siaⁿ ígōa, náchhiūⁿ siáⁿ to bô. Kúiê lâng tiongkan, náchhiūⁿ bô lâng ētàng kah Tiō Siáukhong pí phēng.

2024 nî itgoe̍h chhechhit, Tiongkok Kokbîntóng hù chóngthóng hāusoánjîn Tiō Siáukhong chútōng thàukòe mûithé hiòng Tiongkok Koktâipān hoah siaⁿ,"chhiáⁿ Koktâipān choánkò káihòngkun iúkoan pō͘mn̂g, chhun chi̍t lépài Tâioân tio̍h beh soánkí, mài koh lâi Háikiap tiongsòaⁿ hūkīn, chhiáⁿ lín hō͘ Tâioân Háikiap póchhî hôpêng, hō͘ soánkí póchhî pênghô, ta̍k kang ánne lâi hō͘ Tâioân jînbîn aple̍k, goán soánkí chiahni̍h tiōngiàu, chhiáⁿ mài koh lâi lah." Khólêng Tâioân lī Tiongkok Tāilio̍k siuⁿ hn̄g, Tiō Siáukhong khang chhèng phah thiⁿ, Tiongkok lóng bô thiaⁿtio̍h, ahsī suijiân ū thiaⁿtio̍h, kinpún bô ài chhap i.

Itgoe̍h chhechhit chì chhepeh, Tiongkok phài chhut 9 chiah pái kunki ( kîtiong 1 chiah "Ūn 8" hoánchiâmki chìnji̍p Tâioân Sailâm khonge̍k); 4 tâichhù kunlām tī Tâihái chíūûi oa̍htāng; 3 lia̍p khongphiau khìkiû, chhiauoa̍t Háikiap tiongsòaⁿ. Chhepeh chì chhekáu, Tiongkok phài chhut 10 chiahchhù kunki ( kîtiong 2 chiah "Chhiam 16" chiànki chìnji̍p Tâioân Sailâm khonge̍k); 4 tâichhù kunkàm tī Ttâi hái chiuûi oa̍htāng; 4 lia̍p khongphiau khìkiû (kîtiong 2 lia̍p poe kòe Tâioân tó thiⁿténg). Chhekáu chì chhecha̍p, Tiongkok phài chhut 8 chiahchhù kunki ( kîtiong 1 chiah chhiauoa̍t Háikiap tiongsòaⁿ ）; 5 tâichhù kunlām , tī Tâihái chiuûi oa̍htāng; 1 lia̍p khongphiau khìkiû chhiauoa̍t Háikiap tiongsòaⁿ. Chhecha̍p chì cha̍pit, Tiongkok phài chhut 15 chiahchhù kunki (kîtiong 1 chiah "Ūn 8" hoánchiâmki, 1 chiah "Ūn 9" thongsìn tùikhòngki chìnji̍p Sailâm khonge̍k); 4 tâichhù kunlām tī Tâihái chiuûi oa̍htāng; 3 lia̍p khongphiau khìkiû (kîtiong 1 lia̍p poekòe Tāipak thiⁿténg). Cha̍pit chì cha̍pjī, Tiongkok phài chhut 10 chiahchhù kunki (kîtiong ū 2 chiah chhiauoa̍t Háikiap tiongsòaⁿ kah pakpō͘, Sailâm khonge̍k); 6 tâichhù kunlāmtī Tâihái chiuûi oa̍htāng; 5 lia̍p khongphiau khìkiû. Cha̍pjī chì cha̍psaⁿ, Tiongkok phài chhut 8 chiahchhù kunki (kîtiong 1 chiah chìnji̍p Sailâm khonge̍k); 6 tâichhù kunki tī Tâihái chiuûi oa̍htāng; 3 lia̍p khongphiau khìkiû. Cha̍psaⁿ chì cha̍psì, Tiongkok phài chhut 4 tâichhù kunlām tī Tâi hái chiuûi oa̍htāng; 1 lia̍p khongphiau khìkiû. Sǹgsǹg chi̍tē, chit lépài Tiongkok lóngchóng phài chhut 60 chiahchhù kunki, 33 tâichhù kunlām, 20 lia̍p khongphiau khìkiû.

Hō͘ lán siūⁿkhí 2023 nî cha̍pjīgoe̍h chhecha̍p, Tiongkok Kokbîntóng hù chóngthóng hāusoánjîn Tiō Siáukhong chiapsiū hóngbūn ê sî, kiôngtiāu tio̍h kiônghòa Nn̄ghōaⁿ hō͘sìn tùiōe. I kóng, Tiongkok Kokbîntóng hoántùi Tâito̍k ê li̍ptiûⁿ, mā iaukiû Tāilio̍k hō͘siong piáusī siānì, í Tâioân lâng siōngkài kiaⁿ ê chiàncheng lâi kóng, chiànki mài chhiauoa̍t kòe Háikiap tiongsòaⁿ kah lâi se̍h Tâioân, chiah bē kā Tâioân bú kah ta̍kê chin kiaⁿhiâⁿ. I chìn chi̍tpō͘ kóng, tôngsî, Tāilio̍k bīntùi Tâioân tēit sòaⁿ ê tangpō͘ chiàn khu, huitôaⁿ, penggoân tio̍h ētàng kiámchió, jîchhiáⁿ tio̍h ínchún Tâioân phài kunsū koanchhatoân siông chù koanchhat, í khakpó Tâioân anchoân kah Tāilio̍k kunsū bē tùi Tâioân kò͘sêng uihia̍p, suijiân Tùihōaⁿ sī m̄ sī tôngì lán m̄chai, tānsī Kokbîntóng ê kipún li̍ptiûⁿ bêngkhak, hibāng hō͘siong piáuta̍t siānì.

Hókachài, Tiō Siáukhong lo̍ksoán, nā bô, tán i chiū jīm hù chóngthóng liáuāu, chiah chaiiáⁿ i ê ōe kinpún sī khang chhèng phah thiⁿ. Beh chai to̍h siuⁿ bān lah! (240202)



Pe̍h-ōe-jī-pán/白话字版



《 Le̍k-sek toán-phêng 》　　 Lí Lâm-hêng

　　　 khong-khì chhèng phah thiⁿ, Tiō Siáu-khong siōng gâu!

　　2024 nî chóng-thóng hù chóng-thóng tōa-soán, ū kúi-ūi hāu-soán-jîn chin ài piáu-ián khong-khì chhèng phah thiⁿ. Ū thiaⁿ-tio̍h chhèng siaⁿ í-gōa, ná-chhiūⁿ siáⁿ to bô. Kúi-ê lâng tiong-kan, ná-chhiūⁿ bô lâng ē-tàng kah Tiō Siáu-khong pí phēng.

2024 nî it-goe̍h chhe-chhit, Tiong-kok Kok-bîn-tóng hù chóng-thóng hāu-soán-jîn Tiō Siáu-khong chú-tōng thàu-kòe mûi-thé hiòng Tiong-kok Kok-tâi-pān hoah siaⁿ,"chhiáⁿ Kok-tâi-pān choán-kò kái-hòng-kun iú-koan pō͘-mn̂g, chhun chi̍t lé-pài Tâi-oân tio̍h beh soán-kí, mài koh lâi Hái-kiap tiong-sòaⁿ hū-kīn, chhiáⁿ lín hō͘ Tâi-oân Hái-kiap pó-chhî hô-pêng, hō͘ soán-kí pó-chhî pêng-hô, ta̍k kang án-ne lâi hō͘ Tâi-oân jîn-bîn ap-le̍k, goán soán-kí chiah-ni̍h tiōng-iàu, chhiáⁿ mài koh lâi lah." Khó-lêng Tâi-oân lī Tiong-kok Tāi-lio̍k siuⁿ hn̄g, Tiō Siáu-khong khang chhèng phah thiⁿ, Tiong-kok lóng bô thiaⁿ-tio̍h, ah-sī sui-jiân ū thiaⁿ-tio̍h, kin-pún bô ài chhap i.

It-goe̍h chhe-chhit chì chhe-peh, Tiong-kok phài chhut 9 chiah pái kun-ki ( kî-tiong 1 chiah "Ūn 8" hoán-chiâm-ki chìn-ji̍p Tâi-oân Sai-lâm khong-e̍k); 4 tâi-chhù kun-lām tī Tâi-hái chíū-ûi oa̍h-tāng; 3 lia̍p khong-phiau khì-kiû, chhiau-oa̍t Hái-kiap tiong-sòaⁿ. Chhe-peh chì chhe-káu, Tiong-kok phài chhut 10 chiah-chhù kun-ki ( kî-tiong 2 chiah "Chhiam 16" chiàn-ki chìn-ji̍p Tâi-oân Sai-lâm khong-e̍k); 4 tâi-chhù kun-kàm tī Ttâi hái chiu-ûi oa̍h-tāng; 4 lia̍p khong-phiau khì-kiû (kî-tiong 2 lia̍p poe kòe Tâi-oân tó thiⁿ-téng). Chhe-káu chì chhe-cha̍p, Tiong-kok phài chhut 8 chiah-chhù kun-ki ( kî-tiong 1 chiah chhiau-oa̍t Hái-kiap tiong-sòaⁿ ）; 5 tâi-chhù kun-lām , tī Tâi-hái chiu-ûi oa̍h-tāng; 1 lia̍p khong-phiau khì-kiû chhiau-oa̍t Hái-kiap tiong-sòaⁿ. Chhe-cha̍p chì cha̍p-it, Tiong-kok phài chhut 15 chiah-chhù kun-ki (kî-tiong 1 chiah "Ūn 8" hoán-chiâm-ki, 1 chiah "Ūn 9" thong-sìn tùi-khòng-ki chìn-ji̍p Sai-lâm khong-e̍k); 4 tâi-chhù kun-lām tī Tâi-hái chiu-ûi oa̍h-tāng; 3 lia̍p khong-phiau khì-kiû (kî-tiong 1 lia̍p poe-kòe Tāi-pak thiⁿ-téng). Cha̍p-it chì cha̍p-jī, Tiong-kok phài chhut 10 chiah-chhù kun-ki (kî-tiong ū 2 chiah chhiau-oa̍t Hái-kiap tiong-sòaⁿ kah pak-pō͘, Sai-lâm khong-e̍k); 6 tâi-chhù kun-lāmtī Tâi-hái chiu-ûi oa̍h-tāng; 5 lia̍p khong-phiau khì-kiû. Cha̍p-jī chì cha̍p-saⁿ, Tiong-kok phài chhut 8 chiah-chhù kun-ki (kî-tiong 1 chiah chìn-ji̍p Sai-lâm khong-e̍k); 6 tâi-chhù kun-ki tī Tâi-hái chiu-ûi oa̍h-tāng; 3 lia̍p khong-phiau khì-kiû. Cha̍p-saⁿ chì cha̍p-sì, Tiong-kok phài chhut 4 tâi-chhù kun-lām tī Tâi hái chiu-ûi oa̍h-tāng; 1 lia̍p khong-phiau khì-kiû. Sǹg-sǹg chi̍t-ē, chit lé-pài Tiong-kok lóng-chóng phài chhut 60 chiah-chhù kun-ki, 33 tâi-chhù kun-lām, 20 lia̍p khong-phiau khì-kiû.

Hō͘ lán siūⁿ-khí 2023 nî cha̍p-jī-goe̍h chhe-cha̍p, Tiong-kok Kok-bîn-tóng hù chóng-thóng hāu-soán-jîn Tiō Siáu-khong chiap-siū hóng-būn ê sî, kiông-tiāu tio̍h kiông-hòa Nn̄g-hōaⁿ hō͘-sìn tùi-ōe. I kóng, Tiong-kok Kok-bîn-tóng hoán-tùi Tâi-to̍k ê li̍p-tiûⁿ, mā iau-kiû Tāi-lio̍k hō͘-siong piáu-sī siān-ì, í Tâi-oân lâng siōng-kài kiaⁿ ê chiàn-cheng lâi kóng, chiàn-ki mài chhiau-oa̍t kòe Hái-kiap tiong-sòaⁿ kah lâi se̍h Tâi-oân, chiah bē kā Tâi-oân bú kah ta̍k-ê chin kiaⁿ-hiâⁿ. I chìn chi̍t-pō͘ kóng, tông-sî, Tāi-lio̍k bīn-tùi Tâi-oân tē-it sòaⁿ ê tang-pō͘ chiàn khu, hui-tôaⁿ, peng-goân tio̍h ē-tàng kiám-chió, jî-chhiáⁿ tio̍h ín-chún Tâi-oân phài kun-sū koan-chhat-oân siông chù koan-chhat, í khak-pó Tâi-oân an-choân kah Tāi-lio̍k kun-sū bē tùi Tâi-oân kò͘-sêng ui-hia̍p, sui-jiân Tùi-hōaⁿ sī m̄ sī tông-ì lán m̄-chai, tān-sī Kok-bîn-tóng ê ki-pún li̍p-tiûⁿ bêng-khak, hi-bāng hō͘-siong piáu-ta̍t siān-ì.

Hó-ka-chài, Tiō Siáu-khong lo̍k-soán, nā bô, tán i chiū jīm hù chóng-thóng liáu-āu, chiah chai-iáⁿ i ê ōe kin-pún sī khang chhèng phah thiⁿ. Beh chai to̍h siuⁿ bān lah! (240202)



　　2024年总统副总统大选，有几位候选人真ài表演空气铳phah天。有听tio̍h铳声以外，ná-chhiūⁿ siáⁿto无。几个人中间，ná-chhiūⁿ无人ētàng kah赵少康比phēng。

2024年一月初七，中国国民党副总统候选人赵少康主动透过媒体向中国国台办hoah声：「请国台办转告解放军有关部门，chhun一礼拜台湾tio̍h beh选举，mài koh来海峡中线附近，请línhō͘台湾海峡保持和平，hō͘选举保持平和，ta̍k工án-ne来hō͘台湾人民压力，阮选举chiah-ni̍h重要，请mài koh来lah。」 可能台湾离中国大陆siuⁿ远，赵少康空铳phah天，中国lóng无听tio̍h、ah-是虽然有听tio̍h，根本无ài chhap伊。

一月初七至初八，中国派出9只次军机（其中1只「运8」反潜机进入台湾西南空域）；4台次军舰tī台海周边活动；3粒空飘气球，超越海峡中线。初八至初九，中国派出10只次军机（其中2只「歼16」战机进入台湾西南空域）；4台次军舰tī台海周边活动；4粒空飘气球（其中2粒飞过台湾岛天顶）。初九至初十，中国派出8只次军机（其中1只超越海峡中线）；5台次军舰，tī台海周边活动；1粒空飘气球超越海峡中线。初十至十一，中国派出15只次军机（其中1只「运8」反潜机、1只「运9」通信对抗机进入西南空域）；4台次军舰tī台海周边活动；3粒空飘气球（其中1粒飘越台北上空）。十一至十二，中国派出10只次军机（其中有2只超越海峡中线kah北部、西南空域）；6台次军舰tī台海周边活动；5粒空飘气球。十二至十三，中国派出8只次军机（其中1只进入西南空域）；6台次军舰tī台海周边活动；3粒空飘气球。十三至十四，中国派出4台次军舰tī台海周边活动；1粒空飘气球。算算一下，chit礼拜中国lóng总派出60只次军机，33台次军舰，20粒空飘气球。

Hō͘咱想起2023年十二月初十，中国国民党副总统候选人赵少康接受访问ê时，强调tio̍h强化两岸互信对话。伊讲，中国国民党反对台独ê立场，mā要求大陆互相表示善意，以台湾人上kài惊ê战争来讲，战机mài超越过海峡中线kah来se̍h台湾，chiahbē kā台湾舞kah ta̍k个真惊惶。伊进一步讲，同时，大陆面对台湾第一线ê东部战区，飞弹、兵源tio̍hētàng减少，而且tio̍h允准台湾派军事观察员常驻观察，以确保台湾安全kah大陆军事bē对台湾构成威胁，虽然对岸是m̄是同意咱m̄知，但是国民党ê基本立场明确，希望互相表达善意。

好佳哉，赵少康落选，nā无，等伊就任副总统了后，才知影伊ê话根本是空铳phah天。Beh知to̍h siuⁿ慢ah！ (240202)